Konmakandra di e gi wi „deki-ati fu abi lobi èn fu du bun wroko”

NA INI den hondrohondro yari di pasa sani ben seti, so taki a pipel fu Yehovah ben kan kon makandra. Na ini Israel fu owruten, ala mansma ben e go na Yerusalem fu teki prati na den dri bigi fesa (Deut. 16:16). Na ini a ten fu den apostel, den Kresten ben abi a gwenti fu kon makandra, nofo tron na ini wan sma oso (Fileim. 1, 2). Na ini a ten disi, wi abi gemeente konmakandra, kring konmakandra nanga kongres. Fu san ede den anbegiman fu Gado e hori konmakandra? Fu di dati na wan prenspari pisi fu den anbegi.​—Ps. 95:6; Kol. 3:16.

² Ala sma di de na den konmakandra disi e kisi wini fu den tu. Luku san Gado ben taigi den Israelsma fu ibri di fu seibi Kampufesa di den ben hori: „Meki ala sma kon makandra, iya, ala mansma, ala umasma, ala pikin, nanga ala trakondre sma di e tan na un mindri. Meki den arki èn meki den leri ala den wèt disi, so taki den kan lespeki Yehovah un Gado, èn so taki den kan du ala san skrifi na ini den wèt disi” (Deut. 31:12). A de krin taki wi e go na den konmakandra fu „kisi leri fu Yehovah” (Yes. 54:13). Na den konmakandra wi abi na okasi tu fu kon sabi wi brada nanga sisa. Te wi de nanga den wi e kisi deki-ati èn wi e kisi krakti.

GEMEENTE KONMAKANDRA

³ Den disipel di ben kon makandra baka a Pinksterfesa fu a yari 33 ben poti prakseri na den leri fu den apostel èn „ibri dei den ben de na ini a tempel leki wán man” (Tori 2:42, 46). Bakaten te den Kresten ben e kon makandra fu anbegi Gado, den ben e leisi den buku di Gado ben meki sma skrifi. Den ben e leisi den brifi tu di Gado ben meki den apostel nanga tra Kresten skrifi (1 Kor. 1:1, 2; Kol. 4:16; 1 Tes. 1:1; Yak. 1:1). Leki gemeente den ben e begi gi makandra tu (Tori 4:24-29; 20:36). Ten na ten, den zendeling ben e fruteri san den ben ondrofeni na ini a preikiwroko (Tori 11:5-18; 14:27, 28). Na a konmakandra den ben e taki fu Bijbel leri èn fu profeititori di ben kon tru. Den ben e leri fa wan Kresten musu tyari ensrefi èn fa a kan tan dini Gado. Ala sma ben e kisi deki-ati fu de fayafaya preikiman fu a bun nyunsu.​—Rom. 10:9, 10; 1 Kor. 11:23-26; 15:58; Ef. 5:1-33.

⁴ A fasi fa Kresten konmakandra seti na ini a ten disi, de a srefi leki fa den ben seti na ini a ten fu den apostel. Wi e gi yesi na a rai na ini Hebrewsma 10:24, 25: „Meki wi poti prakseri na makandra. . . . Meki wi no misi konmakandra, soleki fa son sma gwenti du, ma gi makandra deki-ati o moro unu e si a dei e kon krosibei.” Na ini den lasti dei disi di hebi fu pasa, wi abi a deki-ati fanowdu di wi e kisi te wi e kon makandra doronomo. Disi o yepi wi fu tan abi wan tranga bribi èn fu tan du san reti leki Kresten (Rom. 1:11, 12). Wi e libi na mindri ogri sma di e du kruktudu. Ma wi e kakafutu gi ogridu èn gi den lostu fu grontapu (Fil. 2:15, 16; Tit. 2:12-14). Fu tru, wi no ben o wani de na nowan tra presi leki na mindri a pipel fu Yehovah (Ps. 84:10). Iya, nowan sani e tyari moro wini gi wi leki te wi e studeri Gado Wortu èn te wi e taki fu en. Meki wi go luku den difrenti konmakandra di seti èn di e tyari wini kon gi wi.

