Brada di kisi a frantwortu fu luku den skapu fu Gado

DI YESUS ben du en diniwroko na grontapu, dan a sori taki en na „a moro bun skapuman” (Yoh. 10:11). Di a si na ipi sma di ben e waka na en baka, dan „a ben e sari den, bika sma ben e pina den èn den ben e waka bruyabruya leki skapu di no abi skapuman” (Mat. 9:36). Petrus nanga den tra apostel ben si fa Yesus ben e broko en ede nanga sma. A ben de heri tra fasi leki den falsi skapuman fu Israel. Den skapuman disi no ben e luku na ipi bun. Dati meki den skapu ben panya go na ala sei èn den no ben kisi leri fu Yehovah (Esek. 34:7, 8). Yesus ben de wan bun eksempre na ini a fasi fa a ben gi leri èn fa a ben sorgu den skapu. A ben de klariklari fu gi en libi srefi gi den. Na so fasi den apostel ben leri fa fu yepi den wan di abi bribi fu drai kon baka na Yehovah, a ’skapuman di e luku taki sani waka bun nanga den’.​—1 Petr. 2:25.

² Wan leisi di Yesus ben e taki nanga Petrus, dan a sori taki a de prenspari fu gi den skapu fu en nyanyan èn fu luku den (Yoh. 21:15-17). A sani di Yesus ben taki ben naki Petrus ati trutru. Bakaten Petrus gi den owruman fu a fosi Kresten gemeente a rai disi: „Luku den skapu fu Gado di a gi unu fu sorgu. No du dati neleki na dwengi sma dwengi unu, ma du en nanga prisiri. No du en tu fu di unu lobi fu kisi wini na wan fasi di no fiti, ma du en fu di unu e angri fu dini trawan. No prei basi tu gi den wan di de wan gudu fu Gado, ma tron eksempre gi den skapu” (1 Petr. 5:1-3). A rai fu Petrus na gi den owruman fu den gemeente na ini a ten disi tu. Neleki Yesus, owruman de klariklari fu du den wroko nanga prisiri, den de wan eksempre gi na ipi èn den e teki fesi na ini a gemeente.​—Hebr. 13:7.

³ Wi kan de nanga tangi gi den brada di a santa yeye poti fu teki fesi na ini a gemeente. A wroko di den e du e tyari furu wini gi wi. Fu eksempre, den brada disi e gi sma deki-ati èn den e poti prakseri na ibriwan sma na ini a gemeente. Ibri wiki den e wroko tranga fu teki fesi na den gemeente konmakandra pe ala sma e kisi yepi fu meki a bribi fu den kon moro tranga (Rom. 12:8). A muiti di den e du fu kibri na ipi gi ogri soleki takru-ati sma, e meki taki wi e firi bun na ini a gemeente (Yes. 32:2; Tit. 1:9-11). A fasi fa den e teki fesi na ini a preikiwroko e gi wi deki-ati fu tan preiki a bun nyunsu fayafaya ibri mun (Hebr. 13:15-17). Yehovah ’gi a gemeente den mansma disi’ fu gi den brada nanga sisa deki-ati.​—Ef. 4:8, 11, 12.

FA DEN BRADA DI E TEKI FESI MUSU TYARI DENSREFI ÈN SORTU FASI DEN MUSU ABI?

⁴ Fu man sorgu bun gi a gemeente, dan den brada di kisi a frantwortu fu teki fesi musu tyari densrefi soleki fa Bijbel e sori. Soso te den abi den fasi di Bijbel e taki dati den musu abi, dan yu kan taki dati na a santa yeye poti den na wroko (Tori 20:28). A wroko fu wan brada di e teki fesi, na wan seryusu frantwortu. Dati meki difrenti prenspari sani de di wan sma musu du fu kan kisi a frantwortu dati. Ma disi no wani taki dati a frantwortu disi bigi so te, taki wan Kresten man di lobi Yehovah trutru èn di de klariklari fu du iniwan wroko na ini a gemeente no o man tyari en. Ala sma musu man si taki den owruman na sma di e fiti den rai fu Bijbel na ini den aladei libi.

⁵ Na ini a fosi brifi di na apostel Paulus ben skrifi gi Timoteyus èn na ini en brifi gi Titus, a ben sori fa brada di e teki fesi musu tyari densrefi èn sortu fasi den musu abi. Na ini 1 Timoteyus 3:1-7 wi e leisi: „Efu wan man e suku fu tron wan sma di e teki fesi na ini a gemeente, dan a e suku fu du wan tumusi bun wroko. Fu dati ede wan man di e teki fesi musu de wan sma di trawan no man feni fowtu na en tapu. A musu de a masra fu wán wefi nomo. A no musu du sani pasa marki. A musu de nanga krin frustan. En libi musu orga bun. A musu lobi fu teki trawan na ini oso. A musu sabi fa fu gi leri. A no musu de wan sopiman, noso wan sma di lobi du ogri nanga trawan, ma a musu fiti ensrefi makriki na trawan. A no musu de wan sma di lobi meki trobi noso wan sma di lobi moni. A musu de wan man di e tiri en osofamiri na wan bun fasi èn di abi pikin di e gi yesi èn di e tyari densrefi na wan bun fasi. (Bika efu wan sma no sabi fa fu tiri en eigi osofamiri, dan fa a o man sorgu a gemeente fu Gado?) A no musu de wan sma di de nyun na ini a bribi, noso a kan kisi bigimemre èn Gado kan strafu en soleki fa a strafu Didibri. Boiti dati, a musu abi wan bun nen na sma na dorosei fu a Kresten gemeente, so taki a no kisi porinen èn a fadon na ini a trapu fu Didibri.”

