Fa fu Overtoigi Trawan
1 Nanga reti sma e taki dati na apostel Paulus ben de wan preikiman di e overtoigi sma (Tori. 19:26). Srefi Kownu Agripa ben taigi en taki: „Na ini wan syatu pisi ten yu ben sa overtoigi mi fu kon tron wan Kresten” (Tori. 26:28). San ben meki taki Paulus ben man overtoigi sma so bun na ini en diniwroko? A ben e rideneri fu den Buku fu Bijbel na wan makrikifasi, ala di a ben e sori san den penti di a ben kari abi fu du nanga den arkiman fu en.—Tori. 28:23.
2 Neleki Paulus, wi tu musu de sma di e overtoigi trawan ini wi diniwroko. Fa wi kan du dati? Fu di wi e gebroiki a koni fu man si sani krin te wi e taki nanga trawan èn te wi e arki den (Odo 16:23). Dri prenspari sani o yepi wi fu du dati.
3 Arki Bun: Te a sma e taki, arki fu kan feni wan sani di yu nanga a sma e bribi, so taki yu kan gebroiki dati fu taki moro fara. Efu a sma no e agri nanga wan sani, dan pruberi fu frustan fu san ede a no e agri. A o yepi yu fu frustan soifri san a sma e bribi, fu san ede a e bribi dati, èn sortu sani overtoigi en fu bribi dati (Odo 18:13). Pruberi na wan switifasi fu meki a fruteri yu den sani disi.
4 Poti Aksi: Efu wan sma taki dati a e bribi na ini a Dri-wánfasi, dan yu kan aksi: „Na ala ten yu bribi na ini a Dri-wánfasi?” Go moro fara fu di yu e aksi: „Oiti yu ondrosuku finifini san Bijbel e taki fu a tori disi?” Yu kan taki tu: „Efu Gado ben de wan pisi fu a Dri-wánfasi, dan wi kan fruwakti taki Bijbel ben o taki dati krinkrin. A no so?” Den piki di a sma e gi yu o yepi yu fu rideneri nanga en fu den sani di den Buku fu Bijbel e taki.
5 Rideneri Bun Nanga Sma: Wan Kotoigi ben aksi wan uma di ben bribi taki Yesus na Gado: ’Efu yu ben e pruberi fu sori wan sma taki tu sma na a srefi, dan sortu famiri banti yu ben kan gebroiki fu du dati?’ A ben taki moro fara: „Mi ben kan gebroiki di fu tu brada”. A Kotoigi ben taki moro fara: „Kande srefi di fu wan twelengi di gersi makandra. Ma di Yesus ben leri wi fu si Gado leki a Tata èn ensrefi leki a Manpikin, dan san a ben wani fruteri wi dan?” Na uma ben kon frustan taki a wan owru moro a trawan, èn taki a wan di moro owru abi moro makti (Mat. 20:23; Yoh. 14:28; 20:17). A brada ben doro en frustan nanga en ati, nanga a koni fu man overtoigi sma.
6 A no de fu taki dati a no ala sma wani teki a waarheid, awinsi o bun èn o soifri wi e taki. Ma meki a de so taki neleki Paulus, wi e suku den opregti-ati sma na ini a gebied fu wi fayafaya, ala di wi e overtoigi den fu teki a Kownukondre boskopu.—Tori. 19:8.