Fisiti foe owroe man e tjari boen gi na pipel foe Gado
„Den drai go baka na Lystra èn Ikonia èn Antiokia èn den meki den discipel sili kon tranga (na ini bribi), aladi den ben gi den dekati foe tan ini na bribi en den taki: ’Wi moe ondrofeni foeroe benawtoe bifo wi go ini na kownoekondre foe Gado.’” — Tori foe den Apostel 14:21, 22.
1. Foe sainde den fisiti foe reizende opziener de fanowdoe ini disi ten, soleki disi ben de fanowdoe ini na fosi eeuw?
INI na fosi eeuw den apostel nanga tra owroe man ben fisiti den kristen gemeente leki reizende opzieners tapoe ten di ben fiti. Ini na ten disi reizende opziener geregeld e fisiti moro leki 42.000 gemeente foe Jehovah Kotoigi tapoe heri grontapoe. Den fisiti disi ini owroe ten nanga now, e akroederi foeroe nanga makandra? Ja, foe troe! Den fanowdoe di den kristen ini disi ten abi de bijna gelijk leki di foe den kristen ini den ten foe den apostel. Wi abi na dekati nanga praktisch jepi nanga jepi foe den fisiti disi fanowdoe foe doe Gado wani ondro moeiliki omstandigheden.
2. (a) Kristen soema ben moe kaka foetoe gi sortoe problema ini na fosi eeuw, soleki now, en disi ben meki sortoe wroko ben de fanowdoe? (b) Foe sainde meki den fisiti foe owroeman alaten ben de sani di den ben wani nanga ala prisiri?
2 Leki wan bakapisi foe onvolmaakti fasi di den ben kisi, den fositen kristen ben ondrofeni problema di e akroederi nanga di foe wi (Rom. 3:23). Den kori sani di den ben moe kaka foetoe gi, ben de moro foeroe foe na srefi fasi leki den kori sani di wi moe kaka foetoe gi (1 Kor. 10:13). Den ben libi mindri wan ogri seti foe sani, di de te now ete en di wi alamala wani kon fri foe hen (Gal. 1:4). Na moro prenspari féjanti foe den, Didibri, de na féjanti, di wi toe moe kaka foetoe gi (1 Petr. 5:8). Nanga ala den swakifasi foe skin, druk foe grontapoe nanga vervolgoe foe ogri jeje-krakti di no de foe si, den fosi-eeuw bribiman ben moe doe wan wroko. Na order dati de ooktoe foe Jehovah Kotoigi ini disi ten èn moe doe dorodoro bifo na kaba foe na ogri grontapoe disi di e kon krosibé (Matt. 28:19, 20; Tori foe den Apostel 1:8). Den fisiti foe man nanga jejefasi leki wan seti foe tranga, gi dekati èn jepi trafasi na pipel foe Gado, ben de fisiti di ini na ten dati soleki now, wi ben wani nanga ala prisiri.
3. Fa a sa tjari boen gi wi foe loekoe tori foe fisiti foe den ten foe den apostel en loekoe fa sani de ini na ten disi?
3 Den fisiti disi ini den ten foe den apostel e gi wi boen tiri ini disi ten (Tori foe den apostel 14:21-23; 15:36). Te wi loekoe wan toe bijbel tori en loekoe hen nanga fa sani de ini disi ten, dan wi sa kan dipi wi warderi gi na seti foe den sortoe „presenti ini libisoema” disi, di e jepi wi èn di e sorgoe foe den fanowdoe foe wi. — Ef. 4:8, 11, 12.