KONMAKANDRA TAPU SATRA NOSO SONDE

⁵ A fosi pisi fu a konmakandra di wi e hori tapu satra noso sonde na wan Bijbel-lezing. A de spesrutu gi ala sma di wani kon arki. Sonwan fu den sma disi e kon na a konmakandra fu a fosi leisi. A Bijbel-lezing na wan prenspari fasi fu yepi den sma di no e kon so langa ete èn den gemeente preikiman fu kisi leri fu Gado.​—Tori 18:4; 19:9, 10.

⁶ Krestes Yesus, den apostel fu en, nanga den wan di ben e wroko makandra nanga den ben e hori publiki konmakandra, neleki den wan di wi e hori na ini den gemeente fu Yehovah pipel na ini a ten disi. A no de fu taki dati Yesus ben de a moro bun takiman di ben libi na grontapu. Sma ben taki fu en: „Noiti ete wan sma taki leki a man disi” (Yoh. 7:46). Yesus ben e taki leki wan sma di ben abi makti èn dati ben fruwondru den arkiman fu en (Mat. 7:28, 29). Den wan di gi yesi na a boskopu fu en ben kisi furu blesi (Mat. 13:16, 17). Den apostel ben teki na eksempre fu en. Na ini Tori fu den apostel 2:14-36 wi e leisi fu a span lezing di Petrus hori na a dei fu a Pinksterfesa fu a yari 33. Dusundusun sma ben du wantewante san den ben yere. Bakaten, di trawan yere a lezing di Paulus hori na Ateine, den tron bribiman tu.​—Tori 17:22-34.

⁷ Na ini a ten fu wi, a de so tu taki milyunmilyun sma kisi wini fu den Bijbel-lezing di e hori na ini den gemeente ibri wiki èn fu den wan di e hori na kring konmakandra nanga kongres. Den lezing disi e yepi wi fu frustan den Bijbel leri èn fu tan du wi Kownukondre diniwroko. Te wi e kari sma di wani sabi moro noso iniwan tra sma di wi e miti, kon na a konmakandra disi, dan wi e yepi den fu kon sabi den prenspari leri fu Bijbel.

⁸ Den Bijbel-lezing e taki fu ala sortu tori. Den lezing abi fu du nanga den leri fu Bijbel, profeititori, rai gi na osofamiri-libi nanga a trowlibi, sani di e miti yongusma èn a fasi fa wan Kresten musu tyari ensrefi. Sonwan fu den lezing e taki fu den moi sani di Yehovah meki. Trawan e poti prakseri na a bribi nanga a deki-ati fu difrenti sma fu Bijbel èn a fasi fa den tan du san reti. Den lezing dati e yepi wi fu teki na eksempre fu den.

⁹ Efu wi wani kisi wini fu den Bijbel-lezing, dan a prenspari taki wi e arki bun te a lezing e hori. Suku den Bijbeltekst di a takiman e kari. Leisi den tekst makandra nanga en te a e leisi èn fruklari den (Luk. 8:18). Na so fasi wi e luku efu den sani di wi e leri tru. Disi o yepi wi fu no frigiti san wi leri èn fu tan du den sani dati.​—1 Tes. 5:21.

¹⁰ Efu nofo takiman de, dan a no de fu taki dati a gemeente o seti sani taki wan Bijbel-lezing e hori ibri wiki. Furu tron den kan du disi, fu di den e aksi takiman fu tra gemeente na ini a kontren fu kon hori wan lezing. Efu nofo takiman no de fu hori lezing ibri wiki, dan a gemeente o seti sani so taki lezing e hori te a kan.

¹¹ A di fu tu pisi fu a konmakandra di wi e hori tapu satra noso sonde, na a Waktitoren-studie. A Waktitoren-studie na wan aksi-nanga-piki takimakandra di komoto fu a Waktitoren di abi den studie-artikel. Nanga yepi fu A Waktitoren Yehovah e gi wi leri na a reti ten.

