Wi kisi wan gudu
1 Na apostel Paulus ben abi warderi gi a preikiwroko di Gado ben taigi en fu du. Dati meki a ben kari a wroko disi, wan „gudu” (2 Kor. 4:7). A ben horidoro, aladi problema nanga frufolgu ben e miti en di a ben e du a wroko disi. A ben e preiki fayafaya gi ibri sma di a ben miti. Nanga futu èn nanga boto a ben teki waka go na difrenti presi, èn a ben miti furu problema nanga ogri. Fa wi kan teki na eksempre fu Paulus, èn fa wi kan sori taki wi e warderi a diniwroko fu wi? (Rom. 11:13) San e meki wi diniwroko tron wan gudu di warti srefisrefi?
2 Wan gudu di warti srefisrefi: Nofo tron den gudu fu grontapu e tyari furu problema kon, èn soso fu wan pisi ten nomo den e tyari wini kon. Na a tra sei, a diniwroko fu wi e tyari wini kon fu têgo. A e tyari wini kon gi wi èn gi trawan (1 Tim. 4:16). A e yepi opregtisma fu kon sabi Yehovah, fu tyari kenki kon di de fanowdu na ini den libi, èn fu kisi wan trutru howpu fu man libi fu têgo (Rom. 10:13-15). Te wi e si a diniwroko fu wi leki wan sani di warti srefisrefi, dan wi e kisi wan marki na ini a libi di o meki wi firi koloku. Boiti dati, wi e kisi a firi ala ten taki wi e du wan bun sani, èn wi e kisi wan moi howpu gi a tamara.—1 Kor. 15:58.
3 Sori taki yu e warderi a gudu fu yu: Furu tron na a moni di wi wani pai gi wan sani, e sori o warti a sani dati de gi wi. A de wan bigi grani fu gebroiki wi ten nanga wi krakti fu prèise Yehovah! (Ef. 5:16, 17) A fasi fa wi e gebroiki wi ten, musu sori taki wi e si den sani di abi fu du nanga Gado, leki sani di warti moro grontapu gudu. Fu di wi abi wan tumusi warti sani di wi wani prati nanga trawan, meki wi wani preiki fayafaya, èn wi wani gebroiki iniwan okasi fu fruteri sma a bun nyunsu.
4 Te wan sani warti srefisrefi, dan nofo tron sma e poti en na wan presi pe trawan kan si en. Efu wi e si a diniwroko fu wi leki wan gudu, dan a sa de wan prenspari pisi fu wi libi (Mat. 5:14-16). Meki wi de nanga tangi, èn meki a de so ala ten taki wi teki na eksempre fu na apostel Paulus. Iya, meki wi gebroiki iniwan okasi fu sori taki wi e warderi wi diniwroko trutru, èn taki wi e si en leki wan gudu.