Koti akroederi wi eigi moeiti
1 Jehovah Gado ben sori en lobi gi a libismafamiri tapoe foeroe fasi. Jesus ben poti krakti tapoe a lobi foe Gado di e pasa ala tra sani, foe di a ben sori wan ipi sma di ben kon na wan taki Gado ‘e meki en son opo gi ala gadolowsoe nanga boenwan èn e meki alen fadon gi regtfardikiwan nanga onregtfardikiwan’ (Mat. 5:43-48). Na wan tra okasi Jesus ben meki sma kon sabi na moro prenspari sori foe a lobi foe en Tata—na òfer foe en wanenkri gebore Manpikin, di Gado ben doe foe froeloesoe foe wi (Joh. 3:16). Jesus ben gi en arkiman deki-ati foe doe wan sani tapoe a lobi foe Gado, nanga warderi. Wi e proeberi foe doe dati?
2 Foe kan sori oen warderi krinkrin èn foe kisi wini di e tan foe a lobi foe Jehovah, wi moesoe leri sabi en (Joh. 17:3). Wi abi rai nanga tiri fanowdoe foe kon sabi fa wi moesoe dini en na wan fasi di a e teki. Jehovah ben meki a lobi broko-ede foe en kon a krin foe di a gi wi en Wortoe, na bijbel, di skrifi nanga jepi foe santa jeje, èn foe di a wiki en toemoesi moi organisâsi, nanga jepi foe san wi e kisi tiri èn leri (Mat. 24:45-47; 2 Tim. 3:16, 17). Leki Jehovah pipel di gi densrefi abra wi kisi leri na ini en pasi. Ma wi e sori nanga oen eigi moeiti taki wi abi warderi gi na lobi foe Jehovah? Wi e poti prakseri tapoe en rai, foe te foe kaba wi kan prisiri èn tjari wini gi wi srefi nanga jepi foe dati? (Jes. 48:17; 1:22). Na apostel Paulus ben skrifi na ini 1 Korente sma 3:8: „En now di e prani èn en di e nati de wàn, ma ibri sma sa kisi en eigi paiman akroederi en eigi wroko.”
3 Ija, wi moesoe gi wi srefi krinkrin foe doe san Gado wani taki wi doe. No ala sma e gro gawgaw na a srefi fasi na jeje fasi. Ala sortoe sani kan abi krakti tapoe wi go na fesi, èn a no sa de wan froestan sani foe e teki sani di e meki sma lasi-ati, gersi nanga trawan, ma a e go djaso foe wi eigi moeiti di wi e doe. San wi kan doe foe wroko moro krosibei makandra nanga na organisâsi? Wi kan tjari kenki kon tapoe son spesroetoe kontren ini a teki foe oen eigi frantiwortoe leki kresten? Sortoe moeiti sa de fanowdoe foe horibaka moro betre gi den gemeente aktiviteit? Wi moesoe gebroiki son wan foe den rai di na organisâsi gi wi, moro boen ini wi ala dei libi?—1 Tim. 4:16.
WAKA NA BAKA GETROW WROKOMAN
4 A boen njoensoe foe a Kownoekondre e preiki now tintin jari langa na mofo foe getrow brada nanga sisa. Neleki ini a tori foe Paulus, a warti taki sma waka na baka den getrow wrokoman disi (1 Kor. 11:1). Den e doe boen tapoe a lobi foe Gado èn foe na tranga wroko foe den nanga den eigi moeiti ini a hori foe bijbel rai meki den koti foeroe boen. Ini a gemeente den de wan tranga mama groepoe foe fajafaja wrokoman di no e skoifi den eigi frantiwortoe poeroe foe den. Wi kan si den froktoe foe den aparti wroko foe den.—Rom. 1:13; 2 Kor. 3:1-3.
5 Now ala jari tin doesoendoesoen njoenwan e lon kon na a organisâsi (Jes. 60:8). Den e doe so srefi serjoesoe moeiti foe tron bigisma na jejefasi, èn na faja foe den ini a preikiwroko de foe prèisi. Den e si nanga wini fa Jehovah e blesi den sma di e wroko tranga ini en diniwroko. Na eksempel foe lepi brada nanga sisa e jepi njoen sma foe si taki now a no a ten foe meki den anoe kon slap ofoe foe kon doe en safrisafri ini a diniwroko foe wi, gi Gado. Efoe wi de now njoenwan ofoe preikiman nanga ondrofeni, wi e tan gro doronomo na jeje fasi, aladi wi e teki wi eigi kresten frantiwortoe èn e njan boen foe ala theokrasia seti?
