Yu e gebroiki a papira fu gi sma wan kari?

Wan dei, wan boi di ben abi 11 yari, ben feni wan papira pe ben skrifi taki wan publikitaki o hori di e taki fu a tori hel. Bakaten, a boi disi e fruteri: „Disi ben hari mi prakseri srefisrefi, fu di a ben gersi leki ala ten mi ben e du sani di no bun, èn dati meki taki mi ben broko mi ede trutru efu mi ben o go bron na ini hel te mi dede.” A ben go na a lezing, èn baka di a studeri Bijbel pikinmoro wan yari langa, a teki dopu. Na so a Kresten diniwroko fu Karl Klein bigin, èn bakaten a ben e dini furu yari langa leki wan memre fu a Tiri Skin fu Yehovah Kotoigi. Na fu di a teki a papira pe ben skrifi taki wan publikitaki ben o hori, meki taki ala den sani disi kon pasa bakaten.

Te nanga now den papira disi na bun wrokosani fu gi kotoigi. Furu preikiman e feni taki te den e gi wan sma wan fu den papira disi, dan dati na wan bun fasi fu sori suma na wi èn fu bigin wan takimakandra. Papa nanga mama kan meki den yongu pikin fu den abi wan prati na a diniwroko, fu di den e meki den pikin gi den ososma wan fu den papira disi. Preikiman di e gi kotoigi nanga yepi fu a skrifi di den e skrifi brifi, kan poti wan fu den papira disi makandra nanga a brifi, so taki a sma kan kon sabi moro fu den konmakandra. Èn a no de fu taki dati den papira disi na moi fasi fa wi kan kari den bijbelstudenti fu wi nanga den sma di wani kon sabi moro, fu kon na den konmakandra fu wi.

Fesisei fu a papira wan tu sani skrifi di e sori fa ibriwan fu den gemeente konmakandra e hori. Fu di a no skrifi na tapu a papira san na a adres fu a Kownukondre zaal èn o lati den konmakandra e bigin, meki yu abi fu taigi a sma noso skrifi en na tapu a papira, te yu e gi wan sma a papira disi. Efu yu wani fu skrifi den sani dati na tapu a papira, dan yu kan du dati na den presi pe noti no skrifi.

Yu e gebroiki den papira disi na ini yu diniwroko?