Leri yu pikin fu de nanga tangi

Ondrosukuman kon si taki sma di de nanga tangi de moro koloku èn moro gosontu. Den no e brokosaka tumusi te den abi problema èn den man libi moro bun nanga tra sma. Na ondrosukuman Robert A. Emmons e taki dati „te wan sma de nanga tangi, dan dati e yepi en fu no abi takru maniri soleki dyarusu, gridi, bita-ati nanga atibron.”a

San o de a bakapisi te yu pikin de nanga tangi? Na ini wan ondrosuku di ben hori fo yari langa, sabiman ben ondrosuku 700 pikin. Den kon si taki den wan di de nanga tangi no ben e spiek so makelek, den no ben e gebroiki drugs noso dringi sopi pasa marki. Èn furu leisi den no ben du sani tu di kan tyari takru bakapisi gi den noso tra sma.

• Te sma e denki taki den musu kisi ala san den wani, dan a o muilek gi den fu de nanga tangi. Furu pikin e denki taki den abi a reti fu kisi den sani di den abi. Ma efu wan sma e denki so, dan a o muilek gi en fu de nanga tangi fu di a no o si den blesi di a e kisi leki kado, ma leki sani di a abi reti na tapu.

  Furu sma na ini a ten disi e denki so. Wan mama di nen Katherine, e taki: „A grontapu disi e leri sma taki den musu kisi ala san den wani. Sma e sori furu sani tapu tv, Internet èn na ini buku. Den e taigi wi taki wi abi den sani disi fanowdu èn taki wi musu de a fosiwan fu kisi den.”

• Yu kan leri yu pikin frukufruku kaba fu de nanga tangi. Wan mama di nen Kaye, e taki: „Pikin man leri sani. Neleki fa yu ben o tai wan yongu bon na wan tiki so taki a gro bun, na so yu kan leri yu pikin tu fu de nanga tangi.”

Fa yu kan leri den fu de nanga tangi

• Leri den san den musu taki. Srefi yongu pikin kan leri fu taki „dankjewel” te sma gi den wan sani noso te sma sori switifasi gi den. Na so den e leri fu de nanga tangi o moro den e kon bigi.

  

  Bijbeltekst: „Sori taki unu de nanga tangi.”​—Kolosesma 3:15.

  „A granpikin fu wi di abi dri yari lobi taki „dankjewel.” Èn efu a musu aksi wan sani, dan a e du dati na wan lespeki fasi tu. A leri en fu en papa nanga en mama. Den srefi e sori taki den de nanga tangi èn a pikin e leri dati fu den.”​—Jeffrey.

• Leri den fa den musu du en. Kande yu kan yepi den fu skrifi wan syatu brifi fu taki tangi na wan sma di gi den wan sani. Te yu e meki den pikin du osowroko, dan dati kan yepi den fu warderi a muiti di unu e meki fu meki sani waka bun na ini na oso.

  

  Bijbeltekst: „Wan sma sa de moro koloku te a e gi sani, leki te a e kisi sani.”​—Tori fu den apostel 20:35.

  „Den tu pikin fu wi e yepi wi nanga osowroko, soleki fu bori. Dati e yepi den fu frustan o furu wroko wi leki papa nanga mama e du èn a e yepi den fu de nanga tangi gi san wi e du gi den.”​—Beverly.

• Leri den fa den musu si sani. Neleki fa wan bon abi bun doti fanowdu fu man gro bun, na so wan sma musu abi sakafasi fu man de nanga tangi. Sma di abi sakafasi e frustan ala ten taki den abi yepi fu trawan fanowdu. Dati e yepi den fu de nanga tangi fu a yepi di den e kisi.

  

  Bijbeltekst: „Abi sakafasi èn si trawan moro hei leki unsrefi. No poti prakseri na un eigi afersi nomo, ma poti prakseri na den afersi fu trawan tu.”​—Filipisma 2:3, 4.

  „Son leisi te wi e nyan wi e prei wan spelletje. Ibri sma musu taki fu wan sani di e meki taki a de nanga tangi. Disi e yepi wi alamala fu abi wan bun denki fu sani èn fu de nanga tangi, na presi fu denki wisrefi nomo.”​—Tamara.

San yu kan du: Gi wan bun eksempre. A moro makelek gi pikin fu leri fu de nanga tangi te den e si fa yusrefi e sori taki yu de nanga tangi gi den sani di den noso tra sma du gi yu.