DOE SAN WI E LERI
6 Langaten bifo Jakobus ben skrifi taki wi moesoe de ’doeman foe a wortoe’, Moses ben taigi den djoe: „Oenoe moesoe hori na heri gebod di mi e gi oenoe tide” (Jak. 1:25; Deut. 11:8, 18). So boen, sabi wawan no ben de nofo. Den djoe ben moesoe doe den wortoe foe na Wet foe di den ben e gi jesi na Jehovah. Na fondamenti gron-prakseri disi e tan abi krakti. Jesus na Manpikin foe Gado, seiker ben sabi na prenspari fasi foe gi jesi (Joh. 8:28). A ben taki na ini Mateus 7:24 :„Ibri sma . . . di e jere den wortoe disi foe mi èn doe den, den sa teki gersi nanga wan koni man.”
7 Wi e gebroiki san wi e leri tapoe kringkonmakandra? Wi e froestan foe san-ede now a de so prenspari srefisrefi foe tan na ai èn hori wi prakseri na wan? Wi e hori ini prakseri den bidrigi aanval foe Didibri nanga den trapoe di a poti? Wi e warderi den rai nanga warskow di na organisâsi e gi wi doronomo foe na fanowdoe foe krin fasi, na skin èn na jejefasi, ini na gemeente? Te o fara wi e go, foe wisrefi e doe san wi jere?—Jak. 1:23-25.
8 Ini na programa foe now, foe na spesroetoe deikonmakandra, den e poti krakti a tapoe taki wi moesoe de santa, neleki fa Jehovah de santa (1 Petr. 1:14-16). Santafasi wani taki relisi krinfasi ofoe soifrifasi, wan situwâsi foe de santa. A e sori tapoe wan fasi foe de aparti gi a diniwroko foe Gado. Den poti a diniwroko foe a boen njoensoe na ini wi anoe. Foe dati-ede wi moesoe de krin ini jeje, moreel nanga skinfasi foe de wan sma di den feni boen foe tjari na santa Wortoe foe waarheid go na doro. Disi e aksi taki wi moesoe abi moro leki gewoon prakseri gi wi srefi (Hebr. 2:1). Te wi e doe dati, wi sa koti blesi akroederi wi eigi moeiti.
NJAN BOEN FOE STUDERI NANGA WISREFI
9 Studeri nanga wisrefi e jepi wi foe bow wan tranga bribi èn e dipi wi warderi gi na waarheid. A e gi wi froetrow èn meki wi kan taki nanga makti. A e gi wi froestan èn a koni foe man si sani èn a e jepi wi foe weri na njoen eigifasi (Kol. 1:9-11). Ma studie di e meki froktoe e aksi ten nanga moeiti; wan moro sjatoe pasi no de foe kisi soifri sabi nanga jeje dipifasi foe si sani. San wi sa poeroe foe wi studie, sa kon foe san wi e poti na ini. —2 Kor. 9:6, 7; Gal. 6:7.
10 Wi e poti ala wiki nofo ten na wan sei foe sreka gi den gemeente konmakandra? Dati na wán fasi fa wi kan sori warderi gi na jeje njanjan di Jehovah e sorgoe gi nanga jepi foe na getrow èn koni srafoe. Wan joisti sreka gi den konmakandra e jepi wi foe hori fasti na a schema foe na leisi èn studeri foe na Wortoe foe Gado. Wi e poti ala wiki ten a wan sei foe leisi a bijbel, so leki fa a programa foe na theokrasia diniwrokoskoro e gi dati? Ala dei wantoe miniti nomo de fanowdoe foe leisi na materiaal èn foe prakseri foe en. Na diniwrokokonmakandra e poti oenoe prakseri doronomo tapoe fasi fa wi kan abi boen bakapisi na ini wi poebliki diniwroko. Wi e sreka wi srefi èn wi e poti spesroetoe prakseri tapoe a fasi fa wi kan gebroiki na materiaal, di den gi wi, ini na diniwroko? Wi moesoe sreka spesroetoe seti foe kan sreka oenoe srefi tapoe na Waktitoren-studie nanga a gemeenteboekoestudie. Wi e doe dati?
ABI WAN PRATI NA DEN KONMAKANDRA
11 Wi kan abi moro wini foe den konmakandra efoe wi abi wan prati na den. Sreka gi den konmakandra èn moro fara doe moeiti foe abi prati na den, e hori wi na ai na a ten foe den konmakandra èn e jepi wi foe njan boen moro foe den piki foe trawan. Foeroe sma e memre fa den ben doe moeiti foe troe foe gi a fosi piki foe den tapoe wan konmakandra ofoe foe hori a fosi takimakandra foe den tapoe na theokrasia diniwrokoskoro. Den senwe foe wi ben sa moesoe saka foe wan boen pisi kaba, ma wi e doe moeiti ete foe e meki wi gro na jejefasi de foe si na trawan? (1 Tim. 4:15). Trawan e njan boen foe den piki foe wi èn dati e gi den deki-ati. Efoe wi sreka wisrefi boen, foe di wi studeri na materiaal di o behandel tapoe a konmakandra, dan a prati foe wi na a takimakandra, èn di wani taki wan sani, sa gi trawan deki-ati foe sori lobi nanga toemoesi boen wroko.—Hebr. 10:23-25.
