Fa opziener di e rèis e dini leki getrow granfoetoeboi
„Akroederi a presenti di ibriwan sma kisi, gebroiki en foe dini makandra leki boen granfoetoeboi foe a no-froedini boen-ati fasi foe Gado di sori na difrenti sortoe fasi.” — 1 PETRUS 4:10.
1, 2. (a) San joe ben sa taki dati a wortoe „granfoetoeboi” wani taki? (b) Soema na so srefi den granfoetoeboi di Gado e gebroiki?
JEHOVAH e gebroiki ala getrow kresten leki granfoetoeboi. Nofo tron wan granfoetoeboi na wan foetoeboi di abi a frantiwortoe gi wan osofamiri. Kande a e tiri den bisnis afersi foe en meester toe (Lukas 16:1-3; Galasiasma 4:1, 2). Jesus ben kari en skin foe loyaal salfoewan na grontapoe „a getrow granfoetoeboi”. A ben gi a granfoetoeboi disi „ala den goedoe foe en”, so srefi a Kownoekondre preikiwroko. — Lukas 12:42-44; Mateus 24:14, 45.
2 Na apostel Petrus ben taki dati ala kresten na granfoetoeboi foe a no-froedini boen-atifasi foe Gado di de foe si na difrenti fasi. Ibri kresten abi wan presi pe a kan doe wan wroko leki getrow granfoetoeboi (1 Petrus 4:10). Kresten di poti na wroko leki owroeman na granfoetoeboi, èn na mindri den joe abi opziener di e rèis (Titus 1:7). Fa wi moesoe si den owroeman disi di e rèis? Sortoe eigifasi nanga marki den moesoe abi? Èn fa den kan doe a moro boen sani?
De nanga tangi gi a wroko di den e doe
3. Foe san ede wi kan kari opziener di e rèis, „toemoesi boen granfoetoeboi”?
3 Wan kresten trowpaar di ben skrifi wan opziener di e rèis èn a wefi foe en, ben taki: „Wi ben sa wani taki, dati wi de nanga tangi foe ala a ten nanga lobi di joe gi wi. Leki wan osofamiri, wi ben abi boen foeroe wini foe ala deki-ati nanga rai di joe ben gi. Wi sabi taki wi moesoe tan gro na jejefasi, ma nanga a jepi foe Jehovah èn nanga brada nanga sisa leki oenoe, den problema di de te wan sma e gro kon lepi, e kon moro makriki.” Foeroe tron sma e taki den sortoe wortoe disi, bika opziener di e rèis e teki notisi foe kompe bribiman, neleki fa wan boen granfoetoeboi e sorgoe boen gi san wan osofamiri abi fanowdoe. Son wan foe den na toemoesi boen takiman. Foeroe foe den, de heri boen na ini a preikiwroko, ala di sma sabi foe trawan taki den abi waran firi nanga sari-ati. Te opziener di e rèis e kweki èn e gebroiki den sortoe presenti dati foe dini tra sma, dan sma kan kari den nanga reti, „toemoesi boen granfoetoeboi”.
4. Sortoe aksi wi sa go loekoe now?
4 „San den e froewakti foe den granfoetoeboi na taki den moesoe de getrow”, na apostel Paulus ben skrifi (1 Korentesma 4:2). Foe dini kompe kresten na ini wan tra gemeente ibri wiki, na wan aparti grani di e gi prisiri. Ma tokoe a de wan hebi frantiwortoe toe. Dan fa opziener di e rèis kan doe a wroko foe den leki granfoetoeboi na wan getrow fasi èn nanga boen bakapisi?
Den e doe a wroko foe den leki granfoetoeboi nanga boen bakapisi
5, 6. Foe san ede a de so prenspari na ini a libi foe wan opziener di e rèis taki a e froetrow tapoe Jehovah na ondro begi?
