’Go èn meki disipel’

1-3. (a) San wan gronman e du te a gron fu en gi so furu nyanyan taki en wawan no man koti en? (b) Nanga sortu situwâsi Yesus e kisi fu du na a bigin fu a yari 33, èn san a e du?

PRAKSERI sortu problema wan gronman abi na ini a tori di e kon now: Wan tu mun na fesi, a gronman plugu den gron fu en èn a sai siri. A si fa den siri bigin gro, fa den gi wiwiri, èn a breiti taki den kon bigi. Now a o kisi wini fu ala a tranga wroko di a du, bika a ten doro fu koti a nyanyan. Ma a problema di a abi na taki a gron fu en gi so furu nyanyan, taki en wawan no man koti en. Fu man lusu a problema disi, a e yuru wan tu wrokoman èn a e seni den go na ini den gron fu en. A e du dati bika a abi wan syatu pisi ten nomo fu koti a nyanyan.

² Na a bigin fu a yari 33, Yesus, di kisi wan opobaka, kisi fu du nanga wan srefi sortu sani. Na a ten fu en diniwroko na grontapu, a ben sai siri fu waarheid. Now a kotiwroko musu du, èn a nyanyan furu srefisrefi. Furu sma di arki a boskopu musu tyari kon na wán leki disipel (Yohanes 4:35-38). San Yesus e du? Di Yesus ben de na tapu wan bergi na ini Galilea, syatu bifo a opo go na hemel, a gi den disipel fu en a komando fu suku moro wrokoman. A e taki: „Fu dati ede, go na sma fu ala kondre èn meki den tron disipel, èn dopu den . . . Leri den fu du ala san mi komanderi unu.”​—Mateyus 28:19, 20.

³ A komando dati e sori krin san a wani taki fu de wan trutru bakaman fu Krestes. Fu dati ede, meki wi go luku dri aksi. Fu san ede Yesus ben gi den disipel fu en a komando fu suku moro wrokoman? Fa a leri den disipel fu en fu feni den wrokoman disi? San a komando disi abi fu du nanga wi?

Fu san ede moro wrokoman ben de fanowdu

4, 5. Fu san ede Yesus no ben o man klari a wroko di a bigin du? Suma ben o abi fu du a wroko go doro te Yesus drai go baka na hemel?

⁴ Di Yesus bigin en diniwroko na ini a yari 29, a ben sabi taki a ben bigin nanga wan wroko di en wawan no ben o klari. Na ini a syatu pisi ten di a ben abi ete na grontapu, a no ben o preiki a Kownukondre boskopu na ala den kontren drape èn a no ben o preiki gi ala sma. A tru taki, Yesus ben e preiki moro furu gi den Dyu nanga den sma di teki a Dyu bribi. Den sma disi ben de „den lasi skapu fu na oso fu Israel” (Mateyus 15:24). Ma den „lasi skapu” dati ben de na ini heri Israel, di ben bigi omeni dusundusun kilometer. Boiti dati, sma na tra pisi fu grontapu ben musu yere a bun nyunsu tu.​—Mateyus 13:38; 24:14.

⁵ Yesus ben frustan taki furu wroko ben o de ete fu du baka a dede fu en. A ben taigi den 11 apostel fu en, di ben tan horibaka gi en: „Fu tru, mi e taigi unu: A sma di e bribi na ini mi, o du den wroko tu di mi e du; a o du moro bigi wroko leki den wroko disi, fu di mi e go na a Tata” (Yohanes 14:12). Fu di a Manpikin ben o drai go baka na hemel, meki den bakaman fu en, noso den apostel èn sosrefi ala den sma di ben o tron disipel na ini a ten di ben o kon, ben o abi fu du a preikiwroko èn gi trawan leri (Yohanes 17:20). Na wan sakafasi Yesus sori taki den ben o du „moro bigi” wroko leki en. Fa so? Na dri fasi.

6, 7. (a) Na sortu difrenti fasi den bakaman fu Yesus ben o du moro bigi wroko leki en? (b) Fa wi kan sori taki Yesus ben abi leti fu frutrow den bakaman fu en?