FA DEN BEN SI FISITI FOE OWROE MAN
4. Fa wan fisiti gi na gemeente ini Antiokia ben jepi den brada?
4 Baka na konmakandra foe den apostel nanga owroe man ini Jeruzalem, ini na jari 49 G.T., Judas nanga Silas, makandra nanga Paulus nanga Barnabas, ben seni go na Antiokia. Efoe joe ben de drape, san joe ben sa ondrofeni? Leki fa Tori foe den Apostel 15:32 taki, den toe proféti Judas nanga Silas „ben gi den brada dekati nanga foeroe wortoe en gi den tranga.” Na fesi ini Antiokia, wan kesekese ben de foe na tori foe na besnijdenis. Ma now, di na gemeente ini Antiokia ben kisi wan brifi di ben skrifi ondro na tiri foe santa jeje, makandra nanga wan fisiti foe den toe „proféti”, dan na tori ben kon sreka. Na gemeente ben abi reden foe ben prisiri. — Tori foe den Apostel 15:2, 22-31.
5. San Filippi 2:20-22 e taki foe den fasi foe Timoteus?
5 Joisti na sakafasi geest foe den, pe den ben offer densrefi, ben meki „owroe man” de so wan tranga gi den brada foe den. Teki foe eksempel na kompe-zendeling foe Paulus Timoteus, di Paulus ben skrifi foe hen: „Mi no abi no wan tra soema di de foe na srefi fasi leki hen di sa sorgoe foe den sani di abi foe doe nanga oen. Bikasi ala den trawan de soekoe den égi afersi, no di foe Kristus Jezus.” Timoteus kompewrokoman Paulus no ben drai drai foe seni hen go na a gemeente Filipi leki wan soema di ben sa wroko tranga mindri den foe „meki na boen njoensoe go na fesi”. — Fil. 2:20-22.
6. (a) Fa den brada tapoe Kréta ben sa njan boen te Titus ben sa teki den rai foe Paulus? (b) Sortoe krakti Titus rai ben sa abi tapoe jongoe na owroewan, man nanga oema?
6 Leki fa a gwenti ben de, dan den owroe man di ben seni go na wan bepaald gebied, ben tan drape ini wan moro langa ten foe tranga den brada bribi. A ben de wan tranga fanowdoe sani dati Titus ben gi jepi foe loesoe problema tapoe Kréta. A ben kisi order „foe ben sreka den sani, disi ben mankeri èn foe ben poti owroe man ini foto foe foto”. Te joe loekoe na tranga-ede, na soso taktaki èn na den kori prakseri di son wan ben leri, dan boiti dati, Titus ben moe tan piri ai gi den broejawan, foe „den ben sa de gosontoe ini bribi” (Tit. 1:5-14). A ben moesoe gi grani man nanga oema, èn ooktoe srafoe rai en vermane, foe na libi en waka foe den „ben sa kan moi na leri foe wi Jepiman, Gado ini ala sani”. — Tit. 2:1-10.
7. (a) Sortoe fasi den opziener foe a ten dati, di ben tjari wan fisiti, ben abi? (b) Fa joe ben moe si getrouw owroe ma soleki Paulus leki fa 1 Korinte 11:1 e taki?
7 A de krin dati boen bekwaam opziener di ben fisiti den gemeente ini na fosi eeuw ben gi fanowdoe leri. Den alamala ben habi jarilanga ondrofeni ini na prékiwroko, ini na tjari foe frantwortoe leki owroeman èn ini na tjari foe moeilijkheid. Baka di a ben kari den vervolgoe nanga ondrofeni di a ben pasa, Paulus ben tjari hen bigi firi foe frantwortoe kon na fesi nanga den wortoe: „Boiti den sani dati, di de foe dorosé, dé na dé na sorgoe foe ala gemeente e kon na mi tapoe” (2 Kor. 11:23-28). Titus, Timoteus nanga trawan ben wroko makandra nanga hen ini den ondrofeni disi (2 Kor. 8:23; 2 Tim. 3:10, 11). Wan bribi di ben de wan eksempel ben meki den de warti eksempel foe waka na den baka. — 1 Kor. 11:1.
