Sori broko-ede gi na „ipi foe Gado”
„Poti prakseri na oensrefi nanga na heri ipi, di na santa jeje ben poti oen na den mindri leki opziener, foe loekoe èn tjari a gemeente foe Gado, di a ben bai nanga a broedoe foe en égi Manpikin.” — Tori foe den Apostel 20:28.
1. Fa Jezus ben sori bigi broko-ede gi den sma di a ben agersi nanga skapoe?
NOWAN sma na grontapoe ben sori oiti moro broko-ede gi den memre foe a libisma-famiri leki Jezus Kristus, a Bigi Eksempre. A ben kari den sma di ben arki na en sten, en „skapoe”. Èn leki a Toemsi Boen Herder a ben gi en sili abra ofoe a ben gi en libi foe a boen foe den (Joh. 10:11, 27). Baka di a ben opobaka foe dede, Jezus ben sori Petrus a fanowdoe foe poti spesroetoe prakseri tapoe den skapoe disi. Fa Jezus ben doe disi? Ini wan fasi, di ben gi Petrus tranga ini a tra pisi foe en grontapoe libi.
2. (a) Fa Petrus ben doe, leki fa Johannes 21:15-17 e sori, nanga den aksi di en Masra ben aksi en? (b) San Jezus ben poti krakti a tapoe ini disi? Fa?
2 Dri tron Jezus ben aksi Petrus a srefi aksi. Toe tron a ben aksi: ’Simon joe lobi mi?’ Te foe kaba Jezus ben aksi: „Simon, manpikin foe Johannes, joe e firi lobi gi mi?” Baka di dri tron a srefi aksi ben aksi en, Petrus ben kon sari èn a ben gi en Masra na djaranti nanga tranga: „Joe sabi ala sani; joe sabi tog dati mi e firi lobi gi joe.” Ja, Jezus ben sabi heri boen a lobi foe Petrus gi en. Ma a sani ben de, dati na apostel ben moe sori disi ini wan langa pisi ten. Fa? Foe sori broko-ede gi den „skapoe”. Ibri tron baka di Petrus ben piki a srefi aksi nanga Ja, dan Jezus ben meki a punt foe a tori kon boen na fesi, di a taki: (1) „Gi mi pikin skapoe njanjan”, (2) „Loekoe èn tjari mi pikin skapoe” (3) „Gi mi pikin skapoe njanjan.” (Joh. 21:15-17). Na so fasi Jezus no wawan ben poti krakti heri boen tapoe en égi broko-ede gi den „skapoe”, ma tapoe Petrus hebi frantwortoe foe sorgoe foe den, soleki en Masra ben tjari disi kon na krin tapoe wan krakti fasi.
3. (a) Fa Petrus ben bewijsi en lobi gi na Toemsi Boen Herder? (b) San e sori dati a no Petrus ben de na enkri wan di ben moe sori broko-ede gi na „ipi”?
3 Disi ben de wan ondrofeni gi Petrus di a no kan frigiti. Jezus wortoe ben doro boen dipi ini Petrus ati. Leki wan bewijsi foe en lobi gi a Toemsi Boen Herder, Jezus Kristus, dan Petrus noiti ben sa frigiti foe gi den „skapoe” njanjan. Nanga foeroe lobi èn nanga en heri konsensi a ben sa doe moeiti foe loekoe èn tjari „na ipi”. So wan 30 jari a baka, Petrus ben skrifi gi „den pisiten wakaman di e libi panja”, dati wani taki, gi den sma di ben tron discipel foe Jezus Kristus. Leki wan pisi foe a „ipi foe Gado” a de memre den na a kon fri foe den foe den waka nanga libi di no ben meki froktoe. Fa na fri dati ben doe kon? No nanga wan bai di de nanga den gewone sani leki solfro nanga gowtoe, ma nanga „diri broedoe, leki di foe wan lam sondro doti nanga vlaka, ja, foe Kristus” (1 Petr. 1:1, 18, 19). Petrus ben sabi dati disi ben de wan hé prijs. A ben kostoe Jehovah Gado na ofrandi foe en wan enkri gebore Manpikin, di a ben seni na a grontapoe disi foe gi wan verloesoe-paiman gi foeroe sma (Matt. 20:28; Joh. 3:16). Na a ten di Petrus ben skrifi en fosi brifi, dan na nomroe foe den memre foe a „ipi” ben kon tron foeroe doesoen sma. Dan moro „skapoe” ben de foe datede leki Petrus wawan ben kan sorgoe. Ma makandra nanga Petrus moro bekwaam man ben de di ben sori broko-ede gi na „ipi” foe gi disi njanjan, foe tjari èn kibri den. Densrefi e froestan toe dati a „ipi” de foe Jehovah. Èn ini wi ten someni tin doesoen jeje ondro-herder de, di kisi na frantwortoe foe loekoe èn tjari na „ipi foe Gado” di den moe sorgoe, èn den e froestan a punt disi krinkrin.
