Wan spesrutu wroko di abi bun bakapisi
Dri wiki fosi a kongres bigin, den gemeente sa teki prati na wan spesrutu wroko fu gi sma fu a kontren fu den wan kari fu kon na a kongres. Wi sabi fu san ede wi e du a spesrutu wroko disi ibri yari. Nofo tron den wan di teki a kari fu kon na a kongres e feni den Bijbel lezing moi, den e fruwondru fu si fa sani orga bun na den difrenti afdeling, aladi den sma di e wroko drape no e kisi pai. Boiti dati den e fruwondru fu si fa wi e tyari wisrefi na wan bun fasi èn fa wi de na ini wánfasi (Ps. 110:3; 133:1; Yes. 65:13, 14). Ma, a de so taki a spesrutu wroko disi abi bun bakapisi, spesrutu na ini kontren pe sma di wani sabi moro musu komoto fara fu go na a kongres?
Baka a distrikt kongres fu 2011, wan bijkantoro kisi wan brifi fu wan uma di ben feni wan kari na ondro en doro. Nofo tron a ben e kibri te Yehovah Kotoigi e go na en. Na uma disi skrifi: „Mi ben abi wan moi oso, wan bun masra, èn mi ben denki taki mi ben abi ala sani kaba di o meki mi de koloku. Ma mi no ben de koloku trutru èn mi no ben sabi fu san ede mi de na libi. Dati meki mi bosroiti fu rèi 320 km fu go na a kongres tapu satra.” A ben lobi a kongres so te taki a bèl en masra fu taigi en taki a no ben o kon na oso a dei dati, fu di sonde a o go na a kongres tu. „Mi ben arki ala den lezing, mi ben miti furu Yehovah Kotoigi, èn mi ben wani tan abi demakandra nanga den.” Baka di a kon na oso, a bigin studeri èn baka fo mun a tron wan preikiman di no dopu ete. „Mi breiti so te taki mi ben feni a kari na ondro mi doro, fu di now mi de koloku trutru!”
Son sma di kisi wan kari o kon trutru. Fu dati ede, abi wan fayafaya prati na a spesrutu wroko disi. Efu yu abi den papira ete, dan yu musu tyari den kon na a kongres èn gebroiki den fu preiki gi sma di yu e miti.
[Faki na tapu bladzijde 5]
Fa wi o gi sma wan kari fu kon na a kongres?
Fu di wi wani du so furu leki wi man fu wroko a heri kontren fu wi, meki wi kan taki syatu. Kande wi kan taki disi: „Fa yu tan? Na heri grontapu wi e teki prati na a wroko fu gi sma wan kari. A kari disi na fu yu. Tra prenspari sani di yu musu sabi skrifi na tapu a papira.” De nanga faya. Te yu e prati a papira tapu satra nanga sonde, dan yu kan gi a sma den tijdschrift tu te dati fiti.