Yu E Kisi Wini gi Yusrefi?
1 Milyunmilyun sma na ini a ten disi wani sabi fa fu lusu den problema fu den èn fa fu nyan bun fu wan koloku libi. Den e leisi furu buku di e gi rai fa sma kan yepi densrefi fu abi wan moro bun libi, noso den e suku rai na grupu nanga organisâsi, fu tyari kenki kon na ini den libi. Kande wan tu sma kan sori taki den abi winimarki, ala di a no nofo. Ma te wi e luku a fasi fa sma e libi na ini a ten disi, dan a de so taki moro furu sma leri fu nyan bun fu wan switi libi di e gi satisfaksi, fu di den e arki den rai di libisma e gi den? Dati no de so, kwetikweti!—1 Kor. 3:18-20.
2 Na a tra sei, wi Mekiman seti sani so taki ala sma di wani arki kan kisi a moro bun rai, sondro taki den musu pai gi dati. Yehovah wani taki ala sma kisi wini fu den sani di a e leri wi. Na wan lobi-ati fasi Yehovah gi wi en Wortu di skrifi nanga yepi fu en santa yeye, so taki a kan tiri sma na wan opregti fasi, èn a sorgu taki sma e preiki a bun nyunsu fu en Kownukondre na heri grontapu (Ps. 19:7, 8; Mat. 24:14; 2 Tim. 3:16). Efu wi wani fu abi wan trutru koloku libi, dan a de tumusi prenspari taki wi e poti prakseri na den komando fu Yehovah.—Yes. 48:17, 18.
3 A tiri fu Yehovah de krinkrin moro bun leki iniwan rai fu buku di e sori sma fa fu yepi densrefi, noso tra sani di a grontapu disi e pristeri sma fu tyari kenki kon na ini den libi. Wi kan kisi trutru yepi nanga winimarki di e tan, te wi e meki bun gebroiki fu den seti fu Yehovah, soleki fa a Wortu fu en e sori dati èn soleki fa en organisâsi e leri wi.—1 Petr. 3:10-12.
4 Kisi Wini gi Yusrefi na den Gemeente Konmakandra: Na ini a ten disi, Yehovah trutru wani leri wi den pasi fu en, èn wi e kisi wini fu di wi e poti prakseri na den rai fu en. Den feifi konmakandra di wi abi ala wiki, e sori taki Yehovah wani taki sani musu waka bun nanga wi, fu di a lobi wi. Te wi e go na den gemeente konmakandra, dan wi e kon sabi moro fu Gado. Wi e leri fa fu kibri wisrefi gi san ogri, fu di wi e kon krosibei na Yehovah. Na so wan fasi, wi ati e firi bun.
5 Moro de ete. Na den gemeente konmakandra wi kan „opo [wi] ati bradi gi sma” (2 Kor. 6:13). Fu man du dati, dan wi musu leri sabi tra sma na ini a gemeente. Wi e kisi wini te wi e gi makandra deki-ati, soleki fa na apostel Paulus ben skrifi na ini en brifi gi den Romesma (Rom. 1:11, 12). Di a ben skrifi go na den Hebrewsma, dan a ben gi den wan di kande ben kon kisi a gwenti fu no abi Kresten demakandra doronomo, krakti frumane.
6 Te wi e prisiri nanga a libi fu wi, dan wi sa wani taki sani waka bun nanga trawan. Wi e kisi deki-ati fu suku fasi fu meki trawan kisi moro prisiri. Fu dati ede, den Kresten konmakandra de fu kisi wini gi wisrefi trutru, èn den sma di wi abi bun demakandra nanga den, kan kisi wini tu. A de fanowdu taki wi e teki prati nanga wi heri ati.
