Doro na ati nanga a koni foe overtoigi sma

FOEROE sma e tweifri te den jere a wortoe „overtoigi”. A kan gi wan sma na idea foe wan seriman di e dwengi sma, noso wan reklame di meki foe kori sma noso foe abi krakti na tapoe den sma di e bai sani. Srefi na ini bijbel na idea foe na overtoigi di sma e overtoigi tra sma wani taki wan negatief sani son tron, wan sani di e taki foe wan takroe pasi noso wan lasi pasi. Foe eksempre, a kresten apostel Paulus ben skrifi den Galasiasma: „Oenoe ben e lon boen. Soema ben tapoe oenoe foe tan gi jesi na a waarheid? A sortoe overtoigi disi no de foe a Sma di e kari oenoe” (Galasiasma 5:7, 8). Paulus ben warskow den Kolosesma toe teige ibri sma di wani ’kori den nanga overtoigi boeweisi’ (Kolosesma 2:4). Den sortoe overtoigi disi e anga foe koni boeweisi di abi gron tapoe falsi fondamenti.

Ma na ini a di foe toe brifi foe en gi Timoteus, na apostel Paulus ben gebroiki a wortoe overtoigi na wan tra fasi. A ben skrifi: „Tan na ini den sani di joe ben leri èn di den ben boeweigi joe foe bribi, foe di joe sabi foe soema joe ben leri den” (2 Timoteus 3:14). Di den ben „boeweigi [en] foe bribi”, Timoteus en mama nanga en granmama, foe soema a ben leri den bijbel waarheid, no ben kisi en na wan trikifasi. — 2 Timoteus 1:5.a

Ala di Paulus ben de na strafoe na ini wan oso na ini Rome, tokoe a ben gi foeroe sma finifini kotoigi foe di a „ben gebroiki a krakti foe overtoigi den ini a tori foe Jesus, nanga a wet foe Moses èn so srefi nanga den Profeiti, foe mamanten joeroe te na neti-joeroe” (Tori foe den Apostel 28:23). Paulus ben kori den arkiman foe en? Kwetikweti! So boen, a de krin taki overtoigi no takroe ala ten.

Te a mama Griki wortoe di vertaal nanga „overtoigi”, gebroiki na wan positief fasi dan a wani taki foe meki wan sma bribi, foe kenki a prakseri foe wan sma nanga jepi foe boen nanga logis taki-go-taki-kon. Foe dati ede wan sma di e gi leri kan gebroiki wan bijbel fondamenti èn gebroiki overtoigi foe poti bribi foe bijbel waarheid dipi na ini tra sma (2 Timoteus 2:15). Ija, disi ben de wan marki foe a diniwroko foe Paulus. Srefi Demetrius a solfroesmeti, di ben si den leri foe den kresten leki falsi leri, ben taki: „No soso na ini Efeise ma pikinmoro na ini a heri distrikt Asia, a Paulus disi overtoigi wan bigi ipi sma èn ben meki den abi wan tra denki, foe di a ben taki dati den gado di meki nanga anoe, a no gado.” — Tori foe den Apostel 19:26.

Gebroiki overtoigi na ini a diniwroko

Jesus Krestes ben komanderi den bakaman foe en: „Go foe dati ede, èn meki disipel foe sma foe ala nâsi, èn dopoe den na ini a nen foe a Tata èn foe a Manpikin èn foe a santa jeje, èn leri den foe doe ala den sani di mi komanderi oenoe. Èn, loekoe! mi de nanga oenoe ala den dei te na a kaba foe a seti foe sani” (Mateus 28:19, 20). Na ini moro leki 230 kondre den Kotoigi foe Jehovah e gi jesi na a komando disi. Ibri moen na ini a dienstjari foe 1997, den ben hori gemiddeld 4.552.589 oso-bijbelstudie na heri grontapoe.

Efoe joe abi a grani foe hori wan oso-bijbelstudie, dan joe ben sa kan froewakti tjalensi di sa meki a de fanowdoe taki joe gebroiki a koni foe man overtoigi sma. Foe eksempre, kon meki wi taki dati na a tra pisi di joe o studeri, wan aksi opo di abi foe doe nanga a Driwánfasi. San joe ben sa doe efoe joe sabi taki joe studenti e bribi a leri disi? Joe ben kan gi en wan poeblikâsi di e taki foe a tori dati. Baka te a leisi en, kande joe si taki a kisi na overtoigi taki Gado nanga Jesus a no a srefi. Ma efoe tokoe wan toe aksi ben de ete, dan fa joe kan go doro?