4. Sortoe boen rai foe a loekoe èn tjari foe den „skapoe” Petrus ben gi di a ben skrifi den owroeman ini na kristen gemeente?
4 Di Petrus ondro na krakti foe Gado santa jeje ben skrifi en fosi brifi, a ben kan memre ensrefi san Jezus ben poti go ini en froestan nanga ati tapoe a tori foe a loekoe èn tjari foe den „skapoe”. Disi e kon na krin ini den vermane di na apostel e taki no wawan gi den fosi-eeuw ondro-herder, ma sosrefi toe gi den jeje owroeman na mindri Gado pipel ini disi ten. Petrus ben skrifi: „Foe datede mi e gi a vermane disi na den owroeman na oen mindri, bikasi mi srefi na wan owroeman ne leki den èn wan kotoigi foe a pina foe a Kristus, wan sma di e teki prati srefi na a glori di sa kon na krin: Loekoe èn tjari na ipi foe Gado di de na a sorgoe foe oen, no ondro dwengi, ma wani foe doe sani; no nanga lobi foe falsi wini, ma de klari foe doe; no leki masra foe den di de a goedoe foe Gado, ma tron eksempre foe na ipi. Èn te na Granherder kon na krin, oen sa kisi na glori-kroon, di no e flaw.” — 1 Petr. 5:1-4.
Sorgoe nanga foeroe lobi gi na „ipi foe Gado”
5. (a) Fa na fasi foe wan kristen opziener moe de, efoe a wani doe en frantwortoe foe na „ipi” tapoe wan boen fasi? (b) Foe sanede wan opziener ini disi ten kan si den sani na a srefi fasi leki Petrus ben si den?
5 Leki wan ai-kotoigi foe a pina foe na Kristus, Petrus ben kisi a firi foe sori nanga tranga o prenspari a de foe sori broko-ede gi a „ipi foe Gado”. A srefi broko-ede di a Moro Prenspari Herder, Jezus Kristus ben sori, ala sma di e loekoe èn tjari a „ipi” moe sori. Ma wan kristen opziener no ben sa kan doe disi sref-srefi, efoe a ben abi na firi dati a ben doe dienst ondro dwengi. Nowan enkri owroeman ini disi ten moe abi na firi dati a moe doe dienst foedi a kisi dwengi foe dati. Aladi a tjari foe a grani frantwortoe disi e gi foeroe wroko, wan lobifasi ondro-herder sa sori dati a abi na lostoe foe jepi èn dini tra sma. Ma a sa sori a geest dati efoe a abi a srefi jejefasi leki Jezus ben abi, di ben sori sakafasi èn ben de klari foe ondrofeni pina (Fil. 2:5-8; 1 Petr. 4:1). Efoe wan owroeman e froestan, dati ensrefi de wan pisi foe „na ipi” ondro na sorgoe foe a Bigi Herder, Jehovah Gado, èn dati a moe gi frantwortoe na En nanga a Toemsi Boen Herder, Jezus Kristus, èn no na wan libisma, dan a sa doe dienst nanga ala prisiri èn sondro kragi (1 Petr. 2:25). Winsi opziener ini disi ten no ben de ai-kotoigi foe a pina foe Jezus leki Petrus, tog den abi na boenede foe abi den bijbeltori foe Kristus libi nanga diniwroko finifini. Soboen, den kan si den sani soleki Petrus ben si den èn na so fasi abi a srefi geest leki di foe na apostel te a de kon tapoe a tori foe loekoe èn tjari na „ipi”.
