Preikiwroko konmakandra di e hori bun

1. Fu san ede wi e hori preikiwroko konmakandra?

¹ Wan leisi Yesus kon makandra nanga 70 disipel fu en, fosi den go preiki (Luk. 10:1-11). A gi den deki-ati di a taigi den taki den no ben o de den wawan èn taki Yehovah, „a Masra fu a kotiwroko”, ben o yepi den. A taigi den tu fa den musu preiki èn a seni den „tu na tu”. Na ini a ten disi den preikiwroko konmakandra e hori tu fu gi wi deki-ati, fu yepi wi èn fu orga a wroko.

2. O langa wan preikiwroko konmakandra musu hori?

² Now wi gwenti hori preikiwroko konmakandra sowan 10 te go miti 15 miniti. Na a konmakandra a brada e taki suma o wroko nanga suma, pe den musu wroko èn a e tapu nanga begi. A sani disi o kenki now. Bigin nanga april, wan preikiwroko konmakandra musu teki feifi te go miti seibi miniti nomo. Ma te a e hori baka wan gemeente konmakandra, a musu moro syatu srefi fu di den preikiman leri moi sani fu Bijbel kaba. Te wi e hori syatu preikiwroko konmakandra, dan wi o abi moro ten fu preiki. Boiti dati, efu pionier noso tra preikiman bigin preiki kaba fosi a preikiwroko konmakandra, dan den no o abi fu wakti tumusi langa fu go doro nanga a preikiwroko.

3. Fa den owruman kan orga den preikiwroko konmakandra so taki den preikiman kisi wini fu en?

³ Den preikiwroko konmakandra musu hori na so wan fasi taki den preikiman e kisi wini fu en. Na ini furu gemeente a moro bun efu preikiwroko grupu e kon makandra na difrenti kontren, na presi fu meki ala preikiman kon na wán presi. Disi o meki en moro makriki gi den preikiman fu kon na a presi pe a konmakandra e hori èn fu go na ini a kontren. A brada kan seti sani gaw fu sori suma o wroko nanga suma èn a o moro makriki gi den grupu-opziener fu poti prakseri na den preikiman di de na ini den grupu. Den owruman fu a gemeente kan luku a situwâsi na ini a kontren èn den kan bosroiti san moro bun fu du. Fosi a brada tapu a preikiwroko konmakandra nanga wan syatu begi, ala sma musu sabi kaba pe den o wroko èn nanga suma.

4. Fu san ede wi no musu denki taki den preikiwroko konmakandra no prenspari leki den tra gemeente konmakandra?

⁴ A prenspari leki den tra gemeente konmakandra: Fu di den preikiwroko konmakandra e hori gi den sma di o go na ini a preikiwroko, meki a no de so taki a heri gemeente o de drape. Ma disi no wani taki dati den konmakandra disi no prenspari leki den gemeente konmakandra. Neleki fa a de nanga ala den konmakandra fu wi, na so a preikiwroko konmakandra na wan seti fu Yehovah pe wi kan gi makandra deki-ati fu abi lobi èn fu du bun wroko (Hebr. 10:24, 25). Dati meki a brada di e hori a konmakandra disi musu sreka ensrefi bun so taki a takimakandra kan gi Yehovah grani èn so taki den sma di de drape kan kisi wini fu en. Efu a kan, den preikiman di o go preiki musu du muiti fu kon na a preikiwroko konmakandra.

5. (a) San a dienst-opziener musu du fu seti den preikiwroko konmakandra? (b) Fa wan sisa musu hori a preikiwroko konmakandra? (Luku na artikel na tapu bladzijde 6.)

