Na blesi foe Jehovah e meki wan sma goedoe
„A sa de gi wan goedoeman moeilek foe go na ini a kownoekondre foe hemel.” — MATTÉUS 19:23.
1, 2. Sortoe kontrari de a mindri difrenti sortoe foe goedoe?
FA JOE BEN sa doe efoe wan sma e meki joe kon sabi: „Joe kon goedoe”?) Foeroe sma ben sa prisiri tapoe a jere foe so wan njoensoe, efoe a ben sa wani taki dati den kon goedoe nanga moni, gron ofoe diri sani psa marki. Ma loekoe pikinso na afersi foe goedoe foe na sé disi: „Na blesi foe Jehovah — dati e meki wan sma kon goedoe, èn a no e poti no wan sari a tapoe.” — Odo 10:22.
2 Di Gado ben go bemoei nanga den famiri-edeman foe owroeten èn nanga na naatsi Israël, a ben blesi den nanga a boen waka foe sani te den ben de getrow (Genesis 13:2; Deuteronomium 28:11, 12; Job 42:10-12). Kownoe Salomo ben de wan sma di ben kisi blesi na a fasi disi. A ben kon goedoe psa marki. Tokoe a ben leri foe ondrofeni dati wan libi pe goedoe na skinfasi ben de a moro prenspari sani, „ben de wan soso sani èn a feti na baka winti” (Prékiman 2:4-11; 1 Kownoe 3:11-13; 9:14, 28; 10:10). Di Salomo ben skrifi: „Na blesi foe Jehovah — dati e meki wan sma kon goedoe”, a no ben poti na krakti a tapoe goedoe na skinfasi. A ben tjari na waarheid kon ondro wortoe dati joe libi, te joe abi na blesi foe Gado, de foeroe tron moro goedoe leki a libi foe den sma di no e dini en. Fa so?
3. Na ini sortoe fasi joe de troetroe goedoe efoe joe abi na blesi foe
3 Efoe joe de wan kristen, dan joe kan kisi now na boenati foe Jehovah èn kisi blesi foe en soleki koni foe Gado. Den kan teki joe poti na ini wan gemeente di joe kan teki gersi nanga wan osofamiri di abi na ini en kristensma di ini algemeen de kolokoe èn abi boen fertrow èn di abi belangstelling gi joe. Den wet foe Gado e kibri joe gi foeroe siki nanga kefar. Ooktoe joe kan abi na howpoe foe kisi na kibri foe Gado na ini a ten foe na „bigi benawtoe” di de e kon gi na godelowsoe seti disi, èn dati joe sa kan libi na ini na tégo paradijs di sa kon bakadati na grontapoe. Joe e si soboen dati joe nanga den sortoe moi blesi nanga ferwakti disi, foe troe kan taki: „Mi goedoe troetroe!” — Mattéus 24:21, 22.
4. Fa joe ben sa kan tjari joe jeje goedoe kon ini kefar? (Openbaring 3:17, 18)
4 Na „goedoe” di de wan pisi foe joe foe di joe abi na blesi foe Jehovah, ben sa kan kon ini kefar nanga tra sortoe goedoe: moni ofoe goedoe na skinfasi. Pikinso sma foe oenoe (awinsi wi abi djaranti na monisé ofoe abi pikinso sani) ben sa piki wantewante: ’mi tanapoe na fesi a kefar foe a lobi foe moni hari mi tjari gwe tapoe wan fowtoe fasi’. Ma prakseri pikinso na a warskow: „Na lobi foe moni de wan roetoe foe ala sortoe ogri sani, èn foe di sma poti den moeiti na tapoe na lobi dati, meki son sma lasi pasi komoto foe na bribi èn ben boro densrefi ala sé nanga foeroe pen” (1 Timóteus 6:10). Dati ben skrifi na ini wan ten di ala kristen di Gado ben feni boen ben salfoe nanga a jeje foe Gado leki wan marki dati den ben kan tron hemel tiriman nanga Kristus. A kan de dati foeroe ben abi persoonlek kontakti nanga den apostel nanga trawan di ben waka nanga Jezus. Efoe son wan foe den ben lasi pasi foe moni ede, o bigi na kefar no de dan gi wi! — 2 Korinte 5:5; Romeini 8:17, 23.
