Difrenti fasi fa yu kan du moro ini a diniwroko

DI A ten ben doro taki Yesus ben musu seni den disipel fu en fu go wroko leki preikiman fu a Kownukondre, dan a taigi den: „A kotiwroko bigi, ma furu wrokoman no de.” Furu wroko ben de fu du. Dati meki a ben taki moro fara: „Begi a Masra fu a kotiwroko meki a seni wrokoman fu go du a kotiwroko fu en” (Mat. 9:37, 38). Yesus ben fruteri den disipel fa den musu du a preikiwroko. A ben sori den taki a wroko disi na wan seryusu wroko di ben musu du wantewante. A ben taki: „Unu no o kaba preiki na ala den foto fu Israel, fosi a Manpikin fu libisma doro.”​—Mat. 10:23.

² Na ini a ten disi furu de fu du tu na ini a preikiwroko. A bun nyunsu fu a Kownukondre musu preiki fosi a kaba kon èn furu ten no de moro (Mark. 13:10). Fu di a gron di wi e wroko na a heri grontapu, meki wi de na ini a srefi situwâsi leki Yesus nanga den disipel fu en. Ma wi musu preiki gi moro sma. Te yu luku den milyardmilyard sma di e libi na grontapu, dan wi no de nanga furu sma. Ma wi sabi taki Yehovah o yepi wi. A bun nyunsu fu a Kownukondre o preiki na heri grontapu èn a kaba o kon na a ten di Yehovah wani. Wi o poti a Kownukondre fu Gado na a fosi presi ini wi libi fu kan du a wani fu en? San moro wi kan du na ini a diniwroko?

³ Yesus sori wi san Yehovah e fruwakti fu den anbegiman fu en. A taki: „Un musu lobi Yehovah un Gado nanga un heri ati, nanga un heri libi, nanga un heri frustan, èn nanga ala un krakti” (Mark. 12:30). Wi musu dini Gado nanga wi heri ati. Disi wani taki dati wi musu sori o furu wi lobi en èn taki wi e du ala san wi man na ini a diniwroko fu en (2 Tim. 2:15). Te wi o luku a situwâsi fu wi èn den sani di wi man du, dan ibriwan fu wi o si taki wi kan du moro gi Yehovah. Meki wi go luku wan tu fu den okasi di wi abi fu du moro na ini a diniwroko èn luku sortuwan fu den sani dati yu wani du.

DINI LEKI PREIKIMAN NA INI A GEMEENTE

⁴ Ala sma di e kon na ini a tru anbegi abi a grani fu de wan preikiman fu a bun nyunsu. Disi na a moro prenspari wroko di Yesus gi den disipel fu en fu du (Mat. 24:14; 28:19, 20). Furu tron a de so taki wan disipel fu Yesus Krestes no e draidrai fu fruteri trawan a bun nyunsu di a yere. Disi na san Andreas, Filipus, Kornelius, nanga trawan ben du (Yoh. 1:40, 41, 43-45; Tori 10:1, 2, 24; 16:14, 15, 25-34). Ma disi wani taki dati wan sma kan fruteri trawan a bun nyunsu, awinsi a no dopu ete? Iya. Te wan sma na ini a gemeente tron wan preikiman di no dopu ete, dan a kan go preiki oso-fu-oso nanga wi. Efu a man èn efu a situwâsi fu en e gi en pasi, dan a kan preiki na difrenti tra fasi tu.

⁵ Baka te wan preikiman dopu, a no de fu taki dati a o du ala san a man fu yepi trawan fu kon sabi a bun nyunsu. Mansma nanga umasma abi a grani fu du a preikiwroko. A de wan grani trutru fu meki den afersi fu Gado Kownukondre go na fesi. Iniwan sma di e du moro na ini a diniwroko o de koloku trutru.

