Owroeman teki oen herder frantwortoe sondro foe spotoe
„Tjari na ipi foe Gado di de na a sorgoe foe joe foe go njan grasi.” — 1 PETRUS 5:2.
1. Foe san-ede a de wan sani di fiti foe gebroiki skapoe leki wan symbool foe den sma di Gado e feni boen?
A DE troetroe wan sani di fiti foe gebroiki skapoe leki wan symbool foe sma di Jehovah Gado sori en boenati gi den! Skapoe de meti di e waka baka a herder foe den èn di e jere na sten foe a herder foe den èn nanga ala prisiri e waka na en baka. Na pipel foe Gado di joe kan teki gersi nanga skapoe na a srefi fasi e meki na toemsi boen herder Jezus Kristus tjari den. Den sabi en, e doe sani te den e jere en sten èn e teki nanga prisiri a tiri foe en (Johannes 10:11-16). A no de foe taki dati letterlek skapoe e kon de es’esi nanga frede èn e firi dati den de sondro jepi sondro wan boen herder. Foe dat’ede a no de wan froewondroe sani dati Jezus Kristus ben abi sar’ati nanga sma di „den ben foefoeroe èn di den ben drifi go-kon leki skapoe sondro herder”. — Mattéus 9:36.
2. Fa Jehovah ben si den sma di wi kan teki gersi nanga skapoe èn di abi foe njan pina a ondro den „herder foe Israël” di ben de sondro lobi?
2 Jehovah Gado abi boen foeroe belangstelling gi na jeje tanboen foe reti ati sma di a bijbel e sori tapoe den leki „skapoe”. Foe eksempre, Gado nanga mofo foe na proféti Ezechiël ben taki foe foeroe foe „den herder foe Israël”, man di ben abi frantwortoe ma di ben e gi densrefi njanjan ala di den ben libi den skapoe na wan sé. Ma Jehovah no ben o gi pasi dati den sma di joe ben kan teki gersi nanga skapoe ben moe pina sondro dati lekti ben kon gi den, bika a ben taki: „A wan di ben lasi, mi sa soekoe èn a wan di ben drifi gwe, mi sa tjari kon baka, èn a wan di ben broko, mi sa tai èn a siki wan mi sa tranga”. — Ezechiël 34:2-16.
3. Fa Jezus ben sori broko-ede gi den skapoe?
3 Na Toemsi boen Herder, Jezus Kristus, e broko en ede tapoe so wan srefi sortoe fasi nanga sma di joe kan teki gersi nanga skapoe. Bifo Jezus ben opo go na hemel a ben sori foe dat’ede a winsi foe en dati skapoe ben sa moe kisi sorgoe di fiti. A ben komanderi na apostel Petrus: ’Gi mi pikin skapoe njanjan, tjari mi plkin skapoe foe njan grasi, gi mi pikin skapoe njanjan’ (Johannes 21:15-17). Èn foe djaranti den skapoe dati den sa kisi foeroe-nanga-lobi prakseri di e tan, meki Jezus ben gi „son sma leki herder” foe bow „na skin foe na Kristus”. — Efese 4:11, 12.
4. Na apostel Paulus ben gi den owroeman di santa jeje ben poti foe doe san?
4 Foe di Gado èn Kristus abi sowan faja lobi nanga sorgoe gi den skapoe, meki wan sma di de wan ondro-herder foe den skapoe, abi wan bigi frantwortoe wroko. Foe dat’ede meki na apostel Paulus ben gi tranga na den „owroeman” foe Efese di santa jeje ben poti foe „tjari na gemeente foe Gado foe njan grasi” foe di den e poti prakseri na den, tapoe wan fasi di fiti (Tori foe den Apostel 20:17, 28). Fa owroeman di den poti foe doe wroko moe doe tapoe joisti fasi foe dat’ede a frantwortoe disi?
Den herder e kisi regel fa den moe doe
5. Sortoe rai Petrus ben gi en kompe opziener?
5 Na apostel Petrus, foe soema den ben froewakti dati a ben sa gi Jezus skapoe njanjan, ben skrifi gi en kompe-opziener: „Tjari na ipi foe Gado di de na oen sorgoe foe njan grasi, no na ondro dwengi, ma foe di joe wani foe doe en; no nanga lobi foe wini sani na wan eneerlekfasi, ma foe di joe de klari foe doe sani; no leki basi a tapoe den di de a goedoe foe Gado, ma e tron eksempre gi na ipi” (1 Petrus 5:1-3). Meki oen loekoe pikinso fa den owroeman di santa jeje ben poti e kan gebroiki na rai disi tapoe wan fasi di e gi satisfaksi.