⁶ A fosi sani na taki den bakaman fu Yesus ben o wroko wan moro bigi kontren. Na ini a ten disi, den bakaman fu Yesus preiki te na den moro farawe presi fu grontapu, iya, moro fara leki a kondre pe Yesus srefi ben preiki. A di fu tu sani na taki den bakaman fu en ben o preiki gi moro sma. A pikin grupu fu disipel di Yesus ben libi na baka, esi-esi ben gro kon tron wan bigi grupu fu dusundusun sma (Tori fu den Apostel 2:41; 4:4). Now milyunmilyun sma tron disipel fu Yesus, èn hondrohondro dusun nyunwan e teki dopu ibri yari. A di fu dri sani na taki den bakaman fu Yesus ben o preiki fu wan moro langa pisi ten. Teleki now den bakaman fu Yesus e preiki pikinmoro 2000 yari kaba, sensi Yesus kaba a diniwroko fu en di a ben du dri nanga afu yari.

⁷ Yesus ben sori taki a ben e frutrow den bakaman fu en di a ben taki dati den ben o du „moro bigi wroko leki den wroko disi”. A ben gi den wan wroko di ben de tumusi prenspari gi en, iya, a wroko fu preiki èn gi leri fu „a bun nyunsu fu Gado kownukondre” (Lukas 4:43). Yesus ben de seiker taki den ben o tan du a wroko disi. San disi wani taki gi wi na ini a ten disi? Te wi de fayafaya fu du a preikiwroko nanga wi heri ati, dan wi e sori taki Yesus ben abi leti fu frutrow den bakaman fu en. Disi na wan heri moi grani, a no so?​—Lukas 13:24.

Den kisi leri fu gi kotoigi

8, 9. Sortu eksempre Yesus gi te a abi fu du nanga a diniwroko, èn fa wi kan teki na eksempre fu en?

⁸ Yesus gi den disipel fu en a moro bun leri fu du a preikiwroko. Boiti dati, a gi den a moro bun eksempre (Lukas 6:40). Na ini a kapitel na fesi, wi ben taki kaba fa Yesus ben e si a diniwroko. Luku fu eksempre den disipel di ben go makandra nanga Yesus di a ben go preiki na difrenti presi. Den ben si taki a ben e preiki na iniwan presi pe sma ben de, soleki na sekanti, na tapu bergi, na ini foto, na wowoyo, èn na sma oso (Mateyus 5:1, 2; Lukas 5:1-3; 8:1; 19:5, 6). Den ben si taki a ben e wroko tranga, a ben opo fruku mamanten, èn a ben wroko go doro te neti. A no ben du a diniwroko fu en wanwan leisi te a ben firi fu du dati! (Lukas 21:37, 38; Yohanes 5:17) A no de fu taki dati den ben frustan taki na fu di Yesus ben lobi sma trutru, meki a ben du a wroko disi. Kande den ben si na en fesi taki a ben abi trutru sari-ati gi sma (Markus 6:34). Fa na eksempre fu Yesus ben abi krakti tapu den disipel fu en? Fa na eksempre fu en ben o abi krakti tapu yu?

⁹ Wi leki bakaman fu Krestes, e teki na eksempre fu en te wi e du wi diniwroko. Fu dati ede, wi e du ala san wi man fu gi „kotoigi finifini” (Tori fu den Apostel 10:42). Neleki Yesus, wi e go na sma na den oso (Tori fu den Apostel 5:42). Efu a de fanowdu wi e kenki wan tu sani na ini wi libi, so taki wi kan go na sma na wan ten te den de na oso. Wi e pruberi fu miti sma tu èn fu preiki gi den na wan koni fasi na presi pe furu sma de, soleki presi pe sma e go koiri, na tapu strati, na ini wenkri, èn na wrokope. Wi e tan „wroko tranga èn e du bun furu muiti” na ini a diniwroko, bika wi e si en leki wan seryusu wroko (1 Timoteyus 4:10). Fu di wi lobi sma trutru, meki wi e tan suku okasi fu preiki na ala presi pe wi e miti sma.​—1 Tesalonikasma 2:8.

10-12. Sortu prenspari sani Yesus leri den disipel fu en bifo a seni den go preiki?