Na goedoeman èn na kameel
5. Fa Jezus ben si goedoe?
5 Jezus ben tjari nofotron na kefar foe goedoe kon a fesi, bika a de wan kefar di ala sma tanapoe na en fesi, den sma di abi en boen èn den di no abi en boen (Mattéus 6:24-32; Lukas 6:24; 12:15-21). Teki leki wan fasi foe ondrosokoe joesrefi pikinso san Jezus ben taki na wán okasi, soleki tanapoe na ini Mattéus 19:16-24; Markus 10:17-30 èn Lukas 18:18-30. Foe san-ede te joe loekoe en boen wi no ben sa teki now pikinso ten foe loekoe wán foe den tori disi ofoe foe lési den alamala?
6, 7. (a) Sortoe takmakandra ben de mindri Jezus nanga wan jongoeman? (b) Sortoe rai Jezus ben gi bakaten?
6 Wan jongoe tiriman ben kon na Jezus foe aksi: „San mi moe doe foe kisi tégo libi?” Jezus ben poti en prakseri na tapoe a Wet, èn meki nanga dati kon krin dati Jehovah no ben libi foe sori san ben de fanowdoe. Na man ben piki dati a ben hori den gebod foe Gado ’foe sensi jongoeten’ kaba. A ben gersi dati a ben tanapoe na fesi a doro di e tjari joe go na libi, ma a ben firi dati a ben mankeri wan sani ete. Kande a ben prakseri dati wan tra boen wroko ben de ete, wan ofoe tra dek’ati wroko, di ben sa de na laatste stap sodati a ben sa psa go ini a doro di e go na tégo libi. Jezus piki wi moe loekoe na wan moro bradi fasi na ini a libi: „Seri ala sani di joe abi èn prati gi den pótiwan, èn joe sa abi wan goedoe na ini den hemel, èn kon dja, tron mi bakaman.” San ben psa? „Di a ben jere disi, a ben sari dipi, bika a ben goedoe srefisrefi [ofoe: a ben abi foeroe goedoe].” Foe dat’ede meki a man ben gwe. — Lukas 18:8, 21-23; Markus 10:22.
7 Bakaten Jezus ben taki: „O moeilek a sa de gi den di abi moni, foe go ini na kownoekondre foe Gado! Ija, gi wan kameel a de moro makriki foe psa ini na olo foe wan nanai leki wan goedoeman foe go ini a kownoekondre foe Gado” (Lukas 18:24, 25). A rai dati ben de soso gi na goedoe tiriman? Ofoe a de ooktoe gi joe, awinsi joe abi en boen ofoe de póti? Meki oen si.
8. (a) Soema na jongoe djoe tiriman ben de? (b) Sortoe fowtoe a ben abi èn foe san-ede disi moe abi na belangstelling foe wi?
8 Kande a e jepi joe foe ferstan na situwasi foe na jongoe tiriman dati, efoe joe tjari kon na joe fesi wan disten eksempre di de sowan srefi sortoe sani — wan krin jongoe kristen nanga wan boen sabi foe na bijbel, wan toemsi boen moraal èn di komoto foe wan goedoe famiri. Na ini a ten disi joe ben sa kan djaroesoe nanga sowan sma. Ma Jezus ben si wan bigi mankeri na ini na jongoe djoeman: en goedoe ofoe den sani di a ben abi ben teki wan toemsi prenspari presi na ini en libi. Foe dat’ede meki Jezus ben gi na rai dati. Joe e si foe sainde a bijbeltori disi de gi wi alamala ofoe wi de goedoe ofoe de póti. Moni nanga sani di wi abi ben sa kan tron toemsi prenspari gi ibriwan foe wi, awinsi wi abi den kaba ofoe soso e angri foe abi den.
9. Fa wi sabi dati Jezus no ben e kroetoe na abi foe goedoe na ini a fasi dati?
9 Jezus no ben taki dati wan sma di abi goedoe na skinfasi no ben kan dini Gado. Foeroe foe den sma dati ben doe dati. A jongoe djoeman dati ben doe en — te na wan séker marki. Dan joe ben abi na belastingman Zachéüs èn en dati „ben goedoe” (Lukas 19:2-10). Son salfoe kristen na ini na fosi jarhondro ben goedoe èn foe dat’ede meki spesroetoe den ’ben moe lobi foe gi sma sani, ben moesoe lobi foe prati nanga trawan’ (1 Timóteüs 6:17, 18; Jakobus 1:9, 10). Èn ooktoe na ini a ten disi joe abi goedoe kristen. Nofotron den ben gi bijdrage nanga den heri ati foe jepi na kownoekondrewroko, den ben opo den oso foe horl komakandra èn ben gebroiki den oto na ini a diniwroko. Foe san-ede Jezus ben taki disi dan foe na goedoeman èn na kameel? San wi kan leri foe dati?