6. Nanga sortoe jejefasi owroeman moe dini na ipi foe Gado?
6 Petrus ben gi en kompe-owroeman na dek’ati: „Tjari na ipi foe Gado di de na oenoe sorgoe foe njan grasi, no ondro dwengi, ma foe di oen wani.” Den sma di ben abi na grani foe dini leki jeje herder no moe doe disi nanga tegoe, foe di den e firi densrefi ferplekti foe sorgoe gi den skapoe. Den no moe firi leki den e dwengi den netleki disi ben sa de wan ofoe tra wroko di e kiri joe jeje ofoe netleki tra sma ben sa persi den foe tjari na ipi go njan grasi. Owroeman moro foeroe moe dini nanga wan jeje di de klari foe doe sani. (Teki gersi nanga Psalm 110:3) Te wan sma de klari foe doe boen gi trawan, dan gewoonlek a e doe en nanga en heri ati èn e kiri en skin foe doe den belang foe den. Wan owroeman di de klarklari foe doe wroko sondro foe prakseri ensrefi ai gi foe en ten nanga krakti. A sabi dati sontron den skapoe kan lasi pasi èn a wani jepi den, foe di a e waka na baka a sorgoe di Gado e gi a den skapoe. Ija, Jehovah ben broko ede srefsrefi nanga den Israëlsma di ben lasi pasi, dati a ben taki: „Mi ben taki: ’Dja mi de, dja mi de!’ gi wan naatsi di no e kari mi nen”! — Jesaja 65:1.
7, 8. (a) San a wani taki foe doe na herder wroko sondro lobi gi oneerlek wini? (b) San a wani taki foe doe dienst foe di joe de klarklari foe wroko?
7 Petrus ben taki dati na herder wroko „no ben moe doe nanga lobi foe wini na wan oneerlekfasi, ma de klari foe doe sani”. Den owroeman di ben poti no wani de wan hebi gi den skapoe. Dati ben de wan fasi foe na apostel Paulus, bika a ben skrifi gi kristensma ini Thessalonika: „Oenoe e memre séker na wroko foe wi nanga wi nakiskin, oen brada. Foe di oen ben wroko dé nanga neti, foe no poti tapoe nowan sma foe oenoe wan diri lai, meki wi e préki na boen njoensoe foe Gado gi oenoe.” Ooktoe a ben tjari kon na ini den memre: „Wi no ben tjari oensrefi tapoe wan fasi di no fiti a mindri oenoe èn ooktoe wi no ben njan wan sma brede foe soso. Na presi foe dati, nanga tranga wroko èn naki skin wi ben wroko dé nanga neti foe no de wan diri lai gi no wan sma foe oenoe.” — 1 Thessalonika 2:9; 2 Thessalonika 3:7, 8.
8 Na asrefi fasi getrow herder foe a ipi foe Gado no e poti tapoe wan gridifasi a prakseri foe den tapoe san den skapoe abi leki goedoe èn ooktoe den no e proeberi foe kisi wini tapoe wan onregtvaardikifasi foe a skin foe den (Lukas 12:13-15; Tori foe den Apostel 20:33-35). Paulus ben meki oen si dati den sma di ben de boen foe den poti den leki opziener, ’no ben moe anga tapoe wini na wan oneerlekfasi’ (Titus 1:7). Na presi foe dati den wani doe nanga ala prisiri na dienst foe den, abi faja belangstelling gi a wroko foe den èn soekoe a wini foe den di de na a sorgoe foe den (Filipi 2:4). Tapoe a fisi disi den herder e sori na srefi no-gridi sorgoe gi den skapoe netleki Jehovah Gado, èn en Manpikin Jezus Kristus.
9. Foe san-ede wan kristen herder ’no moe de basi tapoe den di de foe na goedoe foe Gado’?
9 Petrus ben taki ooktoe taki owroeman e tjari a pipel foe Gado go njan grasi „no leki basi tapoe den di de a goedoe foe Gado, ma e tron eksempre gi na ioi”. Wan lobi herder e loekoe dati a no gebroiki na makti foe en tapoe wan fasi di no fiti foe di a e teki wan fasi leki a moro hé leki trawan èn e basi den skapoe. Wan hèmemre geest no de wan kristenfasi èn ala sma di wani plisi Jehovah moesoe tan farawe foe dati. Odo 21:4 e taki: „Hémemre ai èn wan asranti-ati, na lampoe foe den goddelowsoewan, na sondoe.” Èn Jezus ben taigi en bakaman: „Oen sabi dati den tiriman foe den naatsi e basi den èn den bigiman e sori makti tapoe den. Na so a no de na mindri oenoe; ma a sma di wani de a moro bigiwan a mindri oen moesoe de oen dinari, èn a sma di wani de a fosiwan a mindri oen moe de oen srafoe” (Mattéus 20:25-27). Ija, owroeman moe hori na ini prakseri dati den sma di de na ini a ipi de skapoe foe Gado èn wi no moe handri den a tapoe wan tranga-atifasi.
