Na heri grontapu wi sa du muiti fu gi sma wan kari fu kon na a „Waka baka Krestes!” Distrikt Kongres
Ete wan leisi preikiman o prati wan spesrutu papira
1 A yari di pasa wi prati wan papira na heri grontapu fu gi sma wan kari fu kon na a „Frulusu de krosibei!” Distrikt Kongres. Disi ben meki taki furu sma di ben wani sabi moro fu Bijbel, kon na a kongres. Den sma di kon na a kongres fu a fosi leisi, ben si nanga den eigi ai fa Yehovah Kotoigi e prisiri na den konmakandra fu den pe den e leri furu sani fu Bijbel (Yes. 65:13). Den ben prisiri fu de makandra nanga Kresten brada nanga sisa di de na ini wánfasi èn di lobi makandra (Ps. 133:1). Fu di wi wani taki furu sma musu kon na a „Waka baka Krestes!” Distrikt Kongres, meki ete wan leisi wi o prati wan spesrutu papira na heri grontapu fu gi sma wan kari.
2 Fa a go a yari di pasa: A yari di pasa wi prati wan papira fu gi sma wan kari fu kon na a „Frulusu de krosibei!” Distrikt Kongres. Wi yere taki a sani disi ben abi bun bakapisi na ala sei fu grontapu. Na furu presi sma ben taki noso skrifi bun sani fu wi. Fu eksempre, wan koranti ben skrifi wan langa artikel fu sori fa wi ben prati a spesrutu papira disi. A koranti ben taki: „Den Kotoigi e du furu muiti fu miti ala sma na ini a kontren bifo a kongres e bigin. Den e wroko moro langa, den e waka moro langa pasi, èn den e taki moro gaw.” A wroko fu den ben orga bun, èn disi ben hari a prakseri fu wan tu koranti na ini wan tra foto. Fu dati ede den koranti disi ben skrifi artikel di ben taki finifini fu a wroko fu wi. Sowan dri koranti ben skrifi bun sani fu a wroko di wi ben du bifo a kongres. Wan skrifiman ben skrifi difrenti langa artikel di ben teki moro leki tu bladzijde na ini wan sonde koranti. A koranti ben taki finifini fu den sani di wi e bribi, a wánfasi di wi abi, a prati fu a spesrutu papira, èn fu a kongres. Di wan sisa pristeri a papira na wan ososma, dan na ososma koti en mofo èn a taki: „Iya, na didyonsro mi ben e leisi fu a tori disi na ini a koranti.” Wan tra ososma taki: „Didyonsro mi ben e leisi fu unu, èn now unu de dyaso kaba! A papira dati na fu mi?” A ben taki tu: „Disi na wan heri bun sani di Yehovah Kotoigi e du.”
3 Furu sma di ben wani sabi moro fu a kongres kon na a presi pe a kongres ben hori, nanga a papira na ini den anu. Sonwan fu den rèi kon fu foto di de farawe, soso fu kon arki a programa. Fu di wi du furu muiti fu gi tra sma wan kari, meki moro sma kon na a kongres. Fu eksempre na ini wán kondre, moro sma ben kon na a kongres na ini 2006 leki na ini 2005.
4 Fa wi o prati a papira na ini a kontren fu wi?: Yu kan bigin prati a papira dri wiki bifo a kongres fu yu. Yu musu du furu muiti fu wroko a heri kontren fu a gemeente. Na ini a lasti wiki bifo a kongres e bigin, den preikiman di de na ini wan gemeente di abi wan bigi kontren fu wroko kan poti a papira na ondro a doro fu sma di no de na oso. Ma den musu poti a papira na so wan fasi taki tra sma no man si en. Den gemeente musu meki muiti fu prati ala den papira di den kisi èn den musu pruberi fu wroko a heri kontren fu den. Te furu fu den papira disi tan abra na ini a gemeente, dan den pionier kan gebroiki den.
5 San wi kan taki: Kande yu kan taki disi: „Wi e teki prati na wan wroko di e du na heri grontapu, èn nanga a papira disi wi e gi sma wan kari fu kon na wan prenspari konmakandra. Disi na fu yu. Tra prenspari sani di yu musu sabi, skrifi na tapu a papira.” Efu yu e hori wan syatu pristeri yu sa man prati moro fu den papira disi. A no de fu taki dati efu wan ososma e poti aksi gi yu, dan yu kan tan moro langa fu piki den aksi. Te wan sma wani sabi moro fu Bijbel, skrifi en nen èn no wakti tumusi langa fu go baka na en.
6 A de tumusi prenspari taki wi du muiti fu waka baka Krestes! (Yoh. 3:36) Ala sma di e kon na a kongres fu wi, sa leri fa den musu waka baka Krestes. Fu tru, wi e fruwakti taki furu sma o yere fu a „Waka baka Krestes!” Distrikt Kongres a yari disi, fu di wi alamala sa du muiti fu gi den wan kari. Fu dati ede yu musu de fayafaya fu kari so furu sma leki yu man fu kon na a kongres. Yu sa kisi furu blesi fu Yehovah te yu o meki muiti fu teki prati na a wroko disi di wi alamala o du na heri grontapu.