¹² Furu tron den studie-artikel e taki fu a fasi fa wi kan gebroiki Bijbel rai na ini wi aladei libi. Den e gi Kresten a krakti fu man kakafutu gi „a yeye fu grontapu” èn fu sorgu taki den no e tyari densrefi na wan fasi di no fiti (1 Kor. 2:12). A Waktitoren e yepi wi fu frustan den leri fu Bijbel nanga den profeititori moro bun. Na so fasi wi alamala kan sabi a tru leri bun èn wi kan tan na tapu a pasi fu den reti-ati sma (Ps. 97:11; Odo 4:18). Te wi de na a Waktitoren-studie èn te wi e teki prati na dati, dan disi kan yepi wi fu prisiri nanga a howpu di wi abi fu libi na ini a nyun grontapu fu Yehovah pe retidu o de (Rom. 12:12; 2 Petr. 3:13). A Waktitoren-studie e yepi wi fu abi den fasi di a yeye e meki sma kisi èn a e gi wi a krakti fu tan dini Yehovah fayafaya (Gal. 5:22, 23). A e yepi wi fu horidoro te wi e kisi tesi èn fu seti „wan bun fondamenti gi a tamara”, so taki wi „kan grabu a trutru libi hori bun steifi”.​—1 Tim. 6:19; 1 Petr. 1:6, 7.

¹³ San wi kan du fu kisi wini fu a Waktitoren-studie? Wi musu sreka ibriwan fu den studie-artikel na fesi. Wi kan du disi wi wawan noso nanga wi osofamiri. Wi musu luku ala den tekst di kari èn gi piki nanga wi eigi wortu te wi de na a konmakandra. Disi o meki taki den sani di wi e leri doro wi ati èn trawan o kisi wini tu te den e yere den piki fu wi. Te wi e arki bun te tra sma e gi piki, dan dati o yepi wi ibri wiki fu kisi wini fu den artikel.

MINDRIWIKI KONMAKANDRA

¹⁴ Ibri wiki a gemeente e kon makandra na a Kownukondre zaal gi wan programa di nen Wi Kresten libi nanga a preikiwroko. A konmakandra disi abi dri pisi di e yepi wi fu de dinari fu Gado di fiti fu du a wroko fu en (2 Kor. 3:5, 6). A schema nanga den tori di wi o luku, o de na ini a Wi Kresten libi nanga a preikiwroko​—Studie-buku di wi o kisi ala mun. A studie-buku disi abi eksempre tu fu takimakandra di wi kan gebroiki na ini a preikiwroko.

¹⁵ A fosi pisi fu a konmakandra disi nen Gudu na ini Gado Wortu. A pisi disi e yepi wi fu kon sabi moro fu son Bijbel tori èn fu sabi fa sani ben de na a ten di den skrifi. Wi o si tu fa wi kan fiti den sani di wi e leri na ini wi libi. A pisi disi fu a konmakandra abi wan lezing, wan leisipisi nanga wan takimakandra fu a leisipisi fu Bijbel. A Kresten libi nanga preikiwroko Studie-buku abi karta nanga prenki fu yepi wi fu kon frustan den Bijbel tori disi moro bun. A abi presi tu pe yu kan skrifi wan tu sani gi yusrefi. Te wi e ondrosuku Bijbel so fini, dan dati o yepi wi na ini wi libi èn na ini a preikiwroko. Disi o meki taki wi ’bun dorodoro èn taki wi de srekasreka fu du ibri bun wroko’.​—2 Tim. 3:16, 17.

¹⁶ A di fu tu pisi fu a konmakandra di nen Du muiti fu tron wan moro bun preikiman, e yepi wi alamala fu oefen gi a diniwroko, fu preiki èn fu gi leri moro bun. Studenti o hori prati èn wi o luku felem di o sori wi fa wi kan hori wan takimakandra. A pisi disi fu a konmakandra e yepi wi fu abi a „tongo fu den wan di kisi leri”, so taki wi ’kan sabi san fu taigi den sma di weri’.​—Yes. 50:4.

¹⁷ A di fu dri pisi fu a konmakandra di nen Wi Kresten libi e sori wi fa wi kan gebroiki Bijbel rai na ini wi aladei libi (Ps. 119:105). Wan prenspari sani fu a pisi disi fu a konmakandra, na a Gemeente Bijbelstudie. Neleki a Waktitoren-studie, a Gemeente Bijbelstudie na wan aksi-nanga-piki takimakandra.

