Opziener — De wan toemsi moi eksempre gi „na ipi”
„Tron wan eksempre gi den getrouwwan ini taki, ini waka nanga libi, ini bribi, ini krin libi.” — 1 Tim. 4:12.
1. Foe sanede den e froewakti foe kristen opziener dati den gi wan toemsi moi eksempre?
FOEROE sani de ini a tori foe doe dienst leki wan opziener. Foeroe doesoen man di gi densrefi abra, èn di abi jeje fasi èn di ben kisi na grani disi, sabi disi heri boen. Foedi ala sma ini a gemeente de kristen brada nanga sisa dan den owroeman sabi dati a frantwortoe foe den ini no wan enkri fasi e meki den de moro boen leki tra aanbegiman foe Jehovah (Matt. 23:8-12). Tog moro e aksi foe den, te joe loekoe den frantwortoe foe den nanga den marki foe a bijbel di den moe doro. Ja, a de soleki Jezus ben taki: „Na ibri sma di den e gi foeroe, foeroe sa aksi foe en; èn na ibri sma di den gi a loekoe foe sani, den sa aksi moro leki de a gwenti” (Luk. 12:48). Den sani di den ondro-herder disi e taki èn doe, e abi wan bigi krakti tapoe „na ipi”. Foe dat-ede den e froewakti foe den man disi, dati den gi tra sma wan toemsi moi eksempre.
2. Ini sortoe spesroetoe fasi, soleki Paulus ben gi tranga, Timoteus ben moe gi wan eksempre?
2 Tapoe a tori disi foe a gi foe wan boen eksempre, wi no kan poti nofo krakti a tapoe. Disi de wan foe den direct rai di Paulus e gi na a opziener Timoteus ini en fosi brifi. Paulus no ben teki noti leki a no kan trafasi, èn a no ben wani toe dati Timoteus ben sa doe disi. Foedi Timoteus ben de wan jongoe man ete, dan son wan ben sa abi na firi foe veragti en. A no de foe taki dati Paulus ben abi disi ini prakseri di a ben skrifi: „Meki noiti wan sma veragti joe jongoe jari, ma na presi foe dati, de wan eksempre gi den getrouwwan ini taki, ini waka nanga libi, ini lobi, ini bribi, ini krin libi. Go doro te leki mi kon, foe poti joesrefi tapoe lési, tapoe vermane, tapoe leri. No afrontoe a presenti ini joe, di ben gi joe nanga jepi foe a wan profétitaki èn di a skin foe owroeman ben poti den anoe na joe tapoe” (1 Tim. 4:12-14). Efoe Timoteus ben sa tan waka baka wan kristen fasi foe waka nanga libi, dan tra sma no ben sa abi wan boen réde foe veragti en.
3. San opziener moe ondrosoekoe, èn foe sanede?
3 Leki Timoteus, a so den opziener a mindri Jehovah pipel ini disi ten moe ondrosoekoe na eksempre di den e sori ini den égi libi. Aladi na takimakandra foe wi e go moro spesroetoe foe opziener, dinari ini na diniwroko nanga man di e proeberi foe kisi wan moro bigi gemeentefrantwortoe, tog ala kristensma moe loekoe finifini san de ini a tori foe doe dienst leki wan eksempre foe „na ipi” (2 Kor. 13:5). Ma now wi e aksi disi: „Oen owroeman, oen de gi troetroe wan toemsi moi eksempre?” Den kompe-bribiman foe oenoe e si oenoe nanga ini prakseri den wortoe di tanapoe ini Hebreër 13:7: „Hori den ini prakseri di e teki fesi na oen mindri, di ben taki a wortoe foe Gado gi oenoe, èn waka baka a bribi foe den, loekoe na a kaba foe a waka nanga libi foe den.” Ja, oen owroeman, den kristen kompe-bribiman foe oenoe wani tan getrouw na Jehovah sote. Foe disi den no abi wawan fanowdoe rai foe a bijbel nanga wortoe foe trowstoe, ma sosrefi toe wan dekati eksempre. Den sa waka na baka oen bribi, te den si na joisti waka nanga libi foe oenoe èn si pe disi e go.
