Sori warderi gi a grani di yu abi fu du a diniwroko
1. Fa furu sma na grontapu e si a preikiwroko fu wi?
1 Furu sma na ini a grontapu fu Satan e si a preikiwroko fu wi leki „wan don sani” (1 Kor. 1:18-21). Efu wi no e luku bun, a takru denki disi kan meki wi lasi-ati èn a kan taki wi no o de so fayafaya moro (Odo 24:10; Yes. 5:20). Sortu reide wi abi fu sori warderi gi a grani fu de wan Kotoigi fu Yehovah?—Yes. 43:10.
2. Fu san ede wi kan taki dati a diniwroko na wan „santa wroko”?
2 Wan „santa wroko”: Na apostel Paulus ben taki dati a diniwroko na wan „santa wroko” (Rom. 15:15, 16). Na sortu fasi a diniwroko na wan „santa wroko”? Te wi e du a diniwroko, dan wi e „wroko makandra” nanga Yehovah, ’a sma di de santa’, èn na so wi e yepi fu meki a nen fu en kon santa (1 Kor. 3:9; 1 Petr. 1:15). Yehovah e si a preikiwroko fu wi leki wan ofrandi fu prèise. Fu dati ede, a diniwroko na wan tumusi prenspari pisi fu wi anbegi.—Hebr. 13:15.
3. Fu san ede a de wan bigi grani fu preiki a bun nyunsu?
3 Na wan bigi grani fu preiki a bun nyunsu èn na wan tu sma nomo abi a grani dati. Den engel ben o prisiri fu du a wroko disi èn a no de fu taki dati den ben o du en heri bun (1 Petr. 1:12). Ma Yehovah gi wi leki sondu libisma di de leki „prapi fu klèidoti”, a bigi grani disi!—2 Kor. 4:7.
4. Fa wi kan sori taki wi e warderi a diniwroko?
4 Wi musu si en leki wan tumusi prenspari wroko: Fu di wi e warderi a grani fu wi trutru, meki wi e si a diniwroko leki wan fu „den moro prenspari sani” na ini wi libi (Fil. 1:10). Fu dati ede wi e meki ten ibri wiki fu go na ini a preikiwroko. Wan pokuman di e warderi a grani di a kisi fu prei poku nanga wan pôpi grupu, o sreka ensrefi bun ibri leisi te a o prei èn a o oefen so taki a kan prei moro bun. Na a srefi fasi wi e sreka wisrefi fosi wi go na ini a diniwroko, so taki wi kan „gebroiki a tru leri na ini Gado wortu na wan yoisti fasi” èn wi kan kisi moro „koni fu gi sma leri”.—2 Tim. 2:15; 4:2.
5. Suma e warderi a diniwroko fu wi?
5 No meki a takru denki fu sma meki yu lasi-ati. Hori na prakseri taki furu sma de ete na ini a kontren fu wi di lobi te wi e go na den. Ma wi no e suku fu sma feni wi bun. A moro prenspari sani na fa Yehovah e denki, èn a e warderi den furu muiti fu wi.—Yes. 52:7.