5 Te opziener di e rèis wani foe de granfoetoeboi di abi boen bakapisi, dan a de prenspari taki den e froetrow tapoe Jehovah nanga jepi foe begi. A schema foe den èn den foeroe frantiwortoe di den abi son tron, ben kan gi den a firi taki sani hebi gi den. (Teki gersi 2 Korentesma 5:4.) Dati meki den moesoe handri soleki fa a psalm singiman David ben singi: „Trowe joe hebi na tapoe Jehovah srefi, èn ensrefi sa horibaka gi joe. Noiti a sa meki taki a regtfardikiwan e degedege” (Psalm 55:22). San e gi trowstoe toe na den wortoe foe David: „Blesi foe Jehovah, di e tjari wi aladei lai gi wi.” — Psalm 68:19.
6 Pe Paulus ben feni a krakti foe sorgoe gi den frantiwortoe foe en na jejefasi? „Gi ala sani mi abi a tranga foe en di e gi mi krakti”, a ben skrifi (Filipisma 4:13). Ija, Jehovah Gado ben de a Fonten foe Paulus en krakti. Na a srefi fasi, Petrus ben gi a rai: „Efoe wan sma e dini, dan meki a dini leki wan sma di e bow na tapoe a krakti di Gado e gi; so taki na ini ala sani Gado kan kisi glori nanga jepi foe Jesus Krestes” (1 Petrus 4:11). Wan brada di ben de wan opziener di e rèis foeroe jari langa, ben poti krakti na tapoe taki a de fanowdoe foe froetrow tapoe Gado, foe di a ben taki: „Froetrow tapoe Jehovah ala ten, te joe moesoe loesoe problema, èn soekoe a jepi foe en organisâsi.”
7. Fa balansifasi e plèi wan ròl na ini a wroko foe wan opziener di e rèis?
7 Wan opziener di e rèis èn di abi boen bakapisi, moesoe abi balansi. Neleki tra kresten, a e meki moeiti foe „kan kon sabi san na den moro prenspari sani” (Filipisma 1:10).a Te den owroeman foe a gemeente abi sani di den wani aksi foe wan seiker tori, dan a de wan koni sani te den e poti mofo makandra nanga a kring-opziener di e fisiti a gemeente (Odo 11:14; 15:22). Kande, a balansi fasi fa a e si sani èn a rai di a e gi di abi en gron tapoe bijbel, sa sori foe de wan boen jepi te den owroeman e go doro foe seti a tori, baka te a gowe libi a gemeente. Na wan srefi sortoe fasi Paulus ben taigi Timoteus toe: „Den sani di joe ben jere foe mi nanga a jepi foe foeroe kotoigi, gi den na getrow man, di foe den sei sa de bekwaam nofo foe leri tra sma.” — 2 Timoteus 2:2.
8. Foe san ede a de prenspari foe studeri bijbel, foe ondrosoekoe sani, èn foe prakseri dipi foe sani?
8 Foe studeri bijbel, foe go ondrosoekoe sani èn prakseri dipi foe den, na sani di de fanowdoe foe gi gosontoe rai (Odo 15:28). Wan distrikt-opziener ben taki: „Te wi e kon makandra nanga den owroeman, dan wi no moesoe frede foe erken taki wi no sabi a piki na tapoe wan spesroetoe aksi.” Te wan sma e meki moeiti foe kisi „a jeje foe Krestes” na ini wan tori, dan kan jepi en foe gi rai di abi en fondamenti na tapoe bijbel, san sa jepi trawan foe doe a wani foe Gado (1 Korentesma 2:16). Son tron, wan opziener di e rèis moesoe skrifi go na a Waktitoren Genootschap foe kan kisi tiri. Awansi fa a no fa, bribi na ini Jehovah èn lobi gi waarheid de moro prenspari leki a fasi fa sma e denki foe wi noso a man di wi man taki boen foe overtoigi sma. Na presi taki Paulus ben kon nanga „wan lo takitaki noso koni”, a ben bigin nanga en diniwroko na Korente „na ini swakifasi èn na ini frede nanga foeroe beifi”. Disi ben meki taki a no ben abi boen bakapisi? Kwetikweti, disi ben jepi den Korentesma foe no bribi, ’na ini a koni foe libisma, ma na ini a krakti foe Gado’. — 1 Korentesma 2:1-5.