⁶ Paulus ben skrifi Titus: „Mi libi yu na Kreita fu poti sani reti di no ben bun èn fu poti owru man na ini ibri foto, soleki fa mi ben taigi yu fu du. Wan owru man musu de wan sma di trawan no man feni wan sani na en tapu. A musu de a masra fu wán wefi nomo. Den pikin fu en musu de na bribi èn den no musu abi a nen taki den e libi wan yayolibi noso taki den trangayesi. Wan man di e teki fesi na ini a gemeente na wan futuboi di abi a frantwortu fu na oso fu Gado. A musu de wan sma di trawan no man feni wan sani na en tapu. A no musu du nomo san en wani. A no musu kisi atibron esi. A no musu de wan sopiman. A no musu de wan sma di lobi du ogri nanga trawan. A no musu gridi fu feni wini na wan fasi di no fiti. Ma a musu lobi fu teki trawan na ini oso. A musu de wan sma di lobi san bun. A musu de nanga krin frustan. A musu de wan reti-ati sma. A musu tai hori na Gado. A musu man dwengi ensrefi. A fasi fa a e gi leri, musu sori taki a e hori finifini na a wortu di tru. Na so fasi a man gi sma deki-ati nanga a soifri leri èn a kan piri-ai gi den sma di e taki sani di no e kruderi nanga dati.”​—Titus 1:5-9.

⁷ Soleki fa Bijbel e sori, wan brada musu wroko na furu sani fosi a kan tron wan owruman. Toku Kresten man no musu frede fu teki a frantwortu disi. Te den man disi abi den fasi di wan Kresten owruman musu abi, dan dati e gi tra sma fu a gemeente deki-ati fu sori den srefi fasi dati tu. Paulus ben skrifi taki Yehovah ’gi a gemeente den mansma disi di abi spesrutu koni, fu poti den santawan na tapu a reti pasi baka, fu yepi trawan èn fu meki a skin fu Krestes kon tranga, teleki wi alamala kon de wán na ini a bribi èn teleki wi alamala sabi a Manpikin fu Gado bun. Na so wi kan kon de leki wan bigisma di lepi dorodoro leki Krestes’.​—Ef. 4:8, 12, 13.

⁸ Owruman a no sma di yongu tumusi noso sma di de nyun na ini a bribi. Na presi fu dati den de Kresten wan pisi ten kaba, den sabi Bijbel, den e frustan en bun èn den lobi a gemeente trutru. Den abi a deki-ati fu opo taki te sma e du sani di no bun èn den e piri-ai gi den. Na a fasi disi den e kibri na ipi gi iniwan sma di wani du ogri nanga den (Yes. 32:2). Ala sma na ini a gemeente man si krin taki den owruman na lepi brada di e broko den ede trutru nanga na ipi fu Gado.

⁹ Brada di wani tron owruman musu abi a koni fu man teki bun bosroiti na ini na aladei libi. Efu so wan brada trow, dan a musu hori ensrefi na san Bijbel e taki fu a trowlibi. A musu de a masra fu wán wefi nomo èn a musu de wan man di e tiri en osofamiri na wan bun fasi. Efu wan owruman abi pikin di de na bribi, dan den musu gi yesi èn den musu tyari densrefi na wan bun fasi. Den no musu abi a nen taki den e libi wan yayolibi noso taki den trangayesi. Na so wan fasi a o makriki gi trawan na ini a gemeente fu kon suku rai na en di abi fu du nanga na osofamiri-libi nanga a fasi fa wan Kresten musu libi. Wan owruman musu de wan sma di trawan no man feni fowtu na en tapu èn a musu abi wan bun nen, srefi na sma na dorosei fu a Kresten gemeente. A no musu de so taki sma man sori taki a no e tyari ensrefi bun, fu di dati o gi a gemeente porinen. A no musu de wan sma di kisi piri-ai no so langa pasa fu wan seryusu sondu di a du. Tra sma na ini a gemeente o wani teki a moi eksempre fu en èn den o breiti taki den sortu brada disi de na ini a gemeente fu yepi den.​—1 Kor. 11:1; 16:15, 16.

¹⁰ Den brada disi di e tyari densrefi soleki fa Bijbel e taki, man dini a Kresten gemeente na a srefi fasi leki den owru man fu Israel di Bijbel e kari man di „koni èn di abi ondrofeni” (Deut. 1:13). Owruman na ini a Kresten gemeente na sondusma, ma toku sma na ini a gemeente èn na ini a libimakandra sabi den leki reti-ati man di e lespeki Gado èn di e libi soleki fa Bijbel e sori. Fu di den libi krin meki den no e frede fu gi leri na ini a gemeente.​—Rom. 3:23.

¹¹ Brada di lepi nofo fu tron owruman no e du sani pasa marki èn den no e fruwakti tumusi furu fu tra sma. Den no de sma di e luku sani tumusi fini, ma a fasi fa den e libi e sori taki den man teki bun bosroiti èn taki den man dwengi densrefi. Te a abi fu du nanga sani soleki nyanyan, dringi, prisiriten nanga tra sani di den lobi du, dan den e teki bun bosroiti. Den no e gebroiki so furu sopi taki den e drungu noso taki sma e kari den sopiman. Te wan sma dringi furu sopi a no man denki bun èn a muilek gi en fu dwengi ensrefi. So wan sma no man gi leri na ini a gemeente na wan bun fasi.