⁵ A brada di e hori a konmakandra musu sreka ensrefi: Efu wan sma wani hori wan lezing bun na wan gemeente konmakandra, dan a musu sreka ensrefi bun. Fu man du dati a musu kisi en toewijzing na fesi. Na so a de tu te wan brada musu teki fesi na a preikiwroko konmakandra. Nofo tron te den preikiwroko grupu e miti na difrenti presi, dan den grupu-opziener noso den brada di e yepi den o hori a preikiwroko konmakandra. Ma efu a gemeente o hori wan preikiwroko konmakandra pe ala den grupu o kon na wán, dan a dienst-opziener o taki na fesi suma musu hori en. Son dienst-opziener e gi ala den brada di musu hori wan preikiwroko konmakandra wan schema èn den e poti wan schema tu tapu a bord pe sani fu a gemeente e meki bekènti. A dienst-opziener musu luku bun suma a o poti fu hori den konmakandra disi. A musu hori na prakseri tu taki a sma di o hori a konmakandra musu de wan sma di man gi bun leri èn di man orga sani bun. Na so den preikiman o kisi wini fu den konmakandra disi. Efu nowan owruman, dinari ini a diniwroko noso wan tra dopu brada no o man hori en tapu son dei, dan a dienst-opziener kan aksi wan lepi dopu sisa fu hori a konmakandra.​—Luku na artikel di nen „Te wan sisa musu hori a preikiwroko konmakandra”.

6. Fu san ede a prenspari taki a brada di o hori a preikiwroko konmakandra sreka ensrefi bun?

⁶ Te wi abi wan prati na a Theokrasia Diniwroko-skoro noso na a Diniwroko Konmakandra, dan dati prenspari gi wi èn wi e sreka wisrefi bun. Wi no ben o wakti teleki wi de na pasi fu go na a konmakandra fu denki san wi o taki. Na so wi musu si en tu te wi kisi a grani fu hori wan preikiwroko konmakandra. Now di a konmakandra disi o hori moro syatu, dan a moro prenspari fu sreka bun so taki den preikiman leri wan sani èn a konmakandra kaba biten. Te a brada di o hori a preikiwroko konmakandra sreka ensrefi bun, dan a o sabi na fesi tu pe wi o preiki.

7. Fu sortu sani a brada di e hori a preikiwroko konmakandra kan taki?

⁷ Fu san yu kan taki: Fu di ibri kontren de tra fasi, meki a srafu di de fu frutrow no skrifi finifini san wi musu taki na den preikiwroko konmakandra. Na ini a faki „San yu kan taki na wan preikiwroko konmakandra”, yu kan si wan tu eksempre. Nofo tron a preikiwroko konmakandra o hori leki wan takimakandra. Wanwan leisi a brada kan hori wan demonstrâsi di sreka bun noso a kan sori wan fu den felem fu a jw.org website soleki Fa wi e studeri Bijbel nanga sma? noso San wi e du na ini wan Kownukondre zaal? Te a brada di o hori a preikiwroko konmakandra e sreka ensrefi, dan a musu prakseri san o gi den preikiman deki-ati èn san o yepi den na ini a preikiwroko a dei dati.

8. Fu san a brada kan taki na a preikiwroko konmakandra tapu satra nanga sonde?

⁸ Fu eksempre, tapu satra wi gwenti pristeri A Waktitoren nanga Ontwaakt! Furu fu den preikiman di e go na ini a preikiwroko tapu satra no e go mindriwiki. Dati meki a kan taki den frigiti san den ben oefen di den ben hori na Osofamiri Anbegi. Fu dati ede a kan bun efu a brada di e hori a preikiwroko konmakandra taki fu wan fu den eksempre na a lasti bladzijde fu Wi Kownukondre diniwroko. Te a e sori fa fu pristeri wan tijdschrift, dan a kan taki tu fu wan sani di kon na nyunsu, wan sani di pasa, noso wan fesadei. A kan sori tu san wi kan du so taki wi man go baka na wan ososma di teki den tijdschrift. Efu son sma di de na a konmakandra ben pristeri den tijdschrift kaba, dan a brada kan aksi den fu fruteri syatu fa den du dati, noso fu fruteri wan moi ondrofenitori. Tapu sonde, a brada di e hori a preikiwroko konmakandra kan du wan srefi sortu sani nanga den buku di wi e pristeri a mun dati. Den buku di wi e gebroiki fu studeri nanga sma wi kan pristeri iniwan dei. Dati na buku soleki a Bun nyunsu-brochure, na Arki Gado-brochure nanga a Bijbel leri-buku. Sobun, a brada kan taki syatu fa fu pristeri wan fu den buku disi.

