Wi kisi wan komando foe preiki
1 Jesus ben komanderi den bakaman foe en foe „meki disipel foe sma foe ala nâsi” (Mat. 28:19). Na ini 232 kondre nanga groepoe foe èilanti na heri grontapoe, moro leki feifi miljoen prèiseman foe Jehovah Gado e gi wan krinkrin boeweisi gi a kontroe foe a komando foe Jesus. Ma fa a de nanga wisrefi? Wi e si a komando foe preiki leki wan serjoesoe sani?
2 Wan froeplekti na moreel sei: Wan komando na „wan ordroe foe doe sani di sma taigi wi na fesi foe doe”. Krestes gi wi a komando foe preiki (Tori. 10:42). Na apostel Paulus ben froestan taki disi ben poti wan froeplekti na en tapoe, noso wan froeplekti na moreel sei, foe meki a boen njoensoe bekènti (1 Kor. 9:16). Foe gi wan eksempre: Kon meki wi taki dati joe na wan foe den botoman na tapoe wan sipi di e soengoe. A kapten e gi joe a komando foe warskow den sma di e rèis nanga a boto èn foe tjari den go na den pikin boto di e gebroiki foe kan kibri den libi. A sa boen efoe joe no poti prakseri na tapoe a komando dati èn prakseri foe kibri joesrefi nomo? Kwetikweti. A libi foe tra sma de na joe anoe. A libi foe den de na ini kefar. Joe abi a froeplekti na moreel sei foe doe a komando di joe kisi foe jepi den.
3 Wi kisi a komando foe Gado foe gi wan warskow. Heri esi Jehovah sa tjari wan kaba kon na a heri godelowsoe seti foe sani disi. A no de seiker san sa pasa nanga a libi foe miljoenmiljoen sma te foe kaba. A ben sa boen foe wi sei foe no poti prakseri na tapoe a kefar di dati sa tjari gi tra sma èn broko wi ede soso nanga a froeloesoe foe wisrefi? Kwetikweti. Wi abi a froeplekti na moreel sei foe jepi froeloesoe a libi foe tra sma. — 1 Tim. 4:16.
4 Eksempre foe getrowfasi foe waka na baka: A profeiti Esekièl ben firi taki a abi wan frantiwortoe foe gi wan warskow boskopoe na den Israèlsma di no ben de getrow. Jehovah ben warskow en krinkrin san sa de a bakapisi efoe a no ben doe a toewijzing foe en: „Te mi taigi wan godelowsoesma: ’Joe sa dede seiker’, èn joe no e warskow en troetroe . . . , foe di a de godelowsoe, [a] sa dede na ini en sondoe, ma en broedoe mi sa aksi baka foe joe eigi anoe” (Esek. 3:18). Na wan loyaal fasi Esekièl ben doe a komando di a ben kisi, ala di a ben kisi hebi gens. Foe dati ede a ben kan prisiri di den kroetoe foe Jehovah ben doe.
5 Hondrohondro jari na baka, na apostel Paulus ben skrifi foe a frantiwortoe di a ben abi foe preiki. A ben froeklari: „Mi krin foe a broedoe foe ala libisma, bika mi no ben draidrai foe froeteri oenoe ala rai foe Gado.” Paulus ben preiki na poebliki èn oso foe oso bika a ben froestan taki efoe a no ben doe dati, dan dati ben kan meki taki a abi broedoe paiman na fesi Gado. — Tori. 20:20, 26, 27.
6 Wi abi a faja foe Esekièl? Wi e firi a tranga firi foe preiki leki Paulus? A komando di wi kisi de a srefi leki di foe den. Wi moesoe go doro foe doe a frantiwortoe di wi abi foe warskow tra sma, ala di den abi wan mi-no-ke-fasi, den no e span, noso den e gens wi. Doesoendoesoen sma moro kan gi jesi na a Kownoekondre boskopoe èn kan froeklari: „Wi wani go nanga oenoe, foe di wi jere taki Gado de nanga oenoe” (Sak. 8:23). Meki a lobi di wi abi gi Gado èn gi den sma na wi sei boeweigi wi foe no tapoe. Wi kisi wan komando foe preiki!