Fa joe kan feni prisiri ini a meki foe disipel
WAN foe den moro bigi prisiri di wan sma kan ondrofeni na foe de wan kompe wrokoman foe Gado. Na ini a ten disi, a wroko foe Gado wani taki toe foe tjari reti-ati sma kon na wán na ini a kresten gemeente èn leri den foe libi leki kresten now èn so srefi foe pasa libilibi go na ini wan njoen grontapoe. — Mika 4:1-4; Mateus 28:19, 20; 2 Petrus 3:13.
A de wan fonten foe bigi prisiri gi Jehovah Kotoigi na Latino-Amerika foe si taki miljoemiljoen sma tron disipel foe Jesus Krestes sensi 1980. Na ini a veld disi di e gi froktoe, pe foeroe sma abi lespeki gi bijbel èn e bribi en, son foeroeten dinari ben man jepi wan lo sma foe gi den libi abra na Jehovah. Nanga someni ondrofeni, den kan froeteri wi wan sani kande foe a prisiri di de ini a meki foe disipel. Wan toe foe den rai foe den kan jepi joe foe feni prisiri ini a meki foe disipel pe joe e libi.
Kon sabi soema na den sma di kan tron „skapoe”
„Na sortoe foto noso na sortoe dorpoe oenoe e go toe, ondrosoekoe soema de drape di warti en”, Jesus ben taki di a ben seni den apostel foe en go preiki (Mateus 10:11). Te joe e go fisiti den sma, dan fa joe kan kon sabi soema na den wan di kan kisi jepi na jejefasi? Edward, di de wan foeroeten dinari moro leki 50 jari, e taki: „Den e sori disi foe di den e poti opregti aksi èn a de di den de tevrede te den e kisi den piki foe bijbel.” Carol e taki moro fara: „Efoe wan sma e froetrow wan persoonlijk problema noso broko-ede na mi, dan troetroe a de wan babari foe kisi jepi. Na ini den poeblikâsi foe a Waktitoren Genootschap, mi e proeberi foe feni tori di e gi jepi. Nofo tron a persoonlijk belangstelling dati abi wan bijbelstudie leki bakapisi.” Tokoe a no ala ten joe man kon sabi soema na opregti sma. Luis e froeteri: „Son sma di ben gersi foe abi foeroe belangstelling kan kon sori foe de sma di no abi belangstelling kwetikweti, ma trawan di ben gersi foe de gensman ini a bigin, ben kenki di den ben jere san bijbel e taki troetroe.” Foe di foeroe Latino-Amerkan sma e lespeki bijbel, meki a e taki moro fara: „Mi e kon sabi soema na den wan di kan kisi jepi na jejefasi te den e teki fajafaja san bijbel e leri, baka te mi sori disi na den.” A e gi troetroe prisiri nanga satisfaksi foe jepi den sortoe sma dati di „warti en” meki den go na fesi na jejefasi. Fa joe kan gi a jepi disi?
Opo bijbelstudie
Nofo tron a moro boen fasi foe meki sma kon sabi bijbel waarheid, na foe gebroiki den bijbelstudie jepisani di „a getrow èn koni srafoe” meki (Mateus 24:45). Fa joe kan meki den kisi moro warderi gi a waarde foe den sortoe bijbelstudie jepisani dati? Edward e taki: „Foe di a situwâsi foe sma, den eigifasi nanga denki foe den e difrenti someni, meki mi e proeberi foe no de so strak te mi e opo studie.” Joe no kan gebroiki a srefi fasi na ala sma.
Na son sma a kan de fanowdoe foe gebroiki wan toe tra okasi foe taki foe bijbel, fosi joe e bigin nanga wan boekoe leki jepisani foe studeri bijbel. Ma tokoe, wan zendeling trowpaar e froeteri: „Moro foeroe wi e pristeri wan studie na a fosi fisiti.” Na so wan Kotoigi di jepi 55 sma foe doro a penti foe gi densrefi abra na Gado, e taki: „A moro prenspari fasi di mi e gebroiki foe opo wan bijbelstudie na foe bigin langalanga nanga a boekoe Joe kan libi foe têgo na ini wan paradijs na grontapoe.” Ala di son sma no lobi a prakseri foe studeri wan sani, tokoe trawan de fajafaja foe studeri ala sani di den denki taki kan jepi den na ini libi. Nofo tron a e hari a prakseri foe den sma disi te joe e aksi den efoe den wani wan bijbel lès na oso sondro foe pai. Wan toe zendeling e tjari a pristeri disi kon na krin èn den e taki: „Mi ben sa wani sori joe fa wi e doe disi. Efoe joe wani, dan joe kan go doro. Efoe joe no lobi en, dan na joe moesoe teki a bosroiti.” Te den e pristeri en na a fasi dati, dan sma no frede foe teki a studie.
