Opziener di e rèis — Presenti na ini man
„Di a ben opo go na hei, dan a ben tjari katibosma gowe; a ben gi presenti na ini man.” — EFEISESMA 4:8.
1. Sortoe njoen wroko den ben meki bekènti na ini a tijdschrift disi na ini 1894?
MORO leki wan hondro jari pasa kaba, a Watch Tower ben meki wan njoen sani bekènti. A ben taki foe a sani disi leki „Wan tra kontren foe a wroko.” San a njoen wroko disi ben wani taki? A ben de a bigin foe a disiten wroko foe opziener di e rèis. A 1 september 1894 uitgave foe a tijdschrift disi ben tjari kon na krin taki foe bigin nanga a ten dati, bekwaam brada ben o fisiti groepoe Bijbel Ondrosoekoeman ’foe bow den na ini waarheid’.
2. Sortoe wroko kring-opziener nanga distrikt-opziener abi?
2 Na ini a fosi jarihondro G.T., den sortoe opziener dati leki Paulus nanga Barnabas ben fisiti kresten gemeente. Den getrow man disi ben abi na prakseri foe ’bow’ den gemeente (2 Korentesma 10:8). Na ini a ten disi, wi blesi nanga doesoendoesoen man di e doe disi na wan orga fasi. A Tiri Skin foe Jehovah Kotoigi poti den na wroko leki kring-opziener nanga distrikt-opziener. Wan kring-opziener e dini ibri leisi na ini so wan 20 gemeente wán wiki langa toe tron wan jari, èn a e ondrosoekoe a gemeente administratie, e hori lezing, èn e go nanga den Kownoekondre preikiman foe a gemeente na ini a velddienst. A distrikt-opziener na a fesiman foe ibri alajari kringkonmakandra gi wan toe kring, a e go na ini a velddienst nanga a gemeente di e ontfanga en na ini a wiki foe a kringkonmakandra, èn e gi sma deki-ati na ini lezing di a e gi èn di abi den gron tapoe bijbel.
A jeje di den abi foe òfer densrefi
3. Foe san ede opziener di e rèis, moesoe abi wan jeje foe òfer densrefi?
3 Opziener di e rèis, e teki waka doronomo. Foe ensrefi, disi wani taki dati den moesoe abi wan jeje foe òfer densrefi. Nofo tron a kan de wan moeilek sani te den moesoe rèis foe a wan gemeente go na a trawan, ma den man disi èn den wefi foe den e doe disi nanga prisiri. Wan kring-opziener ben taki: „A wefi foe mi de wan bigi jepi èn a no e kragi . . . A warti foe kisi prèise troetroe, foe di a abi wan jeje foe òfer ensrefi.” Son kring-opziener e rèis moro leki 1000 kilometer foe a wan gemeente go na a trawan. Foeroe foe den e rèi oto, ma trawan e go foe a wan presi na a trawan nanga bus, nanga baisigri, nanga asi, noso nanga foetoe. Wan kring-opziener foe Afrika moesoe waka srefi na ini wan liba, ala di a e tjari en wefi na tapoe en skowroe so taki a man doro wan gemeente. Te na apostel Paulus ben teki en zending waka, dan a ben moesoe kakafoetoe gi faja nanga kowroe, angri nanga dreiwatra, neti sondro sribi, difrenti kefar, nanga froefolgoe di a ben kisi foe sma di ben doe en ogri nanga tranga. A ben „broko en ede toe nanga ala den gemeente” — wan sani di foeroe opziener di e rèis, e ondrofeni na ini a ten disi. — 2 Korentesma 11:23-29.
4. Sortoe bakapisi, problema nanga a gosontoe kan abi na tapoe a libi foe opziener di e rèis èn den wefi foe den?
4 Neleki Timoteus, a kompe foe Paulus, den opziener di e rèis èn den wefi foe den abi problema nanga a gosontoe son tron (1 Timoteus 5:23). Disi de ete wan tra hebi na den tapoe. Wan wefi foe wan kring-opziener e tjari kon na krin: „Te mi no e firi boen, dan a hebi gi mi foe de ala ten nanga den brada. Foe di mi bigin nanga mi menopause, meki mi feni disi moeilek spesroetoe. Soso te mi abi foe seti den sani foe wi nomo na ini kofroe ibri wiki èn go na wan tra presi, dan a de wan troetroe tjalensi. Nofo tron, mi moesoe tapoe nanga den sani di mi e doe èn begi Jehovah foe gi mi a krakti foe tan go doro.”