Arki heri boen. Disi sa jepi joe foe kon sabi san joe studenti e bribi kaba foe a tori dati. Foe eksempre, efoe joe studenti e taki „Mi e bribi na ini a Driwánfasi”, dan heri-esi joe ben kan bigin wan bijbel takimakandra foe sori taki a leri disi no troe. Ma difrenti leri de foe a Driwánfasi. Joe studenti kan bribi wan heri tra sani leki san joe denki taki a Driwánfasi de. Wi kan taki a srefi sani toe foe den tra leri, soleki reïncarnatie, a dede di a sili no man dede, nanga froeloesoe. So boen, arki heri boen bifo joe e taki. No denki taki joe sabi san a studenti e bribi. — Odo 18:13.

Poti aksi. Dati ben sa kan de: ’Na ala ten joe bribi na ini a Driwánfasi? Oiti joe ben studeri finifini san bijbel e taki foe a tori disi? Efoe Gado ben de wan pisi foe wan Driwánfasi, dan en Wortoe, bijbel, no ben sa taigi wi krinkrin èn langalanga taki a troe?’ Te joe e leri a studenti, dan stòp wanwan leisi foe poti aksi soleki: ’Den sani di wi ondrosoekoe te now de reidelek gi joe?’ ’Joe e agri nanga a froeklari disi?’ Te joe e gebroiki aksi na wan koni fasi, dan joe e jepi a studenti foe leri. A no moesoe arki nomo ala di joe e froeklari a tori.

Taki-go-taki-kon boen. Foe eksempre, te joe e taki foe a Driwánfasi leri, joe ben kan taigi a studenti foe joe: ’Di Jesus ben teki dopoe, wan sten ben komoto foe hemel, taki: „Joe na mi Manpikin, a lobiwan.” Efoe Gado ben de troetroe na grontapoe e teki dopoe, dan a ben sa meki en sten go na hemel èn meki a saka kon baka na grontapoe so taki den wortoe dati ben sa kan jere na grontapoe? Dati no ben sa de wan sani di e kori wi? Gado „di no man lei”, ben sa doe so wan triki sani?’ — Lukas 3:21, 22; Titus 1:1, 2.

Boen taki-go-taki-kon di doe nanga takt, abi nofotron boen bakapisi. Loekoe na eksempre foe wan oema di wi sa kari Barbara. En heri libi langa a ben bribi taki Jesus ben de Gado èn wan pisi foe wan driwánfasi nanga so srefi a santa jeje. Ma dan wán foe den Kotoigi foe Jehovah ben taigi en taki Gado nanga Jesus na toe aparti sma, èn a Kotoigi ben sori en wan toe tekst di ben horibaka gi a froeklari dati.b Barbara no ben man sori taki bijbel fowtoe. Ma na a srefi ten a ben broeja. Boiti dati, a ben lobi a leri foe a Driwánfasi.

Nanga pasensi a Kotoigi ben taki-go-taki-kon nanga Barbara. „Efoe joe ben sa wani proeberi foe leri mi taki toe sma de a srefi”, a Kotoigi ben aksi, „dan sortoe banti na mindri sma na ini wan osofamiri joe ben sa gebroiki foe sori mi dati?” A ben prakseri pikinso èn dan a ben piki: „Mi ben sa kan gebroiki toe brada.” „Soifri”, a Kotoigi ben piki. „Kande srefi wan twelengi di gersi makandra. Ma di a ben leri wi foe si Gado leki a Tata èn ensrefi leki a Manpikin, dan sortoe boskopoe Jesus ben wani gi dan?” „Mi e froestan a tori”, Barbara ben piki, ala di a ben e piri en ai. „A e taki dati a wan moro owroe èn abi moro makti.”

„Ija”, a Kotoigi ben piki, „èn a djoe poebliki foe Jesus di ben libi na ini wan libimakandra di abi wan famiri-edeman, seiker ben sa abi a prakseri dati toe. Foe poti krakti na tapoe a penti foe en, a Kotoigi ben taki na a kaba: „Efoe wi ben man feni so wan boen agersi foe sori taki toe sma de a srefi — di foe brada noso twelengi — dan seiker Jesus, a Bigi Leriman, ben kan doe dati toe. Na presi foe dati, a ben gebroiki den wortoe ’tata’ nanga ’manpikin’ foe taki foe a banti di de na mindri ensrefi nanga Gado.”