6. San opziener moe hori ini prakseri ini na kontakti foe den nanga na „ipi”?
6 Te wan kristen ondroherder wani gi wan joisti eksempre, dan a no moe proeberi foe kisi falsi ofoe gridifasi wini ofoe kon na fesi tapoe wan fasi di pasa marki. Efoe „bigi grani” de ini na tori, dan disi e kon foedi wan sma de foe en brada kan gebroiki en, dati wan sma kan go na en èn den e dini den jeje afersi foe den. Foedi den boen-eksempre owroeman sabi dati a „ipi” de foe Jehovah, di ben bai en nanga a broedoe foe en Manpikin, „den no e de leki masra tapoe den sma di de leki a goedoe foe Gado”. Na presi foe dati, den ondro-herder disi e handri „a ipi” disi safri èn foe kibri den, sodati den e waka baka na rai nanga na eksempre, di a Toemsi Boen Herder ben gi. — Matt. 20:25-27; Tit. 1:7; Teki gersi Ezechiël 34:2-4; Judas 16.
7. Na sortoe fasi foeroe opziener ben sori troetroe broko-ede gi na „ipi”?
7 Wi moe erken troetroe dati a moro bigi pisi foe den kristen opziener ini disi ten, e sori joisti broko-ede gi na „ipi” tapoe difrenti fasi. A de kostoe den foeroe moeiti nanga ten foe gi den „skapoe” njanjan, foedi den e poti spesroetoe prakseri na den aparti sma èn foedi den e teki fesi tapoe gemeente-konmakandra sodati den e gi wan toemsi moi eksempre na den kompe-bribiman (1 Tim. 5:17). Loekoe pikinso toe a toemsi moi tiri di ondroherder e gi ini a velddienstactiviteit nanga den heri konsensi foe soekoe tra sma di gersi skapoe èn foe meki discipel (Matt. 28:19, 20; 2 Tim. 4:5). Èn san wi kan taki foe a sorgoe di e sori foe kibri a „ipi” gi grontapoe elementi èn gi den sma di ben sa wani foefoeroe na „ipi”? (Ef. 4:11-14; Kol. 2:8; Jud. 22, 23) Ini disi nanga foeroe tra fasi na „ipi foe Gado” abi foeroe wini foe ondro-herder, di e loekoe èn e tjari den foedi den e broko den ede tapoe wan lobifasi foe na tanboen foe den.
Warti leri gi wi ini disi ten
8. Sortoe sani na apostel Paulus ben seti gi den owroeman foe Efese foe kan gi jeje tranga?
8 Te wi e lési den bijbel tori foe den sani di den fosi-eeuw opziener ben doe foe a boen foe „a ipi”, dan wi e froewondroe foe a toemsi moi eksemspre foe na apostel Paulus. Leki Petrus, en toe ben gi owroeman dekati. Di Paulus ben waka go na Jeruzalem, a ben meki den owroeman foe Efese konmakandra. Den ben abi, sondro foe degedege, foeroe waarderi gi na okasi foe de wan pisi ten nanga Paulus, soleki opziener ini disi ten e kon ten-na-ten na makandra foe kenki prakseri foe boen ondrofeni, foe bow makandra bribi èn foe kisi vermane foe a bijbel.
9. Fa a tori ini Tori foe den Apostel 20:18-21 e sori, dati Paulus ben de wan man foe Gado di ben offer ensrefi?
9 Wi kan leri wan toe warti leri foe a takimakandra foe Paulus nanga den opziener dati foe Efese. A tori ini Tori foe den Apostel 20:17-38 e gi wi wan moro dipi loekoe ini a fasi fa na apostel ben gi en brada wan eksempre, pe den owroeman foe Efese ben de na ini toe. Paulus ben de wan dinari foe a evangelium di ben spaar ensrefi èn di ben feni en switi foe waka na den difrenti pisi foe na district Asia? Kwet-kweti. A ben de wan man foe Gado di ben offer ensrefi èn di „nanga a moro bigi safrifasi ben dini Masra leki srafoe, nanga watra-ai èn tesi” ini a heri ten di a ben de drape (Tori foe den Apostel 20:18, 19). A no ben hori ensrefi na baka „foe leri ini publiki èn oso-foe-oso”, èn dati aladi gevaar ben de. Sosrefi toe a no ben frede foe san son sma foe a gemeenschap ben prakseri foe en ofoe foe den tapoe-skreki di den gensman ben taki. Paulus ben gi wan fini kotoigi ini a gebied. — Tori foe den Apostel 19:1 te nanga 20:1; 2 Korinte 1:8-11.
