Kisi wini doronomo fu den preikiwroko konmakandra
1. Sortu wini wi e kisi fu den preikiwroko konmakandra?
1 Preikiwroko konmakandra di e hori na wan bun fasi, e gi wi trutru deki-ati nanga bun rai bifo wi e go na ini a preikiwroko. Den konmakandra disi e yepi wi fu wroko makandra nanga tra preikiman, so taki wi kan gi makandra deki-ati èn wi kan leri fu makandra (Odo 27:17; Preik. 4:9, 10). San wi kan du fu kisi wini dorodoro fu den konmakandra disi?
2. San na wan tu sani di a brada di e hori a preikiwroko konmakandra kan tyari kon na fesi?
2 A sma di e hori a konmakandra: Nofo tron a no seti na fesi fu sortu tori yu musu taki na den konmakandra disi. Fu dati ede, a bun fu sreka yusrefi bun efu yu musu hori a konmakandra disi. No teki en leki wan gwenti fu taki fu a deitekst. Ma disi no wani taki dati yu no mag taki fu a deitekst, te disi abi langalanga fu du nanga a preikiwroko. Prakseri san kan yepi den wan di e go na ini a preikiwroko a dei dati. Fu eksempre, kande yu wani taki noso demo fa wi kan pristeri wan sani na ini a preikiwroko. Kande yu wani taki syatu fu wan sani na ini a brochure Fa foe bigin èn go doro nanga Bijbel takimakandra, wan sani fu a Diniwroko-skoro-buku, noso wan sani di ben hori na a Diniwroko Konmakandra no so langa pasa. Na tra okasi, yu wani taki kande fu wan problema di kan opo kon na ini a kontren fu yu. Noso kande yu wani sori fa fu yepi sma fu kon sabi moro èn fa fu bigin bijbelstudie, spesrutu te furu preikiman e go baka na sma di den miti. Awansi fu sortu tori yu e taki, du dati nanga faya èn na wan fasi di e gi deki-ati.
3. O langa a preikiwroko konmakandra musu hori, èn san musu pasa na ini a ten dati?
3 Bigin a konmakandra biten, srefi efu yu sabi taki wan tu sma o kon lati. Handri nanga koni te yu e prati den sma na ini a grupu, èn gi wan kontren na den sma di abi dati fanowdu. A konmakandra no musu hori moro langa leki 10 te go miti 15 miniti, èn a musu hori moro syatu efu a preikiwroko konmakandra e hori wantewante baka wan gemeente konmakandra. Bifo yu tapu a konmakandra, ala sma musu sabi nanga suma den e wroko, èn pe den e go wroko. A konmakandra musu tapu nanga begi.
4. San kan yepi ala sma fu kisi wini dorodoro fu den preikiwroko konmakandra?
4 Yu kan yepi: Neleki fa a de na den gemeente konmakandra, wi e sori lespeki gi Yehovah èn wi e hori trawan na prakseri te wi e kon biten. Teki prati na a takimakandra. Yu kan meki a brada di e hori a konmakandra taigi yu nanga suma yu kan wroko, noso yu kan seti sani na fesi fu wroko nanga wan sma. Efu yu wani seti sani gi yusrefi, dan yu musu ’opo yu ati’ fu wroko makandra nanga difrenti preikiman, na presi taki yu e wroko nomo nanga bun mati ibri tron baka (2 Kor. 6:11-13). Te a konmakandra kaba, dan yu no musu kenki den sani di seti, èn yu musu go wantewante na a kontren.
5. San na a marki fu den preikiwroko konmakandra?
5 Den preikiwroko konmakandra abi a srefi marki leki den gemeente konmakandra. Den konmakandra disi seti, so taki ’wi kan poti prakseri na makandra, èn wi kan gi makandra deki-ati fu abi lobi èn fu du bun wroko’ (Heb. 10:24, 25). Te wi e du muiti fu kisi wini fu den konmakandra disi, dan dati sa yepi wi fu du wi preikiwroko, di de wan „bun wroko” fu tru!