10. Wi kan kon na sortoe bosroiti te wi loekoe na rai di Jezus ben gi na a okasi dati?
10 A sa de krin gi joe dati foe de te na a kaba getrow de wan heri tra sani leki foe meki wan bigin nanga na anbegi foe Gado (Mattéus 24:13; Filipi 3:12-14). Kande Jezus ben abi disi na ini prakseri di a ben taki: „gi wan kameel a de moro makriki foe psa na ini na olo foe wan nanai leki gi wan goedoeman foe psa go ini na kownoekondre foe Gado” (Markus 10:25). No wan kameel ben sa kan kwinsi ensrefi psa na a pikin olo foe wan nanai, so boen Jezus ben gebroiki, èn dati de krin, wan hyperbool, wan sani di e taki psa marki di no ben taki foe joe moe teki en letterlek. Ma ai tjari wel kon a krin o moeilek a de gi wan goedoeman foe doe wan bepaalde sani. San na dati? No wawan foe meki wan bigin nanga a dini foe Gado, nono, ma foe „go na ini a kownoekondre foe Gado”, foe kisi troetroe tégo libi. Fa a de nanga joe na monisé toe, a rai foe Jezus kan de wan jepi gi joe denki, a jeje go a fesi foe joe èn a kisi foe tégo libi.
Foe san-ede a de gi den goedoeman so moeilek
11. Sortoe krakti na préki foe Jezus ben abi tapoe den pótiman nanga den goedoeman?
11 Nanga jepi foe na prékiwroko di Jezus nanga den apostel ben doe, dan ’a boen njoensoe ben meki bekenti na den pótiwan’ (Mattéus 11:5). Den no ben disko goedoe sma. Tokoe a gersi dati a mindri den pótisma morosma ben de di ben festan den jeje nowtoe, èn ben teki na boskopoe foe howpoe tapoe wan boen fasi (Mattéus 5:3, 6; 9:35, 36). Den goedoe djoe ben de moro tevréde nanga fa sani ben go. (Teki gersi nanga Lukas 6:20, 24, 25). Tokoe joe ben abi na ini a ten dati uitzondering, èn dati de troe na ini disiten. Son goedoeman e teki na boskopoe foe na bijbel èn e dini Gado. Dati kan abi kefarlek bigi bakapisi gi den. Dati ben de so na ini a geval foe Paulus di ben meki a positsi di a ben abi ini libi no ben tapoe en (Filipi 3:4-8). Ma ete Jezus ben taki dati a ben sa de moro moeilek gi den goedoeman.
„Na bedrigi krakti foe goedoe”
12, 13. (a) Sortoe punt ini a tori foe sorgoe Jezus ben tjari kon na prakseri ini wan agersitori? (b) Foe san-ede den goedoeman tanapoe ete a fesi wan ekstra moeilijkheid?
12 Jezus ben taki na ini en agersitori foe pikin siri di ben fadon na tapoe difrenti sortoe gron, dati sonwan foe don „ben fadon a mindri maka, èn den maka ben gro èn ben stek den”. A ben tjari kon na krin: „A wan di sai a mindri den maka de a sma di e jere wortoe, ma na sorgoe foe na seti foe sani disi èn na bedrigi krakti foe goedoe, e stek a wortoe, èn a no e meki froktoe” (Mattéus 13:7, 22). Pikinmoro ala sma e ondrofeni wan sani foe „na sorgoe foe na seti foe sani disi”. A makriki foe si foe san-ede disi de so nanga wan sma di de mofina, sondro wroko ofoe malengri. Wan sma di abi sékerfasi na monisé, kande no sa abi den srefi sorgoe, a tapoe ensrefi ben sa kan broko en ede foe den bakapisi foe hé prijs, kenki foe belasting, ofoe na kefar foe foefoeroe. Goedoeman èn pótiman soboen ala toe kan abi na sorgoe foe den. — Mattéus 6:19-21.