¹⁸ Ibri mun te wi kisi wan nyun Kresten libi nanga preikiwroko Studie-buku, a fesiman fu den owruman noso wan tra owruman di e yepi en o luku a studie-buku disi bun èn a o meki wan schema. Ibri wiki wan owruman di de wan bun leriman o de fesiman fu a konmakandra. Den owruman fu a gemeente o luku sortu brada o man du a wroko disi. A fesiman fu a konmakandra e sorgu taki a konmakandra e bigin èn tapu biten. A e prèise èn e gi rai tu na den brada nanga sisa di e hori lezing.

¹⁹ Te wi abi a gwenti fu sreka wisrefi gi a Kresten libi nanga preikiwroko konmakandra, te wi e go na a konmakandra èn te wi abi wan prati, dan wi o kon sabi Bijbel. Wi o frustan Bijbel rai moro bun, wi o man preiki a bun nyunsu sondro fu frede èn wi o man yepi sma tron disipel. Den wan di de na a konmakandra, ma di no dopu ete e kisi deki-ati fu den lezing di e hori èn den e kisi wini tu te den de makandra nanga den brada nanga sisa. Te wi e sreka wisrefi gi a konmakandra disi èn gi tra konmakandra, dan wi kan gebroiki a Sranantongo Watchtower Library na tapu DVD, a JW Library app^®, a Waktitoren Library tapu Internet^™ (efu den sani disi de na ini a tongo di yu e taki), nanga a bukukasi na a Kownukondre zaal. Na ini a bukukasi yu abi den buku fu na organisâsi fu wi, na Index van Wachttoren-publicaties noso Ondrosuku Bijbel moro fini​—Gi Yehovah Kotoigi. A abi difrenti Bijbelvertaling tu, wan wortubuku nanga tra buku fu ondrosuku sani. Iniwan sma mag gebroiki den buku na ini a bukukasi disi fosi noso baka den konmakandra.

PREIKIWROKO KONMAKANDRA

²⁰ Na difrenti ten na ini a wiki èn tapu satra nanga sonde difrenti grupu fu preikiman e kon makandra syatu na den preikiwroko konmakandra di e hori. Nofo tron den konmakandra disi e hori na a oso fu wan sma noso na wan tra presi di bun. Ma den kan hori na a Kownukondre zaal tu. Te pikin grupu preikiman e kon makandra na difrenti presi na ini a kontren, dan disi o meki en moro makriki gi den fu doro na a presi pe a konmakandra e hori èn fu go na ini a gebied. A grupu kan prati gaw èn den preikiman kan go na a gebied sondro fu lasi ten. A grupu-opziener o man poti moro prakseri tu na den sma fu a grupu fu en. Aladi a bun taki den preikiwroko grupu e miti na difrenti presi, a kan de fanowdu taki wan tu grupu e kon makandra na wán presi. Fu eksempre, efu furu preikiman no e go ini a preikiwroko mindriwiki, dan a moro bun fu meki wan tu grupu kon na wán, noso fu meki ala den preikiman miti na a Kownukondre zaal noso na wan tra presi di bun. Disi o meki taki den preikiman o man wroko nanga makandra. A gemeente kan seti sani tu fu kon makandra na a Kownukondre zaal tapu den fesadei. Noso den kan bosroiti fu hori wan preikiwroko konmakandra nanga den difrenti grupu baka a Waktitoren-studie.

²¹ Efu den preikiwroko grupu e kon makandra na difrenti presi, dan a grupu-opziener o hori a preikiwroko konmakandra. Ten na ten a kan aksi a brada di e yepi en, noso wan tra lepi brada fu hori a konmakandra. A brada musu sreka fu taki fu wan sani di den preikiman kan gebroiki na ini a preikiwroko. A brada e prati a grupu èn wan sma fu a grupu e begi. Baka dati, a grupu kan go wantewante na ini a gebied. Den preikiwroko konmakandra musu teki feifi te go miti seibi miniti nomo. Ma te den e hori baka wan gemeente konmakandra, dan den musu de moro syatu. Den preikiwroko konmakandra disi musu gi wi deki-ati, den musu leri wi sani di wi kan gebroiki na ini a preikiwroko, èn ala sma musu sabi pe den e wroko èn nanga suma den e wroko. Sani kan seti taki nyun preikiman noso tra sma di abi yepi fanowdu kan wroko nanga preikiman di abi ondrofeni.