Loekoe èn tjari den skapoe ini ten foe vervolgoe
10. Fa foeroe disiten opziener ben waka baka Pualus ini den moeiti foe den foe jepi na „ipi” aladi pina kan kon gi densrefi?
10 Now na apostel ben de na pasi e go na Jeruzalem, sondro foe frede dati „boei nanga benawtoe” ben de drape e wakti en. A ben de klari efoe a ben de fanowdoe foe gi en libi, sodati en waka nanga libi ben kon na wan kaba ini getrouwfasi èn doe na diniwroko di a ben kisi foe Jezus (Tori foe dem Apostel 20:22-24). Fa dati ben de wan toemsi moi eksempre gi den opziener foe Efese! Paulus broko-ede no ben go wawan na ala sma di ben moe jere na „boen njoensoe”, ma sosrefi toe na den sma di ben abi na frantwortoe foe ferteri na boskopoe gi tra sma. Disi no de na sortoe foe broko-ede di ala kristen owroeman ini disi ten moe sori? Kolokoe, dati wi abi man na mindri di e waka baka na eksempre foe Paulus, foedi den de klari foe lasi den libi foe na „boen njoensoe” ede èn foe kibri den brada foe den. Ja, ini kondre pe kristen sma e ondrofeni hebi vervolgoe, dan foeroe ondro-herder ben tan loyaal na „a ipi”, aladi den frantwortoe man disi kande ben kan go na kondre pe den ben kan lon gwe foe so wan pina. A no langa pasa kaba, foe eksempre, wan owroeman di ben ondrofeni kaba, jari foe strafoe-oso nanga hebi fonfon, ben fisiti Amerkankondre foe kisi leri di ben gi na den memre foe a bijkantoro-personeel foe a Wachttorengenootschap. A ben de ini na okasi foe go na wan kondre pe nownow no wan vervolgoe de. Ma a ben teki na bosroiti foe go na a kondre pe a ben doe dienst, aladi a ben de bijna seker dati strafoe-oso èn takroe-ati vervolgoe, ben e wakti en. Leki someni tra kristen ondro-herder a de si a sorgoe foe na „ipi” leki wan diri grani dan en égi fri. Den sortoe opziener disi e verdini ala prijse. Fa a de wan toemsi boen sani dati den tan sorgoe gi „skapoe ini nowtoe”! — Teki gersi Jesaja 32:1, 2.
11. (a) Te joe loekoe Tori foe den Apostel 20:25-27, san ben de Paulus positie tapoe a tori foe broedoe, èn fa opziener ini disi ten kan teki a srefi positie? (b) Fa, èn dati de wan sani foe froestan, opziener e de nanga sma di den ben jepi na a bigin foe tron discipel?
11 Paulus ben „préki na kownoekondre” na mindri den sma di ben de now opziener ini Efese. Den ben jere a boskopoe foe en mofo. A ben tjari en ati kon na doro gi den nanga trawan foedi a ben meki bekenti ala den rai foe Gado èn no en égi prakseri. Foe datede meki en konsensi ben de soifri. Broedoe paiman no ben kan skrifi poti tapoe en nen foedi a ben libi en na wan sé foe gi kotoigi (Tori foe den Apostel 20:25-27). Disi toe kan taki foe opziener ini disi ten foe tesi, moeilijkheid nanga pina, now di na wroko di de ini a gi foe kownoekondre-kotoigi na heri grontapoe, e kon na wan kaba. Opziener ini disi ten sabi dati foeroe sani anga na a fajafasi eksempre di den e sori te den e teki fesi ini a wroko. Foe na réde dati den e proeberi foe abi someni leki a kan wan prati na a meki bekenti foe a „boen njoensoe”. Na a fasi dati den e hori densrefi krin èn fri foe broedoe-paiman. Tra sma ini a gemeente e si dati den owroeman disi e teki fesi foe warskow den ogri sma èn foe soekoe den reti-ati sma. Leki wan bakapisi foe dati, dan den sortoe kompe-bribiman e kisi tranga foe waka baka na moi eksempre foe den. Soleki ini a geval foe den sma di Paulus ben jepi, a so foeroe sma di de wan pisi foe „a ipi”, ben kon ini kontakti nanga a waarheid na a bigin foedi opziener ben gi kotoigi ini a gebied foe den. Now di den sma disi tron wan pisi foe a gemeente, dan den opziener e sori wan moro bigi broko-ede gi den. — 1 Thess. 1:5, 6; 2:7, 8.