4. (a) Fa 1 Timoteus 3:1 nanga Matteus 20:26, 27 e poti krakti a tapoe san de ini a tori foe doe dienst leki wan kristen opziener? (b) San a de aksi foe wan opziener, efoe a wani doe en frantwortoe?
4 Disi no wani taki, dati den no man foe misi joe leki wan owroeman di ben poti. Kwet-kweti. Ma, joe e doe „wan toemsi boen wroko” nanga a dini di joe e dini joe jeje brada nanga sisa (1 Tim. 3:1). No wan sortoe „grani fasi” tai na a positie foe joe leki wan bakapisi foe den moeiti foe joe (Matt. 20:26, 27). Ja, joe abi ekstra grani nanga frantwortoe. Ma joe e doe den sani disi pas tapoe wan joisti fasi te joe e doe dienst leki srafoe foe Jehovah, Jezus Kristus nanga joe kompe-bribiman tapoe wan saka-fasi (Rom. 12:11; Gal. 5:13; Kol. 3:23, 24). Troetroe joe moe wroko tranga, teki fesi, vermane, èn doe tra sani foe na boen foe joe brada nanga sisa ini a bribi. Den e erken na aanstelling foe joe, ma a tranga wroko di joe e doe nanga a eksempre foe joe, e bewégi den foe tanapoe loyaal baka den moeiti foe joe. So wan respeki de joisti èn de akroederi nanga den wortoe foe na apostel Paulus: „Now wi e begi oenoe brada, foe abi respeki gi den di e wroko tranga na oen mindri èn e teki fesi na mindri oenoe ini Masra èn e vermane oenoe, èn sori den, foe den wroko ede, moro leki bigi respeki ini lobi.” — 1 Thess. 5:12, 13.
Wan toemsi moi eksempre „ini taki”
5. Ini sortoe difrenti omstandigheid opziener moe de wan toemsi moi eksempre „ini taki”, èn foe sanede disi de fanowdoe?
5 Degedege no kan de, dati opziener moe de wan toemsi moi eksempre „ini taki”. Disi moe de so na den oso. Sosrefi toe disi moe de na publiki te den e taki nanga aparti memre foe a gemeente ofoe e taki foe a publiki podium, èn sosrefi te den e gi kotoigi ini a birti oso-foe-oso. Den commentaar foe wan opziener kan abi wan moro bigi krakti tapoe tra sma leki a de froestan kande. San a de taki foe datede moe abi en roetoe alaten ini den gronprakseri foe Gado Wortoe ofoe den gronprakseri dati moe tjari en taki.
6. Foe sanede opziener moe loekoe boen dati den no abi fowtoe prakseri, sodati den „taki boen sani”?
6 Te taki wani bow tra sma, dan na ati moe foeroe nanga boen sani foe Gado Wortoe. Dan a „mofo sa taki boen sani” èn gi verklari di e fiti na jeje fasi èn di e bow tra sma. (Matt. 12:34). Wan opziener moe loekoe boen dati a no e meki fowtoe prakseri teki presi ini en froestan nanga ati, foedi te foe kaba disi sa kon na krin ini en taki èn sa de takroe gi tra sma. A bijbel e sori san wi moe komoto na en pasi èn sortoe wortoe moe taki, te a de gi na rai: „No meki no wan pori wortoe komoto foe joe mofo, ma ibri wortoe di de boen foe bow tra sma pe a de fanowdoe, sodati nanga dati wan sani kan gi san de boen gi den brada.” — Ef. 4:29.
