Den preikiwroko konmakandra

1. Fu san ede wi wani sorgu taki wi e go na ini a preikiwroko na wan orga fasi?

¹ Yesus gi wan bun eksempre na ini a fasi fa a ben e du a Kownukondre preikiwroko na wan orga fasi èn na wan bun fasi. Na so a de tu na ini a ten disi, taki den sma di de frantwortu gi a Kownukondre preikiwroko di e du na heri grontapu, trutru wani taki a wroko disi orga bun. Wan fasi fa den e du dati, na taki den gemeente na heri grontapu e gebroiki den preikiwroko konmakandra fu orga grupu fu Kownukondre preikiman gi a preikiwroko.—Mat. 24:45-47; 25:21; Luk. 10:1-7.

2. San musu pasa na den preikiwroko konmakandra?

² Wan moi seti: Den preikiwroko konmakandra seti fu gi wi deki-ati, fu gi wi rai èn fu sori wi fa fu du a preikiwroko moro bun. A brada di e hori a konmakandra disi kan taki syatu fu a deitekst te a abi fu du nanga a preikiwroko. Son leisi a kan gebroiki wan tu sani di wi kan hori na prakseri èn di teki puru fu Wi Kownukondre diniwroko, fu a Takimakandra-brochure, noso fu a Diniwroko-skoro-buku. Na so ala sma di de drape kan de srekasreka gi a wroko di den o du a dei dati. Wan syatu demonstrâsi di e sori fa fu pristeri wan publikâsi kan hori tu. Bifo a brada begi na a kaba, ala sma musu sabi na ini sortu grupu den o wroko, èn pe den o wroko. Syatu baka a konmakandra disi di no musu hori moro langa leki 15 miniti, ala sma musu de na pasi fu go na ini a kontren pe den musu wroko.

3. Suma abi a frantwortu fu seti sani gi den preikiwroko konmakandra?

³ Fa sani seti gi den preikiwroko konmakandra? A dienst-opziener di e teki fesi, abi a frantwortu fu seti sani gi den preikiwroko konmakandra. Den grupu-opziener noso a brada di e yepi den, abi a frantwortu fu go na ini a preikiwroko makandra nanga a preikiwroko grupu fu den, tapu satra nanga sonde. Son opziener noso dinari ini a diniwroko kan go mindriwiki na ini a preikiwroko, makandra nanga den grupu. Den grupu-opziener e wroko bun makandra nanga a dienst-opziener, so taki den abi nofo kontren gi a grupu fu den fu wroko oso fu oso, tapu satra nanga sonde. Mindri wiki, a dienst-opziener o luku taki sani seti gi den brada di o tyari a grupu go na ini a preikiwroko.

4-6. (a) Fu san ede den preikiwroko konmakandra e hori? (b) Fa den brada kan kon sabi san de fanowdu gi den preikiwroko konmakandra?

⁴ Pe èn o ten den konmakandra disi musu hori? Na presi fu meki a heri gemeente kon makandra na wán presi, a moro bun fu hori den konmakandra disi na presi di de krosibei. Nofo tron den e hori na a oso fu wan brada noso sisa, noso na tra presi na ini a kontren, fu di den wani wroko a kontren fu a gemeente bun. Den brada kan gebroiki a Kownukondre zaal tu gi dati. Furu gemeente e gebroiki a Kownukondre zaal fu hori wan preikiwroko konmakandra, syatu baka a publikitaki nanga a Waktitoren-studie tapu sonde. Den brada musu sorgu taki a no e teki tumusi furu ten fu doro na ini a kontren pe den o wroko. Fu dati ede, ten na ten den musu luku efu den musu kenki den presi pe den e hori den preikiwroko konmakandra. Na so fasi den kan sorgu taki den e wroko a heri kontren finifini.

⁵ Den brada musu luku a kontren fu kon sabi san na a moro bun ten fu hori den konmakandra disi. Boiti dati, den musu luku tu omeni leisi na ini a wiki den o hori a konmakandra disi. Den aksi di e kon now kan de wan yepi fu si san na a moro bun presi èn a moro bun ten fu hori den preikiwroko konmakandra disi.

⁶ Na sortu kontren un musu poti moro prakseri? San na a moro bun ten fu wroko oso fu oso? Un musu poti wan bakadina fu du na oso-fu-oso wroko noso fu tyari gobaka? Ala den sani di seti gi den preikiwroko konmakandra musu poti na tapu a bord pe a gemeente e meki sani bekènti. Ala Kownukondre preikiman wani wroko a kontren fu den so bun, taki wi tu kan taki neleki na apostel Paulus: „Mi wroko kaba na ala presi na ini den kontren disi.”—Rom. 15:23.

