Foe san ede wi moesoe de nanga tangi na ati?
WAN oparasi di Harley ben doe na en baka, ben dwengi en foe kenki en wroko leki wan monteur kon tron wan kantoroman. Di den ben aksi en fa a ben firi foe a kenki disi, Harley ben taki: „Mi e misi a wroko di mi ben e wroko nanga masjin foe troe. Ma foe taki en leti, mi moro breiti nanga a wroko di mi abi now leki nanga a tra wroko.”
Di a ben gi wan reide gi a tevredefasi disi foe en, Harley ben froeteri: „Na a maniri foe den sma nanga soema mi e wroko. Tra fasi leki den sma na a tra wrokope foe mi, mi njoen basi èn den kompe wrokoman foe mi e warderi san mi e doe, èn den de klariklari foe prèise joe. Disi ben de wan bigi difrenti.” Foe di Harley e firi taki sma kan gebroiki en èn taki den abi en fanowdoe, meki a de wan kolokoe wrokoman now.
Wortoe foe prèise noso foe tangi switi troetroe, te sma froedini den. Na a tra sei, a bakapisi foe a de di sma no de nanga tangi na ati, kan kowroe soleki fa Shakespeare ben taki: „Wai, wai, joe winterwinti, joe no takroe leki a de di sma no de nanga tangi na ati.” A de wan sari sani taki foeroe sma ondrofeni a fasi disi fa sma no sori switifasi gi den.
Kibri joesrefi foe no de sondro tangi na ati
Na ini a disiten grontapoe, opregti wortoe foe tangi no e gi moro. Foe eksempre, wan skrifiman ben poti wan aksi: „Efoe a trowmisi ben feni ten foe skrifi 200 karta foe kari sma kon na a trow, dan foe san ede a no man feni ten foe skrifi wan sjatoe brifi leki tangi gi den 163 kado?” Nofotron sma no e taki srefi a makriki wortoe „grantangi”. Moro nanga moro, a de di sma de nanga tangi na ati, e meki presi gi a mi-fosi denki. A situwâsi disi na wan foe den marki di e sori taki wi e libi na ini den lasti dei. Na apostel Paulus ben warskow: „Joe moesoe froestan taki na ini den lasti dei den ten sa lai nanga kefar. Sma sa loekoe densrefi wawan srefisrefi . . . Den no sa de nanga tangi na ati srefisrefi.” — 2 Timoteus 3:1, 2, Phillips.
Na ini tra kefal, a de di sma de nanga tangi na ati, e meki presi gi a kori di sma e kori trawan. Wortoe foe tangi e komoto foe na ati, sondro foe prakseri foe kisi wini gi wisrefi. Ma a kori di sma e kori trawan, di moro foeroe no de opregti èn di e gi pasa marki, kan kon foe a tra reide di den abi, foe kisi promotie, noso foe kisi bepaalde wini gi densrefi (Judas 16). Boiti taki a sma e bedrigi sma di a e taigi den sani disi, den sortoe gratiwortoe dati na a bakapisi foe na abi di sma abi bigifasi èn heimemre. Soema ben sa wani ondrofeni kori di no de opregti dan? Ma opregti tangi na ati switi troetroe.
A sma di e taki tangi e feni wini foe dati. A waran firi di a e ondrofeni foe di a de nanga tangi na ini en ati, e jepi foe meki a de kolokoe èn abi vrede. (Teki gersi Odo 15:13, 15.) Èn foe di a de di wan sma de nanga tangi na ati de wan positief eigifasi, meki dati e kibri en teige negatief firi soleki atibron, djaroesoe, nanga bita-ati.
„Sori taki oenoe de nanga tangi na ati”
Bijbel e gi wi a deki-ati foe kweki a jeje foe de nanga tangi na ati, noso foe firi tangi na ati. Paulus ben skrifi: „Gi tangi gi ala sani. Bika disi na a wani foe Gado na ini wánfasi nanga Krestes Jesus gi oenoe” (1 Tesalonikasma 5:18). Èn Paulus ben gi den Kolosesma a rai: ’Meki a vrede foe a Krestes basi oen ati . . . Èn sori taki oenoe de nanga tangi’ (Kolosesma 3:15). Wan lo psalm abi wortoe foe tangi, èn dati e sori taki tangi di komoto foe na ati de wan boen eigifasi di komoto foe Gado (Psalm 27:4; 75:1). A de krin taki Jehovah Gado e breiti te wi e sori tangi na ini ala afersi foe a libi.
Ma sortoe sani na ini a grontapoe disi di no de nanga tangi na ati, e meki a de moeilek gi wi foe kweki a jeje foe de nanga tangi na ati? Fa wi kan sori taki wi de nanga tangi na ati na ini wi aladei libi? Wi sa taki foe den aksi disi na ini a tra artikel.