Wan tra Kotoigi, di jepi foeroe sma di no goedoe èn di no kisi someni skoro, e taki: „Mi kon si taki den traktaat de wan spesroetoe jepi foe opo bijbelstudie.” Awansi sortoe poeblikâsi den foeroeten dinari e gebroiki, den e proeberi foe poti moro foeroe krakti na tapoe bijbel. Carola e taki: „Na a fosi studie, mi e gebroiki soso den prenki èn so wan feifi bijbel tekst, so taki den moro prenspari penti e kon na krin èn bijbel no sori so moeilek.”
Meki a belangstelling tan
Sma e prisiri foe go na fesi, dati meki Jennifer e gi leki rai: „Meki a studie de fajafaja. No draidrai toemoesi.” Te joe e hori a studie doronomo sondro foe misi wiki, dan dati e jepi den toe foe firi taki den e go na fesi. Wan spesroetoe pionier di ben gro na den boitipresi e tjari kon na krin o prenspari a de foe tjari den sani kon na krin na wan eenvoudig fasi ala di joe e poti prakseri na tapoe den prenspari penti, so taki srefi den wan di no kisi foeroe skoro kan go na fesi. A e taki: „Ini a dorpoe foe mi, wi ben abi foe natinati a gron nanga watra baka di wi ben sai siri. Efoe wi ben nati den gron nanga toemoesi foeroe watra, dan a gron ben kon tranga, so taki den siri di ben sproiti no ben kan go na ini a gron, èn den ben dede. Na so a de toe, taki te joe e gi toemoesi foeroe penti na sma di kisi belangstelling no so langa ete, dan a kan gersi toemoesi moeilek èn den no e go doro.” Srefi sma di lobi ondrosoekoe sani, moesoe leri foe poti prakseri na tapoe wán tori nomo efoe den wani go na fesi ini a froestan di den e froestan sani. Jesus ben taigi den apostel foe en: „Mi abi foeroe sani ete foe taigi oenoe, ma oenoe no man tjari den now.” — Johanes 16:12.
Wan tra fasi foe meki a belangstelling tan na foe gi den wan di joe e fisiti, deki-ati foe tan denki foe Gado Wortoe baka te joe gowe. Jolanda e gi leki rai: „Libi wan aksi sondro foe gi a piki. Gi den wan sani foe go ondrosoekoe, soleki foe leisi wan pisi foe bijbel noso foe ondrosoekoe wan tori di abi foe doe nanga den.”
Kweki wan lobi gi Jehovah
A prisiri foe joe sa kon moro bigi te joe e jepi den studenti foe joe foe tron „doeman foe a wortoe, èn no jereman wawan” (Jakobus 1:22). Fa joe kan doe dati? Lobi gi Jehovah e boeweigi troe kresten. Pedro, di de foe Mèksikow, e tjari kon na krin: „Sma no kan lobi wan sma di den no sabi, so boen na a bigin kaba foe a studie, mi e leri den a nen foe Gado na ini bijbel, èn mi e soekoe okasi foe poti krakti na tapoe den eigifasi foe Jehovah.” Te joe e taki nanga sma, dan joe kan meki den kisi warderi gi Jehovah foe di joe e taki fa joe e denki foe en. Elisabet e taki: „Ala ten mi e proeberi taki foe a boenfasi foe Jehovah. Te mi de na den studie foe mi, dan te mi e si wan moi bromki, wan moi pikin fowroe, noso wan pikin poesipoesi di lobi prei, dan ala leisi mi e taigi den taki dati na a wroko foe Jehovah.” „Taki foe a njoen grontapoe di Gado pramisi, leki wan troe sani gi joe”, Jennifer e gi leki rai. „Aksi san den ben sa wani doe ini a njoen grontapoe.”