DINI PE MORO YEPI DE FANOWDU

⁶ Kande yu de na ini wan gemeente di e wroko a kontren fu den ibri tron baka èn furu sma na ini a kontren yere a boskopu kaba. Efu dati de so, dan kande yu e si taki yu man du moro na ini a diniwroko èn yu man froisi go na wan kontren pe moro preikiman de fanowdu (Tori 16:9). Efu yu e dini now leki owruman noso leki dinari ini a diniwroko, dan kande wan tra gemeente o breiti efu yu go yepi den. A kring-opziener kan sori yu san yu kan du fu yepi na ini wan tra gemeente na ini a kring fu yu. Efu yu wani dini na ini wan tra kontren na ini yu eigi kondre, dan yu kan skrifi a bijkantoro fu kon sabi moro.

⁷ Yu wani dini na ini wan tra kondre? Efu dati de so, dan yu musu prakseri bun fosi yu du dati. Taki nanga den owruman fu yu gemeente. A no de fu taki dati a sani disi o abi krakti tapu yu èn tapu iniwan sma di o froisi makandra nanga yu (Luk. 14:28). Ma efu yu no abi na prakseri fu tan langa na a tra kondre, dan kande a moro bun fu suku wan fasi fu dini na wan tra presi na ini yu eigi kondre.

⁸ Na ini son kondre den brada di e teki fesi na ini den gemeente no dopu so langa ete. Te den brada disi abi sakafasi, dan den o de klariklari fu meki den lepi owruman di kon yepi, teki fesi na ini a gemeente. Efu yu na wan owruman di e prakseri fu go yepi na so wan kondre, dan yu no musu frigiti taki yu no e go drape fu teki a presi fu den brada di de drape kaba. Na presi fu dati yu o wroko makandra nanga den. Gi den deki-ati fu teki moro frantwortu na ini a gemeente (1 Tim. 3:1). Abi pasensi nanga den te sani no e du leki fa yu ben gwenti na ini a kondre pe yu komoto. Gebroiki na ondrofeni di yu abi leki owruman fu yepi den brada, so taki efu yu musu drai go baka na yu kondre, den brada fu a gemeente o man du den wroko bun.

⁹ Fosi a bijkantoro fu a kondre pe yu wani go kan seni den nen gi yu fu gemeente di abi yepi fanowdu, dan a Diniwroko Komte fu a gemeente fu yu musu skrifi wan brifi fu taigi den brada fu a bijkantoro taki den kan gebroiki yu. A brifi disi de fanowdu awinsi yu e dini leki owruman, dinari ini a diniwroko, pionier, noso preikiman. A Diniwroko Komte o seni a brifi disi go na a bijkantoro fu a kondre pe yu wani go dini, makandra nanga a brifi di yu skrifi fu aksi fu go dini na a kondre dati.

PREIKI NA INI WAN TRA TONGO

¹⁰ Efu yu wani du moro na ini a diniwroko, dan yu kan leri wan nyun tongo. Kande yu wani leri Dofusma-tongo. Efu yu wani leri preiki na ini wan tra tongo, dan fu san ede yu no e taki nanga den owruman èn nanga a kring-opziener? Den kan gi yu bun rai èn den kan gi yu a deki-ati di yu abi fanowdu. Ondro a tiri fu a bijkantoro, son kring na ini wan kondre ben orga sani fu leri lepi preikiman nanga pionier wan tra tongo, so taki den kan preiki na ini a tongo dati.

PIONIER

¹¹ Ala preikiman musu sabi san na den moro prenspari sani di wan sma musu du fu kan tron wan yepipionier, wan gewoon pionier, wan spesrutu pionier, noso fu du iniwan tra sortu furuten diniwroko. Wan pionier musu de wan dopu Kresten di de wan bun eksempre. A musu man preiki a bun nyunsu gi wan spesrutu nomru fu yuru. A Diniwroko Komte fu a gemeente e luku efu wan sma kan tron yepipionier noso gewoon pionier. Ma na a bijkantoro e poti wan sma leki spesrutu pionier.

