Aksi Boksu

◼ Fu sortu sani wi musu taki na den preikiwroko konmakandra fu wi?

A marki fu wan preikiwroko konmakandra na fu yepi wi fu poti wi prakseri na a sani di wi sa du baka dati — a diniwroko. Fu dati ede, a sma di sa hori a konmakandra dati musu sreka bun èn musu de klariklari fu pristeri wan sani di e gi deki-ati; wan sani di e taki fu wan spesrutu tori, èn wan sani di den brada nanga sisa kan gebroiki bun. Efu a tekst fu a dei e taki krinkrin fu a preikiwroko, dan yu kan leisi en èn yu kan taki syatu fu en. Toku a konmakandra musu abi fu du na a fosi presi nanga a diniwroko, a musu yepi den wan di e teki prati na a kotoigi wroko fu sreka moro bun fu du a diniwroko a dei dati.​—2 Tim. 4:5.

Yu kan taki fu penti fu Wi Kownukondre Diniwroko di fiti, so taki ala sma sabi san na a pristeri fu a momenti dati èn fa fu pristeri en. Tapu a dei di wi e pristeri tijdschrift wi kan teki wan pristeri puru fu „Sani Di Yu Kan Fruteri fu den Tijdschrift” èn demo en. Na tra okasi yu kan poti krakti na tapu wán noso tu inleiding fu a brochure Fa foe bigin èn go doro nanga bijbel takimakandra di e fiti na a kontren fu wi. Yu kan taki fu wan fu den sani di abi fu du nanga wi diniwroko noso yu kan demo en; sani soleki fa yu kan gebroiki yu Bijbel te yu e taki nanga sma, san fu du te sma e pruberi fu tapu wan takimakandra, fa fu pristeri wan bijbelstudie, noso fa fu tyari gobaka na sma di ben sori taki den wani sabi moro.

Den preikiwroko konmakandra no musu teki moro leki 10 te go miti 15 miniti. Na ini a ten dati yu abi fu prati a grupu, taigi den pe den musu wroko, èn yu abi fu begi. Te a konmakandra klari ala sma di de drape musu sabi nanga suma den e wroko èn pe den musu wroko, èn den musu go na a gebied wantewante. Fu di den konmakandra disi syatu meki a prenspari taki ala sma doro biten. Te a preikiwroko konmakandra e hori baka wan gemeente konmakandra, so leki a Waktitoren-studie, dan a musu hori moro syatu. A no de fanowdu fu taki fu a deitekst fu di wi ben nyan bun kaba fu wan moi Bijbel takimakandra.

Sani musu sreka na fesi so taki dopu brada di doro den markitiki kan hori ibri preikiwroko konmakandra. Efu no wan brada de di kan teki fesi tapu wan spesrutu dei, dan den owruman musu taki na fesi sortu sisa kan hori a konmakandra efu dati ben sa de fanowdu. Ala di a sisa e tan sidon, a kan bigin wan takimakandra fu a deitekst noso fu wan tra penti di abi fu du nanga a preikiwroko, sondro fu taki tumusi langa. A sa abi fu weri wan sani fu tapu en ede.

Den preikiwroko konmakandra na tumusi moi okasi gi wi fu kisi deki-ati èn fu kisi den yepisani di de fanowdu fu man teki prati na a diniwroko. O moro bun a sma di e hori a konmakandra sreka ensrefi, o moro ala sma sa kisi wini fu dati.