A Blesi fu Yehovah E Meki Wi Kon Gudu
1 Furutron sma e luku a moni di wan sma e meki fu taki efu en libi e waka bun. Fu dati ede, furu sma e denki taki den sma di abi furu moni na den moro koloku sma. Ma, den sma di e denki taki moni kan bai koloku, no abi leti srefisrefi (Preik. 5:12). Den sma di „abi a fasti bosroiti fu kon gudu” na materia sei no sa abi prisiri di e tan (1 Tim. 6:9). Kontrari fu dati, den futuboi fu Yehovah de nanga prisiri trutru èn den na den moro gudu sma na grontapu (Odo 10:22; Openb. 2:9). Fa so?
2 Den Sani Di E Sori Taki Wi Gudu: Wi abi a koni fu man si sani krin na yeye fasi èn wi e frustan a Wortu fu Gado, a Bijbel. Nanga yepi fu en organisâsi na grontapu, Yehovah doronomo e leri wi sani di abi fu du nanga en èn nanga en Manpikin so taki wi kan kisi wini fu têgo. Wan soifri sabi fu sani e meki taki wi man kon krosibei na Yehovah èn nyan bun fu wan krosibei matifasi nanga en (Yak. 4:8). Te wi abi a koni fu man si krin san bun èn san ogri èn te wi e gi yesi na den wet fu Yehovah, dan dati e kibri wi gi son siki èn gi ogri. Wi e frutrow na tapu taki Yehovah sa sorgu wi èn dati sa abi leki bakapisi taki wi sa de tevrede nanga den sani di Gado e gi wi èn wi ati sa de korostu.—Mat. 6:33.
3 Wi e nyan bun fu a vrede nanga a wánfasi di de na ini wi yeye bradafasi, fu di wi e kweki a froktu fu a yeye fu Gado. Wi abi wan tranga banti fu lobi di e meki taki wi de na ini wánfasi nanga makandra. Fu dati ede noiti wi musu firi taki Gado noso den brada fu wi gowe libi wi te rampu miti wi.—Gal. 6:10.
4 A libi fu wi abi trutru waarde nanga marki. Wi e si en leki wan tumusi moi grani fu teki prati na a preikiwroko fu a bun nyunsu na heri grontapu. A sani disi e tyari prisiri kon di e tan, fu di wi e yepi trawan fu kon kisi wan bun matifasi nanga Gado èn fu dini en ini a soifri anbegi makandra nanga wi. A diniwroko fu wi di de leki wan gudu di abi furu waarde, e gi Yehovah grani èn a e meki wi prisiri fu di wi e yepi fu meki a nen fu En kon santa. Wi e tan abi wan bun fasi fu denki fu sani, fu di wi sabi taki a howpu di wi abi gi a ten di e kon sa kon tru heri esi.
5 Wi Musu Sori Taki Wi Abi Warderi: Meki a de so taki wi e warderi den blesi fu Yehovah ala ten èn dati fu tru e meki taki wi na den moro gudu sma na grontapu (Odo 22:4). Te wi e teki ten ala dei fu denki dipi fu den sani di wi abi, dan dati e buweigi wi fu taki Yehovah tangi fu a lobi di a e gi wi so furu èn so srefi a e buweigi wi fu tan anbegi En wawan.