¹² Sma kan dini leki yepipionier gi wán mun, gi wan tu mun baka makandra, noso solanga leki a situwâsi fu den e gi den pasi fu du dati. Furu Kownukondre preikiman lobi fu dini leki yepipionier na spesrutu okasi, soleki na a pisi ten fu a Memrefesa noso na ini a mun te a kring-opziener kon na a gemeente. Sonwan e du dati na ini den mun te den abi fakansi. Preikiman di dopu kaba èn di e go na skoro ete kan go na ini a yepi-pionierwroko na ini den mun di den no abi fu go na skoro. Na ini den mun maart nanga april èn na ini a mun te a kring-opziener de na ini yu gemeente sani seti taki preikiman di wani dini leki yepipionier kan bosroiti fu wroko a spesrutu yuru di sma mag wroko na ini den mun dati. A yuru disi moro mendri leki na ini den tra mun. A no abi trobi san na a situwâsi fu yu, ma efu yu e tyari yusrefi na wan fasi di fiti, efu yu man seti sani na so wan fasi taki yu kan doro wan spesrutu nomru fu yuru na ini a preikiwroko, èn efu yu denki taki yu kan dini leki yepipionier gi wán mun noso gi wan moro langa ten, dan den owruman na ini a gemeente o breiti fu luku a papira di yu gi den pe yu e aksi efu yu kan kisi a grani dati.

¹³ Fu man tron wan gewoon pionier, dan nownow kaba yu musu man doro den yuru di so wan pionier musu doro na ini wán yari. Leki gewoon pionier yu musu abi a gwenti fu wroko makandra nanga a gemeente pe yu de. Pionier di e wroko fayafaya na wan blesi gi a gemeente. Den e yepi trawan fu kon kisi moro faya gi a preikiwroko èn den e gi trawan deki-ati fu tron pionier tu. Ma fosi yu kan tron wan gewoon pionier, yu musu de wan bun eksempre leki preikiman èn yu musu dopu siksi mun kaba.

¹⁴ Nofo tron den sma di e tron spesrutu pionier ben de gewoon pionier di sori taki den abi bun bakapisi na ini a preikiwroko. Den musu man dini awinsi pe a bijkantoro wani seni den go. Furu tron a bijkantoro e seni den go na farawe kontren pe den kan feni sma di wani kon sabi moro èn pe den kan opo nyun gemeente. Son leisi, spesrutu pionier e kisi a frantwortu fu go dini na ini wan gemeente di abi yepi fanowdu fu wroko a kontren fu den. Son spesrutu pionier di de owruman tu ben kisi a frantwortu fu go yepi pikin gemeente, srefi te moro preikiman no de fanowdu na ini a kontren dati. Spesrutu pionier e kisi wan pikin moni di den kan gebroiki fu bai san den abi fanowdu. A bijkantoro e poti son sma leki spesrutu pionier fu wan pisi ten nomo.

ZENDELING

¹⁵ A Diniwroko Komte fu a Tiri Skin e poti wan sma fu dini leki zendeling. Baka dati a Bijkantoro Komte e seni so wan zendeling fu go wroko na ini wan kontren pe furu sma e tan. Den zendeling disi e yepi orga a preikiwroko moro bun, den e horibaka gi den gemeente èn den e tranga a bribi fu den brada nanga sisa drape. Nofo tron zendeling na sma di kisi leri na a Skoro gi Kownukondre preikiman. A bijkantoro e sorgu taki den abi wan presi fu tan èn taki den e kisi wan pikin moni fu bai san den abi fanowdu.

KRINGWROKO

¹⁶ Fosi den brada fu a Tiri Skin e poti wan sma leki kring-opziener, den e meki a teki presi wanwan leisi gi wan kring-opziener te a no de. Na so a brada disi e kisi na okasi fu leri a wroko èn fu kon abi ondrofeni. Brada di e kisi a frantwortu disi lobi a preikiwroko èn den lobi den Kresten brada nanga sisa. Den na fayafaya pionier, den lobi studeri Bijbel èn den na bun takiman nanga leriman. Den abi den fasi di a yeye e meki wan sma kisi, den sabi te a fiti fu du wan sani, den de nanga krin frustan èn den abi a koni fu si sani krin. Efu a brada trow, dan a wefi fu en di e pionier tu musu de wan bun eksempre èn a musu sabi fa fu libi nanga trawan. A musu de wan bun preikiman. A e frustan taki a musu saka ensrefi na en masra ondro soleki fa Bijbel e sori èn a no de wan sma di e taki gi en masra noso wan sma di no e gi trawan na okasi fu taki. Kring-opziener nanga den wefi abi furu fu du. Dati meki den sma di wani du a wroko disi musu abi wan bun gosontu. Pionier no e aksi fu go du a kringwroko. Na presi fu dati, den kan taigi a kring-opziener taki den wani du a kringwroko, dan en o taigi den san fu du.

