Konmakandra E Yepi Yonguwan
1 Wan tini meisje ben taki: „Son leisi mi e denki taki yonguwan abi en moro muilek na ini a libi. Wi e miti sma di e du hurudu, sma di e gebroiki drug èn sma di e dringi sopi pasa marki.” Na so yu e denki tu? Efu dati de so, dan san yu e denki sa man yepi yu fu kakafutu gi den takru sani disi? Yu abi bribi fanowdu, wan tranga bribi na ini den reti pasi fu Yehovah, bika sondro dati „wan sma no man plisi en na wan bun fasi” (Hebr. 11:6). Te yu e go na den gemeente konmakandra, dan dati sa yepi yu fu tranga na overtoigi di yu abi leki Kresten èn so srefi a bosroiti di yu abi fu no du ogri.
2 Konmakandra Abi Furu Sani Di Kan Yepi Yu: Sortu sani e meki taki wan switi nyanyan nanga bun mati e gi prisiri? A no a bun nyanyan makandra nanga mati di yu lobi na wan presi pe sma de sondro broko-ede? We, den konmakandra fu wi e meki taki wi man ondrofeni den srefi sortu moi sani disi, ma na yeye fasi.
3 Den sani di den e taki fu den na den konmakandra, na sani di e gi sma deki-ati. Drape den e taki fu sani di abi fu du nanga den aladei problema fu a libi, èn den e ondrosuku den span profeititori so srefi di de na ini Bijbel. Den e gi bun bodoi di e leri yu fa fu libi na a moro bun fasi èn fa fu kakafutu gi den problema di yu e miti. Den mati di yu e miti na den konmakandra na den moro bun mati di yu man feni. A demakandra disi e gi yu prisiri èn a e kibri yu gi ogri (Ps. 133:1). A no de wan fruwondru sani taki wan yonguwan ben taki: „Heri dei mi de na skoro, èn dati e weri mi srefisrefi. Ma den konmakandra de neleki wan watrapresi na ini a drei sabana, pe mi e kisi misrefi baka fu kan pasa a tra skoro dei.” Wan trawan ben taki: „Mi kon si taki krosibei matifasi nanga trawan di lobi Yehovah e yepi mi fu tan krosibei na en.”
4 Te yu poti yu nen na a Theokrasia Diniwroko-skoro, dan yu e leri fa fu feni rai fu Bijbel, fa fu gebroiki den rai disi na ini wan lezing èn fa fu hori a lezing leki wan takimakandra gi wan publiki na ini wan Kownukondre zaal. Prakseri omeni bun a e tyari kon te yu kisi skoro fu leri sma den waarheid fu Gado Wortu na wan koni fasi, di kan meki sma tan na libi! Na sortu tra presi yongu sma kan kisi den bun leri disi?
5 Fa fu Feni Furu Wini na den Konmakandra: Fu man feni furu wini na den konmakandra, dan dri tumusi prenspari sani de fanowdu. Den sani disi na taki yu musu sreka yusrefi gi den konmakandra, teki prati na den èn du san yu leri.
6 Sreka Yusrefi gi den Konmakandra: Abi a gwenti fu poti ten na wan sei fu sreka yusrefi gi den konmakandra. No meki skorowroko, wan pisi ten wroko, noso prisiri ten nyan a ten di yu abi fanowdu fu luku na fesi sortu tori den sa taki na ibri konmakandra. Wan sani di e yepi, na te yu abi wan bun gwenti fu du sani. A fosi èn moro prenspari sani di yu musu du, na taki yu musu leisi den alawiki leisipisi fu Bijbel gi a Theokrasia Diniwroko-skoro. Ibri dei, wan tu miniti de fanowdu nomo fu leisi èn prakseri dipi fu den kapitel gi a wiki dati. Poti ten na wan sei fu sreka den kapitel fu a Gemeente Bukustudie èn a Waktitoren-studie. Son sma e du disi wan noso tu dei bifo den konmakandra dati. Efu a man, dan du a srefi sani disi nanga den takimakandra di musu hori na a Diniwroko Konmakandra na ini a wiki dati.
7 Abi wan Prati na den Konmakandra: Bijbel e taki dati di Yesus ben abi 12 yari, dan den ben feni en na ini a tempel ala di a ben e arki, ben e poti aksi èn ben e gi piki (Luk. 2:46, 47). Nanga tra wortu, Yesus ben de trutru na ini a tori. Yu sa abi moro wini fu den konmakandra te yu e meki muiti fu teki prati na den.—Odo 15:23.
8 Na a fosi presi yu musu poti ala yu prakseri na den leri di e gi na den konmakandra. Son leisi a moro muilek fu arki wan lezing leki fu hori wan. Fu san ede? Fu di wi ben sa kan prakseri tra sani te wan tra sma e taki. Fa yu kan feti nanga a problema dati? Fu di yu e meki notisi. Skrifi wan tu prenspari sani di yu wani gebroiki baka ten. A meki di yu e meki notisi sa yepi yu fu poti prakseri na a programa. So srefi, suku den tekst èn leisi den tu te a takiman e du dati.
9 Boiti dati, yu musu abi a prakseri fu teki prati na ibri aksi-nanga-piki takimakandra na den konmakandra. Yu o abi moro wini srefi te yu e poti bun prakseri na san yu wani taki. Odo 15:28 e taki: „Wan man e prisiri nanga a piki fu en mofo.”
10 Du San Yu Leri: Te fu kaba, yu musu meki den sani di yu leri „abi krakti tapu yu” (1 Tes. 2:13). Te yu e gebroiki den moi penti di yu leri na ibri konmakandra, dan disi sa meki yu kon moro krosibei na Yehovah Gado. A sa de wan trutru sma gi yu èn yu sa kisi furu prisiri te yu e „tan waka na ini waarheid”. Boiti dati yu sa firi bun tu, ala di yu e meki waarheid kon tron wan pisi fu yu.—3 Yoh. 4.
11 Yongu brada nanga sisa, te unu gwenti fu sreka unsrefi gi den konmakandra, abi wan prati na den èn e du san un leri, dan unu sa nyan bun fu den konmakandra srefisrefi. Boiti dati, unu sa kisi ala wini di de fu feni na den konmakandra. A bribi fu unu èn a bosroiti fu unu fu tan getrow na un hemel Tata Yehovah, sa kon moro tranga.—Ps. 145:18.