San o pasa na ini a ten di e kon?

Yesus ben fruteri fa wi ben o „sabi taki a Kownukondre fu Gado de krosibei” (Lukas 21:31). A ben taki dati bigi feti, gronseki, nanga angriten ben o de èn takru siki ben o kiri ipi-ipi sma. Ala den sani disi wi e si na ini a ten disi.​—Lukas 21:10-17.

Bijbel e sori moro fara taki na ini „den lasti dei” fu den regering na grontapu, sma no ben o tyari densrefi bun kwetikweti. Yu kan leisi a sani disi na 2 Timoteyus 3:1-5. Te yu e luku den maniri fu sma na ini a ten disi èn san den e du, dan yu e si krin taki a Bijbel profeititori disi e kon tru nownow.

San disi wani taki? Heri esi Gado Kownukondre o tyari bigi kenki kon di o meki a libi na grontapu kon moro bun (Lukas 21:36). Na ini Bijbel, Gado e pramisi taki bun sani o pasa na grontapu èn den sma di e libi na tapu o feni bun tu. Luku wan tu fu den sani dati.

WAN BUN REGERING

„[Yesus] kisi makti fu tiri. A kisi glori èn a kisi wan kownukondre tu, so taki ala den pipel, nanga den sma di de fu den difrenti kondre èn di e taki difrenti tongo, ben kan dini en. A tirimakti fu en o tan fu têgo. Noiti a o kon na wan kaba. A kownukondre fu en na wan kownukondre di no o kisi pori.”​—DANIÈL 7:14.

San disi wani taki: Yu kan abi wan koloku libi ondro a tiri fu wan moro bun regering di Gado seti. Gado poti en Manpikin leki Kownu fu a regering disi di o tiri heri grontapu.

WAN BUN GOSONTU

„Nowan sma di e tan na ini a kondre o taki: ’Mi siki.’”​—YESAYA 33:24.

San disi wani taki: Noiti yu o siki noso malengri. Yu o man libi fu ala ten. Noiti yu o dede.

FREIDE NA HERI GRONTAPU

„Na ala sei fu grontapu a e meki feti kon na wan kaba.”​—PSALM 46:9.

San disi wani taki: Wi no o abi fu frede moro taki feti o pasa èn taki sma e pina leki bakapisi fu dati.

SOSO BUN SMA O DE NA GRONTAPU

„Den ogriwan no sa de moro . . . Den safri-ati sma o kisi grontapu.”​—PSALM 37:10, 11.

San disi wani taki: Nowan ogri sma o de moro, soso sma di wani gi yesi na Gado.

HERI GRONTAPU O DE WAN PARADIJS

„Den o bow oso èn den srefi o tan na ini. Den o prani droifidyari èn den srefi o nyan fu en.”​—YESAYA 65:21, 22.

San disi wani taki: Heri grontapu o kon moi. Gado o meki a wani fu en pasa na heri „grontapu”, soleki fa wi e begi.​—Mateyus 6:10.