7. Foe sanede meki kristen opziener moe tan farawe foe panja den égi prakseri foe den?
7 Foe de wan eksempre ini taki, dan kristen ondro-herder no moe go „dorosé foe den sani di skrifi” (1 Kor. 4:6). Ini afersi di abi foe doe nanga a leri, nanga na moraal nanga na kristen organisatie, dan wan opziener moe „préki” alaten „a wortoe” (2 Tim. 4:2). Te a ben sa leri en égi prakseri ofoe ben sa panja prakseri di de kontra a leri di a ben kisi foe a „getrouw nanga koni srafoe”, dan disi ben sa tjari broeja kon. Foe sanede a no ben sa wakti tapoe Jehovah nanga en organisatie na presi foe a poesoe go a fesi tapoe wan asranti fasi di ben sa kan tjari sjen kon? (Spr. 11:2). Kande bakaten a tori tjari kon na krin. Sosrefi toe na owroeman nanga jepi foe begi èn wan faja studi foe Gado wortoe nanga a jepi foe den boekoe foe a Wachttorengenootschap kan si, dati a ben fowtoe, sodati a sa prisiri, dati a no ben panja en prakseri di no ben de joisti.
8. (a) Foe sanede a no de joisti foe stré foe wortoe èn kon ini wan tak-go-tak-kon? (b) Fa jepi moe gi te wan sma aksi wan aksi èn abi jeje jepi fanowdoe?
8 Paulus ben taigi Timoteus, dati a moe gi trawan na komando „foe no stré foe wortoe, wan sani di no abi waarde kwet-kweti, foedi den sma di e arki e broko saka te na gron”. Moro fara na apostel ben poti prakseri tapoe a gevaarlek krakti di verklari abi di man ben taki di drifi komoto foe a waarheid. Noti wan sma no e wini nanga dati, aladi ini jeje fasi kande foeroe lasi kon, te wan sma e stré foe wortoe ofoe e kon ini wan tak-go-tak-kon nanga sma di e trowe a gosontoe leri (2 Tim. 2:14-19); Tit. 1:7-9). Disi no wani taki dati wan sma no kan aksi opregti wan aksi foe wan afersi di a no e froestan. Ma foe tan hori nanga tranga-jesi na wan prakseri, ben sa kan tjari foe soso broeja kon. Efoe son sma abi jeje jepi fanowdoe, dan a no de foe prakseri dati wan joisti fasi foe leri de, èn dati de nanga „safrifasi”. — 2 Tim. 2:23-26.
9. San a de aksi foe opziener efoe den wani leri tapoe wan boen fasi?
9 Opziener moe „wroko tranga tapoe a tori foe taki nanga foe leri sma”, no wawan foe miti dorosé sma nanga a waarheid, ma foe bow a gemeente na jeje fasi (1 Tim. 5:17). A de teki ten nanga moeiti foe sreka joesrefi tapoe praktis bijbellezing nanga pisi foe konmakandra di e gi kowroe ati èn di e leri sma wan sani. Te wan sma e studeri alaten den Santa Boekoe nanga den boekoe foe a Wachttorengenootschap, schema foe lezing nanga tra materiaal foe „a getrouw nanga koni srafoe”, dan takiman nanga leriman kan wroko tapoe foeroe moi punt di sa meki den man foe gi gosontoe leri. Èn te den e tron wan eksempre ini taki, dan opziener e sori nanga dati, dati den e poti densrefi krinkrin tapoe a wroko foe den na wan joisti fasi.
Hori alaten „wan toemsi boen waka nanga libi”
10, 11. (a) Sortoe verband de mindri a waka nanga libi foe wan sma nanga hemel koni? (b) San e pasa te koni foe tapoesé sori, te joe teki disi gersi nanga situwasi pe takroe fasi e kon na krin?
10 Gemeente opziener moe tron sosrefi toe wan eksempre ini „waka nanga libi”. Efoe den wani si winimarki foe wan toemsi moi waka nanga libi, dan den abi hemel koni nanga froestan fanowdoe. Na discipel Jakobus e poti krakti tapoe a punt disi di a ben taki: „Soema de koni èn nanga froestan na oen mindri? Meki a sori en toemsi boen waka nanga libi nanga jepi foe en wroko nanga wan safrifasi di de foe koni. Ma efoe oen abi bita djaroesoe nanga stré ini oen ati, no meki bigi èn no lé gi na waarheid. Disi no de na koni di e komoto foe tapoesé, ma a de foe grontapoe, a abi wan metifasi, a de leki ogri jeje. Bikasi pe djaroesoe nanga stré de, drape broeja nanga ala sortoe veragti sani de.” — Jak. 3:13-16; 1 Petrus 2:12.