7 Na apostel Paulus ben taki fu wan srefi sortu sani di a ben gi Timoteus rai ini en brifi, èn a ben skrifi: „Oefen yusrefi nanga a gi di yu e gi yusrefi na ini a dini fu Gado leki marki” (1 Tim. 4:7). Wi kan aksi wisrefi: ’Mi e meki muiti fu du den sani disi? Mi e leri fu kisi wini fu den sani di mi e yere na den gemeente konmakandra?’ Den piki fu wi sa de iya, efu wi e poti prakseri na den sani di wi e yere na den konmakandra, èn efu wi e du muiti fu du san wi e leri. Nanga ai fu bribi, wi musu man luku pasa den brada di e gi leri èn musu si Yehovah leki a Gran Leriman fu en pipel.—Yes. 30:20.
8 Theokrasia Diniwroko-skoro Nanga Diniwroko Konmakandra: Den tu konmakandra disi seti fu yepi wi fu abi bun bakapisi na ini a Kresten diniwroko. A Theokrasia Diniwroko-skoro seti spesrutu gi dati — a de wan skoro nanga studenti di e kisi leri nanga rai doronomo. Yu abi na okasi fu sori taki yu e kon tron wan moro bun publiki takiman èn leriman fu a Wortu fu Gado. Ma fu kisi a moro bigi wini fu a skoro, dan yu musu tron wan studenti na a skoro, yu musu kon na den konmakandra, yu musu teki prati na en doronomo, èn yu musu sreka yusrefi bun fu man hori den toewijzing fu yu nanga prisiri. Te yu e teki èn e gebroiki den rai di yu e kisi, dan dati sa yepi yu fu du sani moro bun.
9 A Diniwroko Konmakandra e leri wi o prenspari a Kresten diniwroko de, èn a e sori wi fa wi kan abi wan prati na a wroko fu meki disipel. Yu nanga yu osofamiri e kisi wini dorodoro fu den sani di e tyari kon na fesi na den tu konmakandra disi? Wan Kresten trowpaar e taki: „Na wan Diniwroko Konmakandra, wi ben yere taki wi musu luku a deitekst nanga a heri osofamiri. Wi no ben du dati, ma now wi e du en.” Fa den du kisi wini gi densrefi? Den e erken: „Wi e si now taki wi abi moro switi takimakandra na a nyanyan tafra. Wi no e hari taki moro te wi e nyan te bakadina.” A de so, taki yongu pikin so srefi e kisi wini fu den konmakandra? Iya. A mama e taki: „A krin fu si taki den konmakandra abi furu krakti tapu den pikin fu wi. Wan fu den wiki, dan wi ben yere fa a boi fu wi di abi siksi yari, e fruteri wan tu lei. Ma a wiki dati na a konmakandra, dan na instruktielezing ben taki fu a lei di sma e lei. A boi ben syen sote taki di a luku en papa, a tan sidon so pî na tapu en sturu. A ben leri wan les, èn baka dati wi no kisi a problema dati nanga en moro.”
10 Wan pionier sisa e taki dati a e prisiri nanga a rai di wi e kisi na a Diniwroko Konmakandra, di e yepi wi fu du wi diniwroko moro bun. Fu san ede? A e fruklari: „Mi e tan du sani na a srefi fasi. Son leisi mi e denki taki a rai di gi na ini Wi Kownukondre Dienst no sa abi bun bakapisi. Ma na a Diniwroko Konmakandra, te mi e yere taki mi musu pruberi fu du sani na a fasi dati, dan mi e kisi deki-ati fu gebroiki a rai. Dati e meki a diniwroko wan prisiri sani!” Baka di a sisa ben pruberi wan tu wiki fu gebroiki a rai fu opo bijbelstudie te a miti wan sma a fosi leisi, dan a bigin studeri Bijbel nanga wan umapikin di ben begi Gado fu kisi yepi.