Tra prenspari eigifasi
9. Foe san ede opziener di e rèis moesoe abi firi gi sma?
9 Firi gi sma e jepi opziener di e rèis foe abi boen bakapisi. Petrus ben gi ala kresten tranga foe ’sori firi gi trawan’, noso foe abi „sari-ati” (1 Petrus 3:8, foetoewortoe). Wan kring-opziener e feni en fanowdoe foe ’teki notisi foe ala sma na ini a gemeente èn foe arki na wan opregti fasi’. Paulus ben abi a srefi jeje èn a ben skrifi: „Prisiri nanga sma di e prisiri; krei nanga sma di e krei” (Romesma 12:15). So wan fasi e boeweigi opziener di e rèis foe meki opregti moeiti foe froestan den problema nanga a situwâsi foe kompe bribiman. Dan den kan gi bijbel rai di e bow sma èn di kan tjari foeroe boen kon efoe sma e gebroiki en. Wan kring-opziener di kan sori na wan toemoesi boen fasi taki a abi firi gi trawan, ben kisi a brifi disi foe wan gemeente krosibei foe Turijn, Italia: „Efoe joe wani de wan sma di e hari a prakseri foe tra sma, dan teki notisi foe den; efoe joe wani plisi sma, dan kweki den eigifasi di e plisi sma; efoe joe wani foe sma lobi joe, dan de wan sma di lobi trawan; efoe joe wani taki sma e jepi joe, dan de klariklari foe gi jepi. Disi na san wi leri foe joe!”
10. San kring-opziener nanga distrikt-opziener taki foe a de di wan sma de nanga sakafasi, èn sortoe eksempre Jesus ben gi na ini disi?
10 Te opziener di e rèis de nanga sakafasi èn den de sma di trawan e feni en makriki foe kon na den, dan dati e jepi den foe doe foeroe boen. Wan kring-opziener ben taki: „A de prenspari troetroe foe tan de nanga sakafasi.” A ben sa warskow njoen opziener di e rèis: „No meki den brada di moro goedoe, abi toemoesi foeroe krakti na joe tapoe foe san den kan doe gi joe, èn no teki soso den goedoeman leki mati, ma proeberi ala ten foe handri nanga trawan sondro foe teki partèi” (2 Kroniki 19:6, 7). Èn wan opziener di e rèis èn di de nanga sakafasi troetroe, no sa denki toemoesi taki a de moro prenspari leki trawan foe di a de wan sma di e teki presi gi a Genootschap. Wan distrikt-opziener ben taki nanga reti: „De nanga sakafasi èn de klariklari foe arki den brada. Trawan moesoe feni en makriki foe kon na joe ala ten.” Jesus Krestes, di ben de a moro bigi man di oiti ben libi, ben kan meki sma firi froefeiri, ma a ben de nanga someni sakafasi èn sma ben feni en makriki foe go na en, taki pikin-nengre srefi ben firi densrefi boen nanga en (Mateus 18:5; Markus 10:13-16). Opziener di e rèis wani, taki pikin, tini, owroewan — troetroe, ibriwan sma na ini a gemeente — moesoe firi fri foe kon na den.
11. San kan de a bakapisi te wan sma e aksi trawan pardon, te disi de fanowdoe?
11 A no de foe taki, dati „wi alamala e naki foetoe foeroe leisi”, èn no wan opziener di e rèis de di no e meki fowtoe (Jakobus 3:2). Te den e meki fowtoe, dan a de wan eksempre foe sakafasi gi tra owroeman te a e aksi den pardon na wan opregti fasi. Soleki fa Odo 22:4 e taki, dan „a bakapisi foe sakafasi nanga a [lespeki] frede gi Jehovah na goedoe èn glori èn libi”. Èn a no ala foetoeboi foe Gado moesoe ’de nanga sakafasi te den e waka nanga a Gado foe den’? (Mika 6:8, Uitgave foe 1960) Di den ben aksi wan kring-opziener sortoe rai a ben o gi wan njoen owroeman di e rèis, dan a ben taki: „Abi foeroe lespeki nanga grani gi ala brada èn si den leki sma di betre moro joe. Joe sa leri foeroe sani foe den brada. Tan de nanga sakafasi. Tan leki fa joe de troetroe. No abi bigi memre.” — Filipisma. 2:3.