11 Na matifasi nanga kompe-owroeman, nanga sosrefi toe nanga tra memre foe a gemeente, e kon tranga nanga wan toemsi boen waka nanga libi di e sori hemel koni (Jak. 3:17, 18). Na a tra sé, dan den matifasi disi e pori nanga stré, djaroesoe, meki bigi nanga tra grontapoe, meti, ogri-jeje fasi. Den takroe fasi disi no moe de a mindri a pipel foe Gado. Te wan sma e handri nanga ensrefi wawan ini prakseri, dan a de misi ibri fundamenti foe kristen lobi. Efoe wan sma wani sori wan toemsi boen waka nanga libi, dan wan sma no sa doe „noti foe stré ede ofoe prakseri ensrefi nomo, ma nanga sakafasi foe loekoe na trawan moro hé leki ensrefi” (Fil. 2:3). So wan waka nanga libi de wan boen eksempre troetroe, foedi a de sori wan jejefasi leki di Kristus Jezus ben sori. — Fil. 2:5-8.
12. (a) Fa wi moe si èn handri nanga oemasma foe a gemeente? (b) Sortoe fasi foe libi a de aksi foe opziener te den pasa Gado moreel wet? (c) Sortoe frantwortoe owroeman e tjari tapoe a tori foe a hori na wan froetrowfasi afersi foe wan kroetoe?
12 Efoe opziener nanga tra frantwortoe brada wani gi wan toemsi boen eksempre, dan alaten den moe tjari densrefi tapoe wan boen fasi na fesi foe a tra sekse. Den moe si „owroe oema leki mama” èn handri nanga „jongoe oema leki sisa nanga ala krinfasi” (1 Tim 5:1, 2). De alaten nanga ai, sodati joe no kon slap foe de trouw na den hé moreel markitiki foe Gado. Efoe definitief bewijs de, dati son wan e proeberi foe pori trawan ini moreel fasi, dan opziener moe handri gaw foe hori na organisatie krin, sabi dati Jehovah e aksi „strafoe foe ala den sani disi” (1 Thess. 4:3-8). Na a srefi ten, ondro-herder di poti a wroko moe dwengi densrefi foe no tjari kroetoe afersi kon na krin, pe sma de na ini di ben pasa Gado regtvaardiki gronprakseri. Den sortoe sani disi moe hori tapoe wan froetrowfasi. Soso te owroeman teki fesi tapoe wan joisti fasi èn e sori wan sondro fowtoe waka nanga libi, wi kan froewakti foe a gemeente, dati a poti dorodoro froetrow ini den sortoe owroeman disi.
Wan boen eksempre „ini lobi”
13. Sortoe geest de fanowdoe, efoe opziener wani gi nanga winimarki wan toemsi boen eksempre, èn foe sanede?
13 Opziener no kan dc troetroe nanga winimarki „wan eksempre gi den getrouwwan” efoe den no e sori na geest foe lobi. Baka di Paulus ben memre Timoteus, dati a ben „moe wiki na presenti foe Gado di de ini en”, a ben taki: „Bikasi Gado no ben gi wi wan geest foe frede, ma foe krakti èn foe lobi èn foe gosontoe froestan” (2 Tim. 1:6, 7). Wi sabi sortoe boen krakti a ben abi ini wi libi, dati Gado ben sori na fasi lobi disi gi wi. Te opziener de toemsi moi eksempre ini na sori foe na jeje froktoe lobi, dan disi e sori moro leki sortoe tra sani toe fa den e denki foe den kompe-aanbegiman foe Jehovah. Lobi abi wan bigi hari-krakti èn a de tjari wi foe soekoe a rai nanga jepi foe lobi ondro-herder. Wi e waarderi na waran foe a belangstelling foe den nanga na opregti lostoe foe den foe jepi wi go a fesi na jeje fasi.
14. Sortoe okasi wan trow opziener abi foe sori dati a „lobi en wefi leki en égi skin” èn sortoe okasi disi e gi en wefi?
