Unu Yonguwan—Feti na Baka Warti Marki
1 San na den marki fu yu na ini a libi? Furu yongusma no poti no wan marki na yeye fasi gi densrefi. ¿Ma a no de wan bun sani fu ondrofeni san a wani taki fu poti marki na yeye fasi gi yusrefi èn fu doro den nanga bun bakapisi?
2 Furu fu den yonguwan fu wi ben kon si taki a de wan soso sani fu feti na baka a marki fu suku gudu na skin fasi, san wani taki tu a suku di yu e suku fu kisi wan moro hei skoroleri. Den kon na a bosroiti taki den sortu marki disi no warti fu di yu e poti yusrefi na ini kefar di yu kan miti te yu e du dati. Na ini den moro bun situwâsi, den winimarki di yu e kisi fu den sani di yu man doro na grontapu e tan so langa leki a seti fu sani disi e tan di nownowde e hari go esi-esi na en trutru kaba. Ma den theokrasia marki di yu e feti na den baka nanga a leti di yu e kisi fu a leri fu Gado, o gi yu satisfaksi nownow èn te fu kaba a o tyari yu go na têgo frulusu.—Pr 12:1, 13.
3 Theokrasia Marki: ¿Unu leki yongusma na ini a ten disi, yu e suku warti sabi? Na Odo 2:1-5 wi e kisi a rai „fu feni a sabi fu Gado srefi”. Yu no kan fruwakti noiti fu kisi sabi fu Gado boiti te yu e studeri en Wortu. Nanga yepi fu wan bun gwenti fu studeri nanga yusrefi, yu e meki a sabi fu Bijbel di meki fu tyari yu kon moro krosibei na Yehovah, go moro dipi na ini yu frustan èn na ini yu ati. Yu sa leri moro èn sa hori moro sani na prakseri. Disi sa yepi yu fu sreka moro bun fu teki bosroiti te yu kisi fu du nanga moro prenspari afersi. Te yu e du muiti, dan a leisi di yu man leisi nanga a fasi fa yu e taki musu kon moro bun, èn yu e leri sabi èn gebroiki moro wortu.
4 Ala den sani disi yu no kan kisi na ini wan dei. A gro di yu e gro fu kon lepi na yeye fasi, e teki ten nanga pasensi. Ma efu yu e poti marki gi yusrefi èn e go na fesi doronomo, dan yu kan kon lepi na yeye fasi.
5 ¿Yu e feti na baka den grani fu a Kresten diniwroko? ¿Yu abi wan spesrutu marki gi yusrefi omeni yuru yu sa wroko ibri wiki na ini na oso-fu-oso preikiwroko? A de a marki fu yu fu kon tron wan moro bekwaam leriman tapu a kontren fu tyari gobaka èn fu hori oso-bijbelstudie? Son sma di de ete na skoro ben poti ibri yari leki marki fu de wan yepi-pionier na ini wan noso moro fakansi mun.
6 Fa a de nanga den marki di yu abi gi a krosibei tamara? San fu eksempre yu wani doro na ini a yari di e kon noso a yari baka dati? ¿Yu poti leki marki fu tron wan gewoon pionier bedinari, wan memre fu a Bethelfamiri noso kande wan zendeling?
7 ¿Efu yu na wan yongu brada, yu e feti na baka a grani fu dini leki wan dinari ini a diniwroko èn fu tron wan owruman wan dei? Te yu e poti fasti marki èn na wan seryusu fasi e pruberi fu doro den marki, dan yu kan tyari yu libi na wan fasi di moro bun.
8 Hori na prakseri taki son owruman fu a gemeente, kringopziener, distriktopziener, zendeling nanga sma na ini a Bethel diniwroko ben de wan ten yongusma na ini a waarheid. Ma den ben du muiti èn ben gro na ini sabi èn na ini a bekwaamfasi fu dini Gado èn fu dini den brada nanga sisa fu den. Na eksempre fu den leki sma di de fayafaya èn di e doro den sani di den wani du musu gi yu deki-ati fu gebroiki a ten di yu abi na ini yu yongu yari, heri bun.
9 Den marki di yu e poti musu de reidelek èn musu poti akruderi den sani di yu man doro. Ala sma e difrenti na skin fasi, na frustan sei èn na emotioneel sei. Difrenti fasi de tu fu gro na yeye fasi. Fu dati ede, yu no musu fruwakti fu doro wan sani soso fu di wan tra sma man du dati.
10 Yu kan abi na overtoigi taki yu e meki Yehovah ati prisiri efu yu e feti na baka marki na yeye fasi. Te yu e pruberi fu doro den marki disi èn yu man fu doro den, dan du dati nanga a fasti bosroiti fu gi ala san yu man. A bun taki yu e du ala muiti, fu di a abi leki bakapisi taki nownow èn na ini den yari di e kon yu o kisi furu blesi.—Fil. 4:13.