Wan wroko gi san Gado e horibaka
1 Furu dinari fu Gado na ini a ten disi no kisi hei skoroleri, no abi gudu, noso no abi wan hei posisi na ini a seti fu sani disi. Fu dati ede, son sma e si a diniwroko fu wi leki wan sani di no de prenspari (Yes. 53:3). Ma a Bijbel leriwroko fu wi e gi trowstu nanga howpu na milyunmilyun sma na heri grontapu. Fa wi du kisi den tumusi bun bakapisi disi aladi wi no de sma di prenspari? Soso nanga a yepi fu Gado (Mat. 28:19, 20; Tori. 1:8). Na apostel Paulus ben taki: „Gado teki den swaki sma fu grontapu fu meki den tranga sma kisi syen.”—1 Kor. 1:26-29.
2 Furu fu den apostel nanga den fosi yarihondro Kresten ’no ben kisi furu skoro èn den ben de neleki ala tra sma’ (Tori. 4:13). Ma toku den ben tan go doro fu preiki a bun nyunsu sondro frede, èn Yehovah ben blesi a muiti di den ben e meki. Aladi den ben kisi fu du nanga gens, toku ’na wan tranga fasi a wortu fu Yehovah ben panya go na ala sei’. Noti no ben man tapu a wroko fu di Gado ben e horibaka gi den (Tori. 5:38, 39; 19:20). A srefi sani e pasa na ini a ten disi. Srefi te bigi tirimakti ben abi a fasti bosroiti fu gens a wroko, toku den no ben man tapu a bun nyunsu fu gro èn fu panya na ala sei.—Yes. 54:17.
3 Gado musu kisi ala glori: Wi musu firi leki wi bun moro trawan fu di wi abi a bigi grani fu de dinari fu Gado? Dati no musu de so kwetikweti. Paulus ben taki fu a Kresten diniwroko di a skrifi: „Ma wi abi a gudu disi na ini prapi, so taki a krakti di bigi pasa marki, sa de fu Gado, no fu wisrefi” (2 Kor. 4:7). Paulus ben frustan taki a ben man du a diniwroko fu en, fu di Gado ben gi en a krakti.—Ef. 6:19, 20; Fil. 4:13.
4 Na a srefi fasi wi e frustan taki wi man du a preikiwroko nanga bun bakapisi, soso fu di wi e „kisi a yepi di e kon fu Gado” (Tori. 26:22). Nanga yepi fu a preikiwroko di e du na heri grontapu, Yehovah e gebroiki wi na wan fruwondru fasi fu seki den pipel fu grontapu. A preikiwroko na wan marki fu a bigi pori di Gado o tyari kon abra a grontapu disi te a o krutu en (Hag. 2:7). Wi abi wan bigi grani trutru fu „wroko makandra nanga Gado” na ini a bigi kotiwroko na yeye fasi!—1 Kor. 3:6-9.