5. Sortoe fasi foe denki den opziener di e rèis èn den wefi foe den abi, ala di den kisi difrenti tesi?
5 Ala di opziener di e rèis èn den wefi foe den, abi problema nanga a gosontoe èn tra tesi, tokoe den e prisiri foe a diniwroko foe den èn den e sori wan lobi foe òfer densrefi. Son wan foe den tjari den libi kon na ini kefar foe gi jepi na jejefasi te froefolgoe noso feti de. Te den e fisiti den gemeente, dan den sori wan srefi jeje leki di foe Paulus, di ben taigi den kresten na Tesalonika: „Wi ben kon de nanga switifasi na oen mindri, neleki te wan mama di e gi pikin bobi e boboi den eigi pikin foe en. So boen, foe di wi abi safoe firi foe lobi gi oenoe, meki nanga ala prisiri wi ben prati no wawan a boen njoensoe foe Gado nanga oenoe, ma so srefi wi eigi sili, bika oenoe ben kon de sma di wi lobi.” — 1 Tesalonika 2:7, 8.
6, 7. Sortoe boen krakti, opziener di e rèis èn di e wroko tranga, kan abi na tapoe sma?
6 Neleki tra owroeman na ini a kresten gemeente, na so den opziener di e rèis „e wroko tranga foe taki èn foe gi leri”. Ala den owroeman dati wi moesoe si leki sma di „warti foe kisi dobroe grani” (1 Timoteus 5:17). Na eksempre foe den kan sori foe de boen gi wi, baka te ’wi e loekoe fa a e go nanga a waka nanga libi foe den, dan wi e waka baka a bribi foe den’. — Hebrewsma 13:7.
7 Sortoe krakti son opziener di e rèis ben abi na tapoe trawan? „Brada P — — troetroe ben abi wan toemoesi boen krakti na tapoe mi libi!” wan Kotoigi foe Jehovah ben skrifi. „Foe sensi 1960 a ben de wan opziener di e rèis na Meksikow. Di mi ben de wan pikin, dan mi ben e wakti den fisiti foe en nanga ala froewakti èn nanga prisiri. Di mi ben abi tin jari, dan a ben taigi mi: ’Joe o tron wan kring-opziener.’ Na ini den moeilek tini jari foe mi, mi ben soekoe en nofo tron foe di ala ten a ben abi wan koni sani foe taigi mi. A moro prenspari sani di a ben wani doe, ben de foe wei na ipi! Now di mi na wan kring-opziener, mi e proeberi ala ten foe gi ten na den jongoewan èn foe gi den deki-ati foe poti theokrasia marki gi densrefi, neleki fa en ben doe gi mi. Srefi na ini den lasti jari foe en libi, ala di a ben abi problema nanga en ati, brada P — — ben soekoe okasi ala ten foe taki wortoe di e gi deki-ati. Soso wán dei fosi a dede na ini februari 1995, a ben go nanga mi na wan spesroetoe dei-konmakandra èn ben gi wan brada, di ben de wan architect, deki-ati foe poti boen marki gi ensrefi. Wantewante a brada ben gi wan formulier foe kan go wroko na Bethel.”
Wi e warderi den
8. Soema na den „presenti na ini man” di Efeisesma kapitel 4 e taki foe den, èn fa den de wan wini gi a gemeente?
8 Den e kari opziener di e rèis èn tra owroeman di ben kisi toewijzing foe dini, „presenti na ini man”. Jesus, leki a sma di e teki presi gi Jehovah èn di de na Edeman foe a gemeente, gi den man disi di abi jejefasi, so taki den ben sa kan bow ibriwan foe wi èn wi kan gro kon lepi (Efeisesma 4:8-15). Ibri presenti warti en foe wi sori taki wi e warderi dati. Disi de spesroetoe so nanga wan presenti di e gi wi deki-ati foe tan dini Jehovah. Foe dati ede dan, fa wi kan sori taki wi e warderi a wroko di opziener di e rèis, e doe? Na sortoe fasi wi kan sori taki wi e „tan lobi den sortoe man dati”? — Filipisma 2:29.
