Grantangi foe na „kolokoe howpoe” foe wi
„Wi e wakti na kolokoe howpoe èn glori kon na krin foe na bigi Gado èn foe na Jepiman foe wi, Jezus Kristus.” — Titus 2:13.
1, 2. Te joe loekoe foe sortoe toe sé, dan grantangi kan tjari kolokoe kon?
DEN tra wrokoman ben sabi en leki wan boen, kolokoe oemasma-sekretarsi di wroko e tjari froktoe. Kande den si disi moro foeroe leki wan bakapisi foe na skoro èn bekwaamheid foe en. Ma di den ben aksi disi na en, na koni oema disi ben poti prakseri tapoe na grantangi foe en basi. Foe sanede?
2 A tjari kon na krin dati srefi foe na moro pikin gewoon wroko a de taki opregti tangi. Nanga dati a ben firi dati a ben de fanowdoe; èn boiti dati a ben de moro kolokoe ini en wroko. Disi de wan boen eksempre foe wan boen bakapisi te wan sma taki tangi. Tokoe a de so dati grantangi no wawan boen gi na sma di e kisi en; a de boen toe gi na sma di e sori grantangi èn di meki wan geest foe grantangi gro.
3. Foe sainde wi moe kweki wan geest foe grantangi?
3 A gersi leki den sma ini disi ten na a fosi presi e broko den ede nanga densrefi. Dati de kontra na geest foe grantangi, bikasi wan sma di e sori grantangi, e prakseri tra sma èn nanga prisiri e taki nanga warderi foe san tra sma e doe. Ma na paradox (wan sani di gersi a de tra fasi) de dati efoe joe wroko foe sori belangstelling gi tra sma, èn e taki fri foe na warderi di joe abi foe den dienst, doe èn moeiti foe den, joe sa de moro kolokoe. Moro fara, na kweki foe wan geest foe grantangi kan abi krakti tapoe na matifasi foe joe nanga Jehovah. A kan abi krakti tapoe na kolokoe di joe abi now ini algemeen ini na libi èn o fara di joe e prati nanga tra sma „na kolokoe howpoe” di na bijbel e poti na fesi foe troe kristen. — Titus 2:13.
„GI . . . TANGI”
4. San a bijbel e taki foe grantangi?
4 Na bijbel e gi wi tranga foe kweki wan geest foe grantangi: „Gi tangi ini ala sani. Bikasi disi de gi joe na wani foe Gado ini wanfasi nanga Kristus Jezus.” Èn a ben gi den Kolosse-sma na rai: „Meki na vréde foe Kristus tiri ini joe ati, bikasi na foe dati joe ben kari kon ini wan skin” (1 Thess. 5:18; Kol. 3:15). Aladi ini na rai disi a de go moro foeroe foe na grantangi foe wi na Gado, tog disi e poti na wi froestan omeni waarde a abi foe kweki ini na ala dé libi wan geest foe grantangi.
5. Fa Paulus ben sori wan geest foe grantangi?
5 Paulus srefi no ben draidrai foe prijse ofoe taki tangi na den sma di ben doe boen. Lési en wortoe ini Romeini 16:1-4. Ini na pisi dati wawan a de prijse Fébe nanga tangi leki „wan sma di e feti gi foeroe sma”, kande foedi a gebroiki en makti ini na gemeenschap foe feti gi kristensma di no nanga reti fowtoe ben poti tapoe den ofoe foe sori opziener di e waka lontoe switifasi foe teki den na oso. Moro fara, Paulus spesroetoe e taki tangi na Priska nanga Aquila, foedi den „ben poti den neki” gi en nanga trawan. Ma a ben de boen sosrefi toe gi Paulus foe ben taki so. Na so fasi a ben kan tesi na kolokoe di e komoto foe gi — na gi foe erkenning, grani dekati. Wi toe kan kisi na kolokoe disi te wi sori grantangi. — Tori foe den Apostel 20:35; 2 Tim. 1:16-18.