10. (a) San son herder foe na pipel na ini na ten foe Ezechiël ben doe? (b) Fa loyaal opziener de troetroe eksempre gi na ipi?
10 Gi den herder di ini na ten f oe Ezechiël ben tjari densrefi go njan grasi, Jehovah ben taki: „Den siki meti, oenoe no ben tranga èn den sikiwan oenoe no ben dresi, èn a wan di ben broko, oen no ben tai en èn a wan di ben drifi gwe, oen no ben tjari kon baka èn a wan di ben lasi, oenoe no ben soekoe foe feni en, ma nanga tranga-atifasi oen ben poti den na oen ondro, ija nanga tranga anoe.” Moro fara Jehovah ben taki dati den tranga ati herder ’ben tan troesoe alamala gwe di ben de siki, te leki den ben panja na ala pe’ (Ezechiël 34:4, 20, 21). Ma so a no de now nanga den lobi herder foe na „ipi foe Gado”. Den no e gebroiki na makti foe den èn den e loekoe boen dati den no meki no wan skapoe stotoe foetoe fadon. (Teki gersi nanga Markus 9:42). Na presi foe dati den sortoe owroeman disi e gi lobi jepi nanga dek’ati. Boiti foe dati, nanga begi den e fertrow tapoe Jehovah èn e wroko tranga foe de toemsi boen eksempre „na ini taki, na ini libi nanga waka, na ini lobi, na ini bribi, èn na ini krin libi” (1 Timotéus 4:12). Foe dat’ede meki den de tevréde èn den e firi taki den de boen foe di den sabi taki lobi herder di e frede Gado e sorgoe foe den.
Kefar di de gi den skapoe
11. Foe san-ede disiten herder moe sorgoe so boen gi na ipi foe Gado dati den skapoe firi denrefi boen sondro foe de ini kefar?
11 A de fanowdoe dati sma di joe kan teki gersi nanga skapoe na ini a ten disi e firi densrefi boen, nanga korostoe ati foe a moi belangstelling nanga san owroeman e kibri a ipi (Jesaja 32:1, 2). Disi de spesroetoe so foe di kristensma na „ini den moeilek ten disi” di de wan „marki foe den laatste dé”, tanapoe na fesi foeroe kefar (2 Timotéus 3:1-5). Na psalmsingiman David ben tanapoe ooktoe na fesi kefar, ma a ben kan taki „Jehovah na mi Herder. . . Awinsi mi e waka ooktoe na ini den lagi presi foe dipi doengroe, mi no e frede ogri, bika joe de nanga mi” (Psalm 25:1-4). Disiten herder foe na ipi foe Gado moe sorgoe so boen gi den skapoe dati den sma disi di joe kan teki gersi nanga skapoe e firi densrefi netleki David boen krosbé na Jehovah. Den moesoe firi densrefi ooktoe boen dati den no de ini kefar leki wan pisi foe na organisaatsi foe Gado.
12. Wi moe kibri den skapoe tege sortoe disiten firi, èn fa owroeman kan gi jepi na ini disi?
12 Wán kefar di den sma moe feni kibri di de wan pisi foe na ipi foe Gado, de na disiten firi foe hoeroedoe waka nanga libi te wan sma no e hori ensrefi na gronprakseri. A de moro foeroe leki wan bakapisi foe den disiten fasi foe prisiri, a kan de foe televisie ofoe tapoe tra fasi, meki foeroe sma ben teki wan libifasi di de kontrari den markitiki di tanapoe na ini a Wortoe foe Gado. Na gosontoe rai foe na bijbel di e gi na ini na gemeente na ini a ten disi, moe de leki wan sani tége na ala-sani-mag-fasi foe na grontapoe disi, nanga en bigi seks fowtoe libi nanga waka. Herder foe na ipi foe dat’ede moe sabi boenboen san na bijbel e leri foe moraliteit. Boiti foe dati, den moe poti alaten a fesi den skapoe a frantwortoe foe den foe tan krin gi na dienst foe Jehovah. — Titus 2:13, 14.