Te wan sma e prakseri dipi èn nanga foeroe warderi foe san a e leri foe Jehovah, dan dati e soengoe go dipi na ini en ati èn a e boeweigi en foe doe wan sani. Ma a no kan prakseri dipi foe sani di a no e memre. Baka ibri studie, a de wan jepisani foe hori sani na ede te joe e loekoe dri noso fo prenspari penti sjatoe baka. Foeroe bijbel leriman e meki njoen sma skrifi prenspari bijbel tekst makandra nanga wan toe wortoe, na a bakasei foe a bijbel foe den. Wan zendeling foe Ingrisikondre e tjari kon na krin san na wan tra wini foe loekoe sani sjatoe baka: „Mi e aksi fa den kisi wini foe den tori di den leri. Disi e meki den prakseri dipi èn nanga foeroe warderi foe den pasi nanga wet foe Jehovah.”
Wan getrow Kotoigi di ben komoto na a di foe dri klas foe Gilead, e taki: „Wi moesoe de fajafaja. Den studenti foe wi moesoe froestan taki wi e bribi san wi e leri.” A bribi di meki joe tron wan kolokoe „doeman foe a wroko”, kan go abra tapoe trawan efoe joe e taki foe en. — Jakobus 1:25.
„Mi feni taki sma e firi moro krosibei na Gado efoe mi e jepi den foe si den piki na tapoe den begi foe den”, na so wan Kotoigi e taki, di jepi foeroe sma foe anbegi Jehovah. „Mi e gi den eksempre foe san misrefi ondrofeni, soleki a wan disi: Di mi patna nanga mi ben doro na ini wan njoen toewijzing leki pionier, dan wi ben abi soso wan toe groentoe, wan paki botro, èn no wan moni. Wi ben kaba a neti njanjan èn ben taki: ’Now wi no abi noti gi tamara.’ Wi ben begi foe a tori, èn ben go sribi. Froekoefroekoe a tra mamanten wan Kotoigi foe a presi drape ben kon fisiti wi èn ben kari en nen èn ben taki: ’Mi ben begi Jehovah foe seni pionier kon. Now mi kan go nanga oenoe a moro bigi pisi foe a dei, ma foe di mi e libi na wan boitipresi, meki mi sa abi foe njan mi brekten njanjan nanga oenoe, so boen, mi tjari a njanjan disi gi wi alamala.’ A ben de wan heri ipi kawmeti nanga groentoe. Ala ten mi e froeteri den studenti foe mi taki Jehovah noiti no e libi wi efoe wi e soekoe en Kownoekondre fosi.” — Mateus 6:33.
Gi praktis jepi
Moro sani de ini a tori foe meki disipel foe Krestes leki foe hori wan bijbelstudie nomo. Wan zendeling di ben dini foeroe jari leki wan opziener di e rèis, e taki: „Gi den ten. No lon gowe foe a studie esi-esi, baka te a kaba. Efoe a e fiti, dan tan èn taki nanga a sma wan pisi ten.” Elisabet e taki: „Mi e sori belangstelling gi den foe di libi de ini a tori. Foeroe leisi mi e broko mi ede nanga den neleki den ben de mi eigi pikin.” Tra Kotoigi e kon nanga a rai disi: „Fisiti den te den siki.” Te joe de ini a birti foe den, foe eksempre ini a velddienst, dan fisiti den sjatoe foe meki den kon sabi tra Kotoigi.” Eva e taki: „Arki boen foe froestan a historia foe a sma èn en situwâsi ini libi. Disi abi krakti na tapoe a fasi fa a sma e handri na tapoe waarheid èn a kan tapoe pasi gi den foe go na fesi. De wan mati foe den, so taki den sa kan abi a froetrow foe taki foe den problema foe den.” Carol e taki moro fara: „Troetroe belangstelling gi a sma de prenspari foe di den kenki di waarheid sa tjari kon na ini en libi son tron wani taki dati a e lasi famiri nanga mati. Moro foeroe, a boen efoe studenti sabi pe wi e libi èn abi a froetrow foe kon na wi tapoe ibri momenti.” Jepi en foe si a gemeente leki en njoen famiri. — Mateus 10:35; Markus 10:29, 30.