6, 7. Fa joe kan sori grantangi?
6 Wi abi ala dé okasi foe sori wi de grantangi. A ben kan de wan eenvoudig sani leki wan boen maniri — kande foedi wan sma hori wan doro opo gi wi ofoe e opo wan sani di wi ben meki fadon. Te wi tapoe wan ofoe tra fasi e taki „grantangi”, dan disi moe de moro leki wan boen maniri. Efoe wi e firi troetroe ini wi ati grantangi, dan trawan sa si dati èn leki wan bakapisi foe dati de moro kolokoe — èn wi sosrefi toe.
7 Wan boen stap ben sa de foe proberi foe meki wi geest foe grantangi kon moro bradi, kande foedi wi e sori grantangi gi sma di wi e teki den dienst foe den leki a no kan trafasi. Dati ben kan de wan sma leki wan wenkri-bediende, wan bediende ini wan restaurant ofoe na postbode. Na lafoe foe joe nanga wan opregti „grantangi” sa meki na wroko foe den kon moro lekti èn abi moro waarde. Ma den sma di e verdini wi grantangi moro foeroe, kan de den di de krosbé foe wi èn di den moeiti foe den, wi lobi foe frigiti. Omeni tron joe e taigi joe wefi tangi foe den boen njanjan di a de bori, foe en moeiti foe hori na oso krin ofoe foe na pasensi sorgoe foe den pikin? Omeni tron trowman e wroko dé foe dé sondro foe jere wan wortoe foe warderi foe na sé foe den wefi, èn moro mendri foe den pikin? Oen jongoewan, oen ben sa wani denki moro foeroe tron foe ala sani di oen papa nanga mama e doe gi oenoe èn foe oen ati kan taki wan sani, di e sori na opregti warderi foe oenoe? O moro oen e gwenti foe sori grantangi, o moro oen libi sa kon moro goedoe. Tra sma sa lobi oen moro èn den banti foe lobi sa gro moro. Ja, oenoe sa de moro kolokoe.
DE GRANTANGI NA GADO
8-10. (a) Foe sanede wi moe de grantangi na Gado, leki Psalm 100 e taki? (b) Fa a de ini disi nanga foeroe sma?
8 Efoe wi abi rede foe de grantangi foe san tra sma e doe, dan wi abi moro krakti rede foe de grantangi na wi Mekiman. Na di foe wan hondro Psalm de wan singi foe taki tangi, pe prakseri e poti tapoe na rede foe sanede a fiti foe taki Gado tangi. Wi e lési drape: „En ben de na Sma di ben meki wi, èn no wisrefi” (Ps. 100:3) Dati de so redelek. Fa wi ben sa feni oiti kolokoe efoe Gado no ben meki na libi foe libisma èn a no ben gi wi na okasi foe libi? (Tori foe den Apostel 17:26-28). Ja, dati wi de ini libi de wan rede foe de grantangi.
9 Ini Psalm 100:5 e taki nanga prisiri: „Bikasi Jehovah de boen.” Dati de ini foeroe sani so. Prenspari ini disi de dati Gado ben gi boen sani foe hori wi ini libi, aladi na a srefi ten wi e njan switi foe den. Wi e libi tapoe Gado grontapoe èn wi e hori wi skin na libi nanga den bogobogo sani di na grontapoe e gi (Jes. 45:18; Tori foe den Apostel 14:15-17). Efoe wan mati ben sa gi joe wan switi, vitamin froktoe, joe ben sa taki foe troe „grantangi”. Tokoe a de so dati Jehovah de na troetroe fonten foe na froktoe dati èn foe ala wi tra natuurlek njanjan (Gen. 2:9, 15, 16; Ps. 104:10-15, 24; 145:15, 16). Sortoe firi gi Gado e kon na fesi nanga den sortoe sorgoe disi? — 1 Tim. 4:3, 4.