12. Fa wi moe froestan a verklari foe Paulus ini Tori foe den Apostel 20:22?
12 A bigi broko-ede foe Paulus gi den owroeman dati foe Efese, so toe gi a „ipi” di ben de na a sorgoe foe den, e kon na krin ini en wortoe: „Poti prakseri na oensrefi nanga a heri ipi, di na santa jeje ben poti oen a den mindri leki opziener, foe loekoe èn tjari a gemeente foe Gado di a ben bai nanga a broedoe foe en égi Manpikin” (Tori foe den Apostel 20:28). Ibri wan foe den man dati ben froestan boen na fanowdoe foe ondrosoekoe densrefi foe na hebi frantwortoe di ben de ini a loekoe èn tjari foe „na ipi”. Sosrefi toe den opziener dati ben moe tjari Paulus rai kon tapoe den leki wan skin foe owroeman. Den ben moe man wroko nanga makandra ini a sorgoe foe na „ipi”. A moro boen bakapisi ben sa kan kon wawan te foe den sé den ben sa denki èn handri ini wanfasi. Disi wawan ben sa sori kaba, dati den e broko-ede tranga nanga „na ipi”.
13. San wi kan taki foe na tjari kon ini wi libi foe Tori foe den Apostel 20:28?
13 Fa a de wan fiti sani foe gebroiki a vermane foe Paulus foe bow kristen owroeman ini disi ten! Te reizende opziener e konmakandra nanga gemeente owroeman, dan den Wortoe ini Tori foe den Apostel 20:28 foeroe tron ben teki leki wan fundamenti foe boen rai. Meki wi tjari kon na fesi dati san ben taki drape, no wani taki dati owroeman moe poti prakseri soso a den tapoe wawan. A heri skin foe owroeman ini ibri gemeente moro foeroe e tjari a frantwortoe foe sorgoe foe den spesroetoe fanowdoe foe „a ipi”. Disi de so, winsi ibri owroeman kande abi wan spesroetoe wroko di e jepi dati te foe kaba a marki disi kon. Opziener moe doe a frantwortoe foe den tapoe a tori foe a loekoe èn tjari foe den skapoe nanga den heri konsensi èn tapoe wan lobifasi, èn erken dati na „ipi” de diri gi Jehovah te joe loekoe a prijs di pai gi den. — Ef. 1:7.
De nanga ai gi den „wolfoe” di fadon komoto a bribi
14. (a) Sortoe warskow wi e feni ini Tori foe den Apostel 20:29, 30? (b) Foe sanede a ben kon na a joisti ten, dati Paulus ben warskow den opziener foe Efese?
14 Foedi Paulus ben sabi san sa ben pasa baka en dede nanga di foe den tra apostel, a ben gi a warskow disi: „Mi sabi dati baka mi gowe, wolfoe sa kon na inisé na oenoe foe kwinsi sma, èn di no sa handri na ipi nanga safrifasi, èn na oen égi mindri man sa opo di sa taki verkeerti sani foe hari den discipel na den baka” (Tori foe den Apostel 20:29, 30). Bakaten na apostel Petrus ben warskow, dati opportunist nanga sma di ben opo sekte, ben sa opo kon èn di ben poti den prakseri tapoe den sma di no ben kisi leri nanga den wan di no de fasti (ini bribi) èn nanga den sma di no e loekoe boen (2 Petr. 2:1-3; 3:15, 16). Solanga den apostel ben de ete, dan den ben wroko leki wan skotoe kontra den firi ini a sé dati. Ma den Santa Boekoe ben taki krin a fesi foe wan bigi fadon komoto foe bribi, èn disi ben pasa troetroe toe. A fadon komoto na bribi disi de te now ete ini a vorm foe a kristenheid. — 2 Thess. 2:6-10.
