Yu E Warderi a Pasensi fu Yehovah?
1 Efu Yehovah no ben abi pasensi na ini den 10, 20 nanga moro yari di pasa, ala di a ben gi sma pasi fu gi kotoigi na heri grontapu, dan yu ben sa leri sabi a waarheid? Fa wi de nanga tangi na ati taki a gi bun furu sma pasi „fu abi berow”. Toku, a bigi krutudei fu Yehovah, „sa kon neleki wan fufuruman” (2 Petr. 3:9, 10). So bun, sma no musu denki taki a pasensi fu Gado wani taki dati a skoifi a dei te a o tyari wan kaba kon na a seti fu sani disi.—Hab. 2:3
2 Abi Sari-ati Nanga Sma: No wan fu wi kaba frustan a langa pasensi fu Yehovah. Wi no musu frigiti fu san ede Yehovah abi langa pasensi (Yona 4:1-4, 11). Yehovah e si a sari situwâsi fu a libisma famiri èn a e sari den. Yesus e sari den tu. Fu di a ben abi sari-ati nanga a bigi ipi sma gi suma a ben e preiki, meki a ben wani taki a preikiwroko ben musu du moro nanga moro, so taki moro sma ben sa abi na okasi fu kisi têgo libi.—Mat. 9:35-38.
3 Te ongoloku nanga rampu e feni presi, dan wi no e sari den sma di no sabi a waarheid? Sma na ini a ten disi de leki „skapu sondro skapuman” ala di den e pruberi fu kakafutu gi a bruya situwâsi na grontapu èn ala di den e pruberi fu frustan fu san ede a situwâsi de so (Mark. 6:34). Te wi e preiki a bun nyunsu fayafaya, dan wi e trowstu den sma di abi wan opregti ati èn wi e sori taki wi e warderi a pasensi fu Yehovah.
4 A Wroko fu Wi De Tumusi Prenspari: A yari di pasa, 323.439 sma ben teki dopu èn moro leki 14 milyun sma ben go na a Memrefesa. So bun, furu sma de ete di no abi fu kisi a pori di a godelowsu seti disi o kisi! Wi no sabi o bigi a „bigi ipi” sa de (Openb. 7:9). Wi no sabi omeni ten de ete fu du a preikiwroko. Ma Yehovah sabi dati. A bun nyunsu sa preiki na wan fasi di En e feni bun, „èn dan a kaba sa kon”.—Mat. 24:14.
5 A ten di tan abra kon syatu, èn a dei fu Gado e kon krosibei (1 Kor. 7:29a; Hebr. 10:37). Sondro tweifri, „a frulusu fu wi de moro krosibei leki na a ten di wi ben tron bribiman” (Rom. 13:11). No meki a de so taki wi no e frustan fu san ede Gado abi pasensi. Na presi fu dati, meki wi preiki a boskopu leki wan tumusi prenspari sani, so taki moro sma di e angri fu kisi regtfardikifasi kan kon sabi a bigi sari-atifasi fu Yehovah.