10 Te wi de grantangi na Gado, dan disi wani taki dati wi e kenki krinkrin nanga na moro bigi pisi foe den sma ini disi ten. Den no wani foe sabi noti foe Gado èn san a ben doe. Srefi foeroe foe den di abi na gwenti ini den osofamiri foe den foe taki wan toe wortoe foe „grantangi” bifo foe njan, no e sori nanga na fasi fa den e libi dati den de grantangi na Gado nanga den heri ati. Pikinso nomo den e prakseri Gado wani te den e meki plan ini den libi. Ma wi de tra fasi? Disi moe de so.
11, 12. Sortoe sroto Kolossenzen 3:15 e gi wi tapoe na tori foe grantangi?
11 Soleki wi ben taki kaba, na apostel Paulus ben skrifi: „Meki na vréde foe Kristus tiri ini joe ati, bikasi na foe dati joe kari kon ini wán skin. Sori dati joe de grantangi.” (Kol. 3:15). Soboen, te wi de troetroe grantangi na Gado, dan moro de ini na tori leki wortoe foe tangi. Wi moe sori nanga na fasi fa wi e libi dati wi de grantangi. Prenspari sani foe sori disi de na stoeka foe en Wortoe foe sabi san de en wani gi wi ini disi ten, èn foe na doe na wani disi moro fara. — Joh. 13:17.
12 Den wortoe foe Paulus ini Kolossenzen 3:15 moesoe meki wi denki dati Jehovah Gado ben kari wi konmakandra foe de wan wanfasi skin foe kristensma. Disi de sma di e erken dati den de sondari ma di e froestan dati den kan kisi pardon foe Gado tapoe na gron foe Jezus ferloesoe-ofrandi (Rom. 6:17, 23; 7:22-25). Prakseri pikinso san dati wani taki. Joe kan kisi wan krin positie na fesi foe Gado. Dati de ete wan rede foe de grantangi na Gado. — Openb. 7:10, 14.
13. Fa grantangi e go moro fara leki na disiten libi foe wi?
13 Ma a boen foe loekoe ofoe wi geest foe grantangi abi soso foe doe nanga wi ala dé libi di wi e libi now. A de go soso dati moro foeroe wi e sori warderi gi san tra wan e doe gi wi — tra sma noso Gado? Nono, na grantangi foe wan kristen abi na ini toe na ten di e kon, en howpoe. Paulus skrifi: „Wi e wakti na kolokoe howpoe èn glori kon na krin foe na bigi Gado èn foe na Jepiman foe wi, Jezus Kristus.” — Titus 2:13.
WAN KOLOKOE HOWPOE, DI WI KAN DE GRANTANGI FOE EN
14, 15. San ben de na „kolokoe howpoe” di Paulus e taki foe en ini Titus 2:13?
14 San ben de na kolokoe howpoe di Paulus ben abi èn di a ben de grantangi foe en? A ben de na kolokoe ten na en fesi dati a ben sa kisi wan hemel opobaka foe de wan jeje mekisani di no e dede moro èn wan kompe-tiriman nanga Kristus ini „en hemel kownoe-kondre” (2 Tim. 4:18). Dati ben de sosrefi toe na howpoe di Titus nanga den salfoe kristen ini Thessalonika di ben gebore njoen ben abi.
15 Paulus ben kan skrifi disi foe datede toe gi den sma foe Kolosse: „Wi taki Gado alaten tangi, na Tata foe wi Masra Jezus Kristus, te wi e begi gi oenoe, foedi wi ben jere foe joe bribi ini Jezus Kristus, èn na lobi di joe abi gi ala santawan foe na howpoe ede di poti gi joe ini hemel. Joe ben jere kaba foe na howpoe disi” (Kol. 1:3-6) Paulus foe datede nanga reti ben gi deki-ati na den kristen disi di ben kisi kari foe hemel libi: „Sori dati joe de grantangi.” — Kol. 3:15.