15. (a) Foe sanede meki den sma moe de nanga ai di e loekoe èn tjari „na ipi”? (b) Foe sanede meki owroeman wawan-tron moe wroko nanga na rai ini Romeini 16:17-19?
15 Ini a „ten disi foe a kaba” den kristen kotoigi foe Jehovah e kisi wan krakti warskow foe a fadon komoto na bribi (Dan. 12:4; Matt. 24:9-13). Foe dat-ede meki getrouw ondro-herder moe sori broko-ede gi „na ipi”, foedi den de nanga ai. Den moe opo ai foe kibri memre foe „na ipi” foe fadon go ini takroe demakandra (1 Kor. 15:33). Te wi loekoe a alaten druk foe a sé foe a no-krin grontapoe, dan a no de makriki foe hori wan gosontoe jeje loekoe nanga fasi. Foe datede meki ibri sma ini a gemeente moe poti prakseri tapoe a vermane: „Hori den na prakseri di e teki fesi na oen mindri, di ben taki a wortoe foe Gado gi oenoe, èn waka baka a bribi foe den, aladi oen e loekoe a kaba foe a waka nanga libi foe den” (Hebr. 13:7). Wawan tron, owroeman kan feni en fanowdoe foe gi rai foe a bijbel èn warskow kompe-bribiman dati den no moe meki den sma hari den di e soekoe den égi gridi lostoe nanga afersi na presi foe a jeje tanboen foe na heri „ipi”. Na krakti rai di Paulus e gi ini Romeini 16:17-19 wi kan tjari kon tapoe den afersi disi. „Now mi e vermane oenoe, brada, foe hori ai tapoe den, di kontrari a leri di oen ben leri, e tjari pratifasi nanga okasi foe naki foetoe kon, èn komoto na den pasi. Bikasi den sortoe sma dati no de srafoe foe wi Masra Kristus, ma foe den égi bere, èn nanga switi taki èn moi wortoe den e kori den ati foe den onnowselsma. Bikasi ala sma si a gi jesi foe oen. Ma mi wani dati oen de koni ini boen sani, ma sondro fowtoe ini ogri sani.”
Wroko foe a boen foe na „ipi”
16. (a) Tapoe san a de sori, dati Paulus ben moe vermane sontron nanga watra-ai? (b) San opziener ini disi ten wani foe doe nanga a fajafasi broko-ede foe den gi „na ipi”?
16 Foedi Paulus ben waka lontoe foeroe, dan a ben abi wan bradi loekoe foe san ben pasa ini den gemeente. A ben sabi dati difrenti problema nanga gevaar ben de. A ben de foe datede wan sani di ben de foe froestan, dati a ben gi den owroeman foe Efese tranga foe tan na ai na jeje fasi. Dri jari langa Paulus ben sori en lobi nanga broko-ede foe vermane den alaten, srefi ondro watra-ai (Tori foe den Apostel 20:31). A de krin dati a sortoe herder wroko dati ben tjari spanning kon tapoe a sé foe firi. A ben aksi foeroe foe Paulus foe sori a lobifasi nanga de-na-ai prakseri dati. A no moe de foe datede wan froewondroe sani, dati opziener ini disiten sontron e ondrofeni so wan sani, spesroetoe te hebi problema moe loekoe (Teki gersi 2 Korinte 2:4). Ini den sortoe situwasi disi na broko-ede foe den e go na a fosi presi na a „ipi”. Den e wroko faja foe hori a gemeente krin èn gosontoe na jejefasi èn fri foe sroedeki. — 1 Kor. 5:6; Gal. 5:7-10; Tit. 2:1.
17. (a) Sortoe prenspari punt wi kan leri foe den wortoe foe Paulus ini Tori foe den Apostel 20:32? (b) Sortoe bakapisi wi kan verwakti te sma nanga den afersi foe den ben gi abra na Jehovah?