12. Foe san ede a de so prenspari gi a kresten diniwroko foe de fajafaja?
12 Faja gi a kresten diniwroko e gi krakti na den wortoe foe wan opziener di e rèis. Te joe loekoe en boen, dan te en nanga a wefi foe en de eksempre, foe di den de sma di de fajafaja na ini na evangelie wroko, dan owroeman, den wefi foe den, èn den tra sma foe a gemeente e kisi deki-ati foe de fajafaja na ini a diniwroko foe den. „De fajafaja gi a diniwroko”, wan kring-opziener ben gi tranga. A ben taki toe: „Mi kon si, taki foeroe tron, o moro fajafaja wan gemeente de gi a diniwroko, o moro mendri problema den abi.” Wan tra kring-opziener ben taki: „Mi e bribi taki efoe den owroeman e wroko nanga den brada nanga sisa na ini a veld èn e jepi den foe prisiri foe a diniwroko, dan disi sa abi leki bakapisi taki den abi vrede èn a moro bigi satisfaksi foe dini Jehovah.” Na apostel Paulus ’ben teki deki-ati foe froeteri foe a boen njoensoe foe Gado nanga den Tesalonikasma nanga foeroe strei’. A no de foe froewondroe taki den ben memre moi sani foe a fisiti èn a preikiwroko foe en èn den ben angri foe si en baka! — 1 Tesalonikasma 2:1, 2; 3:6.
13. San wan opziener di e rèis e hori na prakseri te a e wroko nanga kompe kresten na ini a velddienst?
13 Te wan opziener di e rèis e wroko nanga kompe kresten na ini a velddienst, dan a e hori a situwâsi foe den èn san den man doe na prakseri. Ala di a rai di a e gi kan de wan jepi, tokoe a sabi taki son sma e senwe kande te den e preiki nanga wan owroeman di abi foeroe ondrofeni. Son leisi, foe dati ede, a sa jepi moro te deki-ati e gi na presi foe rai. Te a kring-opziener e go nanga preikiman noso pionier na wan bijbelstudie, dan den wani kande taki en moesoe hori a bijbelstudie. Kande disi e jepi den foe kon sabi wan toe fasi fa foe meki a fasi fa den e gi leri, kon moro boen.
14. Foe san ede wi kan taki dati fajafaja opziener di e rèis e boeweigi trawan foe de fajafaja toe?
14 Opziener di e rèis èn di de fajafaja, e boeweigi tra sma foe kon de fajafaja toe. Wan kring-opziener na Oeganda ben waka na ini bigi boesi wán joeroe langa so taki a ben kan go nanga wan brada na wan bijbelstudie di no ben go na fesi someni. Di den ben waka, dan alen ben fadon so hebi taki di den ben doro, den ben nati krinkrin. Di na osofamiri foe siksi sma ben kon sabi taki a fisitiman foe den ben de wan opziener di e rèis, dan dati ben naki den ati troetroe. Den ben sabi taki den domri foe a kerki foe den noiti ben o teki notisi foe na ipi na so wan fasi. A tra sonde foe en, den ben kon na den konmakandra fosi tron èn ben taki dati den ben wani tron Jehovah Kotoigi.