„De klariklari foe gi praktis jepi. Sidon nanga den na den konmakandra, èn jepi den nanga den pikin foe den”, na so Jolanda e taki. Foe sori njoen sma fa foe gi den pikin foe den leri, fa den kan kisi moro hei markitiki ini a tori foe krinfasi, fa foe sreka piki gi den konmakandra, èn fa foe hori lezing na a Theokrasia Diniwroko Skoro, na alamala sani di de wan pisi foe a wroko foe meki disipel. Wan tra sisa e taki moro fara: „A de prenspari foe leri njoen sma a diniwroko. Te prakseri no e poti tapoe a pisi disi foe gi leri, dan son wan sa tan de fredefrede foe doe a preikiwroko, e lasi a prisiri di den abi foe dini Jehovah, èn no e horidoro.” So boen, gi finifini leri ini na oso-foe-oso wroko, ini a tjari foe gobaka, èn ini na opo foe bijbelstudie. A prisiri foe joe sa de bigi te joe e si taki a studenti foe joe e go na fesi nanga joe jepi èn a tiri di joe e gi.
Tranga den foe horidoro
„A e pasa taki den no e teki a studeri di den moesoe studeri so serjoesoe moro baka te a studenti teki dopoe kaba”, na so wan sma di abi ondrofeni ini a meki foe disipel, e warskow. A leriman nanga a studenti toe moesoe memre taki wan kresten di teki dopoe no so langa ete kwetikweti no lepi ete na jejefasi. A moesoe gro foeroe ete ini a bribi foe en, ini a warderi di a abi gi a wet foe Gado, èn ini en lobi gi Jehovah. A de prenspari foe gi en deki-ati meki a kweki boen gwenti ini a tori foe persoonlijk studie so taki a kan tan go na fesi. — 1 Timoteus 4:15.
A njoen sma kan abi jepi fanowdoe foe go na fesi èn foe tron wan memre foe a demakandra foe brada nanga sisa, di abi switifasi. Kande a de fanowdoe foe sori en fa foe doe nanga den onvolmaaktifasi foe den brada nanga sisa, ala di a e kon moro krosibei na den (Mateus 18:15-35). Kande a abi jepi fanowdoe foe tron wan boen leriman, di man ondrosoekoe sani ensrefi. Wan zendeling e froeteri: „Baka en dopoe, wan studenti ben wani go na fesi ini en bekwaamfasi leki wan leriman, dati meki a ben taigi mi: ’Tra wiki mi moesoe hori wan njoen studie, ma mi moesoe loekoe baka san mi hori na ede foe den kapitel di mi ben studeri kaba. Grantangi, joe ben kan loekoe den kapitel disi ete wan leisi nanga mi, wán kapitel na ini wán leisi, so taki mi kan poti prakseri na tapoe a fasi fa den bijbel tekst nanga den agersitori tjari kon na krin, èn dan mi kan gebroiki den te mi e go hori a studie foe mi?’ A tron wan heri boen leriman, èn fo studenti foe en teki dopoe na wan bigi konmakandra.”
Foe san ede a meki foe disipel, warti a moeiti
„Foe meki disipel wani taki moro prèiseman foe Jehovah. A wani taki libi gi den wan di e teki waarheid”, na so Pamela e taki. „Mi troetroe lobi leri waarheid na trawan — a de so wan moi sani! Joe e si fa den studenti e gro safrisafri, e tjari kenki kon na ini den libi èn e loesoe problema sondro a jeje foe Jehovah ben o gersi wan sani di den no ben man wini. Foeroe foe den wan di kon lobi Jehovah tron lobi mati foe mi.”
„Te mi e prakseri foe den wan di mi jepi foe tron disipel”, na so wan zendeling foe Doisrikondre e froeteri, „dan mi e si son sma di froeleigi srefisrefi, di go na fesi someni leki dinari foe Gado taki pikinmoro mi no man bribi. Mi e si sma di e wini boen bigi problema, èn a de krin taki a de nanga a jepi foe Jehovah. Mi e si osofamiri di wan ten ben prati, ma di de makandra now — kolokoe pikin nanga papa nanga mama di e tjari frantiwortoe. Mi e si sma di e prisiri foe di den e libi wan libi di abi wan prakseri, èn e prèise Jehovah. Disi na a prisiri di wan sma e kisi ini a meki foe disipel.”
Ija, foe de wan kompe wrokoman nanga Jehovah Gado ini a wroko foe meki disipel de wan fonten foe prisiri di joe no kan teki gersi nanga noti. Den ondrofenitori foe den zendeling nanga pionier boeweisi disi. Joe kan feni a srefi prisiri nanga tevredefasi efoe joe e gebroiki den rai ini joe libi èn e doe dati nanga joe heri ati. Nanga a blesi foe Jehovah, a prisiri foe joe sa de dorodoro. — Odo 10:22; 1 Korentesma 15:58.