A Wortoe foe Gado e gi wi tiri
1 „Wi e libi na ini wan grontapoe di abi toemoesi foeroe problema èn toemoesi weiniki loesoe gi den. Foeroe miljoenmiljoen sma no abi nofo foe njan. Moro nanga moro sma e tron srafoe foe drug. Moro nanga moro osofamiri e broko. Seks nanga famiriman èn ogri di e doe nanga tranga na ini osofamiri, de doronomo na tapoe njoensoe. A loktoe di wi e blo èn a watra di wi e dringi, e doti safrisafri. Na a srefi ten, moro nanga moro foe wi e kisi foe doe nanga ogridoe.”
2 Na so a boekoe De bijbel — Gods woord of dat van mensen? (Bijbel — A wortoe foe Gado noso di foe libisma?) e bigin. A biginwortoe foe a boekoe abi moro foe doe nanga a ten disi, leki di a ben kon na doro aiti jari pasa kaba. Sma moesoe sabi taki a Wortoe foe Gado e gi tiri èn taki a abi loesoe gi ala den problema di e trobi den. Wi sa meki tranga moeiti foe jepi sma na ini januari foe di wi sa pristeri den a boekoe De bijbel — Gods woord of dat van mensen? A no de foe taki, dati a libi di wi e libi poeblikâsi wawan gi wan sma na baka, no de wan djaranti taki a sa teki a tiri foe Gado. Wi moesoe meki gobaka nanga a marki foe bigin wan bijbelstudie. Wi kan de seiker foe kisi jepi efoe wi e doe so wan moeiti (Mat. 28:19, 20). Djaso wi abi wan toe pristeri di wi kan gebroiki:
3 Efoe joe miti nanga wan moro owroe sma, joe ben sa kan gebroiki a fasi disi foe bigin:
◼ „Mi mag aksi joe wan sani: Di joe ben de moro jongoe, fa den sma na ini a birti ben handri nanga makandra? [Gi okasi foe piki.] A situwâsi de heri tra fasi now, a no so? Foe san ede joe prakseri taki sani kenki? [Gi okasi foe piki.] Foe taki en leti, wi e si a kontroe foe wan profeititori di de na ini bijbel. [Leisi 2 Timoteus 3:1-5.] Boiti taki bijbel e taki finifini fa grontapoe de na ini a ten disi, a bijbel e pramisi wan moro boen grontapoe heri esi. Na foe dati ede wi e gi ibri sma deki-ati foe leisi bijbel. Joe si o makriki a de foe froestan den wortoe di gebroiki na ini a bijbel disi, a Nieuwe-Wereldvertaling (Njoen-Grontapoevertaling), foe pe mi ben e leisi?” Tjari kon na krin taki a skrifi na ini a disiten Bakratongo, èn dati e meki wi man froestan a bijbel moro boen. Sori a boekoe De bijbel — Gods woord of dat van mensen?, èn sori go na kapitel 10 di e froeklari wan tra profeititori di wi si taki a kon troe. Pristeri a boekoe. Efoe a sma teki en, taki dan san na a bijdrage.
4 Te joe e go baka na wan moro owroe sma pe joe ben libi a boekoe, joe ben kan taki:
◼ „Di wi ben taki a lasti leisi, wi ben agri taki na foeroe fasi a disiten libimakandra kenki kon takroe te wi teki en gersi a fasi fa a libi ben de wan toe jari pasa nomo. Ma mi ben kon baka foe sori joe taki bijbel e gi wi froewakti gi wan moro boen grontapoe na ini a ten di e kon. [Leisi Openbaring 21:3, 4.] Foe di wi sabi taki disi na a Wortoe foe Gado, dan dati moesoe gi wi deki-ati foe ondrosoekoe san bijbel abi foe taki ete.” Opo a Gods woord-boekoe na kapitel 14, èn leisi paragraaf 3, 4. Pristeri wan fri oso-bijbelstudie.