15. Sortoe moi sani, wan fajafaja kring-opziener ben ondrofeni na Meksikow?
15 Na ini a distrikt foe Meksikow, di nen Oaksaka, wan kring-opziener ben meki moeiti foe doe wan sani di a no ben abi foe doe troetroe. A ben seti en tori so, taki a ben kan tan na ini wan strafoe-oso cel fo neti langa so taki a ben kan fisiti wan groepoe foe seibi strafoeman di ben tron Kownoekondre preikiman. Wan toe dei a ben go nanga den strafoeman disi te den ben gi kotoigi cel foe cel èn ben hori bijbelstudie. Foe a belangstelling di den ben sori, meki son wan foe den studie disi ben go doro latilati na neti. „Na a kaba foe a fisiti, den strafoeman nanga mi ben prisiri srefisrefi foe di wi ben gi makandra deki-ati”, a fajafaja kring-opziener disi e skrifi.
16. Foe san ede a de wan wini te opziener di e rèis èn den wefi foe den e gi sma deki-ati?
16 Opziener di e rèis e proeberi foe gi trawan deki-ati. Di Paulus ben fisiti den gemeente na Masedonia, dan ’a ben gi foeroe foe den deki-ati nanga wan toe wortoe’ (Tori foe den Apostel 20:1, 2). Wortoe di e gi deki-ati kan de wan heri boen jepi foe tiri jongoewan nanga owroewan foe poti marki na jejefasi. Na wan bigi bijkantoro foe a Waktitoren Genootschap, wan pikin ondrosoekoe ben sori taki kring-opziener ben gi pikinmoro 20 procent foe den friwani wrokoman deki-ati foe bigin nanga a foeroeten diniwroko. A moi eksempre di a wefi foe a kring-opziener e gi leki wan foeroeten Kownoekondre preikiman, de wan bigi fonten toe foe deki-ati.
17. Fa wan owroe kring-opziener e denki foe a grani di a abi foe jepi tra sma?
17 Owroe sma nanga sma di lasi-ati abi deki-ati fanowdoe spesroetoe. Wan owroe kring-opziener e skrifi: „A pisi foe mi wroko di e gi mi boen foeroe prisiri na inisei, na a grani di mi abi foe jepi den inaktief sma nanga den wan foe Gado en ipi di swaki na skin sei. Den wortoe foe Romesma 1:11, 12 wani taki wan spesroetoe sani gi mi, foe di mi e kisi boen foeroe deki-ati nanga krakti ala di mi e ’gi wan presenti na jejefasi na den sortoe sma dati so taki den kan kon tranga.’”
A pai di den e kisi foe a prisiri wroko foe den
18. Sortoe marki di abi en fonten na tapoe bijbel, opziener di e rèis abi?
18 Opziener di e rèis wani jepi den kompe bribiman foe den troetroe. Den wani tranga den gemeente èn bow den na jejefasi (Tori foe den Apostel 15:41). Wan opziener di e rèis e wroko tranga „foe gi deki-ati, foe gi kowroe-ati, èn foe meki sma abi na angri foe doe a diniwroko èn tan libi na ini waarheid” (3 Johanes 3). Wan trawan e proeberi foe meki a bribi foe kompe bribiman kon tranga (Kolosesma 2:6, 7). Memre taki na opziener di rèis na wan „opregti kompe bribiman”, no wan sma di de wan basi foe a bribi foe trawan (Filipisma 4:3; 2 Korentesma 1:24). A fisiti foe en na wan okasi foe kisi deki-ati èn foe wroko moro, so srefi wan okasi gi a skin foe owroeman foe loekoe fa sani ben go na fesi èn foe poti marki gi a ten di e kon. Den gemeente preikiman, pionier, dinari ini a diniwroko, nanga owroeman kan froewakti taki den wortoe nanga na eksempre foe en, sa bow den èn boeweigi den foe doe a wroko di moesoe doe ete. (Teki gersi 1 Tesalonikasma 5:11.) Foe dati ede dan, horibaka nanga joe heri ati gi den fisiti foe a kring-opziener èn gebroiki a diniwroko di a distrikt-opziener e doe dorodoro.
19, 20. Fa opziener di e rèis èn den wefi foe den kisi pai foe a getrow diniwroko foe den?