14 Foe go doro foe tjari densrefi leki man nanga jeje fasi dan opziener sa feti „foe meki ala den afersi foe den pasa nanga lobi” (1 Kor. 16:13, 14). Efoe den man disi trow, den „moe lobi . . . den wefi leki den égi skin”, di den e gi njanjan èn di den e sorgoe (Ef. 5:28, 29). Wan opziener e froestan omeni sorgoe en égi skin abi fanowdoe ala dé. A so fasi en wefi sosrefi toe abi fanowdoe foe aandacht nanga geregelde jeje sorgoe èn disi sa jepi en foe doe en ondersteunende rol leki wan wefi tapoe wan fasi „di fiti na Masra” (Kol. 3:18, 19). Wan takimakandra foe a détekst foe na Jariboekoe foe Jehovah Kotoigi, a lési makandra foe materiaal ini den boekoe foe a Genootschap, sreka densrefi tapoe kristen konmakandra, èn na soekoe foe okasi foe begi makandra, de alamala sori foe so wan lobi. Sosrefi toe owroeman moe teki den okasi foe jepi den wefi foe den tapoe tra fasi. Disi, nanga sosrefi toe na joisti kweki foe pikin di a man nanga oema kan abi, sa de a bewijsi, dati a man na wan joisti fasi e teki fesi ini en égi osoframiri èn na so fasi e doro wan foe den marki foe a bijbel foe de wan opziener. — 1 Tim. 3:4, 5; 5:8.
15. Fa wan opziener kan sori dati a „kan sorgoe gi a gemeente foe Gado” èn dati a abi lobi?
15 Wan opziener di e hori wan toemsi boen seti foe na osofamiri, e sori troetroe, dati a „kan sorgoe gi na gemeente foe Gado” (1 Tim. 3:5). Te wan owroeman e doe en gemeente frantwortoe, dan a de sori wan libi belangstelling gi den sma di abi a srefi bribi leki en (Gal. 6:9, 10). Opziener e sreka densrefi tapoe gemeente konmakandra èn e hori den disi, e go loekoe den sikiwan nanga trawan di de ini mofina omstandigheden èn den e teki prati alaten na a publiki bekenti foe a „boen njoensoe”. Ala disi de wan eksempre foe lobi gi Gado, gi den „skapoe” di de na a sorgoe foe en èn gi den sma di den owroeman disi e préki a kownoekondreboskopoe gi.
16. San ben bewégi Paulus foe handri nanga den moro boen belang foe Korinte na en fesi èn wi e feni a srefi fasi disi mindri kristen opziener ini disi ten?
16 A de pasa toe dati opziener e feni en fanowdoe ten-na-ten foe gi rai ofoe tranga leri. A de na lostoe foe den foe jepi aparti sma èn foe kibri a gemeente. Ini disi den owroeman e waka baka na apostel Paulus. Foedi lobi ben poesoe en, meki Paulus ben handri nanga den moro boen belang foe a gemeente Korinte na en fesi, aladi disi ben aksi foeroe foe en. A ben skrifi: „Komoto foe foeroe benawtoe nanga pen na ati mi ben skrifi oenoe, nanga foeroe watra-ai, no foe meki oenoe sari, ma dati oenoe ben sa sabi a lobi di mi abi spesroetoe gi oenoe” (2 Kor. 2:4). Aladi son sma ini a gemeente dati no ben waarderi den sondro weri ofoe gridifasi moeiti foe Paulus, tog a ben de klari foe span ensrefi moro fara foe a boen foe den, bikasi a ben taki: „Foe taki foe mi sé, mi sa wani tjari den kostoe nanga prisiri, èn mi sa wani foe gi misrefi krinkrin foe oenoe sili. Efoe mi lobi oenoe pasa marki, oenoe moe lobi mi moro pikinso dan?” (2 Kor. 12:15). Soleki Paulus, na so foeroe opziener e span densrefi nanga den heri ati. Den e doe disi foedi den lobi den brada foe den èn na so fasi den e gi wan eksempre di de foe prijse.
17. Sortoe krakti na toemsi boen eksempre foe foeroe opziener ben abi tapoe na organisatie foe Gado pipel, èn foe datede sortoe firi getrouw ondro-herder e firi?