11 Te yu e yere wan lezing di e gi Bijbel rai fa fu teki bosroiti na ini sani di abi fu du nanga yu eigi afersi, dan yu e frustan taki Yehovah ensrefi e taki nanga yu? Wan brada ben si en na so wan fasi. A ben taki: „No so langa pasa na wan konmakandra, wan lezing ben hori èn ini a lezing dati, wan brada ben sori sortu sani di sma e du fu meki prisiri e fiti gi Kresten èn sortu sani no e fiti. Mi ben lobi fu luku fa sma e strei naki kofu tapu telefisi. Ma baka a konmakandra dati, mi kon frustan taki a sport disi ben de a sortu sani di sma e du fu meki prisiri di no e fiti gi Kresten. Fu dati ede mi no e luku en moro.” Iya, ala di a brada disi ben kon lobi wan ogri sani, toku a teki a tiri fu Yehovah nanga sakafasi.—Ps. 11:5.
12 A Publiki Konmakandra, a Waktitoren-studie, Nanga a Gemeente Bukustudie: Den publikitaki di wi e yere ala wiki e taki fu difrenti Bijbel tori. San yu e leri fu den publikitaki disi? Wan Kresten masra ben taki fu den wini di a ben kisi: „Na ini wan publikitaki, a takiman ben poti krakti na tapu ala den froktu fu a yeye. A ben taki dati ensrefi ben teki wán fu den eigifasi, èn a ben du muiti wán heri wiki fu kweki en. Na a kaba fu a wiki, a ben luku fa a ben sori na eigifasi dati ini den sani di a ben du ibri dei. A tra wiki, dan a ben du muiti fu kweki wan tra eigifasi. Mi ben feni dati wan moi sani fu du, èn misrefi bigin du dati tu.” Dati na wan tumusi moi fasi fu du san yu leri!
13 A Waktitoren-studie e leri wi fu gebroiki Bijbel gronprakseri na ini difrenti situwâsi fu wi libi. Disi e yepi wi fu no bruya, ala di a libi e gi sma broko-ede. A Waktitoren-studie so srefi e meki wi tan skinskin nanga waarheid di e kon na krin moro nanga moro. Fu gi wan eksempre, wi no kisi wini di wi ben studeri den Waktitoren-artikel fu 1 mei 1999, di abi leki nen: „Den sani disi moesoe feni presi”, „Meki a leisiman gebroiki a koni foe man si sani krin”, nanga „De na ai èn de fayafaya!” Fa den studie disi ben abi krakti tapu yusrefi? Yu e sori na a fasi fa yu e handri taki yu e gi yesi na a warskow fu Yesus, di abi fu du nanga a ten di e kon? Yu e sreka yusrefi gi den tesi di sa kon te wi e si „a tegu sani di e tyari pori kon . . . e tanapu na ini wan santa presi”? (Mat. 24:15-22) A de so taki den marki fu yu, nanga a fasi fa yu e tyari yu libi e sori taki a no materia sani, ma a kon di Yehovah en nen musu kon santa, na a moro prenspari sani gi yu? A no de so taki na a Waktitoren-studie, wi e leri fu kisi wini gi wisrefi na ini a ten disi?
14 Prakseri den furu sani di wi e leri na a Gemeente Bukustudie ibri wiki. Now wi e studeri a Bijbel buku Danièl. Na ini den fo mun di wi e studeri a Bijbel buku dati, a no de so taki wi e si fa a bribi fu wi e kon moro tranga ibri wiki? Neleki Yehovah en lobi profeiti Danièl wi e tranga a bribi fu wi, so taki wi ben sa man horidoro.
15 Yehovah E Leri Wi fu Libi Nanga Prisiri: Wi no sa abi so furu broko-ede efu wi e poti prakseri na den komando fu Gado. Boiti dati, wi e ondrofeni san a wani taki fu libi nanga prisiri. Te wi e waka na tapu a pasi di Yehovah e sori wi, dan wi e tron sma di abi wan prati na a wroko fu en, èn no sma di e luku nomo. Èn den wan di e du a wroko fu Gado, na koloku sma.—1 Kor. 3:9; Yak. 1:25.
16 Prakseri bun fa yu sa gebroiki den sani di yu e yere na den gemeente konmakandra (Yoh. 13:17). Dini Gado nanga prisiri, èn nanga yu heri ati. Yu sa abi bogobogo prisiri. Yu libi sa kon moro bun. Iya, yu sa kisi wini gi yusrefi.