5 Efoe joe abi wan takimandra nanga wan moro jongoe sma, joe ben kan taki:
◼ „Mi ben sa wani aksi joe wan sani: Leki wan jongoe sma, joe denki taki joe abi reide foe de positief gi a ten di e kon? Fa joe denki taki a tamara foe joe sa de? [Gi okasi foe piki.] Kolokoe taki troetroe reide de foe de positief gi a ten di e kon. [Leisi Psalm 37:10, 11.] Foe di sma abi difrenti denki foe bijbel èn san skrifi na ini, meki wi tjari a boekoe disi kon na doro, De bijbel — Gods woord of dat van mensen? Loekoe den reide di a e gi foe leisi bijbel. [Leisi paragraaf 16, 17 na tapoe bladzijde 10, 11.] Te wi abi na overtoigi kaba taki san bijbel e taki de troe, dan wi sa abi wan seiker howpoe gi a ten di e kon. Efoe joe wani leisi a boekoe disi, mi sa wani foe libi wan eksemplaar gi joe.”
6 Te joe go baka foe loekoe wan jongoe sma di ben teki a „Gods woord”-boekoe, joe ben sa kan bigin foe taki:
◼ „Mi ben warderi en foe jere fa joe e broko joe ede nanga a ten di e kon. Joe kan memre taki mi ben sori joe wan bijbeltekst di e pramisi wi wan kolokoe èn wan seiker tamara. Djaso wan tra tekst de. [Leisi Openbaring 21:3, 4.] A boekoe di mi ben libi gi joe, e gi wi boeweisi di e overtoigi sma, taki bijbel na a Wortoe foe Gado, no di foe libisma. A troetori dati wani taki wan toe dipi sani. Loekoe san na den. [Leisi paragraaf 1 nanga 2 na tapoe bladzijde 184, 185.] Efoe joe ben sa wani, mi sa breiti foe studeri a bijbel nanga joe sondro foe joe pai gi dati.”
7 Wan sma di no sabi pe a moesoe go foe kisi tiri foe kakafoetoe gi den problema foe a libi, ben sa kan piki te joe e taki wan sani leki disi:
◼ „Wi e libi na ini wan ten pe pikinmoro ibri sma e miti serjoesoe problema. Foeroe sma e go na ala sortoe raiman foe kisi tiri. Son sma e go na loekoeman foe soekoe jepi. Pe joe denki taki wi kan feni boen rai di sa gi wi wini troetroe? [Gi okasi foe piki.] Bijbel e kari wan prenspari troetori, di wi alamala moesoe froestan.” Leisi Jeremia 10:23. Opo De bijbel — Gods woord of dat van mensen? na tapoe bladzijde 187, èn leisi paragraaf 9. „A boekoe disi sa jepi joe foe froestan fa, na ondro Gado Kownoekondre, ala den problema foe wi sa poeroe gowe. Joe ben sa wani leisi en?” Efoe a sma teki a boekoe, taigi en san na a bijdrage.
8 Efoe na a fosi fisiti joe ben taki foe a abi di libisma abi tiri fanowdoe, joe ben kan go doro nanga a takimakandra na tapoe a gobaka, foe di joe e taki:
◼ „Di wi ben miti a fosi leisi, wi ben agri taki wi abi a tiri foe Gado fanowdoe efoe wi wani kakafoetoe nanga boen bakapisi gi den problema foe a libi. Foe a tori dati, mi denki taki joe sa warderi den lasti sani di taki na ini a boekoe di mi ben libi gi joe. [Leisi paragraaf 12, 13 na tapoe bladzijde 189 na ini a Gods woord-boekoe.] Mi wani pristeri joe wan oso-bijbelstudie sondro foe joe pai gi dati, èn mi wani foe demo en gi joe nownowde.”
9 Jehovah sa blesi den moeiti foe wi te wi e jepi owroesma nanga jongoesma foe warderi a waarde foe a Wortoe foe Gado èn a tiri di a e gi ini wi libi. — Ps. 119:105.