9. Na sortoe fasi wi kan sori taki wi e warderi opziener di e rèis?
9 Te den e meki bekènti taki a kring-opziener e kon, dan wi kan bigin meki plan foe abi wan bigi prati na den sani di a gemeente o doe a wiki dati. Kande wi kan poti moro ten na wan sei foe horibaka gi den sani di seti gi a velddienst na a ten foe a fisiti. Kande wi man dini leki jepipionier na ini a moen dati. Seiker wi wani gebroiki den rai di a kring-opziener e gi, so taki wi kan go na fesi na ini wi diniwroko. So wan fasi foe wani arki rai, sa tjari boen kon gi wi èn sa gi en djaranti taki a fisiti foe en na wan fisiti di e tjari wini kon. Ija, den opziener di e rèis, e fisiti a gemeente foe bow wi, ma den so srefi abi en fanowdoe foe sma bow den na jejefasi. Son ten Paulus srefi ben abi deki-ati fanowdoe, èn nofo tron a ben aksi kompe kresten foe begi gi en (Tori foe den Apostel 28:15; Romesma 15:30-32; 2 Korentesma 1:11; Kolosesma 4:2,3; 1 Tesalonikasma 5:25). Disiten opziener di e rèis, abi den begi nanga a deki-ati foe wi fanowdoe toe.
10. Fa wi kan jepi foe meki a wroko foe opziener di e rèis de wan prisiri?
10 Wi taigi a kring-opziener nanga en wefi kaba omeni wi e warderi den fisiti foe den? Wi e taigi en tangi foe di a e gi rai di de wan jepi? Wi e taigi en te den rai di a e gi foe a velddienst, e meki a prisiri foe wi kon moro bigi na ini a diniwroko? Efoe wi e doe dati, dan disi sa jepi foe meki a wroko foe en de wan prisiri (Hebrewsma 13:17). Wan kring-opziener na Spanjorokondre ben taki spesroetoe omeni en nanga en wefi e warderi den pikin brifi foe taki tangi di den kisi baka di den fisiti den gemeente. „Wi e kibri den karta disi èn e leisi den te wi lasi-ati”, a e taki. „Den de wan fonten foe troetroe deki-ati.”
11. Foe san ede wi moesoe meki den wefi foe kring-opziener nanga distrikt-opziener kon sabi taki wi lobi èn e warderi den?
11 A wefi foe na opziener di e rèis troetroe e njan boen foe den wortoe foe prèise. A tjari bigi ofrandi foe jepi en masra tapoe a kontren disi foe diniwroko. Den getrow sisa disi e poti a firi na wan sei di ala oemasma abi foe abi den eigi oso èn, nofo tron, a firi foe abi pikin toe. Na oemapikin foe Jefta ben de wan foetoeboi foe Jehovah di ben de klariklari foe libi na okasi di a ben abi foe abi wan masra nanga wan osofamiri, bika en papa ben meki wan serjoesoe pramisi (Kroetoebakra 11:30-39). Fa sma ben si na ofrandi foe en? Kroetoebakra 11:40 e taki: „Ibri jari den oemapikin foe Israèl ben abi a gwenti foe go prèise na oemapikin foe Jefta, a Gileadiet, fo dei foe a jari.” Fa a de wan moi sani te wi e meki moeiti foe taigi den wefi foe kring-opziener nanga distrikt-opziener taki wi lobi den èn e warderi den!
„No frigiti foe ontfanga den boen”
12, 13. (a) Sortoe bijbel fondamenti de, taki wi moesoe lobi foe ontfanga opziener di e rèis èn den wefi foe den, boen? (b) Gi wan eksempre foe sori fa a lobi disi di wi lobi foe ontfanga trawan boen, kan tjari wini kon gi ala sma.
12 A sori di wi e sori taki wi lobi foe ontfanga sma boen, na ete wan tra okasi fa wi kan sori lobi nanga warderi gi den wan di e doe a kresten wroko foe rèis (Hebrewsma 13:2). Na apostel Johanes ben prèise Gajus foe di Gajus ben lobi foe ontfanga den sma boen di ben fisiti a gemeente leki zendeling di ben rèis. Johanes ben skrifi: „Lobiwan, joe e doe wan getrow wroko na ini ala sani di joe e doe gi den brada, èn srefi gi freimdesma, di taki na fesi a gemeente foe a lobi foe joe. Grantangi, seni den go na wan fasi di fiti Gado. Bika a ben de foe a boen foe en nen taki den ben go na doro, sondro foe teki wan sani foe den sma foe den nâsi. Dati meki wi de froeplekti foe teki den sortoe sma dati na ini oso na wan switi fasi, so taki wi kan tron kompe wrokoman na ini waarheid” (3 Johanes 5-8). Na ini a ten disi, wi kan horibaka gi a Kownoekondre preikiwroko foe di wi e sori na a srefi fasi taki wi lobi foe ontfanga opziener di e rèis èn den wefi foe den, boen. A no de foe taki dati owroeman foe a gemeente moesoe sorgoe taki den tanpresi boen, ma wan distrikt-opziener ben taki: „Te wi abi foe doe nanga den brada, dan dati no kan abi en gron na tapoe soema kan doe wan sani gi wi. Wi no wani srefi taki sma e prakseri so foe wi. Wi moesoe wani foe teki a fasi fa iniwan foe den brada foe wi e sori a lobi foe ontfanga wi boen, awansi den goedoe noso pôti.”
