A boen srefisrefi foe de ala ten na den konmakandra!
1 Foeroe tenti jari, lanti wet ben tapoe foeroe foe den lobi brada foe wi na Owstoe-Europa foe kon makandra na poebliki. Prakseri o prisiri den ben de di lanti ben poeroe a wet di ben e tapoe den foe kon makandra èn den ben kan doe dati na wan fri fasi!
2 Wan kringopziener ben skrifi foe wán foe den fisiti foe en na so wan gemeente: „Toedewroko mofoneti, leti na a bigin foe a fisiti foe mi, a sistema di e waran a presi ben broko. Dorosei, a temperatuur ben tan kowroe so taki watra ben kan tron ijs, èn inisei a ben de wan sani foe 5 graad Celcius nomo. Den brada ben sidon nanga den djakti, deki sjaal, handschoen, moesoe nanga boeta. No wan sma ben kan soekoe den tekst ini bijbel, foe di den no ben man opo den bladzijde. Mi ben tanapoe tapoe a podium ala di mi ben weri mi jas nanga broekoe, mi ben steifi srefisrefi, èn ibri tron te mi ben e taki, mi ben kan si a bro foe mi. Ma a sani di naki mi ati srefisrefi na taki mi no jere no wan wortoe foe kragi. Ala den brada ben taki dati den ben feni en troetroe prisiri foe ben kan de na a konmakandra!” Den brada dati no ben prakseri srefi foe misi a konmakandra dati!
3 Na so wi e firi toe? Wi e warderi a grani foe kan kon makandra na wan fri fasi na den konmakandra foe wi ibri wiki? Noso wi no e sori warderi gi den konmakandra te sani e go boen? Foe fisiti konmakandra doronomo kande no sa de so makriki, èn sontron ten kan de pe wi abi wan boen reide foe san ede wi no man go na konmakandra. Ma noiti no frigiti, taki wi abi sma na wi mindri di ala di den e kon owroe, e kisi serjoesoe problema nanga a gosontoe foe den, e kon skotoe na skin sei, e abi hebi wrokoschema èn e abi tra serjoesoe frantiwortoe, tokoe den e si o prenspari a de foe go na konmakandra èn pikinmoro ala ten den de na den konmakandra. Fa den de moi eksempre gi wi foe wi kan waka na baka! — Teki gersi Lukas 2:37.
4 Meki a de a gwenti foe wi foe hori baka gi a troe anbegi foe di wi e fisiti ala den kresten konmakandra foe wi, foe bigin foe wan pikin boekoestudie-groepoe te leki wan bigi kongres. Foe san ede wi moesoe teki a fisiti foe den konmakandra disi so serjoesoe? Bika a de wan komando foe Gado dati wi moesoe kon makandra. Ma tra prenspari reide de. Wi alamala abi den winimarki fanowdoe foe den rai foe Gado èn a jepi foe santa jeje, di wi e kisi na den konmakandra. Wi e bow kon tranga foe di wi e gi makandra deki-ati te wi abi demakandra nanga sma di abi a srefi warti bribi leki wi. — Heb. 10:24, 25.
5 Di Jesus ben kisi a transfigurâsi, Petrus ben taki: „Leriman, a boen srefisrefi taki wi de djaso” (Luk. 9:33). A srefi fasi disi wi moesoe firi gi ala den kresten konmakandra foe wi. A boen srefisrefi foe de ala ten na den konmakandra!