Fa Wi Kan Kisi Moro Prisiri fu den Konmakandra
1 Den konmakandra de prenspari gi a gosontu fu wi na yeye sei. A prisiri di wi e kisi fu den abi langalanga fu du nanga den sani di wi e du bifo, na den konmakandra, èn na baka den konmakandra. Fa wi kan yepi wisrefi nanga tra sma fu tan abi furu prisiri te wi e fisiti den konmakandra?
2 Bifo den Konmakandra: A sreka di wi e sreka wisrefi abi langalanga fu du nanga a prisiri di wi e kisi fu den konmakandra. Te wi sreka bun, dan wi sa poti prakseri moro esi èn wi sa wani abi wan prati tu. Na tapu fu dati, ibri toewijzing di wi e kisi na den konmakandra musu sreka bun na fesi, nanga a marki fu gi a bodoi na wan soifri fasi soleki fa den rai e taki èn fu hori a belangstelling fu den arkiman. Wi musu oefen heri bun. Te wi e yepi fu meki den konmakandra de na wan fasi di e gi ala sma deki-ati èn e meki sma abi wini, dan a gro di wi e gro e kon de fu si èn wi abi moro prisiri.—1 Tim. 4:15, 16.
3 Na den Konmakandra: Te wi e gi komentaar na den konmakandra dan dati kan yepi wi fu nyan bun fu den moro. Den pisi pe den arkiman abi wan prati tu, musu de leki wan persoonlijk toewijzing gi ibri sma na ini a gemeente. Syatu komentaar di e taki krinkrin fu a tori e wroko nofotron moro bun. Te wi e fruteri syatu ondrofenitori dan dati kan gi sma deki-ati èn krakti, èn wi musu de na ai fu gebroiki den ibri leisi te a fiti na ini a programa (Odo 15:23; Tori. 15:3). Te wi abi wan prati na a konmakandra, dan wi musu taki nanga faya èn nanga overtoigi, èn wi musu taki na wan fasi di e hari a belangstelling fu sma. So srefi wi musu taki fu sani leki fa den de trutru èn sori sma fa fu gebroiki den sani di wi taki.
4 Na Baka den Konmakandra: Te wi e taki nanga trawan na wan switi fasi, e gi den wan switi odi, èn e taki fu wan tu prenspari penti di ben kari na den konmakandra, dan dati sa abi wini gi wi alamala. Te wi e sori taki wi breiti fu si den yonguwan, den owruwan, nanga den nyunwan e teki prati na den konmakandra, dan dati e tranga a lobi na ini a bradafasi. Na presi fu krutu son sma di e misi den konmakandra kande, wi musu fruteri den a prisiri di wi abi te wi e fisiti den konmakandra, èn dati sa gi den deki-ati fu fisiti den konmakandra.—Hebr. 10:24, 25.
5 No meki wi misi a prenspari seti disi fu gi makandra deki-ati (Rom. 1:11, 12). Te wi e du seryusu muiti na wan opregti fasi, dan wi alamala kan tan abi prisiri te wi e fisiti den Kresten konmakandra.