13 Jezus ben sori dati son sma ooktoe ben sa kisi wan skotoe nanga „na bedrigi krakti foe na goedoe”. Na feti na baka a waka boen foe sani na monisé kan teki wan sma krinkrin abra. Na miljonair Aristoteles Onassis ben taki wan dé: „Efoe joe doro wan bepaalde punt, dan moni no e de wan prenspari sani moro. San e de a tori, de a waka boen foe sani. A ben sa de a moro boen sani efoe mi ben tapoe now. Ma dati mi no kan. Mi moe kon moro hé èn tan go moro hé soso foe a span foe a tori.” Na so wan kristen ben sa kan feni en wan span tori foe feti go a tapoe a trapoe foe bisins. Ofoe sani kan kori en foe meki na zaak foe en kon moro bigi, langaten baka di a ben doro kaba san a ben si na ini en libi leki „nofo”. Na presi foe go wroko moro mendri (ofoe foe tapoe) sodati a kan teki na foeroetendienst na en tapoe, a e go „broko en maksin-oso èn e bow moro bigiwan”. (Loekoe Lukas 12:15-21.) Dati ben sa kon joe abra? Joe denki dati Gado ben sa denki dati wan sma na ini na situwasi dati e dini en nanga heri en sili? — Mattéus 22:37.
14. Fa wi kan gi wan eksempre foe sori dati goedoe ben sa kan de wan moeilekheid gi wan kristen? (Odo 28:20)
14 Tra fasi de ooktoe ete fa goedoe (ofoe na angri foe kisi goedoe) kan tapoe wan kristen ’foe kisi tégo libi’. Wán foe den dati de dati na lobi foe goedoe ben sa kan bewégi en so fara foe gebroiki grontapoe taktik, soleki a poti toemsi lagi san ai wroko leki moni, ofoe a ben sa kan gebroiki tra oneerlek methode di ini algemeen sma e doe. Ofoe efoe a abi kompe kristen na ini dienst, di de eerlek èn e wroko tranga, dan a ben sa kan feni en égi persoonlek wini moro prenspari leki na jejefasi foe den. Foe tai den moro faste na den wroko dan a ben kan gi den dekati foe eksempre foe go libi moro diri (ofoe foe meki paiman foe kan libi moro goedoe). Èn foe di a de den basi, dan wan firi ben sa kande foe na matifasi disi de ooktoe ini gemeente afersi.
15. Fa son fosten kristen kande ben ondrofeni den takroe bakapisi foe goedoe? (Psalm 73:3-8, 12, 27, 28)
15 Kande son goedoe kristen na ini na fosi jarhondro ben de a mindri den sma di ben fadon gi na „bedrigi krakti foe goedoe”. Jakobus ben skrifi foe ’den rampoe di e kon abra oenoe, den goedoewan’. Den ben abi diri krosi, ben tjari gowtoe nanga solfroe kon makandra foe di den ben pai den sma di ben wroko gi den toemsi wéniki, èn den ben kon fatoe na ini den goedoe foe den (Jakobus 5:1-5). Na so a de ooktoe na ini a ten disi. Goedoe nofotron e gi wan sma na okasi foe njan èn dringi psa marki, san ben sa kan de wan takroe sani gi en skin. Goedoe ooktoe kan gi en pasi foe alaten de tapoe reis, sodati nofotron a e gwe komoto na a gemeente pe a de. Nanga disi wi no wani taki dati moi krosi, gowtoe sani njanjan nanga reis tapoe ensrefi de takroe. Ma den sani disi no ben jepi den „goedoeman” foe soema Jakobus ben skrifi; foe na lagi pikinfaja tapoe san na jejefasi foe den ben e de nanga positsi di no ben boen na ini na ai foe Gado, meki den ben abi réde ’foe kré èn geme foe den rampoe di ben sa kon a den tapoe’.