¹² Wan brada di wani teki fesi na ini a gemeente musu orga en libi bun. Disi o de fu si na ini a fasi fa a e sorgu ensrefi, a fasi fa a e sorgu en oso èn na ini den sani di a e du. Te so wan brada musu du wan sani, dan a no e draidrai fu du dati. A e hori ensrefi na den leri fu Bijbel.

¹³ Wan owruman musu fiti ensrefi makriki na trawan. A musu man wroko makandra nanga den tra owruman na ini a gemeente. A no musu denki tumusi furu fu ensrefi èn a no musu fruwakti tumusi furu fu trawan. Wan owruman no e denki taki a fasi fa en e si sani bun moro di fu den tra owruman. A e hori na prakseri taki tra brada abi moi fasi di en no abi noso taki den man du son sani moro bun leki en. Wan owruman o man fiti ensrefi na trawan te a e du sani soleki fa Bijbel e taki èn te a e du muiti fu de neleki Yesus Krestes (Fil. 2:2-8). Wan owruman no de wan sma di lobi meki trobi noso di lobi du ogri nanga trawan, ma a e sori lespeki gi den èn a e si den moro hei leki ensrefi. A no e du nomo san en wani èn a no e feni taki ala ten trawan musu si sani leki en. A no e kisi atibron esi, ma a e suku fu libi bun nanga trawan.

¹⁴ Wan brada di lepi nofo fu tron wan owruman musu de nanga krin frustan tu. Dati wani taki dati a no e bruya te sani e pasa èn a no de esi fu krutu sani. A e frustan den leri fu Bijbel bun èn a sabi fa a musu fiti den na ini en libi. Wan sma di de nanga krin frustan de klariklari fu teki rai èn fu du san trawan e sori en. So wan sma no e hoigri.

¹⁵ Paulus memre Titus taki wan brada di e teki fesi na ini a gemeente musu de wan sma di lobi san bun. A musu de wan reti-ati sma èn a musu tai hori na Gado. Den sani disi o kon na krin na ini a fasi fa a e libi nanga tra sma èn na ini a fasi fa a e feti fu tan du san reti èn san bun. A o tan dini Yehovah fayafaya èn a o tan hori ensrefi na san Bijbel e taki. A o man hori wan tori gi ensrefi. A lobi fu teki trawan na ini oso èn a lobi fu gebroiki den sani di a abi fu yepi trawan.​—Tori 20:33-35.

¹⁶ Fu man du a wroko fu en na wan bun fasi, dan wan owruman musu sabi fa fu gi leri. Di Paulus ben skrifi Titus, a taki dati wan owruman „musu sori taki a e hori finifini na a wortu di tru. Na so fasi a man gi sma deki-ati nanga a soifri leri èn a kan piri-ai gi den sma di e taki sani di no e kruderi nanga dati” (Tit. 1:9). A man taki-go-taki-kon nanga trawan, a man buweisi fu san ede wan sani tru èn a man piki sma di e taki sani fu gens wi. A man gebroiki Bijbeltekst tu fu sori trawan taki san Bijbel e leri tru, so taki a bribi fu den kon moro tranga. Den sani disi o yepi wan owruman fu man gi leri na ini bun ten èn na ini muilek ten (2 Tim. 4:2). A abi a pasensi di de fanowdu fu piri-ai gi trawan na wan safri-ati fasi te den meki fowtu. Te sma e tweifri, a man yepi den fu kon abi bribi èn fu du bun wroko di e sori a bribi dati. Te wan owruman man gi leri na wan bigi grupu sma noso na wán sma nomo, dan dati e sori taki a man tyari a prenspari frantwortu disi.

¹⁷ A prenspari taki owruman e du a preikiwroko fayafaya. Sma musu man si taki den e waka baka Yesus na ini a tori disi tu. A ben prenspari srefisrefi gi Yesus fu preiki a bun nyunsu. A ben e poti prakseri na den bakaman fu en èn a yepi den fu tron bun preikiman (Mark. 1:38; Luk. 8:1). Te den sma na ini a gemeente e si taki den owruman e wroko fayafaya na ini a preikiwroko awinsi den abi furu fu du, dan dati o yepi den fu preiki fayafaya tu. Efu den owruman e wroko makandra nanga den osofamiri èn nanga den tra sma fu a gemeente, dan den o man „gi makandra deki-ati”.​—Rom. 1:11, 12.

¹⁸ Te yu luku ala den sani disi, dan a kan gersi leki wan brada musu du bun furu sani fosi a man tron wan owruman. A no de fu taki dati nowan owruman man du ala den sani di skrifi na ini Bijbel, finifini. Ma a no musu de so tu taki a de krin taki a e mankeri wan fu den fasi di Bijbel e taki dati a musu abi. Son owruman man du son sani heri bun, aladi trawan man du tra sani moro bun. Ma te fu kaba, ala den owruman disi makandra o abi den moi fasi di de fanowdu fu teki fesi na wan yoisti fasi na ini a gemeente fu Gado.