17 Di Paulus ben gi den opziener foe Efese abra „na Gado èn na a wortoe foe en no-verdini boenfasi”, a ben kan abi na froetrow dati den ben de ini a moro boen anoe (Tori foe den Apostel 20:32). A so fasi toe, opziener ini disi ten kan libi na afersi na Gado, baka te den ben doe ala sani san den ben man foe gi rai nanga jepi ofoe sortoe tra tranga-leri toe di de fanowdoe te joe loekoe a bijbel. Ini situwasi pe wi lobi brada nanga sisa ini bribi e kisi kwinsi foe hebi problema, a de alaten wan trowstoe foe sabi, dati te den nanga den afersi sa gi abra na Jehovah ini begi, aladi wan sma e meki Jehovah Wortoe, jeje nanga organisatie gi na fanowdoe tiri, dan a bakapisi sa de akroederi en wani. Ondro den omstandigheid dati, dan den sani di e pasa, sa pasa foedi Gado gi pasi foe dati (Teki gersi 1 Petr. 2:23). Sosrefi dja toe a sori foe broko-ede gi „na ipi” e kon na krin, foedi a prakseri e poti tapoe na SMA di ini ibri situwasi kan doe a moro boen sani.
18. (a) Fa Paulus be si den sorgoe na skinfasi? (b) Fa opziener e sori broko-ede gi „na ipi” te den waka baka na eksempre foe Paulus ini disi?
18 Nanga wan soifri konsensi Paulus ben kan sori a tapoe, dati a no ben proeberi foe goedoe ensrefi nanga jepi foe en brada. A ben wroko nanga en égi anoe, èn a ben abi na so fasi na satisfaksi dati a ben sorgoe foe den sani foe en foe tan na libi (Tori foe den Apostel 20:33, 34). A de troe, dati, di a ben de ini pôti omstandigheid, a ben teki wan sani foe den kristen ini Filippi. Ma a no ben soekoe den sortoe presenti dati, ma moro foeroe na froktoe di a gi foe disi e tjari kon (Fil. 4:14-17). Soleki Paulus ben de nanga faja èn no ben doe dienst foe falsi wini ede, a so opziener ini wi ten kan gi wan toemsi moi eksempel foe sori dati den no lesi ofoe dati den e soekoe foe komoto ondro tranga wroko. A broko-ede foe den gi „na ipi” e tapoe den foe de wan hebi gi na gemeente. — 1 Thess. 3:6-10.
19. Sortoe krakti a abi tapoe opziener nanga na heri gemeente te den libi akroederi a gronprakseri ini Tori foe den Apostel 20:35?
19 Baka di den opziener dati foe Efese ben si san Paulus ben sori ini en libi nanga dienst, dan den ben abi wan sani di ben kan tjari den, te den ben doe moeiti foe assisteri den swakiwan èn foe gi densrefi foe bow a gemeente. Foedi den e handri akroederi na gronprakseri, dati „a moro kolokoe foe gi sani leki foe kisi sani”, den disiten kristen opziener e gi wan toemsi moi eksempel na trawan (Tori foe den Apostel 20:35). Ja, den no e gi wawan foeroe, ma den e gi toe sondro foe hori densrefi na baka. Dati den e tan doe disi, e meki dati a kolokoe foe alasma ini a gemeente foe Jehovah Kotoigi kon moro bigi.
„A sorgoe gi ala gemeente”
20. O fara Petrus nanga Paulus ben broko den ede nanga „na ipi”?
20 A de krin dati den toemsi moi eksempel di den sortoe apostel disi leki Petrus nanga Paulus ben gi, ben de aparti. Den ben gi densrefi krin krin foe na boen foe kompe-kristen èn no ben sori wawan toemsi bigi broko-ede gi wán gemeente, ma gi na heri gemeenschap foe den brada foe den (1 Petr. 2:17). Aladi foeroe pina, problema nanga tesi ben de, tog den apostel ben prakseri fosi na a jeje tanboen foe „na ipi”.
21. (a) Leki fa 2 Korinte 11:23-28 e sori, dan san ben de wan toe foe den „sani di ben de dorosé foe Paulus” èn di a ben ondrofeni? (b) Fa Paulus ben sori a bigi broko-ede di a ben abi gi trawan?