7. Sortu frantwortu a brada abi di musu tyari a grupu go na ini a kontren fu preiki?

⁷ Fa fu hori den preikiwroko konmakandra: A brada di musu hori a konmakandra disi, e sori bigi lespeki gi a seti disi te a e sreka ensrefi bun. Den konmakandra disi musu bigin biten, den musu leri den sma wan sani, èn den musu de syatu, sowan 10 te go miti 15 miniti. Fosi a konmakandra bigin, a brada di e hori en musu abi kontren gi a grupu fu wroko. Aladi a no de fanowdu fu wakti den sma di lati, toku a ben o bun fu libi wan boskopu gi den pe den kan feni a grupu. Syatu baka te a preikiwroko konmakandra kaba, ala sma musu bigin go na ini a kontren di den kisi fu wroko. A no de fu taki dati te sani seti bun, èn te sma kan leri wan sani fu a preikiwroko konmakandra, dan dati sa yepi ala sma fu sabi fa èn pe den musu preiki a dei dati.—Odo 11:14.

8. Na sortu fasi den sma di e go na den preikiwroko konmakandra kan wroko makandra nanga den wan di e teki fesi?

⁸ Wi musu go na den preikiwroko konmakandra: A de prenspari fu wroko makandra nanga den brada (Hebr. 13:17). Te a kan, dan a sma di musu orga sani na ini a grupu, sa yepi iniwan sma di musu abi wan patna ete fu wroko. A bun te preikiman di abi ondrofeni de na a preikiwroko konmakandra, so taki den kan yepi den nyun sma noso den preikiman di no abi so furu ondrofeni. Den wan di de klariklari fu wroko nanga wan tra sma, kan yepi na wan bun fasi (Odo 27:17; Rom. 15:1, 2). Ala sma musu meki muiti fu de biten. A lespeki di wi abi gi a seti disi fu Yehovah èn a hori di wi e hori wi brada nanga sisa na prakseri, sa meki taki wi tyari den kenki kon di de fanowdu te a abi fu du nanga a sani disi.—2 Kor. 6:3, 4; Fil. 2:4.

9. Na sortu moi fasi pionier kan horibaka gi a seti disi?

⁹ Pionier di e horibaka gi a preikiwroko konmakandra: Ala sma e warderi en èn den e kisi deki-ati te den pionier e horibaka gi den preikiwroko konmakandra. A no de fu taki dati pionier abi furu frantwortu. Boiti taki den e hori Bijbelstudie èn e tyari gobaka, den abi frantwortu kande na ini den osofamiri èn kande den abi wan grontapu wroko tu. Fu dati ede, pionier no de fruplekti fu horibaka gi ibri preikiwroko konmakandra di a gemeente seti, spesrutu efu den konmakandra dati e hori ibri dei. Ma a no de fu taki dati den pionier o horibaka gi wan tu fu den preikiwroko konmakandra na ini a wiki. Den preikiwroko konmakandra e leri den memre fu a gemeente fa fu preiki. Èn a sabi di den pionier abi fu Bijbel nanga na ondrofeni fu den na ini a preikiwroko, kan de wan bigi yepi gi trawan. Fu di den e teki prati furu na a preikiwroko, meki den kon kisi ondrofeni. Den kan fruteri trawan den sani di den ondrofeni. Fu di den e teki prati fayafaya na a preikiwroko èn na den preikiwroko konmakandra, meki den de heri moi eksempre gi wi. Wi e warderi en tu te den e teki prati na den konmakandra disi.

10. Fu san ede a fiti taki ala Kownukondre preikiman e du ala san den man fu horibaka gi a seti disi?

¹⁰ Neleki fa a ben de nanga Yesus nanga den disipel fu en, wan bigi pisi fu a Kownukondre preikiwroko e du fu di wi e preiki oso fu oso. Den preikiwroko konmakandra na fu gi makandra deki-ati èn fu sabi fa fu teki prati na wan bun fasi na a wroko disi. Ala preikiman fu a bun nyunsu musu horibaka so furu leki den man, gi den sortu seti disi fu Yehovah (Tori. 5:42; 20:20). Meki a de so taki wi alamala e du san de fanowdu fu man horibaka gi den preikiwroko konmakandra disi. Te wi o du dati, dan wi kan de seiker taki Yehovah sa blesi wi bogobogo èn wi o prisiri na ati fu wi Fesiman, Yesus Krestes, te wi e preiki a bun nyunsu fu Gado Kownukondre.—Mat. 25:34-40; 28:19, 20.