¹⁹ Te den owruman na ini a gemeente e luku efu wan brada bun nofo fu tron wan owruman, dan den musu hori na prakseri san Paulus ben taki: „Mi e taigi un alamala drape fu no denki moro fu unsrefi leki san de fanowdu. Ma ibriwan fu unu musu tyari ensrefi na wan fasi di e sori taki a de nanga krin frustan èn taki a abi a bribi di Gado gi en” (Rom. 12:3). Nowan owruman musu si ensrefi hei moro trawan. Te den e luku efu wan brada kan tron wan owruman, dan nowan owruman musu krutu en tumusi hebi (Preik. 7:16). Den owruman musu hori bun na prakseri fa Bijbel e taki dati wan brada musu de fu kan tron wan owruman. Na presi fu wroko nanga san den srefi e denki fu a brada, den o luku efu a de krin taki a brada abi den fasi di Bijbel e taki, sondro fu luku sani tumusi fini. Den musu hori na prakseri taki a brada na wan sondu libisma neleki den. Te den o luku efu wan brada bun nofo fu tron wan owruman na ini a gemeente den o du dati na wan fasi di e sori taki den e lespeki den wet fu Yehovah èn taki den e prakseri a bun fu a gemeente. Den o begi Yehovah fu a tiri den nanga en santa yeye èn den o luku bun efu a brada e tyari ensrefi soleki fa Bijbel e taki. Fu di disi na wan seryusu frantwortu meki den musu hori a rai fu Paulus na prakseri. A taki: „Noiti yu musu gaw fu poti yu anu na tapu wan man fu poti en na wroko.”​—1 Tim. 5:21, 22.

DEN FASI DI A YEYE E MEKI SMA KISI

²⁰ Lepi brada e sori taki a santa yeye e tiri den. Na ini den libi den e sori den fasi di a yeye e meki sma kisi. Paulus e taki dati den neigi fasi disi na: „Lobi, prisiri, freide, langa pasensi, switifasi, bun-ati, bribi, safri-ati, a dwengi di wan sma man dwengi ensrefi” (Gal. 5:22, 23). Den brada disi de wan deki-ati gi den brada nanga sisa èn den e yepi a gemeente fu du santa diniwroko leki wán man. A fasi fa den e libi èn den bakapisi fu a wroko di den e du e sori taki den poti na wroko nanga yepi fu santa yeye.​—Tori 20:28.

MAN DI E SORGU TAKI WÁNFASI DE

²¹ A de tumusi prenspari taki owruman e wroko makandra fu meki taki wánfasi de na ini a gemeente. Aladi den brada disi no abi den srefi fasi, toku den e arki makandra na wan lespeki fasi, srefi te den no e agri nanga makandra fu wan tori. Disi e meki taki den e tan abi wánfasi. Solanga den no e pasa nowan wet fu Bijbel, dan ibriwan fu den musu de klariklari fu saka ensrefi èn fu horibaka gi a bosroiti di teki. Te owruman e du dati, dan den e sori taki den abi „a koni fu hemel” di e meki taki den ’lobi freide èn taki den no e hori nomo na san den e prakseri’ (Yak. 3:17, 18). Nowan owruman musu prakseri taki a hei moro den trawan èn nowan fu den musu suku fu basi den trawan. Te owruman e wroko makandra fu yepi a gemeente, dan den e sori taki den e wroko makandra nanga Yehovah.​—1 Kor. kap. 12; Kol. 2:19.

SORI TAKI YU WANI YEPI TYARI FRANTWORTU

²² Lepi Kresten brada musu meki muiti fu tron sma di e teki fesi na ini a gemeente (1 Tim. 3:1). Ma te den kisi a grani dati, dan den o abi fu wroko tranga èn den musu de klariklari fu libi den eigi sani fu man yepi trawan. Den o abi fu meki ten fu yepi den brada nanga sisa fu kon abi wan bun matifasi nanga Yehovah èn fu yepi den nanga tra sani tu. Te wan sma wani kisi a grani fu teki fesi na ini a gemeente, dan a musu meki muiti fu tyari ensrefi soleki fa Bijbel e taki.

A SITUWÂSI FU WAN BRADA KAN KENKI

²³ A no de fu taki dati wan brada di e dini leki owruman wan heri pisi ten kaba kan kon siki noso wan tra sani kan pasa di e meki taki a no man du furu moro. Kande a kon owru èn a no man du ala den wroko di wan owruman musu du. Toku sma musu tan sori lespeki gi en èn den musu tan si en leki wan owruman, solanga a abi a frantwortu dati. A no de fanowdu taki a no dini leki owruman moro, soso fu di a no man du so furu moro. A e tan wan sma di warti fu kisi a lespeki di ala owruman e kisi di e wroko tranga èn di e du ala san den man fu luku den skapu.

²⁴ Ma efu wan brada firi taki a ben o moro bun gi en fu no dini leki owruman moro fu di a situwâsi fu en kenki èn a no man du so furu moro, dan a mag teki a bosroiti dati (1 Petr. 5:2). Toku sma musu tan sori lespeki gi en. So wan brada kan du furu bun sani na ini a gemeente, aladi a no o kisi den frantwortu di wan owruman e kisi.