DEN SKORO FU WI ORGANISÂSI

¹⁷ Skoro gi Kownukondre preikiman: Moro Kownukondre preikiman de fanowdu fu wroko den kontren di wi no man wroko so furu èn fu tranga a bribi fu den brada nanga sisa na ini den gemeente. Dati meki brada nanga sisa di no trow ete nanga trowpaar kan poti den nen fu go na a Skoro gi Kownukondre preikiman fu kisi spesrutu leri. Te den kaba nanga a skoro, dan den e go dini leki gewoon pionier na ini kontren pe preikiman de fanowdu na ini a kondre fu den. Ma den wan di man du moro kan kisi tra frantwortu na ini den eigi kondre noso na ini wan tra kondre. Wan tu fu den kan dini leki spesrutu pionier fu wan pisi ten nomo noso moro langa. Pionier di wani go na a skoro disi kan go na a konmakandra di e hori na a kongres fu kon sabi san den musu du.

¹⁸ Waktitoren Bijbelskoro Gilead: Brada nanga sisa di no trow nanga trowpaar di e kisi a kari fu go na a skoro disi, na sma di e dini leki spesrutu furuten dinari èn den musu man taki Ingrisitongo. Den brada nanga sisa disi kan yepi nanga a preikiwroko na son presi noso den kan yepi nanga a wroko na wan bijkantoro. Den sori kaba taki den lobi yepi den Kresten brada nanga sisa fu den èn den kan yepi den na wan switi fasi fu leri fa fu du san Bijbel e taki èn fu saka densrefi ondro a tiri fu Yehovah. A Bijkantoro Komte fu a kondre e taki suma kan go na a skoro disi. Te den brada noso sisa disi kaba nanga a skoro, dan den e kisi a frantwortu fu go preiki na wan spesrutu kontren noso den e go wroko na wan bijkantoro na ini wan tra kondre noso na ini den eigi kondre.

BETELWROKO

¹⁹ A de wan spesrutu grani fu kan dini na wan fu den Betel-oso. A nen Betel wani taki „Oso fu Gado” èn a nen dati fiti den presi disi di meki spesrutu fu kan du a wroko fu Gado. Den brada nanga sisa di e wroko na Betel e du wan prenspari wroko. Drape den e meki buku nanga tra sani, den e vertaal den èn den e seni den gi den gemeente. Den brada fu a Tiri Skin di e luku a wroko na heri grontapu breiti srefisrefi nanga a wroko di den sma disi e du. Furu sma di e wroko na Betel èn di e du vertaal-wroko e libi èn e wroko na ini a kontren pe sma e taki a tongo di den e vertaal na ini. Na so den kan yere ibri dei fa sma e taki a tongo. Dan den srefi kan si efu sma e frustan den buku di den e vertaal.

²⁰ Furu fu den sani di den e du na Betel na hebi wroko. Dati meki furu fu den wan di e kisi a kari fu go wroko drape na yongu brada di gi densrefi abra na Gado, di dopu kaba, di de gosontu, èn di man wroko tranga. Efu a bijkantoro di e luku a wroko na ini a kondre pe yu e tan abi yepi fanowdu èn efu yu wani wroko na Betel, dan yu kan aksi den owruman fu yu gemeente san yu musu du fu kan wroko drape.

BOW-WROKO

²¹ A bow fu Kownukondre zaal, kongreshal nanga tra presi na wan fasi fa wi e du santa diniwroko, neleki a wroko di sma ben du fu bow a tempel fu Salomo (1 Kow. 8:13-18). Furu brada nanga sisa de fayafaya fu horibaka gi a bow-wroko èn den e gebroiki a ten nanga den gudu fu den fu du a wroko disi.

²² Yu man yepi nanga a wroko disi tu? Efu yu na wan dopu preikiman èn yu wani du a wroko disi, dan den brada di e luku a bow-wroko na ini a kontren fu yu o breiti taki yu wani yepi den. Den de klariklari fu leri yu a wroko, srefi efu yu no sabi du bow-wroko. A ben o bun fu taigi den owruman fu yu gemeente taki yu wani yepi. Son dopu preikiman ben man gi den nen fu go na tra kondre srefi fu yepi du bow-wroko gi na organisâsi.