¹⁰ Wan tra fasi fa Yesus gi den disipel fu en leri, na taki a ben gi den finifini bodoi fa fu du a diniwroko. Bifo Yesus seni den fosi 12 apostel go preiki, èn baka dati den 70 disipel, dan a kon makandra nanga den fu gi den finifini bodoi fa fu du a preikiwroko (Mateyus 10:1-15; Lukas 10:1-12). A leri di Yesus gi den ben abi bun bakapisi, bika Lukas 10:17 e taki: „Den seibitenti disipel drai kon baka nanga prisiri.” Meki wi go luku tu prenspari sani di Yesus leri den disipel fu en, aladi wi e hori na prakseri taki den sani di a taki abi fu du nanga den gwenti fu den Dyu na ini Bijbel ten.

¹¹ Yesus leri den disipel fu en fu frutrow tapu Yehovah. A taigi den: „No suku gowtu, solfru, noso kopro fu poti na ini un monisaka na un seibere; no tyari wan saka nanga nyanyan fu te unu de na pasi, èn no tyari tu krosi, noso susu, noso wan tiki; bika a wrokoman warti fu kisi a nyanyan fu en” (Mateyus 10:9, 10). Sma di ben teki waka go na wan presi, ben gwenti fu tyari wan monisaka, wan saka nanga nyanyan, èn wan tra susu. Fu taki en leti, di Yesus taigi den disipel fu no broko den ede nanga den sortu sani dati, dan trutru a ben taigi den: „Poti ala yu frutrow tapu Yehovah, bika a o sorgu gi den sani di yu abi fanowdu.” Yehovah ben o sorgu gi den, fu di a ben o meki den sma di arki a bun nyunsu sori switifasi gi den. Sma na ini Israel ben gwenti fu sori switifasi gi trawan.​—Lukas 22:35.

¹² Yesus leri den disipel fu en tu fu no meki sani puru den prakseri na a wroko fu den. A ben taki: „Un no musu brasa nowan sma fu gi en odi” (Lukas 10:4). Yesus ben taigi den disipel fu no sori switifasi gi trawan? Nôno, kwetikweti. Na ini Bijbel ten, nofo tron sma no ben bari trawan odi nomo te den ben miti makandra. Te sma ben taki odi, dan den ben gwenti fu du ala sortu sani èn fu hori langa takimakandra. Wan Bijbel sabiman e taki: „Te wi e taki wan sma odi, dan a kan taki wi e boigi wi ede pikinso, noso wi e seki anu nanga a sma. Ma den sma fu den kondre fu owstusei no ben taki odi na a fasi dati. Den ben gwenti fu brasa a sma wan lo leisi, fu boigi den ede, èn srefi fu boigi nanga den fesi go na gron. Fu du ala den sani disi, ben teki furu ten.” Di Yesus taigi den disipel fu en fu no taki sma odi na a fasi fa den ben gwenti, dan fu taki en leti a ben taki: „Yu musu gebroiki yu ten na a moro bun fasi, fu di a boskopu di yu e tyari de tumusi prenspari.”a

13. Na sortu fasi wi kan sori taki wi e gi yesi na den bodoi di Yesus gi den disipel fu en fu a fosi yarihondro?

¹³ Wi e gi yesi na den bodoi di Yesus ben gi den disipel fu en fu a fosi yarihondro. Te wi e du wi diniwroko, dan wi e poti ala wi frutrow tapu Yehovah (Odo 3:5, 6). Wi sabi taki noiti wi o mankeri den sani di wi abi fanowdu na ini wi libi efu wi e „tan suku a kownukondre . . . fosi” (Mateyus 6:33). Furuten Kownukondre preikiman na heri grontapu, ondrofeni taki na ini muilek ten, noiti Yehovah gowe libi den (Psalm 37:25). Wi e frustan tu taki wi musu luku bun taki sani no puru wi prakseri na wi wroko. Efu wi no e luku bun, dan a grontapu sistema disi kan puru wi prakseri makriki na a wroko di wi e du (Lukas 21:34-36). Ma disi a no a ten fu meki sani puru wi prakseri na wi wroko. Fu di libisma kan lasi den libi, meki a boskopu fu wi de tumusi prenspari (Romesma 10:13-15). Te wi e tan hori bun na prakseri na ini sortu prenspari ten wi e libi, dan dati o yepi wi fu no lasi wi ten èn wi krakti nanga den sani fu a grontapu disi. A moro bun fu gebroiki wi ten nanga wi krakti na ini a diniwroko. Hori na prakseri taki a ten di tan abra kon syatu, èn a kotiwroko bigi.​—Mateyus 9:37, 38.