DIFRENTI FRANTWORTU DI SMA KAN KISI NA INI A GEMEENTE

²⁵ Owruman e tyari difrenti frantwortu na ini a gemeente. Yu abi a fesiman fu den owruman, a sekretarsi, a dienst-opziener, a brada di e hori a Waktitoren-studie, nanga na opziener fu a Kresten libi nanga preikiwroko konmakandra. Furu owruman e dini leki grupu-opziener tu. Te den kisi den frantwortu disi, dan dati no e kenki ibri tron baka. Ma a no de fu taki dati efu wan brada froisi, efu a no man tyari en frantwortu moro fu di a gosontu fu en no de so bun, noso efu a no e tyari ensrefi moro soleki fa Bijbel e taki, dan wan tra owruman o kisi a frantwortu fu en. Na ini gemeente pe furu owruman no de, a kan de fanowdu taki wán owruman kisi moro leki wán frantwortu teleki tra brada de di kan dini leki owruman.

²⁶ A fesiman fu den owruman e teki fesi te den owruman fu wan gemeente e kon makandra. Aladi en na a fesiman, toku a abi sakafasi èn a e wroko makandra nanga den trawan fu sorgu den skapu fu Gado (Rom. 12:10; 1 Petr. 5:2, 3). A brada disi musu sabi orga sani bun èn a musu de fayafaya fu du en wroko.​—Rom. 12:8.

²⁷ A sekretarsi e sorgu gi ala den raportu, brifi nanga tra sani fu a gemeente èn a e gi den tra owruman iniwan prenspari brifi noso iniwan prenspari nyunsu di den kisi. Efu a de fanowdu, dan wan tra owruman noso wan lepi dinari ini a diniwroko kan kisi a frantwortu fu yepi en.

²⁸ A dienst-opziener e seti sani gi a preikiwroko èn a e seti tra sani tu di abi fu du nanga a diniwroko fu a gemeente. Wán leisi ibri mun, a musu go na wán fu den preikiwroko grupu. Na ini pikin gemeente pe furu preikiwroko grupu no de, a kan go tu leisi wan yari na den grupu dati. Te a de makandra nanga a grupu, dan en o hori den preikiwroko konmakandra. A o preiki makandra nanga a grupu èn a o go nanga den preikiman na den gobaka nanga den Bijbelstudie fu den.

DEN GRUPU-OPZIENER

²⁹ Wan fu den moi grani na ini a gemeente, na fu dini leki grupu-opziener. Den frantwortu fu a brada disi na: (1) Fu sorgu taki ibri sma na ini a preikiwroko grupu abi wan tranga bribi, (2) fu yepi ibri sma na ini a grupu fu du a preikiwroko ala ten baka, fu du en fayafaya èn nanga prisiri, èn (3) fu yepi den dinari ini a diniwroko fu a grupu fu kan tyari moro frantwortu na ini a gemeente. Den owruman fu a gemeente o bosroiti sortu brada fiti fu kisi a frantwortu disi.

³⁰ Te yu e luku a wroko fu wan grupu-opziener, dan a moro bun te so wan brada na wan owruman. Efu tra fasi no de, dan wan lepi dinari ini a diniwroko kan du a wroko disi teleki wan owruman de di kan du en. Wan dinari di kisi a frantwortu disi, wi e kari wan grupu-dinari fu di en a no wan owruman, ma a e wroko ondro a tiri fu den owruman.

³¹ Wan tra prenspari sani di wan grupu-opziener musu du, na fu teki fesi na ini a preikiwroko. Te a de na ini a preikiwroko doronomo, te a e wroko tranga èn te a de fayafaya, dan dati o de wan deki-ati gi den preikiman na ini a grupu fu en. Fu di den preikiman e warderi a deki-ati nanga a yepi di den e kisi te den de makandra, dan a ben o bun fu seti den preikiwroko konmakandra na wan ten di bun gi furu fu den preikiman (Luk. 10:1-16). A grupu-opziener musu sorgu taki ala ten nofo gebied de fu wroko. Nofo tron na en e hori a preikiwroko konmakandra èn a e prati a grupu, so taki den sabi pe den kan go preiki. Te a no man de drape, dan a musu sorgu taki wan tra owruman noso wan dinari ini a diniwroko kan sorgu gi den frantwortu disi. Efu dati no man, dan wan lepi preikiman kan du dati. Na so fasi den preikiman e kisi a tiri di den abi fanowdu.

³² A grupu-opziener musu bigin seti sani na fesi te a dienst-opziener o kon na a grupu fu en. A o taigi a grupu o ten a brada o kon èn a o sori den tu sortu wini a o abi gi den. Te ala sma na ini a grupu sabi san seti, dan dati kan meki taki den de fayafaya fu horibaka gi dati.

³³ Wan preikiwroko grupu no musu bigi. Disi o meki taki a grupu-opziener kan kon sabi ala den sma na ini en grupu bun. Leki wan lobi-ati skapuman a wani sabi fa a e go nanga ibriwan fu den. A e du ala san a man fu yepi den, fu gi den deki-ati fu du a preikiwroko èn fu horibaka gi den gemeente konmakandra. A e du iniwan tra sani di de fanowdu fu kan yepi ibri sma na ini a grupu fu abi wan tranga bribi. Te son sma siki noso te den lasi-ati, dan den o firi bun te a grupu-opziener go luku den. Te na owruman disi gi son preikiman rai noso deki-ati, dan a kan taki den o meki muiti fu kisi moro frantwortu na ini a gemeente. Na so fasi den kan yepi den brada nanga sisa moro bun. A no de fu taki dati a grupu-opziener o du furu muiti fu yepi den sma na ini en eigi grupu. Ma leki owruman èn skapuman, a e broko en ede nanga ala sma na ini a gemeente èn a de klariklari fu yepi iniwan fu den di abi yepi fanowdu.​—Tori 20:17, 28.

