De nanga faya fu gi sma wan kari gi a kongres

1. O ten wi o bigin gi sma wan kari fu kon na a kongres?

¹ Efu yu ben du furu muiti èn yu ben bai furu sani fu bori wan switi nyanyan gi yu famiri noso mati, dan yu ben o breiti fu kari den kon. Na so den brada wroko tranga fu sreka sani fu hori a kongres di e kon. Dri wiki fosi wi o hori wi kongres, wi kisi a grani fu Yehovah fu gi sma wan kari. San o yepi wi fu du dati fayafaya?

2. San o meki taki wi o de fayafaya fu gi sma wan kari?

² Te wi e prakseri o furu wini wi e kisi fu den moi sani di Yehovah e leri wi na den kongres, dan wi o du ala san wi man fu gi sma wan kari (Yes. 65:13, 14). Wi musu hori na prakseri tu taki furu sma e kon te wi e gi den wan kari. (Luku a faki di nen „A abi bun bakapisi”.) Son sma di wi e gi wan kari o kon na a kongres, ma trawan no o kon. Awinsi omeni sma kon, toku a muiti di wi meki fu gi den wan kari o gi Yehovah grani èn o sori taki Yehovah bun.—Ps. 145:3, 7; Openb. 22:17.

3. Fa wi o prati den kari?

³ Den owruman fu ibri gemeente musu luku fa den preikiman kan prati moro furu kari. Den o luku efu a de fanowdu fu libi den kari gi sma di no de na oso noso efu den o prati den na den presi pe furu sma e waka pasa. Te wi o prati den papira fu gi sma wan kari tapu satra nanga sonde, dan wi kan prati den tijdschrift tu efu a fiti. Te den dri wiki pasa, dan wi o breiti taki wi ben de fayafaya fu gi sma wan kari èn taki furu sma ben kon arki den moi leri fu Yehovah na a kongres!

A abi bun bakapisi

Wan tu yari pasa, wan sisa ben aksi ensrefi efu a ben de fanowdu fu du a spesrutu preikiwroko fu gi sma wan kari. A ben aksi ensrefi: ’Den sma o kon trutru na a kongres?’ Tapu satra mamanten fu a kongres a si wan man fu a Sikh bribi di ben e sidon krosibei fu en èn a go taki nanga en. A man taigi en taki a ben kon na a kongres fu di a kisi wan fu den kari fu wi. A ben abi wan tu aksi èn a sisa piki den aksi fu en. A man ben taki dati a lobi a programa, a fasi fa den sma drape ben weri krosi èn fa den ben e tyari densrefi. Moro lati tapu a srefi dei dati, a sisa bigin taki nanga wan trowpaar di ben e sidon krosibei fu en. Den ben kisi wan kari tu èn den ben teki bus fu kon na a kongres. Den ben lobi a kongres èn den ben o kon baka tapu sonde. Dan a sisa kon si o prenspari a de fu gi sma wan kari gi a kongres.
Na wan kongres di hori no so langa pasa, wan trowpaar di e du a gewoon pionierwroko, bigin taki nanga wan owru trowpaar. Den tu owru sma taigi den taki disi ben de a fosi leisi taki den kon na wan kongres. Den pionier aksi den suma ben gi den wan kari. Den piki: „Di wi kon na oso wan dei, wi si taki wan sma ben skoifi wan kari na ondro wi doro.” Den leisi a papira èn den skrifi den nen nanga adres na ini a faki na bakasei. Tra sma na a kongres ben gi a trowpaar wan sani fu nyan. A trowpaar ben lobi a programa so te taki den seti sani fu kon baka a tra dei. Den brada ben seti sani so taki wan sma ben kan go na den fu taki moro fara nanga den.