’Sori taki oenoe de nanga tangi’
1 Foeroe foe wi leri leki pikin-nengre foe taki „grantangi” te wan sma ben sori wi boen maniri noso switifasi. Paulus e froemane wi foe ’sori taki wi de nanga tangi’ ala ten, èn wi moesoe de nanga tangi na Jehovah spesroetoe (Kol. 3:15, 16). Ma fa wi kan sori wi Gran Kriaman taki wi de nanga tangi? Èn sortoe spesroetoe reide wi abi foe de nanga tangi na en?
2 Na apostel Paulus ben skrifi: „Tangi foe Gado, bika a e gi wi a wini nanga jepi foe wi Masra Jesus Krestes!” (1 Kor. 15:57) Ibri jari na a ten foe a Memrefesa, den e memre wi foe a lobi sondro skotoe, di Gado nanga Krestes ben sori nanga a loesoe-paiman di den gi èn di e gi wi a howpoe foe têgo libi (Joh. 3:16). Foe di pikinmoro wi alamala lasi lobiwan na dede, meki wi de nanga tangi srefisrefi gi a pramisi foe Jesus foe na opobaka! Na ati foe wi e foeroe nanga tangi te wi e prakseri foe a froewakti foe pasa a kaba foe a sistema disi libilibi sondro foe dede oiti kwetikweti (Joh. 11:25, 26). A moeilek foe feni wortoe foe sori taki wi de nanga tangi gi ala den toemoesi moi blesi di wi sa kisi ete foe na anoe foe Jehovah na ini a paradijs na grontapoe di sa kon (Openb. 21:4). Sortoe moro boen reide wan sma ben kan abi foe ’sori [Gado] taki a de nanga tangi’?
3 Fa foe sori Gado taki wi de nanga tangi: Ala ten a fiti foe froeteri Jehovah na ini begi taki wi de nanga tangi foe a boenfasi foe en (Ps. 136:1-3). Wi ati e boeweigi wi so srefi foe sori En na tapoe tra positief fasi taki wi de nanga tangi. Foe eksempre, wi sa de seiker na a Memrefesa foe a dede foe Krestes tapoe sonde 23 maart. Na wan prisiri fasi wi e ’gi Jehovah grani nanga den warti sani foe wi’ foe sorgoe gi den sani di a gemeente nanga a wroko na heri grontapoe abi fanowdoe na materia sei (Odo 3:9). Wi e horibaka nanga wi heri ati gi den owroeman èn e wroko makandra nanga den, èn na so wan fasi wi e sori Jehovah taki wi de nanga tangi gi a jepi di a e gi, nanga jepi foe den owroeman (1 Tes. 5:12, 13). Ibri dei wi e doe moeiti foe tjari wisrefi na wan joisti fasi di e gi a nen foe Gado glori (1 Petr. 2:12). Ala den boeweisi disi di e sori taki wi de nanga tangi, e plisi Jehovah.—1 Tes. 5:18.
4 A moro boen fasi foe sori taki wi de nanga tangi: Na abi di wi abi wan prati nanga wi heri ati na ini a Kownoekondre preikiwroko, a gi di wi e gi a nen foe Jehovah grani, a sori di wi e sori na ini begi taki wi de nanga tangi, èn a hori di wi e horibaka na wan loyaal fasi gi a waarheid, na wan toe foe den moro boen fasi fa wi kan sori wi Kriaman taki wi de nanga tangi nanga wi heri ati foe ala san a doe gi wi. Jehovah e prisiri foe si taki wi e doe santa diniwroko gi en foe horibaka gi a wani foe en „taki ala sortoe sma moesoe kisi froeloesoe” (1 Tim. 2:3, 4). Na foe dati ede meki so foeroe preikiman di kan seti sani gi dati e handri tapoe a kari di ben gi na ini Wi Kownoekondre Dienst foe februari, foe gi den nen leki jepi-pionier na ini wán noso moro foe den moen maart, april nanga mei. A doe di wi e doe moro moeiti na ini a diniwroko na wan moi fasi foe ’sori [Gado] taki wi de nanga tangi’. Joe sa man foe go na ini a groepoe foe den pionier na ini april noso mei?
5 Wi ben kisi wan seiker howpoe foe libi foe têgo. Te wi e si taki a e kon troe, dan wi sa abi moro foeroe reide ibri dei foe tan gi Jehovah tangi na wan prisiri fasi.—Ps. 79:13.