³⁴ Wan fu den frantwortu fu a grupu-opziener, na fu sorgu taki a kisi ala den preikiwroko raportu fu den wan na ini en grupu. Te a kisi den, dan a e gi a sekretarsi den raportu disi. Ibriwan fu den preikiman kan yepi a grupu-opziener te den no e draidrai fu gi den preikiwroko raportu. Den kan gi den raportu na a grupu-opziener, noso den kan poti en na ini a boksu di seti spesrutu gi dati na ini a Kownukondre zaal.

A DINIWROKO KOMTE FU A GEMEENTE

³⁵ Na ini a Diniwroko Komte fu a gemeente yu abi a fesiman fu den owruman, a sekretarsi, nanga a dienst-opziener. A komte disi abi difrenti frantwortu. Fu eksempre, a Diniwroko Komte musu gi primisi te wan sma wani gebroiki a Kownukondre zaal fu hori trow-lezing nanga beri-lezing èn na den abi a frantwortu fu taki sortu preikiman e go na sortu preikiwroko grupu. Te wan sma e poti en nen fu tron gewoon pionier, yepi-pionier, noso efu a wani go du wan tra sani, dan na den brada disi e bosroiti tu efu dati kan. A Diniwroko Komte e wroko ondro a tiri fu den tra owruman fu a gemeente.

³⁶ A bijkantoro e sori den brada disi fa den musu du den wroko, sosrefi a brada di e hori a Waktitoren-studie, na opziener fu a Kresten libi nanga preikiwroko konmakandra, nanga den tra owruman na ini a gemeente.

³⁷ Den owruman na ini ibri gemeente e kon makandra ten na ten fu taki fu a fasi fa a gemeente kan go na fesi. Boiti na owruman konmakandra di den e hori te a kring-opziener e fisiti den, dan dri mun baka a fisiti fu a kring-opziener den musu hori wan owruman konmakandra tu. A no de fu taki dati den owruman kan kon makandra tu na iniwan tra momenti te dati de fanowdu.

SAKA YUSREFI

³⁸ Aladi den owruman na sma di e meki fowtu, toku ala sma na ini a gemeente e kisi a deki-ati fu saka densrefi na den ondro, fu di na Yehovah seti sani so. Den owruman musu gi frantwortu na Yehovah. Den e teki presi gi Yehovah di e tiri a gemeente. Hebrewsma 13:17 e taki: „Gi yesi na den wan di e teki fesi na un mindri èn saka unsrefi na den ondro, bika na den e luku unu leki sma di o abi fu gi Gado frantwortu fu san den e du. Dan den o sorgu unu nanga prisiri èn no nanga geme, bika disi no ben o bun gi unu.” Neleki fa Yehovah e gebroiki en santa yeye fu poti brada leki owruman, na so a e gebroiki a srefi yeye dati fu puru owruman di no abi den fasi di a yeye e meki sma kisi èn di no e tyari densrefi soleki fa Bijbel e sori.

³⁹ A no de fu taki dati wi e warderi a tranga wroko nanga a bun eksempre fu den owruman na ini a gemeente. Na ini a brifi di Paulus skrifi gi a gemeente na ini Tesalonika, a ben gi den brada a deki-ati: „Mi brada, now wi e begi unu fu lespeki den sma di e wroko tranga na un mindri, di e teki fesi na un mindri te den e du a wroko fu Masra èn di e gi unu rai. Abi furu lespeki gi den èn lobi den gi a wroko di den e du” (1 Tes. 5:12, 13). A tranga wroko di den owruman na ini a gemeente e du e meki taki a moro makriki èn a moro switi gi wi fu wroko gi Yehovah. Na ini a fosi brifi di Paulus ben skrifi gi Timoteyus, a ben taki tu fu a fasi fa den sma fu a gemeente ben musu si den owruman. A taki: „Meki sma gi moro lespeki na den owru man di e teki fesi na wan bun fasi, spesrutu den wan di e wroko tranga fu taki fu a wortu fu Gado èn fu leri sma a wortu dati.”​—1 Tim. 5:17.

TRA FRANTWORTU DI BRADA KAN KISI NA INI NA ORGANISÂSI

⁴⁰ Ten na ten owruman e kisi a kari fu dini na ini wan Fisiti Grupu gi Sikisma. Trawan e dini na ini wan Ati-oso Kontakti Komte. Den brada disi e go na difrenti ati-oso nanga datra fu gi den deki-ati fu gi Yehovah Kotoigi dresi nanga datrayepi sondro fu gebroiki brudu. Tra owruman e meki Kownukondre afersi go na fesi fu di den e yepi bow èn sorgu Kownukondre zaal nanga kongreshal, noso den de na ini wan Kongreshal Komte. Ala sma na ini na organisâsi e warderi a tranga wroko fu den brada disi di de klariklari fu wroko na so wan fasi. Iya, wi e „tan lespeki den sortu brada dati”.​—Fil. 2:29.