17 Joe abi opziener di foe jari, letterlijk ben gi densrefi krinkrin foe dini Jehovah èn foe sorgoe foe den fanowdoe foe den jeje brada nanga sisa foe den. Na eksempre di den man disi ben gi ben wroko boen gi na geest foe lobi ini na heri organisatie foe Gado pipel. Nanga den sortoe eksempre disi ini a loekoe nanga sorgoe foe „na ipi” ini den moeiliki dé disi, na froetrow foe wi kon moro tranga. Foedi den ondro-herder disi abi troetroe lobi nanga sorgoe gi „na ipi”, den kan taki a srefi leki Paulus, di ben skrifi: „Meki na Masra meki oenoe kon moro foeroe, ja, kon foeroe pasa marki, ini lobi gi makandra èn gi ala sma, soleki wi toe abi dati gi oenoe; foe meki oenoe ati de stanvaste, sondro fowtoe ini lobi na fesi foe wi Gado èn Tata na a de no-ja foe wi Masra Jezus nanga ala en santawan.” — 1 Thess. 3:12, 13.
Sori bribi, e tranga kompebribiman
18. Na sortoe wroko opziener moe kan sori leki wan bewijsi dati den abi troetroe bribi?
18 Aladi foeroe sma ini disi ten e taki tranga dati den de anga na wan kerki, tog a de so dati „bribi no de a goedoe foe ala sma” (2 Thess. 3:2). Ma efoe wi wani prisiri Gado, dan wi moe abi bribi (Hebr. 11:6). Ini disi toe kristen opziener de wan eksempre gi ala sma — „ini bribi”. Boiti dati, den moe kan bewijsi a troefasi foe den bribi nanga jepi foe doe ofoe wroko (Jak. 2:14-26). Na ini den wroko disi de, den doe leki na trowstoe foe siki kompe-bribiman, na sorgoe foe den mofina sma na mindri den, èn na abi foe wan geregelde prati ini a meki bekenti foe „a boen njoensoe foe a kownoekondre”. — Matt. 24:14; Teki gersi Matt. 25:24-40.
19. Foe sanede bribi de fanowdoe, èn a de meki foeroe sma doe san?
19 A wani taki foeroe, dati Paulus alaten e poti krakti tapoe a punt, dati „a regtvaardiki wan sa libi foe en bribi ede” (Rom. 1:17; Gal. 3:11; Hebr. 10:38). Bribi no e gi wi wawan wan loekoe san o kon ini a ten di e kon, ma a de tjari wi sosrefi toe foe doe wan sani. Foe eksempre, bribi de fanowdoe foe teki na jepi- ofoe gewone pionierwroko èn moro fara foe doe dienst leki foeroeten-prékiman foe a „boen njoensoe” (Mark. 13:10). Foeroe opziener nanga dinari ini na diniwroko e seti sani so dati den e teki prati na a activiteit disi, awinsi den abi osofamiri-frantwortoe, nanga tra verplekti. Foeroe foe den e tjari bepaalde kenki kon ini den grontapoe wroko nanga tra afersi foe den, sodati den kan poti moro prakseri tapoe gemeente-frantwortoe. Sosrefi toe, wan troetroe bribi de fanowdoe foe abi wan rechtstreeks prati na a préki foe a „boen njoensoe”, foe doe wan pisi tapoe kristelek bigi konmakandra, foe bow kownoekondre zaal ofoe foe teki prati na difrenti ala dé theocratis activiteit. Foetroe, a de aksi bribi foe opziener nanga ala tra sma foe a pipel foe Jehovah, foe bribi, foe libi, foe wroko èn foe aanbegi akroederi Gado Wortoe.
20. (a) O prenspari bribi de foe kakafoetoe tranga gi Didibri? (b) Fa opziener kan jepi spesroetoe den kompe-bribiman foe den foe wini tesi foe bribi?