Wan komando di abi fu du nanga wi

14. San e sori taki a komando di gi na ini Mateyus 28:18-20, abi fu du nanga ala den bakaman fu Krestes? (Luku sosrefi san skrifi na ondrosei fu a bladzijde.)

¹⁴ Nanga den wortu ’go èn meki disipel’, Yesus, di ben kisi wan opobaka, gi den bakaman fu en wan bigi frantwortu. A no ben prakseri den disipel wawan di ben de drape makandra nanga en na tapu a bergi na ini Galilea.b A wroko di a gi den disipel fu du, wani taki dati den ben musu preiki gi „sma fu ala kondre” èn a wroko disi ben o go doro teleki „a kaba fu a grontapu sistema”. A de krin fu si taki a komando disi abi fu du nanga ala den bakaman fu Krestes, sosrefi den wan na ini a ten disi. Meki wi go luku den wortu fu Yesus na ini Mateyus 28:18-20 moro fini.

15. Fu san ede a de wan koni sani fu gi yesi na a komando fu Yesus fu meki disipel?

¹⁵ Bifo Yesus e gi a komando dati, a e taki: „Mi kisi ala makti na ini hemel èn na grontapu” (vers 18). A de so trutru taki Yesus abi so furu makti? Iya, na so a de trutru! En na a gran engel, di e teki fesi èn e gi komando na milyardmilyard engel (1 Tesalonikasma 4:16; Openbaring 12:7). Leki ’ede fu a gemeente’, a e tiri den bakaman fu en na grontapu (Efeisesma 5:23). Sensi 1914, a e tiri leki Mesias Kownu na ini hemel (Openbaring 11:15). A abi a makti sosrefi fu gi den dedesma wan opobaka (Yohanes 5:26-28). Sobun, fu di Yesus taki fosi dati a kisi ala makti, meki den sani di a taki na ini vers 19 nanga 20, na wan komando. A de wan koni sani fu gi yesi na en, fu di a makti di Yesus abi, no kon fu ensrefi, ma na Gado gi en a makti dati.​—1 Korentesma 15:27.

16. Te Yesus e taki dati wi musu „go”, dan san disi wani taki? Fa wi kan gi yesi na a komando disi?

¹⁶ Now Yesus e taki san na a komando. A komando e bigin nanga a wán wortu disi: „Go” (vers 19). Sobun, Yesus e gi wi a komando fu du muiti fu miti sma so taki wi kan fruteri den a Kownukondre boskopu. Difrenti fasi de fa wi kan gi yesi na a pisi disi fu a komando. A moro bun fasi fa wi kan miti nanga sma, na te wi e preiki oso fu oso (Tori fu den Apostel 20:20). Wi e suku okasi tu fu preiki gi sma. Na ini wi aladei libi, wi de fayafaya fu bigin takimakandra nanga sma fu a bun nyunsu, te dati fiti. A kan de so taki den spesrutu fasi fa wi e preiki e difrenti, fu di wi e fiti wisrefi na difrenti situwâsi. Ma wán sani de a srefi: Wi e „go” èn e suku den sma di warti fu yere a boskopu.​—Mateyus 10:11.

17. Fa wi e ’meki disipel’?

¹⁷ Baka dati, Yesus e taki fu san ede a e gi a komando disi, namku fu ’meki disipel fu sma fu ala kondre’ (vers 19). Fa wi e ’meki disipel’? Fu taki en leti, wan disipel na wan sma di e kisi leri. Ma fu meki disipel, no wani taki dati wi e meki trawan kon sabi sani nomo. Te wi e studeri Bijbel nanga sma di wani sabi moro, dan wi wani yepi den fu tron bakaman fu Krestes. Te dati kan, dan wi e poti prakseri na a eksempre fu Yesus so taki a studenti fu wi e leri fu si Yesus leki en Leriman nanga Eksempre. Na so a o libi na a fasi fa Yesus ben libi, èn a o du a wroko di Yesus ben du.​—Yohanes 13:15.