A FASI FA KONMAKANDRA SETI NA INI NYUN GEMEENTE NOSO PIKIN GEMEENTE

²² Fu di moro sma e tron disipel, meki den gemeente e kon moro furu tu. Nofo tron a kring-opziener e skrifi go na a bijkantoro fu aksi fu opo wan nyun gemeente. Son leisi den sma fu wan pikin grupu kan feni en moro bun fu wroko makandra nanga a gemeente di de moro krosibei.

²³ Son leisi wan pikin gemeente kan abi soso sisa. Te dati de so, dan a sisa di e begi na ini a gemeente noso di e hori den konmakandra disi, musu weri wan sani tapu en ede, soleki fa Bijbel e taki (1 Kor. 11:3-16). Furu tron a sisa e tan sidon nanga en fesi go na a grupu. Sisa no e tanapu tapu a podium e hori lezing na den konmakandra. Na presi fu dati den e sidon èn den e leisi den sani di na organisâsi seti fu luku a neti dati. Te den kaba leisi, den kan fruteri san wi kan leri fu a tori. Ten na ten den kan hori a prati nanga wan tra sisa pe den e taki nanga makandra fu a tori, noso den kan hori wan demonstrâsi fu en. A bijkantoro o aksi wan fu den sisa na ini a gemeente fu sorgu gi den brifi di musu skrifi go na a bijkantoro èn a sisa dati o hori den konmakandra tu. Baka wan pisi ten, te brada de na ini a grupu di man du den wroko dati, dan den o teki den frantwortu disi abra.

KRING KONMAKANDRA

²⁴ Ibri yari sani e seti, so taki gemeente di de na ini a srefi kring kan kon makandra gi tu kring konmakandra di e hori wán dei nomo. Den prisiri okasi disi e gi ala sma na okasi fu ’opo den ati moro’ èn fu abi demakandra nanga den brada nanga sisa fu den (2 Kor. 6:11-13). Na organisâsi fu Yehovah e luku sortu leri de fanowdu èn nanga yepi fu Bijbel den e sreka difrenti lezing di abi fu du nanga dati. Boiti dati, den e luku fa den o tyari a leri kon na fesi, fu eksempre na ini lezing, na ini takimakandra, na ini demonstrâsi, na ini ondrofenitori pe den e demo fa sani pasa trutru, na ini wan demo pe wan sma e taki nanga ensrefi èn na ini interview. Den leri dati di e gi na a reti ten, e tranga a bribi fu den arkiman. Na den kring konmakandra disi preikiman di gi densrefi abra na Yehovah kan dopu.

KONGRES

²⁵ Wán leisi wan yari, wi e hori moro bigi konmakandra. Furu tron den bigi konmakandra disi na kongres fu dri dei pe gemeente fu difrenti kring e kon makandra. Pikin bijkantoro kan feni taki a moro bun efu ala den gemeente di de na ini a kontren di den e luku, e kon makandra na wán presi. Son leisi a situwâsi na ini wan kondre e meki taki den kongres e orga tra fasi noso na organisâsi e taki dati sani musu seti tra fasi. Ten na ten, internationaal kongres noso spesrutu kongres e hori na son kondre èn dusundusun Kotoigi fu difrenti kondre e kon na den kongres disi. Na ini den yari di pasa, furu sma kon sabi a bun nyunsu fu a Kownukondre fu di na ala sei wi e gi sma wan kari fu kon na den bigi konmakandra disi fu Yehovah Kotoigi.

²⁶ Yehovah en pipel e prisiri fu kon makandra na den kongres fu anbegi en na ini wánfasi. Na den kongres disi wi e leri fu Bijbel tori di wi kon frustan moro bun. Na son kongres, wi e kisi nyun buku noso tra sani fu studeri, fu gebroiki na ini a gemeente, noso fu gebroiki na ini a preikiwroko. Na den kongres sma kan dopu tu. Den kongres prenspari fu di den e yepi sma fu tron wan moro bun mati fu Yehovah. Den konmakandra disi e sori taki na heri grontapu a pipel fu Yehovah na wán bigi famiri. Leki Kresten, den gi densrefi abra na Gado èn den e sori taki den na trutru bakaman fu Yesus Krestes.​—Yoh. 13:35.