²³ Furu okasi de fu yepi nanga a bow-wroko di na organisâsi e du. Preikiman di dopu, di de wan bun eksempre èn di sabi du wan spesrutu wroko, kan wroko makandra nanga a Bow-kantoro na ini a kondre. Den kan yepi te bow-wroko e du na ini a kontren fu den. Trawan kan yepi nanga wroko di e du na farawe presi. A bijkantoro kan poti den brada nanga sisa disi fu dini leki bow-yepiman gi wan pisi ten fu tu wiki te go miti dri mun. Den wan di e kisi a grani fu wroko fu wan moro langa ten, wi e kari bow-dinari. Son bow-dinari e kisi a grani fu go wroko na ini wan tra kondre. Wan Bow-grupu di abi bow-dinari nanga bow-yepiman e teki fesi na ini a bow-wroko. Ma brada nanga sisa di e wroko makandra nanga a Bow-kantoro nanga sma fu den gemeente di o kon na ini a zaal e kon yepi tu. Den Bow-grupu e wroko na ini a kontren di a bijkantoro e luku. Te den kaba nanga a wan wroko den e go na a trawan.

SAN MORO YU WANI DU NA INI A DINIWROKO?

²⁴ Efu yu gi yu libi abra na Yehovah, dan yu wani dini Yehovah fu têgo. Ma san yu wani du ete gi Yehovah na ini a ten di e kon? Te yu sabi san yu wani du, dan dati o yepi yu fu gebroiki yu krakti nanga ala tra sani di yu abi na wan koni fasi (1 Kor. 9:26). Te yu sabi san yu wani du èn te yu e meki muiti fu du den sani dati, dan disi o yepi yu fu tron wan moro lepi Kresten èn fu tan poti prakseri na den moro prenspari sani, so taki yu kan kisi moro frantwortu te fu kaba.​—Fil. 1:10; 1 Tim. 4:15, 16.

²⁵ Na apostel Paulus gi wi wan moi eksempre na ini a fasi fa wi musu du wi diniwroko gi Gado (1 Kor. 11:1). Paulus ben wroko tranga fu du a diniwroko fu Yehovah. A ben kon si taki Yehovah gi en na okasi fu du bun furu sani. Paulus ben skrifi den brada na Korente: „Mi kisi wan moi okasi fu du furu wroko.” A no so a de gi wi tu? Wi abi furu okasi fu dini Yehovah makandra nanga a gemeente, spesrutu te wi e preiki a bun nyunsu fu a Kownukondre. Ma neleki Paulus, wi musu hori na prakseri taki te wi e kisi den „moi okasi” disi, dan ’furu sma o gens wi’ (1 Kor. 16:9). Ma Paulus ben de klariklari fu dwengi ensrefi fu du bun. Luku san a taki: „Mi e naki mi skin nanga kofu èn mi e basi en neleki a de wan srafu” (1 Kor. 9:24-27). Na so wi e prakseri tu?

²⁶ Ibri sma e kisi deki-ati fu luku san en srefi kan du moro gi Yehovah. Furu brada nanga sisa e du furuten diniwroko now, fu di den ben sabi yonguyongu kaba san den ben wani du gi Yehovah. Srefi di den ben pikin ete, den papa, den mama, nanga trawan gi den deki-ati fu du moro gi Yehovah. Dati meki den abi wan koloku libi na ini a diniwroko fu Yehovah èn a no e hati den taki den bosroiti fu du moro (Odo 10:22). Wan tu tra sani di wi kan du na fu go na ini a preikiwroko ibri wiki, fu abi wan Bijbelstudie, noso fu meki moro ten fu sreka gi den konmakandra. San prenspari, na taki wi e tan tanapu kánkan èn taki wi e du a wani fu Gado. Efu wi e du dati, dan wi o gi grani na Yehovah èn wi o man tan dini en fu têgo.​—Luk. 13:24; 1 Tim. 4:7b, 8.