KRING-OPZIENER

⁴¹ A Tiri Skin e seti sani, so taki lepi owruman kan dini leki kring-opziener. A bijkantoro e poti den brada disi na wroko fu go na den difrenti gemeente na ini a kring fu den. Furu tron den e du dati tu tron wan yari. Ten na ten den e go tu na den pionier di de na farawe kontren. Den e luku na sortu gemeente den o go fosi èn den e seni brifi gi den gemeente dati langa ten na fesi, so taki a fisiti fu den kan abi bun bakapisi.

⁴² A fesiman fu den owruman e orga sani, so taki ala sma kan kisi deki-ati te a kring-opziener kon (Rom. 1:11, 12). Baka te a kisi a brifi taki a kring-opziener o kon èn te a kon sabi san a brada nanga en wefi abi fanowdu (dati na efu a brada trow), dan a fesiman fu den owruman e gi tra brada a wroko fu sreka wan presi pe a kring-opziener kan tan nanga tra sani di de fanowdu. A e sorgu taki ala sma, sosrefi a kring-opziener, sabi fa ala sani seti.

⁴³ A kring-opziener o taki nanga a fesiman fu den owruman fu seti sani gi den difrenti konmakandra di o hori, sosrefi gi den preikiwroko konmakandra. A fesiman fu den owruman o wroko nanga den rai fu a kring-opziener èn nanga rai fu a bijkantoro fu seti den sani disi. Ala sma musu sabi na fesi o lati èn pe den gemeente konmakandra, a konmakandra nanga den pionier, a konmakandra nanga den owruman èn nanga den dinari ini a diniwroko o hori. Den musu sabi tu o lati èn pe den preikiwroko konmakandra o hori.

⁴⁴ Na tapu tudewroko bakadina a kring-opziener o luku den Gemeente preikiman karta, den karta di e sori omeni sma e kon na den konmakandra, den gebied karta èn den karta di e sori fa den e wroko a kontren pe den e preiki, nanga den raportu fu den monitori fu a gemeente. Disi o yepi en fu kon frustan san a gemeente abi fanowdu èn fa a kan yepi den wan di abi a frantwortu fu luku ala den raportu disi. A fesiman fu den owruman o seti sani, so taki a kring-opziener kan kisi den raportu disi na fesi.

⁴⁵ Te a kring-opziener de na ini a gemeente, dan a e meki ten fu taki nanga den brada nanga sisa so furu leki a man. A e du disi te a de na den konmakandra, te a de na ini a preikiwroko, te a e go nyan na den oso èn na tra okasi. Boiti dati, a e hori konmakandra nanga den owruman èn nanga den dinari ini a diniwroko pe a e gi den Bijbel rai di fiti. A e sori den fa fu du sani moro bun èn a e gi den deki-ati di o yepi den fu tyari den frantwortu di den abi fu luku den skapu fu Gado (Odo 27:23; Tori 20:26-32; 1 Tim. 4:11-16). A e kon makandra tu nanga den pionier fu gi den deki-ati fu tan du a wroko fu den èn fu yepi den nanga iniwan problema di den e miti na ini a preikiwroko.

⁴⁶ Efu den owruman abi yepi fanowdu nanga tra sani, dan a kring-opziener o du ala san a man fu yepi nanga den sani disi na ini a wiki te a de ini a gemeente. Efu a tori no lusu na ini a wiki dati, dan a o yepi den owruman noso iniwan tra sma di abi fu du nanga a tori fu kon si sortu Bijbel rai den kan gebroiki. Efu den abi yepi fanowdu fu a bijkantoro, dan a kring-opziener nanga den owruman o seni wan raportu gi a bijkantoro pe den e fruteri finifini fa a tori de.

⁴⁷ Te a kring-opziener de na ini wan gemeente, dan a e go na ala den gemeente konmakandra. Son leisi den konmakandra disi kan kenki, soleki fa a skrifi na ini brifi di a bijkantoro seni gi den. A kring-opziener o hori lezing fu gi a gemeente deki-ati, fu gi den rai èn fu tranga a bribi fu den. A o du muiti fu yepi a gemeente fu kisi moro lobi gi Yehovah, gi Yesus Krestes èn gi na organisâsi.

⁴⁸ A kring-opziener e kon na a gemeente fu gi den brada nanga sisa deki-ati fu du a preikiwroko fayafaya èn fu gi den rai. Furu sma na ini a gemeente kan seti sani, so taki den kan du moro na ini a preikiwroko a wiki dati. Kande sonwan fu den man wroko leki yepi-pionier a mun dati. Den sma di wani wroko nanga a kring-opziener noso nanga a wefi fu en kan poti den nen fu du dati. A de wan tumusi bun sani fu tyari a kring-opziener noso en wefi go na den Bijbelstudie nanga den gobaka fu wi. A de wan bigi sani taki yu e du muiti fu du disi na ini a wiki te a kring-opziener de na yu.​—Odo 27:17.

⁴⁹ Ala yari sani e seti, so taki tu kring konmakandra e hori gi ala kring. A kring-opziener musu sorgu taki den konmakandra disi orga bun. A e poti wan kring konmakandra-opziener nanga wan tra brada fu yepi en. Den brada disi musu wroko makandra nanga a kring-opziener fu sorgu taki a konmakandra orga bun. Disi o meki taki a kring-opziener kan poti prakseri spesrutu na sani di abi fu du nanga a programa. A kring-opziener e gi difrenti tra brada a frantwortu fu sorgu gi den difrenti afdeling fu a kring konmakandra. Te den brada di abi a frantwortu fu luku den monitori fu a kring konmakandra du dati, dan wan tra brada musu luku den monitori ete wan tron. Disi na wan sani di a kring-opziener e seti tu. Na wán fu den kring konmakandra wan brada di e teki presi gi a bijkantoro o de a fisiti takiman. Son leisi a de fanowdu fu prati wan kring na ini moro pikin grupu di abi den eigi kring konmakandra. Disi e pasa te a presi pe a konmakandra o hori pikin tumusi noso te a fara tumusi.