13. (a) Na brifi foe Judas e gi gosontoe rai tege sortoe kefar? (b) Sortoe bosroiti owroeman moe teki ini a tori foe sma di fadon komoto foe bribi?
13 Kefar de ooktoe foe na sé foe sma di fadon komoto na bribi. Hori ini prakseri dati tinanégi hondro jari psa kaba bepaalde „goddelowsoesma di ben de falsi leriman, ben boro kon na ini a gemeente. Den ben de kefarlek „ston di ben de na ondro watra”, falsi herder di ben gi densrefi njanjan, sma di ben de leki meti èn di ben tjari prati kon èn di no ben abi jejefasi. Na brifi foe Judas e gi gosontoe rai di e jepi owroeman nanga ala getrowwan „foe stré sondro foe weri gi na bribi”(Judas 3, 4, 12, 19). Sondro degedege a de so dati owroeman moe teki wan faste bosroiti ini a tori foe ibriwan sma di e proeberi foe sai pratifasi, bika Paulus ben skrifi: „[Ori den na ai] . . ., di, ontrari na leri di oenoe ben kisi, e meki pratifasi kon èn e gi réde foe naki foetoe fadon èn tan farawe foe den” (Romeini 16:17). Na frantwortoe de foe dat’ede tapoe den herder foe kibri na ipi tege den ’wolfoe disi ofoe trawan na ini skapoe boeba’. — Mattéus 7:15.
Jepi den skapoe tapoe tra fasi
14, 15. Fa owroeman kande kan gi jepi na kompe-bribiman di e handri nanga makandra tapoe wan fasi di no fiti?
14 „Tjari na ipi foe Gado go njan grasi” kan aksi dati den skapoe moe kisi jepi foe difrenti problema di kan sori den srefi na ini a kristen gemeente. Sontron skapoe srefi a mindri makandra kan kisi trobi. Foe pikin kesekese meki sonwan e handri nanga makandra tapoe wan fasi di no switi. Den aparti sma disi kan go taki lé srefi foe pori makandra nen èn te foe kaba tapoe foe abi demakandra nanga den fosten mati foe den na ini a dienst foe Jehovah, nanga bigi ogri na jejefasi di den e doe densrefi. — Odo 18:1.
15 Jeje herder moe de klarklari èn esi foe jepi den sortoe kompebribiman disi. A kande foe eksempre dati den owroeman kande moe sori na tapoe o fowtoe a de foe ferteri lé foe makandra foe pori makandra nen èn fa ala loyaal kristen moe wroko a tapoe dati na wan fasi foe a gemeente tan (Leviticus 19:16-18; Psalm 133:1-3; 1 Korinte 1:10). Owroeman kande kan gi jepi foe di den e sori na tapoe na eksempre foe Paulus: „Efoe oenoe e tan beti makandra, èn e njan makandra, loekoe boen dan dati oenoe no pori makandra.” — Galacia 5:13-15; Jakobus 3:13-18.
16. San owroeman moe doe efoe den si fasi na ini a gemeente di no de gosontoe?
16 Oen owroeman, hori na ini prakseri dati Didibri e waka lontoe „leki wan krasi lew, di e soekoe foe swari wan sma” (1 Petrus 5:8). Ala troe kristensma abi wan stré foe stré no tegen meti nanga broedoe, ma tegen goddelowsoe jeje krakti (Efese 6:10-13). Getrow herder séker no wani dati Satan kisi den skapoe. Efoe sonwan foe den sma di joe kan teki gersi nanga skapoe e bigin djompo komakandra, dan owroeman di e sorgoe sani boen moe proeberi foe kon sai san de a réde foe disi èn foe kon gi jeje jepi di e fiti. Herder moe sabi fa den pikin meti foe den tan èn opo doe es’esi wan sani tapoe ibri firi ini a gemeente di no de gosontoe (Odo 27:23). Efoe den frantwortoeman disi e si wan fasi foe libi velddienst, persoonlek studi a wansé, ofoe e gi foeroe ten psa marki na ontspanning ofoe a feti na baka belang foe goedoe, dan den moe proeberi foe jepi na situwasi. Owroeman di e sorgoe gi „na ipi foe Gado” e pristeri na tapoe wan fasi di fiti persoonlek jepi ofoe den e gi sontron tapoe komakandra fanowdoe rai foe di den e waka na baka Jehovah nanga na Toemsi boen Herder Jezus Kristus (Galacia 6:1). Tapoe a fasi disi nanga tra fasi lobi owroeman e sori dati den e teki den herder frantwortoe foe den sondro foe spotoe. — Tori foe den Apostel 20:28.