20 Bribi de sosrefi toe fanowdoe foe kakafoetoe gi moeilijkheid èn foe wini tesi foe bribi. Baka di Petrus ben gi tranga na owroeman foe de eksempre foe „na ipi”, a ben warskow: „Hori oenoe prakseri na wan, de nanga ai. Na feanti foe oenoe, Didibri, e waka lontoe leki wan lew di e bari, e soekoe foe njan wan sma. Ma kakafoetoe gi en, fasti ini bribi, aladi oenoe sabi dati den srefi sani disi ini a fasi foe pina, ini a heri gemeenschap foe oenoe brada ini a grontapoe e feni presi” (1 Petr. 5:8, 9). Opziener alaten moe loekoe boen foe na tactiek nanga methode di Didibri e gebroiki foe hari Gado dienstknegti go na wan sépasi, foe kori den ofoe foe njan den. Noiti kristensma nanga wan firi toe satisfaksi moe dodoi densrefi go ini sribi tapoe a situwasi di den moe kakafoetoe gi, èn ondro-herder foe „na ipi” di poti na wroko, moe de ekstra nanga opo ai. Ini foeroe kondre pe Jehovah Kotoigi e miti nanga moeilijkheid nanga tesi, dan ondrofenitori sori dati opziener ben de na a fesi foe a stré. Nanga froetrow na Jehovah den opziener disi e tan jepi den kompe-bribiman foe den na difrenti fasi, aladi den e kakafoetoe gi na Gensman, e begi faja èn e gebroiki na schild foe bribi nanga tra pisi foe na jeje fetisani. — Ef. 6:10-18.
21. Sortoe jepi opziener e gi na a „ipi” tapoe a tori foe sori bribi èn foe prisiri densrefi ini a howpoe nanga jepi foe den égi eksempre foe den bribi foe den?
21 Opziener moe gi na jepi, di sa meki „na ipi” waka ini bribi èn di sa meki den prisiri ini na howpoe di de na den fesi. Foedi Jehovah Gado nanga en Manpikin no de foe si, wi no kan si den ini na kondre foe hemel. Ma dati den e handri nanga wi de wan troetroe sani (Hebr. 11:27). San e pasa leki wan bakapisi foe a tiri foe den, de wan kon troe foe san ben taki na fesi ini bijbel. Opziener moe jepi den jeje brada nanga sisa foe den foe froestan na sani disi èn foe den kan si dati den memre foe na „bigi ipi” e tja kon makandra ini bigi nomroe. Jehovah e blesi a wroko di e doe (Jes. 60:22; Openb. 7:9). Wi e ondrofeni na jeje sekerfasi di a ben pramisi (Ps. 91:1, 2). Den froktoe foe Jehovah santa jeje, nanga bribi toe, de troetroe pasa marki na mindri Gado pipel ini disi ten (Gal. 5:22, 23; teki gersi Romeini 1:8). Wi kan si nanga wi ai foe bribi na tjari kon troe foe den kroetoe foe Jehovah (Openb. 11:16-18; 16:14, 16). Baka na „bigi benawtoe”, wan njoen seti sa bigin èn na grontapoe sa tjari kon ini wan paradijs-toestand (Matt. 24:21; Luk. 23:43; 2 Petr. 3:11-13). Wan opobaka sa kon (Joh. 5:28, 29; Tori foe den Apostel 24:15). Na libisma famiri sa tjari kon baka ini wan vrédefasi matifasi nanga Gado, aladi den sma di bewijsi dati den de gi jesi ini a ten foe a laatste tesi, sa kisi tego libi (Openb. 20:7-10). Ma aladi wi e loekoe ini a ten di e kon, tog wi abi foeroe waarderi gi den someni tin-doesoen opziener, di de doe dienst now leki eksempre foe bribi, loyaal ondro-herder di e doe someni foe jepi „na ipi” foe prisiri ini na howpoe di de na den fesi. — Rom. 12:12.
„Ini krinfasi” — warti eksempre
22. (a) Fa na teki ini prakseri foe Filipenzen 4:8 nanga Jakobus 3:17 kan jepi opziener foe de eksempre ini krin fasi? (b) Fa opziener moe proeberi foe tan krin te den e taki foe poti brada na frantwortoe positie ini na gemeente?