⁵⁰ Na a kaba fu ibri mun a kring-opziener e seni a preikiwroko raportu fu en go langalanga na a bijkantoro. Efu a gemeente pe a de no man pai den kostu di a meki fu kon na den, noso den no man pai gi nyanyan, gi wan tanpresi èn gi tra prenspari sani di a abi fanowdu fu du en wroko, dan a kan aksi a bijkantoro fu yepi en. Kring-opziener abi a frutrow taki den o kisi den sani di den abi fanowdu efu den e poti den afersi fu Yehovah Kownukondre na a fosi presi, soleki fa Yesus pramisi (Luk. 12:31). Den gemeente o de klariklari fu sori warderi gi a grani di den abi fu horibaka gi den owruman disi di e du so furu muiti fu dini den.​—3 Yoh. 5-8.

BIJKANTORO KOMTE

⁵¹ Na ibri bijkantoro fu Yehovah Kotoigi na heri grontapu, dri noso moro brada de na ini a Bijkantoro Komte. Den lepi brada disi e luku a preikiwroko na ini den eigi kondre noso na ini wan tu kondre di de ondro a tiri fu a bijkantoro. Wan fu den brada na ini a komte dati e dini leki fesiman fu a Bijkantoro Komte.

⁵² Den wan di e dini na ini a Bijkantoro Komte abi a frantwortu fu seti sani gi ala den gemeente na ini a kontren fu den. A komte e sorgu taki a bun nyunsu fu a Kownukondre e preiki na ini a heri kontren di de ondro a tiri fu den, èn taki nyun gemeente nanga nyun kring seti. Den e sorgu tu taki den brada di e teki fesi na ini den gemeente man du san de fanowdu fu yepi den sma na ini den kontren pe den e preiki. A Bijkantoro Komte e poti prakseri tu na a wroko fu den zendeling, den spesrutu pionier, den gewoon pionier nanga den yepi-pionier. Te a ten doro fu hori kring konmakandra nanga kongres, dan den brada disi e seti sani, so taki den konmakandra disi kan hori èn den e prati toewijzing, so taki „ala sani pasa na wan fasi di fiti èn soleki fa sani seti”.​—1 Kor. 14:40.

⁵³ Na ini son kondre yu abi wan Kondre Komte di de ondro a tiri fu a Bijkantoro Komte fu wan tra kondre. Disi e meki taki a wroko kan seti moro bun na ini a kondre pe a Kondre Komte e dini. Den brada fu a komte dati e sorgu gi den afersi fu a Betel-oso nanga den kantoro fu na organisâsi di de na ini a kondre. A komte disi e du ala sani di abi fu du nanga brifi èn nanga raportu, èn nofo tron na den e seti sani gi a preikiwroko. A Kondre Komte e wroko makandra nanga a Bijkantoro Komte fu meki a Kownukondre wroko go na fesi.

⁵⁴ Na a Tiri Skin e bosroiti suma o dini ini wan Bijkantoro Komte noso wan Kondre Komte.

BRADA DI E TEKI PRESI GI NA EDEKANTORO

⁵⁵ Ten na ten, a Tiri Skin e seti sani so taki lepi brada e go na ibriwan fu den bijkantoro di de na heri grontapu. Den brada disi e teki presi gi na edekantoro. A moro prenspari wroko fu den, na fu gi a Betelfamiri deki-ati èn fu yepi a Bijkantoro Komte nanga problema noso aksi di abi fu du nanga a preikiwroko. A brada disi e kon makandra son leisi nanga son kring-opziener nanga den zendeling na ini a preikiwroko. A e taki nanga den fu den problema èn fu den sani di den abi fanowdu. A e gi den deki-ati fu du a moro prenspari wroko fu den, dati na fu preiki fu a Kownukondre èn fu meki disipel.

⁵⁶ A brada di e teki presi gi na edekantoro wani sabi fa a e go nanga a Kownukondre preikiwroko èn nanga den gemeente na ini a kontren di a bijkantoro e luku. Efu a abi nofo ten, dan a kan go luku den vertaal-kantoro di no de na wan bijkantoro. Te a brada disi e go na den bijkantoro, dan efu a kan, a e go na ini a preikiwroko tu.

BRADA DI E DU DEN WROKO NANGA LOBI

⁵⁷ Wi e kisi furu wini fu a tranga wroko nanga a lobi-ati sorgu fu den lepi Kresten man di de na wi mindri. Te wi e tan saka wisrefi ondro den brada di kisi a frantwortu fu teki fesi èn fu luku den skapu fu Gado, dan wi e wroko makandra nanga Yesus Krestes, na Edeman fu a gemeente (1 Kor. 16:15-18; Ef. 1:22, 23). A bakapisi na taki a yeye fu Gado e tiri den gemeente na heri grontapu èn taki na ala sei a wroko e du soleki fa Gado Wortu e sori.​—Ps. 119:105.