16. Oten na howpoe dati ben sa kon troe?
16 Oten na „kolokoe howpoe” dati tapoe na opobaka foe hemel libi ben sa kon troe? Paulus sabi dati disi no ben sa pasa bifosi bepaalde sani ini na ten di ben kon ben pasa. A skrifi dati „den libiwan, di e tan ini libi te na de noja foe Masra, sa go fesi den wan di dede”. Dan „den di dede ini wanfasi nanga Kristus . . . sa opobaka fosi”. Soboen, a ben sa pasa te na de noja (Griki: parousia) foe Kristus ben doro. — 1 Thess. 4:15-17.
17, 18. Foe sanede na ten foe wi de spesroetoe prenspari tapoe na tori foe na „kolokoe howpoe”?
17 Djaso wi kan feni wantoe prisiri sani na ini. Jezus ben taki na fesi dati en de noja ben abi wan samengesteld marki, pe ben de na ini ongewoon oorlog, gronseki, mankeri foe njanjan nanga tra sani di sensi 1914, na jari foe na Fosi Grontapoe, ben de krin foe si (Matt. 24:3-14). A de wan aparti sani toe, dati na hemel opobaka foe salfoe kristen ben sa feni presi leki ben taki na fesi, bifosi na Kownoe Jezus Kristus sa opo doe wan sani ini na „bigi benawtoe” di e kon (Matt. 24:21; Openb. 2:26, 27). Wi e libi foe datede ini na ten, di Paulus, Titus nanga trawan di ben dede ini wanfasi nanga Kristus, e kisi na kontroe foe na „kolokoe howpoe” foe den.
18 Na opobaka dati de wan pisi toe foe na „glori kon na krin foe na bigi Gado èn foe na Jepiman foe wi, Jezus Kristus”. Nanga na jepi foe Gado Jezus e kon sori ensrefi ofoe a de kon na krin foedi a de kroetoe èn e pai den sma di ben dede ini wanfasi nanga Kristus. Den Santa Boekoe ben taki foe na tori disi dati „a ben sa saka komoto foe hemel nanga wan komanderi sten, nanga na sten foe wan gran-èngel èn nanga na trompeti foe Gado, èn den di dede ini wanfasi nanga Kristus . . . sa opobaka” foe densrefi go na en ini hemel (1 Thess. 4:16). Fa a de nanga den salfoe kristen di de ete na libi na grontapoe? Alaten te wan foe den dede, „a de kenki ini wan momenti”. A de kisi wan jeje skin èn a de teki go ini hemel, pe a de kisi leki paiman „na kroon foe na libi”. — 1 Thess. 4:17; 2 Tim. 4:1, 8; 1 Kor. 15:44, 50-57; Jak. 1:12.
19. Soema moro abi wan kolokoe howpoe?
19 San wi Jepiman, Kristus Jezus, e doe ini disi, de so srefi toe wan kon na krin foe na glori foe Gado. Ma na kon na krin foe Gado glori nanga jepi foe Kristus sa doe moro ete, san de spesroetoe prenspari gi kristen ini disi ten, di sabi dati den no kisi salfoe nanga Gado jeje èn soboen no ben teki foe kisi libi ini hemel. Den sma di wi e taki dja foe den, de getrow kristen di abi na kolokoe howpoe tapoe tego libi ini wan njoen grontapoe paradijs. Efoe dati de na froewakti foe joe, poti prakseri dan na wan spesroetoe rede di joe abi now foe de grantangi.
DE GRANTANGI GI SAN DE WANTEWANTE NA WI FESI
20, 21. Leki fa Jezus ben taki na fesi, dan san en ben sa doe ini na ten foe en de-noja?
20 Den troe anbegiman foe Jehovah moe sori now kaba hondro hondro jari horidoro ini èn moe feti nanga na seti foe sani, di moro foeroe de ogri èn di falsi religie de wan pisi foe en. Troe kristen ben kan feni foeroe kolokoe ini na dini foe Jehovah, ma den no ben sa de noiti troetroe kolokoe, solanga na ogri seti nanga en falsi religie e tan. Ma now wan spesroetoe rede de foe kolokoe èn grantangi! Sortoe rede dati de?