22 Te foe kaba opziener e kisi tranga foe de „wan eksempre gi den getrouwwan ini krinfasi”. Disi wani taki moro leki foe de krin ini prakseri èn ini moreel waka èn libi. A de krin dati den moe loekoe dati den geest moe de tapoe krin sani (Fil. 4:8; Jak. 3:17). Ma te opziener wani tan krin, dan sosrefi toe den moe sori taki den abi wan boen kroetoe te den e loekoe brada di de boen foe frantwortoe ini na gemeente. Den koni foe den moe loekoe finifini ini na leti foe den marki foe a bijbel. Noiti égi mati nanga famiri moe de favoriet. Efoe degedege de foe a moreel waka nanga libi foe wan sma, meki ten nanga sani di kon na krin poeroe ala den sortoe degedege dati. Disi ben sa de akroederi na gosontoe rai ini 1 Timoteus 5:22: „No poti noiti esesi anoe na tapoe wan sma; no abi sosrefi toe prati na a sondoe foe trawan; kibri joe krinfasi.”
23. San sa jepi opziener foe hori den krinfasi te den e behandel kroetoe-afersi?
23 Opziener e komoto na a pasi foe teki prati na a sondoe foe trawan, te den e handri kroetoe afersi tapoe wan joisti fasi. Te den e handri geval foe ogridoe, dan owroeman moe de nanga sari-atifasi te den omstandigheden e aksi sari-atifasi, ma den no moe loekoe pasa sondoe ofoe go esesi abra sondoe (Spr. 28:13; Jak. 2:13; teki gersi Judas 3-15, 22, 23). Owroeman di poti na wroko moe loekoe boen dati partijfasi, ofoe firi hari den te den e arki na den verklari foe sma di doe ogri ofoe na a kotoigi foe trawan. Getrouw ondro-herder sa hori densrefi krin, te den sa meki bijbel gronprakseri tiri den ini ibri bosroiti di den e teki ini den sortoe geval disi.
24. San sa jepi opziener foe taki a srefi leki Paulus ini 1 Korinte 11:1?
24 Te den tron eksempre ini den fasi di kari dja na fesi, dan ala getrouw opziener leki Paulus kan taki nanga wan boen konsensi: „Waka na mi baka, soleki mi e waka baka Kristus” (1 Kor. 11:1). Aladi na apostel ben sabi en égi swakifasi, a ben kan taki nanga froetrow, dati a ben waka baka Kristus. A srefi kan taki foe opziener ini disi ten, di e feti foe miti den marki foe Gado.
Na gemeente kisi tranga foe taki a wortoe fri èn sondro frede
25. Sortoe winimarki kan kon ini a gemeente leki wan bakapisi foe a blesi foe Gado, te brada waka baka a boen eksempre foe kristen opziener?
25 Sortoe bakapisi wi kan froewakti te sma sa waka baka na eksempre di getrouw ondroherder foe „na ipi” foe Gado ben gi? We, ala sma ini na gemeente sa kisi tranga foe taki a wortoe foe Gado fri èn sondro frede, aladi den e hori wan toemsi boen waka nanga libi! (Tori foe den Apostel 4:28-31; 1 Petr. 2:12). Na froktoe lobi sa tjari kon na krin dati a gemeente abi den troe discipel foe Kristus, èn disi sa hari tra sma foe tai densrefi nanga Gado pipel (Zach. 8:23; Joh. 13:34, 35). Wan actief bribi sa moe sori, foedi den sortoe wroko e doe leki a prèki foe a „boen njoensoe”, a meki foe discipel èn a waka baka wan fasi foe libi pe wan sma e frede Gado (Matt. 24:14; 28:19, 20). Foedi ala sma di e proeberi foe kisi na boen-ati foe Gado e libi wan krin libi, dan na heri gemeente sa hori krin. Foe datede, meki makandra wi dini ini getrouwfasi, foeroe nanga waarderi foe den blesi di wi abi leki Gado pipel. Èn meki wi lobifasi hemel Tata tan blesi wi wanfasi moeiti te wi e wroko makandra nanga kristen opziener di de toemsi boen eksempre gi „na ipi”.