Wan kotoigiwroko o du na heri grontapu, fu gi sma wan kari gi a „Frulusu de krosibei!” Distrikt Kongres
Ibri gemeente musu prati den spesrutu papira di meki fu gi sma wan kari
1 Na heri grontapu, wi sa gebroiki wan spesrutu papira fu gi sma wan kari gi den distrikt kongres di sa hori na ini sowan 155 kondre. A kotoigiwroko disi sa bigin na ini mei 2006 èn a o go doro teleki ala den distrikt kongres na heri grontapu hori kaba. A kotoigiwroko disi sa de tu fu kari sma gi den spesrutu kongres di sa hori na Doisrikondre, a Tyekia Republiek, nanga Polen na ini a mun yuli èn a fosi wiki fu augustus 2006.
2 Fu di wi e libi na ini a kabapisi fu den lasti dei, meki den kongres disi musu hari a prakseri fu sma di abi a yoisti denki. Den kongres sa poti krakti tapu a pramisi fu Gado taki a sa frulusu wi fu na ogri sistema disi. A boskopu musu gi sma deki-ati fu go denki den sani di o pasa na ini a ten di e kon. Fu man gi milyunmilyun sma na okasi fu yere a boskopu fu trowstu nanga howpu, meki moro leki 98.000 gemeente fu Yehovah Kotoigi na heri grontapu e kisi a deki-ati fu fruteri sma fayafaya fu a kongres pe densrefi e go.
3 Den gemeente sa kisi nofo fu den papira, so taki ibri preikiman sa kisi 50 fu den. Efu den papira furu tumusi, dan den pionier fu a gemeente kan gebroiki den. Ibri gemeente sa bigin a kotoigiwroko dri wiki bifo a kongres fu den o hori. A ten disi musu de nofo fu wroko a moro bigi pisi fu a kontren, noso kande a heri kontren srefi, pe den gemeente e preiki.
4 Efu wi man du dati, dan a bun fu gi den papira disi langalanga na ibri ososma. Ma efu den sma no de na oso, dan wi kan libi a papira na ondro a doro. Wi musu du ala muiti fu prati ala den papira na ini den dri wiki disi.
5 Wi abi na overtoigi taki wan bigi kotoigi o gi, fu di wi alamala na heri grontapu sa du muiti fu kari sma gi a „Frulusu de krosibei!” Distrikt Kongres, soleki fa a skrifi na ini na artikel disi. Wi e begi taki Yehovah blesi den muiti fu yu te yu o teki prati na a kotoigiwroko disi di o du na heri grontapu.