21 Di Paulus ben skrifi kompebribiman ini Korinte, a ben ferteri san a ben ondrofeni ini en diniwroko, soleki fonfon, strafoe-oso, sari ondrofeni nanga difrenti gevaar. Na apostel ben taki disi ete: „Boiti den sani disi di de foe dorosé foe mi, dan dé foe dé na sorgoe gi ala gemeente e kon na mi tapoe” (2 Kor. 11:23-28). Wi kan denki na wi srefi pikinso sortoe druk Paulus ben moe abi èn a broko-ede di a ben firi gi „ala gemeente”, bikasi a ben tan hori kontakti nanga wan toe kristen kompe (2 Tim. 4:9-13). A ben waka boen fara ini den prékiwaka foe en èn a ben fisiti den gemeente difrenti tron (Tori foe den Apostel 15:36). Den activiteit foe en foe a boen foe trawan ben aksi foeroe foe en. A ben hori lezing ini langa pisi ten èn a ben gi geregeld kotoigi ini synagoge, publiki presi èn oso-foe-oso (Tori foe den Apostel 17:2; 19:9, 10; 20:20). Foe sorgoe foe en fanowdoe na skinfasi èn foe no de wan hebi gi a gemeente, a ben de fanowdoe gi Paulus foe doe grontapoe wroko (Tori foe den apostel 18:1-3; 2 Thess. 3:8, 9). Na apostel ben gebroiki toe, foeroe ten ini a studeri foe Gado Wortoe, èn a sabi di a ben kisi na a fasi dati, . . . ben jepi en boen di ondro santa jeje a ben skrifi 14 foe den 27 boekoe foe den kristen Griki Boekoe. Paulus ben abi en troetroe druk, ma a ben go doro èn alaten a ben sori wan bigi broko-ede gi „na ipi”.
22, 23. (a) San de wantoe foe den fasi ini wi ten foe gi „na ipi foe Gado” sorgoe? (b) Foe san ala den seti disi de wan bewijsi, èn sortoe krakti ala disi moe abi tapoe wi?
22 Sosrefi toe now, foeroe wroko ben doe foe na boen foe „na ipi foe Gado”. Denki pikinso, sortoe prakseri moe gi na den fanowdoe foe den moro leki 42.000 gemeente foe Jehovah pipel di de now. A „getrouw nanga koni srafoe” e gi sorgoe dati geregeld jeje njanjan kon (Matt. 24:45-47). Sosrefi toe, a de so dati programma e meki geregeld foe gemeentekonmakandra, kringkonmakandra nanga districtscongres foe gi kristensma na okasi foe konmakandra foe studi, aanbegi, nanga demakandra di e bow op (Hebr. 10:23-25). Reizende opziener e seni go foe fisiti den gemeente èn foe sorgoe ini den spesroetoe fanowdoe (Teki gersi Tori foe den Apostel 16:4, 5). Moro fara, brifi nanga wantoe sani nanga rai nanga dekati e seni go na den gemeente nanga den skin foe owroeman (Teki gersi Filippi 1:1; 1 Petr. 5:12; Judas 3). Sosrefi toe tra sani de di seti, foeroe foe wi kan kari den, sodati „na ipi foe Gado” kan njan boen foe dati na jeje fasi nanga tra fasi.
23 A wroko disi e aksi boen foeroe ten, moeiti, nanga onkostoe. Ma foe san disi de wan bewijsi? A de sori dati Jehovah e sorgoe gi en pipel. Nanga jepi foe en Manpikin, na Toemsi Boen Herder, Gado e sori en toemsi moi Herder-krakti (Jes. 40:10, 11). Someni tindoesoen ondro-herder ben poti nanga jepi foe santa jeje èn den abi wan prati ini a loekoe èn tjari foe „na ipi foe Gado”. Ini disi a lobi sorgoe gi na heri „ipi” nanga den aparti sma foe na „ipi” e sori. Meki wisrefi sori wan waarderi di komoto foe na ati gi na lobi di na Bigi Herder, Jehovah Gado, nanga en Manpikin, Jezus Kristus, e sori gi wi ini ala den safrifasi sorgoe foe den.