12 Den piki foe wi no moesoe de langa èn frekti. So leki fa a gwenti de, a moro boen foe gi wan sjatoe wantewante piki tapoe a aksi di poti efoe dati e jepi foe meki a gebroiki foe na tekst kon moro krin a fesi. Efoe wi sreka wi srefi boen, dan wi sa man gi piki nanga wi eigi wortoe. Te wi e doe dati, dan den wini gi wi srefi nanga trawan de moro bigi. Foe san-ede? Foe di a e aksi foe wi foe prakseri-foe san wi e taki èn tjari a penti kon a fesi so leki fa wi e froestan en. Disi kan meki en makriki gi trawan foe froestan a materiaal. A sa jepi wi foe hori den bodoi na ede foe kan gebroiki den na wan tra okasi.
SAI BOGOBOGO INI A VELDDIENST
13 Wi kresten diniwroko de wan diri goedoe (2 Kor. 4:7). Joe e si dati so toe? Nanga jepi foe wi diniwroko wi abi na grani foe sori oenoe bribi na trawan. ‘Foe san e foeroe na ati,’ na so Jesus ben taki, ‘a mofo e taki’ (Luk. 6:45). Foe di wi e doe wi eigi moeiti ini a wroko foe kan abi wan dorodoro prati na a velddienst, meki wi e kisi na okasi foe koti foeroe wini. Na froestan di wi e froestan na waarheid e kon moro krin èn wi e gro na ini wan moro bigi bekwaamfasi foe gebroiki na bijbel. Wi e prisiri foe a switi foe meki a waarheid bekènti na trawan èn jepi den foe kon sabi na Gran Mekiman foe den. Wi teki leki kotoigi a sei foe a retifasi foe a tiri foe Gado nanga en Soevereiniteit. Wi de kolokoe foe di wi sabi taki wi e prisiri Jehovah, foe di wi kenki kon tron leki en prenki èn e doe en wani.—Mat. 5:48.
14 Efoe doronomo wi e ondrosoekoe wi eigi moeiti, dan wi anbegi foe Jehovah noiti no sa fadon go ini wan simbôlis dini. San dati wani taki? Dati wani taki, taki wi no sa de nanga toe ati ini a doe foe a wani foe Gado foe doe so pikinso diniwroko nomo, foe sma kan si dati, sondro wanenkri gi ensrefi ini a dini foe Gado èn opregti moeiti. Wi diniwroko gi Jehovah moesoe doe nanga wi heri ati. Wi abi na bijbel prekti foe gi wi srefi nanga wi heri ati èn sili ini en diniwroko (Kol. 3:23, 24). A de troe taki den omstandigheid kan de difrenti èn taki Jehovah no e aksi moro foe wi leki san wi man. Ma a e froewakti wel foe wi, taki wi doe san wi man! (Mat. 22:37) Foe di a fadon libisma natuur lobi foe kibri ensrefi, a boen foe wi ten a ten, ondrosoekoe wi srefi foe si pe wi kan tjari kenki kon ini oen diniwroko gi Gado. A de wi gwenti foe doe dati?
15 Tan na ai de fanowdoe efoe wi wani kibri wi srefi foe meki eigi afersi èn sani di wi e angri foe den, e hori wi foe no doe ala moeiti ini a diniwroko foe Jehovah. Prisiri, sani di wi lobi foe doe, nanga ontspanningsaktiviteiten [sani san joe e doe foe bro joe skin pikinso] moesoe hori na a joisti presi foe den. So srefi toe wi moesoe loekoe boen taki wi no abi a firi foe e moksi toemoesi nanga grontapoe aktiviteit. Efoe wi poti prakseri na tapoe Jesus rai na ini Mateus 6:22, 23, dan sondro degedege wi sa man foe doe moro moeiti ini na proeberi di wi e proeberi foe doe jeje afersi èn wi sa koti ini akroederi nanga dati.
16 Te wi e tan doe moeiti foe teki weri na njoen eigifasi, Wi sa teki oen eigi frantiwortoe foe gebroiki na rai nanga den bodoi di wi e kisi na den gemeentekonmakandra, kringkonmakandra, kongres èn nanga jepi foe den poeblikâsi. Meki a de so taki wi alamala studeri fajafaja, abi aktief prati na den konmakandra èn so fara oen eigi situwâsi e gi pasi foe dati, abi wan prati na a gran wroko di abi na ini en a meki foe disipel. So boen efoe wi piki nanga warderi tapoe Gado lobi, wi kan de seiker taki now wi sa koti boen foeroe jeje paiman èn tan hori na boen howpoe tapoe têgo libi ini Jehovah njoen grontapoe.