16. Foe san ede Jezus ben gi den sortoe krin rai disi ini a tori foe goedoe, èn san wi moe aksi wisrefi?
16 Jezus séker ben sabi na pen èn den moeilekheid gi den jejefasi foe den nanga san den goedoeman nofotron ben abi foe feti nanga den. A ben sabi ooktoe dati diri sani ben kan pori gwe letterlek ofoe kan kon tron sani sondro waarde, san noiti kan psa nanga kristen goedoe (Odo 11:28; Markus 1:29, 30). Jezus ben bewijsi gi wi alamala foe datede wan troetroe dienst foe di a ben gi na warskow di e kon now: „O moeilek a sa de gi den di abi moni foe go na ini na kownoekondre foe Gado!” (Lukas 18:24) Wi kan njan boen foe na warskow foe en, awinsi wi no abi foeroe na monisé. Fa? Foe di wi e poti go na ondro ibri ambisi di wi ben sa kan abi foe kon goedoe. Kristensma e bribi dati Jezus ben taki a waarheid. Wi e bribi san Jezus ben taki foe en Tata, foe na kaba foe na seti foe sani èn a kweki foe lobi, èn wi e libi nanga dati. Na waarheid-takiman ben taki ooktoe: „Gi wan kameel a de moro makriki foe psa na ini na olo foe wan nanai leki gi wan goedoeman foe psa go na ini na kownoekondre foe Gado” (Mattéus 19:24). Joe e bribi dati troetroe? Den doe foe joe, joe fasi foe libi èn joe fasi foe doe e bewijsi dati joe e bribi en?
Tan goedoe — tapoe a fasi foe Gado
17. Fa foeroe kristen e sorgoe dati den kon so fara dati Jehovah meki den kon goedoe?
17 Foe na heri grontapoe bewijsi e kon na ini dati na moro bigi pisi foe den dienstknegti foe Gado e teki rai na ati soleki di tanapoe na ini Mattéus 16:24. Foeroe jongoe kristen e bosroiti te den klari nanga den normaal skoroleri foe teki a foeroetendienst na den tapoe. Trowoema di ben sa kan doe grontapoe wroko foe meki na osofamiri kisi moro moni e gi na presi foe dati moro ten na kristenactiviteit èn e meki densrefi nanga trawan kon moro goedoe na jejefasi. Wi abi srefi mansma tapoe soema na bijbel frantwortoe de a den tapoe foe sorgoe na skinfasi gi den osofamiri, di e feni pasi foe abi wan moro bigi pisi na a diniwroko.
18, 19. Sortoe sani son wan ben doe di ben wani dati Jehovah blesi den?
18 Wán owroeman foe mindri dritenti e piki dati „go ini na foeroetendienst ben de alaten soso wortoe di ben lolo komoto foe mi mofoboeba”. A ben wroko moro leki $25.000 wan jari, boiti foe dati a ben kisi wan onkostoe vergoeding èn a ben rij na ini wan oto foe na zaak. Ne den ben aksi en foe hori tapoe na kongres foe 1983 na lezing: „Poti joisti marki èn meki den kon troe ooktoe”. A e taki: „Aladi mi ben lési a stof nanga ala prisiri, mi ben kon so ferlégi èn kon sjen so dati mi ben kisi problema srefsrefl nanga mi konsensi.” Bifo na kongres ben bigin, en nanga en oema ben taki foe den situwasi. Heri esi a ben teki wan afoedé wroko èn a ben go moksi ensrefi nanga en oema ini na pionierdienst. Den e pionier te now ete, èn den de kolokoe nanga den foeroe jeje blesi di den e kisi.
19 Tra sma ben froisi komoto foe kontren pe den mogelekheid foe kon goedoe ben de so foe teki go na presi pe den ben kan bradi den jeje activiteit foe den. Wan man nanga oema foe Canada ben skrifi foe na pionierdienst foe den na ini Latijns-Amerika: „Ala di foeroe pina de dja na mindri den brada nanga sisa, tokoe den abi wan kefarlek bigi faja gi na waarheid. Awinsi den de póti te i loekoe en na grontapoesé, na jejesé den de miljonair. Wi abi 38 prékiman, di 10 foe den de gewone pionier. Wi moe hori den komakandra toe tron foe di someni sma e kon — mindri 110 nanga 140. Den toe owroeman nanga 3 dinari na ini na diniwroko moe hori ala den komakandra disi. Foe den sakafasi brada foe wi dja wi e leri agen na les san a wani taki foe poti Jehovah troetroe tapoe na fosi presi ini wi libi. Den e meki wi si dati wi kan dini Jehovah nanga wi heri sili san den omstandigheid foe wi mag de ooktoe.”
