Den kan si taki wi de difrenti
1 A jari di pasa, dan 300.000 sma ben moksi densrefi nanga wi foe di den teki dopoe. San den sma disi si na Jehovah Kotoigi di e meki taki den wani de wan pisi foe Gado en organisâsi? Foe san ede wi de difrenti foe ala tra relisi? Djaso wan toe piki de di de krin foe froestan:
— Wi e hori fasti na bijbel na presi taki wi e hori na a fasi fa sma e denki foe sani: Wi e anbegi Jehovah Gado „nanga jeje èn nanga waarheid”, neleki fa Jesus ben taigi wi foe doe. Disi wani taki dati wi trowe relisi falsi leri èn taki wi e gi jesi na a Wortoe foe Gado di skrifi. — Joh. 4:23, 24; 2 Tim. 3:15-17.
— Wi e go na sma na presi taki wi e wakti foe den kon na wi: Wi teki a komando foe Krestes foe preiki èn foe gi leri, èn wi e waka na baka na eksempre foe en foe soekoe opregtiwan. Wi e soekoe den na den oso, na strati, noso awansi pe wi kan feni den. — Mat. 9:35; 10:11; 28:19, 20; Tori. 10:42.
— Wi e gi bijbel leri na ibri sma sondro taki den abi foe pai gi dati: Wi e gebroiki den sani di wi abi nanga wi krakti, sondro taki wi e aksi pai gi dati, èn na so fasi wi e gi moro leki wan biljoen joeroe ibri jari na a diniwroko foe Gado. Wi e studeri bijbel nanga ala sortoe sma, sondro taki wi e teki sma partèi. — Mat. 10:8; Tori. 10:34, 35; Openb. 22:17.
— Wi kisi troetroe boen leri foe jepi sma na jeje fasi: Nanga jepi foe a studeri di wisrefi e studeri bijbel èn a leri di wi e kisi na den gemeente konmakandra èn na den bigi konmakandra, wi e kisi wan doronomo theokrasia leri di warti srefisrefi, èn di meki taki wi man gi trawan jeje leti. — Jes. 54:13; 2 Tim. 2:15; 1 Petr. 3:15.
— A waarheid na wan serjoesoe sani gi wi, èn wi e fiti en na ini wi aladei libi: Foe di wi lobi Gado meki wi e tjari kenki kon na ini wi libi akroederi a wani foe en. A njoen persoonlijkheid foe wi, leki di foe Krestes, e hari sma kon na a waarheid. — Kol. 3:9, 10; Jak. 1:22, 25; 1 Joh. 5:3.
— Wi e meki moeiti foe libi èn wroko nanga trawan na ini vrede: A kweki di wi e kweki den eigifasi foe Gado e jepi wi foe loekoe boen fa wi e tjari wisrefi èn san wi e taki. Wi e ’soekoe vrede èn e doe moeiti foe kisi en’, nanga ala sma. — 1 Petr. 3:10, 11; Ef. 4:1-3.
2 Na eksempre foe a fasi foe libi leki kresten di sma e si na ini Jehovah en organisâsi, e boeweigi foeroe foe den foe teki a waarheid. Meki na eksempre di wisrefi e gi abi a srefi krakti na tapoe den wan di sabi wi èn di e loekoe wi.