Moro Brada De Fanowdu gi a Pionierwroko
1 Paulus ben gi wi a tranga ’fu abi ala ten furu fu du na ini a wroko fu Masra’ (1 Kor. 15:58). Gi furu sma, disi wani taki fu go na ini a pionierwroko. ¡Na ini september di pasa, 8 sma na Sranan ben moksi densrefi nanga a grupu fu den pionier!
2 Tapu a momenti disi a moro bigi pisi fu den wan di e dini leki pionier na ini wi kondre na sisa (Ps. 68:11). ¡A ben sa de wan prisiri srefisrefi gi a gemeente efu moro brada ben kan moksi densrefi nanga a grupu di e dini leki furuten futuboi! (Ps. 110:3) Wi e frustan taki furu brada abi fu sorgu gi prenspari grontapu nanga osofamiri frantiwortu. Trawan so srefi, e wroko tranga fu sorgu gi den yeye fanowdu fu a gemeente. Wi e warderi den man disi di e wroko tranga fu a Kownukondre ede.—1 Tim. 4:10.
3 ¿Ma toku, moro fu unu, brada, ben kan go na ini a pionierwroko? ¿Efu yu wefi e pionier, yu kan go pionier makandra nanga en tu? Efu yu de nanga pensyun, yu no ben sa agri taki a moro bun fasi fu gebroiki yu ten na wan fasi di e gi satisfaksi, na fu de na ini a furuten diniwroko? ¿Efu yu de fu kaba nanga skoroleri, dan yu ben prakseri seryusu èn na ondro begi fu go na ini a pionierwroko leki wan fasi fu man kisi moro grani na ini a diniwroko baka ten?—Ef. 5:15-17.
4 Wan brada ben seri en bisnis di ben e drai bun èn ben teki pisi ten wroko, so taki a ben kan de pionier. A moi eksempre fu en ben meki taki dri fu den fo pikin fu en ben tron pionier di den ben kaba nanga skoro. A di fu fo pikin ben de fayafaya fu go na ini tu. A brada disi nanga en osofamiri kisi furu blesi.
5 Wan Bigi Doro Opo: Pionierwroko kan opo „wan bigi doro di e tyari go na aktiviteit” (1 Kor. 16:9). Den kan gebroiki brada di de pionier furufuru na ini a gemeente. Fayafaya aktiviteit na ini a veld e tranga a yeye fasi di den abi èn e meki taki den e go na fesi na theokrasia sei. Pionierwroko kan opo a pasi gi moro grani na ini a diniwroko. Baka te yu pionier a fosi yari, yu kan kisi a blesi fu go na a Pionierskoro. Dinari na ini a diniwroko nanga owruman di no trow, kan suku fu fisiti a Bedinariskoro. Den trowpaar di doro den markitiki, kan skrifi wan formulier fu aksi fu go na a Gileadskoro. Baka ten, brada kan doro den markitiki fu du wroko leki opziener di e reis. Iya, a pionierwroko e opo a doro gi den moro bigi grani disi ini na organisâsi fu Yehovah.
6 Brada di kan seti den sani fu den so taki den man abi wan prati na ini a gewoon pionierwroko, kan ondrofeni a moro bigi koloku di e kon fu a gi di wan sma e gi pasa marki.—Tori. 20:35.