21 Di na apostel Paulus ben skrifi den sma foe Thessalonika foe na de-noja foe Kristus, a ben kisi Gado jeje foe taki na pramisi, dati ini disi pisi-ten wondroe kenki ben sa kon. Na a fosi presi Kristus ben sa opo doe wan sani foe, „nanga jepi foe na kon na krin foe en de-noja” tjari kon na wan kaba na falsi religie-elementi, di nen na „sma foe kroektoedoe”. Nanga disi spesroetoe prakseri e poti tapoe wan anti-(. . .)
22, 23. Foe sanede wi sa de grantangi foe na kaba foe falsi religie?
22 Na kaba foe falsi religie sa de wan rede foe de grantangi na Gado. Ma Kristus sa doe moro. Nanga na jepi foe Jehovah Gado, Jezus sa tjari pori kon tapoe ala sma „di no sabi Gado èn tapoe den di no e gi jesi na a boen njoensoe foe wi Masra Jezus” (2 Thess. 1:6-10). Wi e libi ini na ten foe Kristus de-noja èn foe na „glori kon na krin foe na bigi Gado èn foe na Jepiman foe wi, Kristus Jezus”. Disi wani taki dati wi e libi ini na ten pe falsi religie nanga ala sma di no wani dini na Mekiman ini waarheid, sa poeroe na pasi. Efoe Paulus ini na ten dati ben kan skrifi gi den sma foe Thessalonika taki „taki grantangi ini ala sani”, dan prakseri pikinso sortoe aparti rede wi abi now foe doe disi! — 1 Thess. 5:18.
23 Na poeroe na pasi foe falsi religie sa de wan blesi. Wan kaba sa kon dan na korifasi leri di ben hori langa ten miljoen miljoen sma ini frede — leri foe sili di no e dede moro èn di e kisi pina ini wan helfaja ofoe foe den jeje foe dedesma (Joh. 8:32). Na heri gehoorzaam libisma famiri sa „gi jesi na a boen njoensoe foe wi Masra Jezus” èn dini Jehovah. Dati sa abi leki bakapisi wanfasi nanga vréde. Dati no de wan sani foe de grantangi?
24, 25. Sortoe tra blesi de wantewante na wi fesi foe na gehoorzaam libisma-famiri?
24 Te den sma no de moro di no e gi jesi na a „boen njoensoe”, dan na libisma-famiri sa leri èn waka baka den pasi foe regtvaardiki fasi. (Jes. 11:9; 26:9). A no de foe taki, dati now kaba a sa gi joe osofamiri satisfaksi foe taki sortoe difrenti disi sa de. Teki en gersi nanga san joe e ondrofeni now tapoe joe wroko ofoe ini joe kontakti nanga tiriman ofoe te joe e waka psa wan kontren di joe no sabi.
25 Na njoen ordening sa abi toe leki marki blesi na skinfasi di komoto foe Gado. A sa meki wan kaba kon na siki nanga dede (Openb. 21:1-4). A sa blesi na wroko foe wi anoe, sodati wi kan prisiri ini boen foeroe pasa marki foe den fanowdoe sani foe tan na libi (Ps. 67:6; teki gersi Jes. 65:21-25). Vréde srefi sa de mindri na libisma-famiri nanga den meti; Jehovah sa sorgoe dati disi pasa, soleki ini na fosi paradijs, pe den meti ben njan groen sani èn den no ben doe sma ogri.
26. Sortoe rede joe abi foe de grantangi èn de kolokoe?
26 Den blesi dati de leti na wi fesi. Joe kan ondrofeni ala disi. Fa wi e libi foe datede ini wan spesroetoe ten! Aladi no-sabi-boen ini algemeen de wan marki now èn ini na ongolokoe situwasi pe a de now, ete wi abi foeroe rede pasa marki foe de grantangi na Gado, spesroetoe foe na kolokoe howpoe di wi abi. Meki wi taki en alaten grantangi foe dati.