18. Fu san ede dopu na a moro prenspari sani di wan disipel kan doro na ini en libi?

¹⁸ Wan tumusi prenspari sani di e kon na krin na ini a komando, na disi: „Dopu den na ini a nen fu a Tata, fu a Manpikin, èn fu a santa yeye” (vers 19). A moro prenspari sani di wan disipel kan doro na ini en libi, na fu teki dopu. Fu di disi e sori na wan heri bun fasi taki a gi ensrefi abra na Gado nanga en heri ati. Sobun, disi de tumusi prenspari efu a wani kisi frulusu (1 Petrus 3:21). Iya, te wan disipel di dopu kaba e du ala san a man na ini a diniwroko fu Yehovah, dan a kan abi a howpu fu kisi blesi fu têgo na ini a nyun grontapu di e kon. Yu yepi wan sma fu tron wan dopu disipel fu Krestes? Nowan sani e gi moro prisiri na ini a Kresten diniwroko leki a sani disi.​—3 Yohanes 4.

19. San wi e leri nyunwan, èn fu san ede a kan de fanowdu fu gi den leri ete baka te den dopu?

¹⁹ Yesus e taki san na a tra pisi fu a komando. A e taki: „Leri den fu du ala san mi komanderi unu” (vers 20). Wi e leri nyunwan fu gi yesi na den komando fu Yesus, sosrefi den komando fu lobi Gado, fu lobi tra sma, èn fu meki disipel (Mateyus 22:37-39). Wi e leri den safrisafri fa fu fruteri trawan den tru tori fu Bijbel èn fa den kan opo taki gi a bribi fu den di e kon moro tranga. Te den doro den markitiki fu teki prati na a preikiwroko, dan wi e wroko makandra nanga den. Nanga den sani di wi e taki èn nanga na eksempre di wi e gi, wi e leri den fa fu du a wroko disi bun. A no de so ala ten taki wi no abi fu gi leri moro na wan nyun disipel di teki dopu kaba. Nyunwan di teki dopu kan abi rai fanowdu ete di o yepi den fu pasa den tesi di den o kisi fu di den e waka baka Krestes.​—Lukas 9:23, 24.

„Mi sa de nanga unu ala dei”

20, 21. (a) Fu san ede wi no musu frede te wi e du a wroko di Yesus gi wi fu du? (b) Fu san ede now a no a ten fu du en safrisafri na ini a diniwroko, èn san musu de a fasti bosroiti fu wi?

²⁰ A lasti pisi fu Yesus en komando e gi wi furu deki-ati. A e taki: „Unu o si taki mi sa de nanga unu ala dei te na a kaba fu a grontapu sistema” (Mateyus 28:20). Yesus e frustan taki disi na wan bigi frantwortu. A sabi tu taki te wi o du a wroko disi, dan son leisi disi o meki taki sma di e gens wi no o handri bun nanga wi (Lukas 21:12). Ma dati no musu meki wi frede. Wi Fesiman no e fruwakti taki wi o du a wroko disi wi wawan, sondro fu kisi yepi. A e gi wi deki-ati trutru fu sabi taki a Sma di abi „ala makti na ini hemel èn na grontapu”, de nanga wi fu horibaka gi wi so taki wi kan du san a taigi wi fu du.

²¹ Yesus ben gi den disipel fu en a dyaranti taki a ben o de nanga den na ini a diniwroko, na ini ala den hondrohondro yari, teleki „a kaba fu a grontapu sistema”. Teleki a kaba kon, wi musu tan du san Yesus gi wi leki komando. Now a no a ten fu du en safrisafri na ini a wroko disi. Now wan bigi kotiwroko e du! Bun furu sma di e arki a boskopu fu wi, tyari kon na wán. Meki a de so taki wi leki bakaman fu Krestes, no o meki noti tapu wi fu tyari a bigi frantwortu disi di Yesus gi wi. Meki wi abi a fasti bosroiti fu gi wi ten, wi krakti, nanga den sani di wi abi, fu gi yesi na a komando fu Krestes, di a taki: ’Go èn meki disipel.’