8. Sortoe vermane den owroe man foe Efese kisi en fa den ben prakseri foe Paulus?
8 No wawan dati den brada ben respeki den „owroe man” disi di ben fisiti den èn di de wan eksempel, foe na toemsi boen wroko foe den, ma den ben sori wan bigi égi lobi gi den. Wan foe den toemsi moi eksempel foe disi ben de, di Paulus ben miti nanga den owroe man foe Efese. A ben vermane den: „Poti prakseri na joesrefi nanga na heri ipi, di na mindri den na santa jeje ben poti oenoe leki opziener, foe wé na gemeente foe Gado, di a ben bai nanga na broedoe foe hen égi Pikin” (Tori foe den Apostel 20:28). Moro fara a ben warskow den foe wan fadon komoto na bribi di ben kon krosibé en a ben gi den tranga foe tan nanga ai èn foe jepi den swakiwan. Baka di den begi makandra, na firi foe den owroe man dati ben kon na doro, di den ben teki afscheid foe Paulus, foedi a ben gi den spesroetoe sari foe sabi dati den no ben sa si hen noiti moro. — Tori foe den Apostel 20:29-38.
PRAKTISCHE JEPI NA GEMEENTE
9. Fa den opziener di ben tjari wan fisiti ben prijse èn gi tranga na den gemeente?
9 Den opziener di ben tjari wan fisiti ben prijse den fositen bribiman foeroe tron foe den toemsi moi fasi di den ben sori. Disi ben de so nanga „den santawan” foe Kolosse. Epafras ben taki foe den toemsi boen wroko nanga foe den lobi ini jeje fasi en Paulus ben gi Gado tangi foe dati (Kol. 1:2-8). Na fisiti foe Paulus na Thessalonika ben tjari toemsi boen winimarki. Di bakaten a ben skrifi den bribiwan drape, a ben verteri foe den getrouw wroko, den lobifasi wroko èn horidoro. Den ben teki na wortoe ondro benawtoe en den ben tron warti soema di ben waka baka soema leki Paulus, Silvanus (Silas) nanga Timoteus (1 Thess. 1:1-7). Den owroe man dati ben leri den fositen discipel disi èn nanga den wortoe èn nanga den eksempel èn den ben sori den fa den ben kan sori den froktoe foe Gado jeje ini den aladé libi. Den ben kisi tranga foe poti sondro kroederi vertrouw ini Jehovah en libi densrefi alaten ini begi na hen. Den gemeente ben prisiri foe den sortoe fisiti disi, foedi den ben erken dati den ben kisi tranga nanga dekati foe dati foe „tan ini na bribi”. — Tori foe den Apostel 14:22.
10. (a) Foe sainde den no ben kan meki spotoe tapoe na gebied foe jeje nanga moreel krinfasi? (b) Sortoe dekati den owroe man dati ben gi na den herder foe den presi dati?
10 A no de foe taki, dati den apostel nanga owroe man ben doe sani foe si, dati den gemeente ini na ten dati ben drai boen tapoe wan orde èn harmonieus fasi ondro na tiri foe Kristus (Ef. 4:15, 16). Den ben sabi dati moreel nanga jeje krinfasi ben moe tan. Joe no ben kan meki spotoe tapoe na pisi tori disi. Fa na kristen gemeente ben kan de aparti foe na grontapoe en ben kan gebroiki leki wan krin patoe foe doe na wroko foe Jehovah? (2 Kor. 6:14-17; 1 Thess. 4:3-8; 2 Tim. 2:20-22) Foe ben poti krakti na tapoe, dati a de prenspari foe gi jesi na den wet foe Gado, den owroe man disi ben tjari fisiti en den ben skrifi brifi en disi ben jepi den herder foe den presi dati nanga den ipi di den ben kisi na sorgoe foe den. — 1 Petr. 5:1-5.
11. Sortoe tranga den opziener di e tjari fisiti, kan gi ini disi ten na ala gemeente opziener, akroederi na rai foe Paulus na Timoteus?