9. Fu san a brada kan taki te a gemeente o du wan spesrutu preikiwroko tapu satra nanga sonde?

⁹ Efu a gemeente o du wan spesrutu preikiwroko tapu satra nanga sonde, dan a brada di e teki fesi kan sori fa wi kan pristeri den tijdschrift fu a mun makandra nanga wan traktaat noso wan kari. A kan taki tu san fu du te wan sma wani sabi moro. Boiti dati, a kan meki den preikiman fruteri ondrofenitori di e sori o prenspari a spesrutu preikiwroko de.

10, 11. Fu san ede a preikiwroko konmakandra o waka bun te den preikiman sreka densrefi bun?

¹⁰ Fa den preikiman kan sreka densrefi: Den preikiman kan yepi tu fu meki a preikiwroko konmakandra waka bun. Te den e sreka na fesi gi a preikiwroko, kande te den e hori na Osofamiri Anbegi, dan den o man fruteri tra preikiman wan moi sani. Te wi sreka bun, dan wi o teki tijdschrift nanga tra buku fosi wi doro na a preikiwroko konmakandra so taki ala sma kan go na a kontren sondro fu draidrai.

¹¹ A de prenspari tu fu seti sani so taki wi kan doro wan tu miniti fosi a preikiwroko konmakandra bigin. A no de fu taki dati wi wani doro biten na ala den gemeente konmakandra. Ma te wi e doro lati na a preikiwroko konmakandra, dan dati kan tyari bruya kon. Fa so? A brada di e teki fesi e hori wan tu sani na prakseri fosi a bigin prati a grupu. Efu wan tu preikiman nomo de, dan a kan bosroiti fu seni ala sma go na ini wán kontren di no ben kaba wroko ete. Efu son preikiman waka kon na a preikiwroko konmakandra èn a kontren pe den o wroko de fara, dan a brada kan meki den sma disi wroko makandra nanga den wan di abi wagi. Efu furu ogri e pasa na ini wan kontren, a kan poti brada fu wroko makandra nanga wan grupu sisa noso a kan meki den wroko ini a birti fu den sisa. A kan poti preikiman di siki fu wroko na ini wan strati pe a no muilek fu waka. A kan poti nyun preikiman fu wroko makandra nanga den wan di abi ondrofeni. Ma efu den preikiman e doro lati, dan a o abi fu seti sani tra fasi noso kenki ala sani baka soso gi den wan di kon lati. A no de fu taki dati wan sani kan pasa son leisi taki wi kon lati. Ma efu wi abi a gwenti fu kon lati, dan wi kan aksi wisrefi efu a e kon fu di wi no abi nofo warderi gi den preikiwroko konmakandra noso fu di wi no seti wi tori bun.

12. Efu yu gwenti meki mofo na fesi nanga suma yu o wroko, dan san yu kan pruberi fu du?

¹² Preikiman di e kon na a preikiwroko konmakandra kan meki mofo na fesi nanga suma den o wroko noso den kan wakti teleki a brada taigi den nanga suma den kan wroko. Efu yu abi a gwenti fu meki mofo na fesi nanga sma, dan a ben o bun fu „opo wi ati” gi trawan. Disi wani taki dati yu kan wroko nanga difrenti preikiman na presi fu wroko soso nanga den mati fu yu (2 Kor. 6:11-13). Kande yu kan wroko nanga wan nyun preikiman fu yepi en preiki moro bun (1 Kor. 10:24; 1 Tim. 4:13, 15). Arki bun te a brada e taki san a grupu o du èn pe yu kan bigin preiki. Te a preikiwroko konmakandra kaba, dan a no bun fu kenki den sani di a brada seti kaba, ma sorgu taki yu go na a kontren wantewante.

13. Sortu wini wi o kisi fu den preikiwroko konmakandra efu ala sma e meki muiti fu du san den musu du?

¹³ Di den 70 disipel fu Yesus ben kaba preiki, dan den „drai kon baka nanga prisiri” (Luk. 10:17). A musu de so taki a konmakandra di Yesus hori nanga den, fosi den go preiki yepi den fu du a wroko bun. Na ini a ten disi den preikiwroko konmakandra e yepi wi tu fu abi bun bakapisi. Efu ala sma di de drape sabi san den musu du èn den e meki muiti fu du dati tu, dan den preikiwroko konmakandra o gi wi deki-ati, den o yepi wi èn wi o orga fu du a wroko di wi kisi fu ’preiki so taki sma fu ala kondre kan yere dati’.​—Mat. 24:14.