19 Opziener di e rèis èn den wefi foe den e kisi foeroe pai foe a getrow diniwroko foe den, èn den kan de seiker taki Jehovah sa blesi den foe a boen di den e doe (Odo 19:17; Efeisesma 6:8). Georg nanga Magdalena na wan owroe trowpaar di ben dini foeroe jari na ini a wroko foe rèis. Na wan kongres na Luxemburg, wan sma, di Magdalena ben gi kotoigi so wan 20 jari na fesi, ben kon na en. Den bijbel poeblikâsi di Magdalena ben libi gi a djoe oema disi ben meki na oema kisi belangstelling gi a waarheid, èn baka wan pisi ten a ben teki dopoe. Wan sisa na jejefasi ben kon na Georg èn a ben memre di Georg ben kon na en oso pikinmoro 40 jari pasa kaba. A fajafaja fasi fa Georg ben taki foe a boen njoensoe ben abi leki bakapisi te nanga langa, taki en nanga en masra ben teki a waarheid. Wi no abi foe taki dati Georg nanga Magdalena ben prisiri srefisrefi.
20 Den boen bakapisi di Paulus ben abi nanga en diniwroko na Efeise ben gi en foeroe prisiri èn kande dati boeweigi en foe taki den wortoe foe Jesus: „Moro kolokoe de ini a gi foe sani, leki ini a kisi foe sani” (Tori foe den Apostel 20:35). Foe di a wroko foe opziener di e rèis wani taki toe dati wan sma moesoe gi doronomo, meki den wan di e doe a wroko disi e kon kolokoe, spesroetoe te den e si den boen bakapisi foe a wroko foe den. Wan kring-opziener di ben jepi wan owroeman di ben lasi-ati, ben kisi wan brifi di ben taki: „Na ini a libi foe mi na jejefasi, joe ben de wan bigi ’jepi di e gi tranga’ — moro leki san joe denki. . . . Noiti joe sa sabi dorodoro omeni joe jepi wan disiten Asaf di ’den foetoe foe en pikinmoro ben lasi pasi.’” — Kolosesma 4:11; Psalm 73:2.
21. Foe san ede joe ben sa taki dati 1 Korentesma 15:58 e fiti den wroko di opziener di e rèis e doe?
21 Wan owroe kresten di ben de na ini a kringwroko foeroe jari langa, lobi foe prakseri foe 1 Korentesma 15:58 pe Paulus ben gi tranga: „Kon de kánkan, no beifi, ala ten abi foeroe foe doe na ini a wroko foe Masra, foe di oenoe sabi taki a wroko foe oenoe no de foe soso ini a tori foe Masra.” Opziener di e rèis troetroe abi foeroe foe doe na ini a wroko foe Masra. Èn fa wi de nanga tangi taki den e dini nanga someni prisiri leki getrow granfoetoeboi foe Jehovah en no-froedini boen-atifasi!
[Foetoewortoe]
a Loekoe na artikel „Kunt u gelukkig zijn terwijl u veel te doen hebt?”, na ini De Wachttoren foe 15 mei 1991, bladzijde 28-31.
Fa joe ben sa piki?
◻ Foe san ede wi kan si opziener di e rèis leki „toemoesi boen granfoetoeboi”?
◻ San na wan toe sani di e jepi kring-opziener nanga distrikt-opziener foe doe foeroe boen?
◻ Foe san ede sakafasi nanga faja de so prenspari gi den wan di e doe a wroko foe opziener di e rèis?
◻ Sortoe boen marki opziener di e rèis abi?
[Prenki na tapoe bladzijde 26]
Opziener di rèis e proeberi foe gi kompe bribiman deki-ati
[Prenki na tapoe bladzijde 27]
Jongoewan nanga owroewan kan kisi wini foe di den abi demakandra nanga opziener di e rèis èn den wefi foe den
[Prenki na tapoe bladzijde 28]
A faja diniwroko foe na opziener di e rèis kan meki taki trawan e kon fajafaja toe