11 Paulus ben vermane na jongoe opziener Timoteus: „Tron wan eksempel gi den getrouwwan . . . Go doro . . . foe poti joesrefi tapoe na lési, na vermane, na leri . . . sodati ala soema kan si na publiki dati joe e go na fesi” (1 Tim. 4:12-15). Reizende opziener ini disi ten e gi ini den fisiti foe den tapoe na srefi fasi rai. En soleki Paulus ben gi Timoteus order, na so den e gi ala gemeente opziener tranga foe „préki na wortoe, hori densrefi bezig nanga hen leki wan toemsi fanowdoe sani, ini boen ten, ini moeiliki ten, foe gi piri-ai, foe warskow, foe vermane, nanga ala pasensi nanga koni foe leri soema”, „doe na wroko foe wan evangelium-prékiman”, èn foe doe na diniwroko boen dorodoro. — 2 Tim. 4:1-5.
12. Sortoe rai ben gi na a gemeente foe Korinte, pe na lési foe strafoe ben de na ini?
12 Den apostel no ben draidrai foe meki den sabi fa den ben moesoe doe te wan sani ben moe kroetoe. Di Paulus ben kon tanapoe fesi wan situatie foe ogridoe, di den no ben strafoe, a ben verteri nanga brifi san hen ben sa doe, efoe hen ben drape hensrefi, aladi a ben taki krakti nanga den soema di ben tjari ini Korinte na frantwortoe „foe poeroe na ogri man na oen mindri” (1 Kor. 5:3, 13). A ben sori ooktoe dati man di e kroetoe sani bekwaam ben moe behandel kesekese na mindri den brada (1 Kor. 6:1-6). Den sortoe rai disi ben jepi den frantwortoe brada foe poti den prakseri reti.
WAN LOBI SETI FOE TRANGA WI
13. (a) Foe sainde wi kan de grantangi foe na seti foe Jehovah foe getrouw opziener, pe de na ini den wan di e tjari fisiti geregeld gi den gemeente? (b) Sortoe ondrofeni foeroe reizende opziener abi?
13 Foedi na geest foe Jehovah ini na ten disi e wroko tapoe hen pipel, meki joe abi now bekwaam man, di e wroko tranga, nanga foeroe jari foe ondrofeni, foe fisiti den gemeente. (Loekoe Efese 4:11, 12.) Aladi den de onvolmaakti man, tog den e sori foeroe foe den toemsi moi fasi di ben marki Paulus, Silas, Barnabas, Timoteus nanga trawan. Tapoe na momenti disi foeroe reizende opziener abi moro leki 30 jari foe ondrofeni ini na foeroe-ten-wroko. Wàn kringopziener, di de te now ete actief, ben teki 55 jari pasa kaba, di a ben abi 18 jari, na foeroe-ten-wroko tapoe hen (Pred. 12:1). Foe sensi na ten dati a de dini sondro foe tapoe, aladi a ben gebroiki den laatste 30 jari foe fisiti den gemeente. Bijna ala den man disi ben doe diniwroko ooktoe leki opziener ini plaatselijke gemeente èn leki pionier. Trawan foe den ben de jarilanga ini na zendingwroko ofoe tapoe wan bijkantoro foe na Wachttorengenootschap. Na de foe den sortoe man disi ini wan gemeente na wan blesi, foedi ala soema kan kisi krakti foe den jeje sani di den abi foe prati. Den fisiti foe den kan jepi wi ini wi diniwroko nanga aanbegi en ooktoe ini na kweki foe wan kristen égifasi.
14. Ini san wi kan si na bekwaamheid foe den owroe man, en san den e proberi foe bow ini trawan?
14 Den vertegenwoordigers di den e seni go na den gemeente, sondro foe joe kan poeroe wan na mindri, de man di e teki fesi ini na kownoekondreprékiwroko nanga na meki foe discipel. Den e verstan san a wortoe wani taki en den e meki toemsi boen froktoe (Matt. 13:23). Nanga na foeroe di den foeroe nanga na firi foe na tranga fanowdoe foe na ten en dati e kon foe na troe troe verstan san Gado kownoekondre wani taki, en ini na verstan foe na ernst foe den laatste dé disi, den no e doe den wroko safri safri (Rom. 12:11). Nanga na fasi disi den e proberi foe bow na srefi evangeliumgeest, di ben marki na fositen kristen gemeente. — Tori foe den Apostel 5:42; 8:1-4.