13 A lobi di wi lobi foe ontfanga trawan boen kan tjari wini kon gi ala sma. „Na ini mi osofamiri, wi ben gwenti foe aksi opziener di e rèis, foe tan nanga wi”, Jorge e memre, di fosi ben de wan kring-opziener èn di e dini na Bethel now. „Mi denki taki den fisiti disi ben jepi mi moro leki san mi ben froestan na a ten dati. Leki wan tini mi ben abi problema na jejefasi. Mi mama ben broko en ede nanga disi, ma a no ben sabi fa foe jepi mi èn foe dati ede a ben aksi a kring-opziener foe taki nanga mi. Fosi mi ben wai pasi gi en, foe di mi ben frede taki a ben o kroetoe na mi tapoe. Ma a switi fasi foe en ben meki mi bigin taki fri nanga en te foe kaba. Wán moende, a ben kari mi foe kon njan nanga en èn mi ben opo mi ati gi en, bika mi ben de seiker taki a ben froestan mi. A ben arki boen. Den praktis rai foe en ben wroko troetroe, èn mi ben bigin go na fesi na jejefasi.”
14. Foe san ede wi moesoe abi warderi gi owroeman di e rèis, na presi taki wi e kroetoe den?
14 Wan opziener di e rèis, e proeberi foe gi jepi na jejefasi na jongoewan èn na owroewan toe. Dan seiker wi moesoe sori taki wi e warderi den moeiti di a e meki. Ma san efoe wi ben kroetoe en foe di a e meki fowtoe noso wi e teki en gersi trawan di fisiti a gemeente? Kande disi ben sa meki en lasi-ati srefisrefi. A no ben gi Paulus deki-ati foe jere sma e kroetoe na tapoe a wroko foe en. Soleki fa a sori, dan son kresten foe Korente ben taki lagi sani foe a fasi fa Paulus ben loekoe èn ben e taki. Ensrefi ben kari den sani di den sma disi di ben kroetoe, ben taki di a ben taki: „Den brifi foe en prenspari èn den abi krakti, ma a denoja foe en na ini skin swaki èn a fasi fa a e taki, na wan wisiwasi sani” (2 Korentesma 10:10). Ma kolokoe taki nofo tron, opziener di e rèis e jere wortoe foe lobi-ati warderi.
15, 16. Sortoe krakti a abi na tapoe opziener di e rèis èn den wefi foe den, te kompe bribiman e sori lobi èn de fajafaja?
15 Wan kring-opziener na Latino-Amerika e waka wan heri dei na tapoe tokotoko pasi foe fisiti den brada nanga sisa foe en na jejefasi di e libi na ini wan kontren di de ini na anoe foe guerilla fetiman. „A e naki mi ati foe si fa den brada e sori taki den e warderi a fisiti”, na so a e skrifi. „Ala di mi moesoe meki foeroe moeiti foe doro drape, èn e miti foeroe kefar nanga problema, tokoe mi e kisi pai foe ala den sani disi foe di den brada e sori lobi èn den de fajafaja.”
16 Wan kring-opziener na Afrika e skrifi: „Foe di den brada ben sori wi lobi, meki wi ben lobi a kontren foe Tanzania someni! Brada ben de klariklari foe leri foe wi, èn den ben prisiri foe abi wi na ini den oso.” Wan lobi-ati èn kolokoe matifasi ben de na mindri na apostel Paulus nanga a fosi jarihondro kresten trowpaar, Akwila nanga Priska. Te joe loekoe en boen, dan Paulus ben taki foe den: „Gi Priska nanga Akwila odi gi mi, mi kompe wrokoman na ini Krestes Jesus, di ben tjari den eigi libi kon ini kefar foe mi sili ede, di a no soso mi, ma ala den gemeente foe den nâsi toe wani taki tangi” (Romesma 16:3, 4). Opziener di e rèis èn den wefi foe den de grantangi foe abi disiten sma leki Akwila nanga Priska leki den mati, di e meki spesroetoe moeiti foe sori taki den lobi foe ontfanga trawan boen èn di de leki kompe gi den.