²⁷ Te wi e go na den gemeente konmakandra, den kring konmakandra nanga den kongres fu Yehovah pipel, dan wi e kisi krakti fu du a wani fu Yehovah. Den konmakandra disi e kibri wi tu gi a krakti fu grontapu di kan meki a bribi fu wi kon swaki. Yehovah e kisi glori èn sma e prèise en na den konmakandra disi (Ps. 35:18; Odo 14:28). Wi kan de nanga tangi taki Yehovah seti den konmakandra disi di e tranga a bribi fu a pipel fu en na ini a ten fu a kaba.

NA AVONDMAAL FU MASRA

²⁸ Wán leisi wan yari den gemeente fu Yehovah Kotoigi na heri grontapu e hori a Memrefesa fu a dede fu Krestes, noso na Avondmaal fu Masra (1 Kor. 11:20, 23, 24). Disi na a moro prenspari konmakandra fu a yari gi a pipel fu Yehovah. Wi kisi a komando fu hori a Memrefesa disi.​—Luk. 22:19.

²⁹ A dei di a Memrefesa e hori na a srefi dei di a Paskafesa ben e hori èn a dei dati skrifi na ini Bijbel (Eks. 12:2, 6; Mat. 26:17, 20, 26). A Paskafesa ben de na alayari fesa pe den Israelsma ben e memre a ten di den komoto na ini Egepte na ini a yari 1513 Fosi Krestes. Na a ten dati Yehovah ben taki dati na a di fu 14 dei fu a fosi mun (Nisan) tapu a Dyu kalender, den ben musu nyan a pikin skapu di den ben srakti gi a Paskafesa èn den ben musu komoto na ini katibo na Egepte (Eks. 12:1-51). A dei fu a Memrefesa na a dei te a fosi furu mun de fu si, baka a dei na ini maart te a son e skèin sowan 12 yuru langa èn te a dungru sowan 12 yuru langa. Yu musu luku o ten a nyun mun de fu si fosi a dei disi, dan yu e teri 13 dei baka dati. Nofo tron disi na a dei fu a fosi furu mun te a Memrefesa musu hori.

³⁰ Na ini Mateyus 26:26-28 wi e leisi fa Yesus srefi taki dati a Memrefesa musu hori. Na a fesa dati wi no e hori wisrefi na gwenti nomo èn wi no e du ala sortu sani di sma no man frustan. A fesa e hori nanga brede èn nanga win di wani taki wan spesrutu sani. Den sma di e nyan a brede èn di e dringi a win na den wan di o tiri makandra nanga Yesus Krestes na ini a Kownukondre fu en na hemel (Luk. 22:28-30). Ala tra Kresten di gi densrefi abra na Gado nanga ala den sma di wani kon sabi moro fu Gado, e kisi a deki-ati fu de na a Avondmaal fu Masra. Te den e kon na a konmakandra disi, dan den e sori taki den abi warderi gi a fasi fa Yehovah seti sani fu tyari wini kon gi ala libisma nanga yepi fu en Manpikin Yesus Krestes. Fosi a Memrefesa, wan spesrutu Bijbel-lezing e hori fu gi sma deki-ati fu kon na a Memrefesa èn fu studeri Bijbel.

³¹ Yehovah Kotoigi e prisiri fu kon makandra na den konmakandra fu den. Drape wi e „poti prakseri na makandra tu, so taki wi kan gi makandra deki-ati fu abi lobi èn fu du bun wroko” (Hebr. 10:24). A koni srafu di de fu frutrow e seti den konmakandra disi fu sorgu taki wi kisi san wi abi fanowdu fu tranga a bribi fu wi. Ala den futuboi fu Yehovah nanga den sma di wani kon sabi moro e kisi a deki-ati fu gebroiki den sani disi di seti gi wi èn fu go na den konmakandra doronomo. Te den futuboi fu Gado e sori warderi gi den sani di Yehovah seti nanga yepi fu na organisâsi fu en, dan dati e meki den libi na ini wánfasi. San moro prenspari, na taki wi e prèise Yehovah èn wi e gi en glori.​—Ps. 111:1.