15. (a) Fa reizende opziener e si Jezus komando ini Matteus 24:14 èn 28:19, 20? (b) Akroederi nanga san ben pasa baka na Pinksterfesa foe 33 G.T., fa den e gi ini disi ten jepi nanga dekati?
15 Foedi den reizende opziener abi so wan bigi respeki foe Jezus komando foe préki na „boen njoensoe” en meki discipel, dati e troesoe den foe poti krakti tapoe a toe-pisi order disi leki wan santi panti, wan wet foe Gado (Matt. 24:14; 28:19, 20). Den e memre densrefi san ben pasa baka na pinksterfesa ini na jari 33 G.T., èn ooktoe baka dati, baka na bekering foe Cornelius nanga hen osofamiri, foe taki, dati bribiwan foeroe foe den ben kon esesi na bribi en ben kisi leri dorodoro, sodati den ben kan libi akroederi na „boen njoensoe” en meki hen tapoe wan boen fasi bekenti na trawan (Tori foe den Apostel 2:46, 47; 5:14; 6:7; 10:44-48; 20:20). Dati den nomroe foe den njoen bribiman ooktoe now sa kon dobroe, reizende opziener e kari someni soema leki den kan foe teki prati nanga den na a prékiwroko. Den e jepi den wan di mankeri ondrofeni. Na faja nanga na toemsi boen tiri foe fisiti owroe man e jepi foe na prékiwroko kon moro bigi. Den e taki leki Paulus: „Heloe foe mi, efoe mi no meki na boen njoensoe bekenti!” — 1 Kor. 9:16.
16, 17. (a) Sortoe tranga reizende opziener kan gi foe kibri na gemeente foe na kon na ini foe grontapoe-fasi? (b) Na tapoe sortoe fasi den kan jepi den brada foe feti nanga na krakti foe na materialisme di bijna no de foe si?
16 Boiti dati, foeroe wroko de foe doe foe jepi den wan di de wan pisi foe na gemeente foe go na fesi ini na libi foe wan kristenlibi (2 Petr. 1:5-10). Son wan di no kon fri ete foe grontapoefasi, ben sa kan proberi foe tjari grontapoe-doe kon en disi ben sa meki den hé fasi foe libi nanga waka di Gado Wortoe ben poti, kon slap. Foe kibri na gemeente foe na kon na insé foe grontapoefasi, reizende opziener moe sori dati den abi onderscheidingsvermogen foe si den tendens di bijna no de foe si. Den sa moe gi na pipel foe Gado tranga foe hori densrefi soifri na gronprakseri foe na bijbel tapoe na tori foe gwenti, moraal, demakandra nanga trawan, ini égi leki sociaal afersi (1 Kor. 10:31-33; 1 Petr. 1:14-17; Hebr. 13:18). Den sa moe memre den owroeman kande, foe opo teki wan vaste bosroiti foe kibri na moreel, na leri nanga jeje krinfasi ini na gemeente.
17 Akroederi nanga na rai di Timoteus ben kisi, dan reizende opziener e kisi tranga foe warskow kristen soema foe no kon na ini (na gemeente) foe na krakti foe na materialisme (lobi foe goedoe) (1 Tim. 6:9, 10, 17-19). Foedi densrefi e poti jeje sani tapoe na fosi presi, den e gi trawan dekati nanga den eksempel „foe soekoe fosi na kownoekondre foe Gado”. — Matt. 6:33.