Te foe kaba, Barbara ben froestan a penti èn a ben teki en. A Kotoigi ben doro en ati nanga jepi foe a koni foe man overtoigi sma.

Te joe abi foe doe nanga den firi foe sma

Tranga relisi bribi nofo tron abi so srefi foe doe nanga den firi foe sma. Loekoe a kefal foe Edna, wan fajafaja Katolik. Den toe tini gran-manpikin foe en ben gi en krinkrin bijbel boeweisi taki Gado nanga Jesus a no a srefi sma. Edna ben froestan san a ben jere. Ma tokoe a ben taki na wan switifasi ma na wan serjoesoe fasi: „Mi e bribi na ini a santa Dri-wánfasi.”

Kande joe ben abi wan srefi sortoe ondrofeni. Foeroe sma e si den leri foe den relisi foe den leki den de wan pisi foe densrefi. Foe man overtoigi den sortoe bijbelstudenti disi, moro de fanowdoe leki nomo logis denki sondro firi, noso srefi wan toe bijbeltekst di e boeweisi taki a prakseri foe a sma de fowtoe. Den sortoe situwâsi disi kan loesoe boen te wi e balansi a koni foe man overtoigi sma nanga jepi foe sari-ati. (Teki gersi Romesma 12:15; Kolosesma 3:12.) Ija, wan boen leriman moesoe abi tranga overtoigi. Foe eksempre, Paulus ben gebroiki wortoe soleki „mi abi na overtoigi” èn „mi sabi èn mi kisi na overtoigi na ini Masra Jesus” (Romesma 8:38; 14:14). Ma te wi e taki foe na overtoigi foe wi, dan wi no moesoe gi sma a firi taki wi sabi ala sani, taki wi wawan abi leti, èn wi no moesoe taki sani di e hati sma noso di e lagi a sma te wi e pristeri den bijbel waarheid. Seiker wi no wani lagi noso afrontoe a studenti. — Odo 12:18.

A moro boen foe lespeki den bribi foe a studenti èn erken a reti di a abi foe abi den bribi dati. Sakafasi na a sroto. Wan leriman di abi sakafasi no e firi taki, nomonomo a hei moro en studenti (Lukas 18:9-14; Filipisma 2:3, 4). A overtoigi di sma e overtoigi trawan nanga Gado na prakseri, wani taki a moesoe abi sakafasi toe di, te joe loekoe en boen, e taki: ’Jehovah sari mi foe meki mi froestan disi. Meki mi prati en nanga joe.’

Paulus ben taigi den kompe kresten foe en na ini Korente, di a ben skrifi: „Den fetisani foe a feti foe wi no de na skinfasi, ma abi a krakti foe Gado foe trowe sani di seti steifi. Bika wi e trowe den prakseri èn ala den hei sani di den opo kontrari a sabi foe Gado; èn wi e tjari ibri prakseri kon na ini katibo, foe meki en gi jesi na Krestes” (2 Korentesma 10:4, 5). Na ini a ten disi, Jehovah Kotoigi e gebroiki a Wortoe foe Gado foe trowe falsi leri di poti tranga èn so srefi dipi gwenti nanga eigifasi di no e plisi en (1 Korentesma 6:9-11). Te den Kotoigi e doe disi, dan den e hori na prakseri taki Jehovah ben abi pasensi nanga den na wan lobi fasi. Den breiti srefisrefi taki den abi en Wortoe, bijbel, èn foe gebroiki a krakti wrokosani disi foe roetoe den falsi leri poeroe èn foe doro den ati foe sma nanga jepi foe a koni foe man overtoigi sma!

[Foetoewortoe]

[Faki na tapoe bladzijde 23]

Doro na ati foe joe studenti

◻ Begi foe a tiri foe Jehovah foe doro na ati foe a bijbelstudenti. — Nehemia 2:4, 5; Jesaja 50:4.

◻ Froestan san a studenti e bribi èn foe san ede a falsi bribi e hari en kande. — Tori foe den Apostel 17:22, 23.

◻ Bow wan logis bijbel boeweisi nanga switifasi èn nanga pasensi, ala di joe abi penti pe oenoe e agri na tapoe. — Tori foe den Apostel 17:24-34.

◻ Efoe a kan, poti krakti na tapoe den bijbel waarheid nanga jepi foe boen agersitori. — Markus 4:33, 34.

◻ Sori a studenti den winimarki te a e erken a soifri sabi foe bijbel. — 1 Timoteus 2:3, 4; 2 Timoteus 3:14, 15.