Gebroiki den strooibiljet boen
1 Den strooibiljet foe a gemeente de boen foe froeteri sma na ini a birti san na a adres foe a Kownoekondre zaal èn a joisti ten foe den konmakandra. A ben sa boen foe libi wán gi ibri sma di joe e miti. Foe man doe dati, ibri gemeente moesoe abi nofo strooibiljet. Den gemeente di e kenki a konmakandra ten foe den ala jari na ini januari moesoe bisteri njoen strooibiljet ibri jari na fesi na ini oktober, so taki ala ten den sa abi nofo strooibiljet nanga den njoen konmakandra ten na tapoe. Na Aanvraagformulier voor strooibiljetten moesoe gebroiki gi dati. Te joe abi den kaba, fa joe kan gebroiki den strooibiljet na a moro boen fasi dan?
2 Foeroe preikiman feni taki te joe e gi wan sma wán, dan dati na wan boen fasi foe kari joe nen èn foe bigin wan takimakandra. Te joe e sori a schema foe den konmakandra noso a boskopoe na bakasei foe a strooibiljet, dan dati kan opo a pasi foe taki foe a wroko foe wi èn a marki foe en. Papa nanga mama kan meki den jongoe pikin foe den doe wan sani na ini a diniwroko foe di den e meki den pristeri wan strooibiljet gi na ososma. Preikiman di e gi kotoigi nanga jepi foe brifi, moesoe poti wan strooibiljet na ini a brifi foe den èn gi a sma wan kari foe fisiti den konmakandra. Kande wi kan libi den strooibiljet toe na den oso pe sma no ben de, ma wi moesoe sorgoe taki wi e poti den na ondro a doro na so wan fasi taki tra sma no man si den srefisrefi.
3 Den strooibiljet de boen wrokosani foe tjari reti-atisma go na a waarheid. Wán ondrofenitori e froeteri foe wan oema di, foe wan strooibiljet ede, ben meki na angri di a ben abi en heri libi langa foe froestan bijbel, kon troe. Baka di a ben begi Gado wan heri neti, wan Kotoigi trowpaar ben bel na en doro wan mamanten. Di a ben loekoe na ini a pikin olo foe a doro, a ben taki dati a no ben de wan boen ten gi en foe opo a doro. Den Kotoigi poesoe wan strooibiljet na ondro a doro. A strooibiljet ben abi a thema: „Ken uw bijbel” (Sabi joe bijbel). A ben si en èn ben opo a doro. Wan studie ben bigin wantewante, èn baka ten a sma ben teki dopoe. Ala di noiti no wi moesoe prakseri toemoesi lekti foe a krakti foe a jeje foe Gado, meki a de so taki doronomo wi e meki boen gebroiki foe den strooibiljet te wi e doe wi diniwroko dorodoro. — Loekoe so srefi Wi Kownoekondre Dienst foe februari 1994, bladzijde 1.