20. Fa wi moe denki na ini wi ati foe goedoe na skinfasi?
20 Den sortoe kristen disi no abi boen réde foe djaroesoo wan sma di goedoe, efoe a de dorosé ofoe inisé foe na gemeente ofoe foe meki ambisi foe feti na baka goedoe teki den abra. Den e ferstan dati gi wan normaal libi moni de fanowdoe (Prékiman 5:3; 7:12). Ma den e si ooktoe dati Jezus ben taki a waarheid — den goedoeman e kon tanapoe na fesi foeroe jeje hendri, tjalansi èn kefar. Wán foe sowan moeilek tjalansi gi den „di de goedoe na ini na disiten seti foe sani” de foe no de nanga bigimemre èn foe no poti den howpoe tapoe goedoe, ma tapoe Gado. — 1 Timóteus 6:17.
21. San den sma e kisi di e feti baka jeje goedoe?
21 A de wan sari sani dati na jongoe tiriman di ben taki nanga Jezus no ben teki na tjalansi disi. Trawan soleki en ben dini Gado wan pisten, ma den ben ondrofeni pen èn ben fadon na jejefasi ini a tori foe na goedoe foe den. Na a tra sé miljoenmiljoen loyaal kristen de di e tan bewijsi dati „na blesi foe Jehovah e meki wan sma kon goedoe èn dati a no e poti sari a tapoe” (Odo 10:22). A libi foe den wani taki wan sani; den abi warti marki di den poti foe doro èn den abi na firi dati den e doe wan sani. Den boen wroko foe den sa tan foe tégo èn sa gi den now èn ini a ten di e kon bigi prisiri. Meki ibriwan foe wi feti na baka foe kon goedoe na a fasi dati. — Filipi 4:1; 1 Thessalonika 2:19, 20.
Sani foe go teki a prakseri
◻ Sortoe goedoe den e bedoel na ini Odo 10:22?
◻ Na sani di Jezus taki foe na goedoeman nanga na kameel e go foe sortoe tori?
◻ Foe san-ede a libi foe den goedoeman foeroetron de moro moeilek?
◻ Fa wi kan feti a baka foe kon goedoe tapoe a fasi foe Gado?
[Faki na tapoe bladzijde 5]
Goedoe nanga na osofamiri
Te joe e go denki foe den krakti di goedoe kan abi tapoe joe, no loekoe dan psa na osofamiri foe joe. Loekoe pikinso den tori di e kon now:
Foe Canada wan tori e kon foe senwe datra, di ben studeri den pikin foe boen goedoeman: „A libi e ferferi den. Den no abi nowan tra marki na den fesi leki foe doe nomo san den ati firi èn den no man ferdrage srefi na moro pikin moeilekheid. Den no abi foeroe firi foe iniwan sortoe. Den de moro foeroe nanga bai sani, reis, èn e soekoe foe njoen span sani.”
The New York Times ben taki foe wan fosten miljonair: „Omoro en bisnis ben waka boen èn en goedoe ben kon moro foeroe, na so ai taki, omoro a ben si fa en osofamiri ben kenki. ’Mi oema nanga mi oemapikin ben marki den sma gewoonlek nanga na moni di den sma ben abi, èn efoe mi ben gi na wán oemapikin wan oso foe $300.000, dan mi ben moe gi na tra oemapikin $300.000 ini moni.’” Bakadi a ben kisi wan hartaanval èn „boiti foe dati ben si san na goedoe ben doe na en oema nanga pikin”, dan a ben kenki en fasi foe libi.
Arnold Hottinger ben taki foe wan kondre ini Mindri-Ostoe di ben abi foeroe oli: ’Na pathologie (a leri foe den siki) foe goedoe de wan sani di den foeroe dorosékondre datra sabi ooktoe, di e kon dja foe wroko boen foeroe moni. A no wan pe, a so den e taki, someni psychomatische siki de leki dja, siki di e tjari foeroe pina, ma di no e kon foe wan mankeri di joe kan sori na a skin. Joe abi, na so den e taki, jongoe sma di e sori ala marki foe grani, èn owroe sma di e tjari densrefi leki jongoe sma.’