Den owroewan e preiki sondro foe tapoe
1 Te sma e kon owroe, dan foeroe foe den e froewakti taki den sa go nanga pensjoen foe den normaal grontapoe wroko èn taki den sa abi wan libi sondro sorgoe, na ini den jari di libi ete. Den e denki kande taki den wroko tranga nofo èn now den e froedini en foe rostoe. Noso kande den wani njan boen nomo foe a libi, foe den jari di tan abra.—Luk. 12:19.
2 Leki foetoeboi foe Jehovah di gi densrefi abra na en, wi abi wan tra denki foe a libi. Wi sabi taki wi no e go nanga pensjoen foe a diniwroko foe Gado. Wi e denki na wan positief fasi, bika wi e hori a „têgo libi na prakseri” (Jud. 21). Den jari di wan sma ben kisi moro nanga moro sabi nanga ondrofeni, kan meki a koni foe en foe si sani krin nanga na inzicht di a abi, kon moro boen. Disi ben kan meki wan sma kon moro koni èn abi moro balansi na ini sani èn foe sori wan moro dipi warderi foe a libi. Ala den eigifasi disi abi foeroe wini gi wan bedinari foe a boen njoensoe.
3 Na owroe di wan sma e kon owroe a no soso wan sani pe a skin e kon owroe; a abi foe doe toe nanga a fasi fa a sma e denki na froestan sei. Te joe e froewakti foe libi wan langa ten èn joe e doe moeiti foe tan jongoe na ini a fasi fa joe e prakseri foe sani, dan a tjans bigi taki joe kan doe ala toe sani. Owroe sma kan meki den libi abi moro waarde te den e teki moro sabi na jejefasi èn e prati en nanga tra sma.—1 Kor. 9:23.
4 Troetroe eksempre: Wan sisa foe 86 jari, ben taki: „Te mi e prakseri dipi foe den 60 jari di pasa sensi di mi ben leri sabi a waarheid, dan a pramisi foe Gado di e gi wi froetrow, e opo kon na ini mi ati. Ija, Jehovah di sa handri na wan loyaal fasi nanga den loyaalwan foe en, e meki wi koti prisiri pasa marki” (Ps. 18:25). Wan owroe brada ben froeteri fa a dede foe en wefi ben seki en srefisrefi, èn baka dati en gosontoe ben go na baka serjoesoe. A ben taki: „Tokoe nanga a no-froedini boen-atifasi foe Jehovah, mi ben kisi krakti nofo baka foe man go na ini a pionierwroko toe jari baka dati. Mi de Jehovah tangi srefisrefi taki mi gosontoe kon moro betre troetroe di mi ben doe moro na ini a preikiwroko!”
5 A de foe prèise troetroe taki so foeroe owroewan abi a fasti bosroiti foe go doro foe preiki na a fasi fa den gosontoe èn den krakti e gi den na okasi—sondro foe tapoe! Den abi boen reide foe froeklari: „O Gado, joe leri mi foe sensi mi jongoe jari, èn te nanga now mi e tan froeteri foe den moi wroko foe joe.”—Ps. 71:17.