Den e tranga den gemeente
17. Foe san ede wi kan taki dati koni de na baka a seti di sani seti foe meki opziener rèis, èn foe pe den e kisi leri?
17 Jesus ben taki: „Den wroko e regtfardiki koni” (Mateus 11:19). Joe kan si krin sortoe koni de na baka a seti foe meki opziener rèis, foe di disi e jepi foe tranga den gemeente foe Gado pipel. Na ini a ten foe a di foe toe zending waka foe Paulus, en nanga Silas ben abi boen bakapisi di den ben „wroko na ini heri Siria nanga Silisia foe tranga den gemeente”. A boekoe Tori foe den Apostel e froeteri wi: „Di den ben rèis go na den foto, den ben gi den sma di ben de drape, den bosroiti di den apostel nanga den owroeman di ben de na Jerusalem ben teki, so taki den kan handri akroederi dati. Foe dati ede den gemeente ben tan kon tranga na ini bribi èn ibri dei den ben kon moro foeroe” (Tori foe den Apostel 15:40,41; 16:4, 5). Disiten opziener di e rèis e kisi leri na jejefasi di e kon foe den Boekoe foe bijbel nanga den poeblikâsi foe „a getrow èn koni srafoe”, neleki fa ala tra kresten e kisi dati toe. — Mateus 24:45.
18. Fa opziener di e rèis, e tranga den gemeente?
18 Ija, opziener di e rèis moesoe tan njan na a jeje tafra foe Jehovah. Den moesoe sabi heri boen san na den fasi nanga tirilin di Gado organisâsi e gebroiki. Dan den man dati kan de wan troetroe blesi gi trawan. Nanga a moi eksempre di den e gi taki den de fajafaja na ini a velddienst, den kan jepi kompe bribiman foe go na fesi na ini a kresten diniwroko. Den lezing di den owroeman disi di e tjari fisiti kon, abi den gron tapoe bijbel, èn den e bow den arkiman na jejefasi. Foe di opziener di e rèis e jepi trawan foe gebroiki a rai foe Gado Wortoe, foe dini ini wánfasi nanga Jehovah en pipel na heri grontapoe, èn foe gebroiki den sani di Gado seti na jejefasi foe di a gebroiki a ’getrow srafoe’, meki opziener di e rèis e tranga den gemeente di den abi a grani foe go fisiti.
19. Sortoe aksi de ete foe poti prakseri na dati tapoe?
19 Di na organisâsi foe Jehovah ben seti a wroko foe owroeman di e rèis na mindri den Bijbel Ondrosoekoeman so wan wán hondro jari pasa kaba, dan a tijdschrift disi ben froeklari: „Wi sa wakti foe si den bakapisi èn a tiri di Masra sa gi wi moro fara.” A tiri di Jehovah gi, de krin foe si. Foe den blesi ede di a gi èn na ondro a tiri foe a Tiri Skin meki a wroko disi gro èn ben kon doe moro boen na ini den jari di pasa. A bakapisi de, taki den gemeente foe Jehovah Kotoigi na heri grontapoe e kon tranga na ini bribi èn a nomroe foe den e gro dei foe dei. A de krin taki Jehovah e blesi a jeje di den presenti na ini man disi abi, foe di den abi a jeje foe òfer densrefi. Ma fa opziener di e rèis kan abi boen bakapisi te den e doe a wroko foe den? San na den marki di den abi na prakseri? Fa den kan de wan moro boen winimarki?
Fa joe ben sa piki?
◻ San na wan toe wroko di kring-opziener nanga distrikt-opziener e doe?
◻ Foe san ede opziener di e rèis moesoe abi wan jeje foe òfer densrefi?
◻ Fa wi kan sori warderi gi a wroko foe owroeman di e rèis èn den wefi foe den?
◻ San opziener di e rèis kan doe foe meki den gemeente kon tranga ini bribi?
[Prenki na tapoe bladzijde 21]
Te wan sma e rèis doronomo, dan dati wani taki dati a moesoe abi wan jeje foe òfer ensrefi
[Prenki na tapoe bladzijde 24]
Joe sori taki joe lobi foe ontfanga opziener di e rèis èn den wefi foe den, boen?