18. Foe sainde a de so prenspari foe kisi jeje stabiliteit nanga lepi en fa dekati kan gi foe dati?
18 Ini wan grontapoe, pe den soema e meki broeja winti foe kerki-leri fringi den go fringi den kon, dan Jehovah dienstknegti moe de stabiel, lepi kristen (Ef. 4:13, 14). Na fasi foe den moe de krakti, aladi di den no e meki wan onafhankelijke denki ofoe emotionele spanning poeroe den esesi na den presi (Kol. 1:23; 2:6, 7). Nanga reti foe datede, reizende opziener sa poti krakti tapoe a fanowdoe di de, dati ala kristen soema gro alaten ini wan joisti sabi foe Gado. (Fil. 1:9, 10; Kol. 1:9-11). Den e gi tranga foe abi wan égi, wan osofamiri, èn wan gemeente-studi foe Gado Wortoe, sodati kristen soema no sa gi densrefi njannjan soso nanga „na merki foe na wortoe”, ma nanga „tranga njanjan”, sodati den sa verstan „na wortoe foe retidoe” dorodoro èn „den kan oefen den waarnemingsvermogen foe si boen nanga ogri” (Hebr. 5:12-14). Te reizende opziener e si na jeje kondisi foe wan gemeente, dan den sa gi bijbel rai tapoe den sortoe punt disi.
19. Fa reizende opziener e jepi difrenti soema nanga den difrenti fanowdoe di den abi? (Jak. 5:19, 20)
19 Den owroe man disi kan tjari wan fisiti go na sikiwan, graniwan nanga trawan, te na okasi de foe doe dati (Spr. 16:31; Matt. 18:12-14; Loekoe toe Ezech. 34:4). Te soema e kon na den nanga égi afersi pe den no e agri nanga makandra, den kan gi den tapoe wan lobifasi ma ooktoe krakti fasi vermane nanga jepi foe na bijbel foe tjari vréde kon mindri den (1 Thes. 5:14, 15). A kan de dati foeroe tron den sabi foe bow, tapoe wan fasi sondro den e si, den soema di e degedege tapoe kristen waka nanga libi ofoe di tapoe tra fasi „den hari poeroe ini faja”. — Judas 22, 23.
20. Fa reizende opziener nanga den wefi no ben prakseri densrefi?
20 Soleki ini na fosi eeuw, den opziener disi nanga den oema foe den e doe diniwroko ondro ala sortoe omstandigheden. Foe wroko ini geïsoleerde presi ofoe boesikondre, son wan foe den e waka nanga asi ofoe kroejara, ofoe e waka langa bergipasi. Foe na boen foe den gemeente den e pasa bigi pina. Foeroe foe den teki na wroko foe doe boen fara foe den famiri nanga boen mati. Ma winsi fa den situatie de, den de klari foe wroko tranga, fiti densrefi nanga ala prisiri foe na „boen njoensoe” ede. — 1 Kor. 9:23.
21. (a) Sortoe warderi na loekoe di wi loekoe na diniwroko foe den owroe man disi moe bow na wi? (b) Sortoe aksi disi e meki kon na wi foe datede?
21 Now di wi ben loekoe den foeroe fasi, di den fisiti di getrouw owroe man e tjari ben tranga den gemeente, ini den ten foe den apostel leki now, dan a no kan de trafasi, ofoe disi e gi wi foeroe warderi foe na moeiti foe den. Den sortoe owroeman disi di no e teri densrefi leki dem de wan sani, de troe troe den wan di na apostel Paulus ben skrifi foe den: „Now wi de begi oenoe, brada, foe abi respeki foe den di e wroko tranga na oen mindri, en di abi na tiri tapoe oen ini Masra, en di e vermane oen, en foe oen sori den moro leki bigi respeki ini lobi foe na wroko foe den ede” (1 Thess. 5:12, 13). Fa wi wisrefi kan njan moro boen foe den fisiti foe den ini na ten di e kon, wans wi abi respeki ooktoe foe den reizende opziener? Meki wi loekoe?