Na tjari foe skapoe go njan grasi de wan afersi di no de foe spotoe
17. Wan sma moe doro sortoe marki foe den feni en boen foe poti en leki owroeman?
17 A de wan wroko di e aksi foeroe efoe owroeman e tjari na ipi foe Gado foe njan grasi. Den hé markitiki di wan sma moe doro foe kisi sowan grani, e tjari kon na krin na ini 1 Timotéus 3:1-7; Titus 1:5-9; èn 1 Petrus 5:1-4. A no ibri brada nomo di de, kan dini na ini a wroko disi, bika soso man di abi jejefasi kan tjari na frantwortoe disi tapoe joisti fasi (1 Korinte 2:6-16). Foeroe man di no e dini now leki owroeman ben sa kan kon sofara dati den kan gi den a grani disi, ma den moe ’feti fosi baka wan opzienerwroko’. Den moe de fajafaja studenti foe a Wortoe foe Gado sodati den kan kisi wan soifri ferstan foe en. Ija, den moe sori dati den de warti foe den rikomanderi den foe di den ben doro den marki foe na bijbel foe den kan poti den leki owroeman, herder foe na ipi foe Gado di de boen.
18. Fa Paulus ben de nanga den gemeente, èn trawan abi densrefi firi foe en?
18 Na ede foe na gemeente, na Toemsi boen Herder, Jezus Kristus, e doe dienst na ondro Jehovah Gado (Johannes 10:11; 1 Korinte 11:3; Efese 5:22, 23). Èn Jezus sa moe prisiri séker nanga ondro-herder foe na ipi di e tjari èn e kibri den skapoe tapoe a joisti fasi! Den man disi nanga jeje fasi e doro den hémarki foe na bijbel di den poti gi kristen owroeman. Boiti foe dati, den ben sori na srefi bigi broko ede gi den skapoe leki na apostel Paulus, di ben skrifi: „Boiti den sani dati [pina nanga skinati], di de foe dorosé, e kon a mi tapoe dé foe dé na sorgoe foe ala gemeente. Soema de swaki èn mi no de swaki? Soema de e tjari go foe naki foetoe èn mi ati no e teki faja?” (2 Kor. 11:29) Paulus ben reis fooroe, aladé a ben e ondrofeni „na sorgoe foe den gemeente” netleki fa disi de now a geval nanga den opziener di e reis. Tapoe a srefi sortoe fasi disi den owroeman e broko den ede gi den skapoe ini na ipi di gi na a sorgoe foe den leki jeje herder.
19. San sa de a bakapisi efoe Hebrewsma 13:17 gebroiki èn owroeman kan teki na herder frantwortoe foe den sondro foe spotoe?
19 „Tjari na ipi foe Gado go foe njan grasi”, wani taki tranga wroko ma a warti ala moeiti. Foe dat’ede oen herder foe na ipi, oen kibri na grani boen. Sorgoe boen gi den skapoe foe Gado. Èn meki ala sma di oen kan teki gersi nanga skapoe wroko makandra dorodoro nanga den ondro-herder di den poti nanga jepi foe santa jeje. „Gi jesi na den di e teki fesi na mindri foe oenoe èn saka oensrefi na den ondro”, Paulus nanga krakti e taki, „bika den e waki oenoe sili leki sma di sa moe gi frantwortoe” (Hebrewsma 13:17). O moro ala sma di nanga den heri ati e gi densrefi na Gado e wroko nanga makandra na ini wanfasi, dan na getrow dienst foe kristen owroeman di e teki den herder frantwortoe foe den sondro foe spotoe sa tan tjari bigi jeje blesi nanga wini kon.
Joe man leg disi uit?
◻ Foe san-ede jeje herder moe de klari foe dini?
◻ Foe san-ede owroeman moe de fri foe na lobi foe oneerlek wini?
◻ Foe san-ede a ben sa de wan fowtoe sani efoe owroeman ben sa basi na ipi foe Gado?
◻ Foe san-ede opziener moe de eksempre gi na ipi?
◻ San de wan toe kefar di herder moe kibri na ipi foe Gado gi den?
[Prenki na tapoe bladzijde 12]
Net soleki Herder na ini owroeten ben sorgoe gi den skapoe, na so den disiten owroeman na wan lobifasi ’e tjari na ipi foe Gado foe go njan grasi’