Jehovah e gi a krakti di e pasa san de normaal
1 Ala den disipel foe Jesus kisi a frantiwortoe foe wan warti grani foe santa diniwroko — a kresten diniwroko (Mat. 24:14; 28:19, 20). Ma na onvolmaaktifasi foe libisma èn a druk foe a seti foe sani disi sontron kan meki wi si wisrefi leki sma di no bekwaam srefisrefi.
2 Te disi e feni presi wi kan kisi trowstoe foe a brifi foe na apostel Paulus gi den salfoe kresten na ini Korente. A ben skrifi: „Wi abi a goedoe disi na ini tokotoko patoe” (2 Kor. 4:7). Paulus ben abi froetrow: „Foe di wi abi a diniwroko disi . . . , wi no e gi abra” (2 Kor. 4:1). A de troe taki a de wan tjalensi gi ibriwan foe wi foe tan meki a boen njoensoe bekènti èn ’no gi abra’, awansi wi de wan salfoewan noso wi de foe den „tra skapoe”. Wi abi krakti fanowdoe foe Gado, di e gi „a krakti di e pasa san de normaal”. — Joh. 10:16; 2 Kor. 4:7b.
3 A e gi deki-ati taki foeroe Kotoigi de fajafaja preikiman ala di den abi foe feti teige serjoesoe gens, serjoesoe gosontoe problema, noso nanga a abi di den no abi nofo moni. Wi alamala moesoe froestan taki Jehovah e horibaka gi wi na ini a preikiwroko di wi kisi foe doe. Na presi foe meki sani di e meki sma e lasi-ati noso frede e swaki a bosroiti foe wi foe preiki, meki wi „tan teki krakti na ini Masra èn na ini a maktifasi foe a tranga foe en”. — Ef. 6:10; Odo 24:10.
4 Fa foe kisi a krakti foe Gado: Horidoro na ini begi, ala di joe e aksi a jepi èn a krakti foe Gado (Rom. 12:12; Fil. 4:6, 7). Dan, froetrow nanga joe heri ati tapoe Jehovah taki a sa gi a krakti di e pasa san de normaal (Odo 3:5). Leisi den disiten ondrofenitori na ini den tijdschrift foe wi, bika den e gi boeweisi taki Jehovah e jepi den foetoeboi foe en na ini a ten disi foe kan horidoro na ondro tesi. Abi krosibei demakandra nanga den brada na ini a gemeente, èn no libi den gemeente konmakandra. — Rom. 1:11, 12; Hebr. 10:24, 25.
5 Meki wi doe ala san wi man foe man kisi a krakti foe Jehovah — wan krakti di e pasa san de normaal èn di sa jepi wi foe no gi abra na ini a toemoesi prenspari wroko foe preiki a Kownoekondre.