Joe kan gro na jejefasi

A KAN moeilek foe kon sabi a waarde foe wan sani. Disi de so nanga djamanti. Ala di wan grati djamanti e brenki, wan grofoe djamanti e skèin swaki nomo. Ma tokoe, na ini a dipi foe a grofoe djamanti joe kan froewakti seiker wan heri moi diri ston.

Kresten gersi grofoe djamanti na foeroe fasi. Ala di wi no de volmaakti srefisrefi ete, tokoe wi abi wan sani na inisei di warti gi Jehovah. Neleki djamanti, wi alamala abi wi eigi aparti eigifasi. Èn ibriwan foe wi kan gro moro na jejefasi efoe dati na troetroe san wi wani na ini wi ati. Wi kan grati a persoonlijkheid foe wi, so taki den kan skèin moro brenki gi a glori foe Jehovah. — 1 Korentesma 10:31.

Baka te den koti èn grati wan djamanti, dan den e poti en na wan sortoe fasi di e meki den eigifasi foe en skèin moro boen. Na a srefi fasi Jehovah kan gebroiki wi na ini difrenti fasi noso toewijzing efoe wi „weri a njoen fasi fa wan sma de, di ben kria akroederi a wani foe Gado na ini troetroe regtfardikifasi nanga loyaalfasi”. — Efeisesma 4:20-24.

So wan gro na jejefasi no e kon foe ensrefi, neleki fa wan lala-lala djamanti pikinmoro noiti e brenki leki wan diri ston. Wi ben sa moesoe fri wisrefi foe wan swakifasi di de pikinso ete, kenki a denki foe wi ini a tori foe teki frantiwortoe, noso doe moeiti srefi foe no doe sani na wán fasi nomo na jejefasi. Ma wi kan gro efoe wi wani troetroe, foe di Jehovah Gado kan gi wi „a krakti di e pasa san de normaal”. — 2 Korentesma 4:7; Filipisma 4:13.

Jehovah e tranga den foetoeboi foe en

Na overtoigi taki wi man doe wan sani, de fanowdoe foe koti wan djamanti, èn dati e kon te wan sma sabi soifri san a e doe, foe di te wan pisi foe a lala-lala djamanti koti poeroe kaba, dan nofotron a e lasi gowe. Diri materiaal — son tron moro leki 50 procent foe a ston di no koti ete — moesoe koti poeroe foe man kisi a vorm di wan sma wani. Wi toe abi na overtoigi fanowdoe di e kon foe soifri sabi taki wi man doe wan sani, so taki wi kan gi wi persoonlijkheid wan vorm èn so taki wi kan gro na jejefasi. Spesroetoe, wi moesoe abi froetrow taki Jehovah sa gi wi krakti.

Kande wi e firi taki wi no bekwaam nofo, noso e denki taki wi no man doe moro. Na ini a ten di pasa son tron den getrow foetoeboi foe Gado ben firi a fasi dati (Exodus 3:11, 12; 1 Kownoe 19:1-4). Di Gado ben gi en a wroko foe de wan „profeiti gi den nâsi” dan Jeremia ben froeklari: „Loekoe, mi no sabi kwetikweti fa mi moesoe taki, bika mi na wan boi ete” (Jeremia 1:5, 6). Ma ala di a ben draidrai foe teki a wroko, tokoe Jeremia ben tron wan deki-ati profeiti di ben gi langalanga boskopoe na wan pipel di ben abi feantifasi. Fa a ben man doe disi? A ben leri foe froetrow tapoe Jehovah. Baka ten Jeremia ben skrifi: „Blesi foe a man di gosontoe èn tranga na skinfasi, di e poti en froetrow tapoe Jehovah, èn di kon froetrow tapoe Jehovah.” — Jeremia 17:7; 20:11.

Na ini a ten disi, Jehovah e tranga den sma toe di e poti froetrow tapoe en. Edward,a wan papa foe fo pikin èn di no ben gro na jejefasi, ben kon si taki disi de troe. A e froeklari: „Mi ben de wan foe den Jehovah Kotoigi neigi jari kaba, ma a ben gersi taki mi ben tan tanapoe na jejefasi. A problema ben de taki mi no ben abi krakti foe doe dati èn mi no ben abi na overtoigi taki mi ben man doe dati. Baka di mi ben froisi go na Spanjorokondre, mi ben de na ini wan pikin gemeente di ben abi soso wán owroeman nanga wán dinari ini a diniwroko. Foe di a ben de fanowdoe, meki na owroeman ben aksi mi foe doe foeroe wroko. Mi ben e beifi di mi ben e hori den fosi lezing nanga toewijzing foe mi na tapoe den konmakandra. Ma mi ben leri foe froetrow tapoe Jehovah. Ala ten na owroeman ben e prèise mi èn ben e gi mi rai na wan konifasi foe doe sani moro boen.

„Na a srefi ten mi ben doe moro na ini a velddienst èn ben teki fesi moro boen na ini jeje afersi na ini mi osofamiri. Leki wan bakapisi foe dati, a waarheid ben kon moro prenspari gi a heri osofamiri, èn mi ben firi moro satisfaksi. Now mi na wan dinari ini a diniwroko, èn mi e wroko tranga foe kweki den eigifasi foe wan kresten opziener.”

„Poeroe na owroe persoonlijkheid”

Soleki fa Edward ben froestan, foe gro na jejefasi dan a de fanowdoe foe froetrow tapoe Jehovah. A de prenspari toe foe kweki a „njoen persoonlijkheid” leki di foe Krestes. Fa wi kan doe disi? Wan fosi stap na foe „poeroe” den eigifasi di de wan pisi foe na owroe persoonlijkheid (Kolosesma 3:9, 10). Neleki fa onvolmaaktifasi, soleki pikinpikin mineraal, moesoe poeroe foe wan lala-lala djamanti foe meki a tron wan brenki diriston, na so denki „di de foe grontapoe” moesoe trowe so taki a njoen persoonlijkheid kan skèin go doro. — Galasiasma 4:3.

Wán foe den denki disi na a weigri di wi e weigri foe teki frantiwortoe bika wi e frede taki a sa aksi toemoesi foeroe foe wi. A troe, frantiwortoe wani taki wroko, ma a de wan wroko di e gi satisfaksi. (Teki gersi Tori foe den Apostel 20:35.) Paulus ben erken taki a gi di wi e gi wisrefi na Gado e aksi taki wi ’e wroko tranga èn e doe moeiti’. Wi e doe dati nanga prisiri, a ben taki, „bika wi poti wi howpoe tapoe wan Gado di e libi”, a sma di noiti e frigiti a wroko di wi e doe gi a boen foe wi kompe kresten èn gi tra sma. — 1 Timoteus 4:9, 10; Hebrewsma 6:10.

Wan toe djamanti abi „swaki pisi” di den kisi di den ben e meki èn joe moesoe handri fersektiki nanga den. Ma nanga jepi foe wan wrokosani di nen wan polariscoop, a sma di e grati a djamanti kan si a swaki pisi èn kan wroko a ston na wan boen fasi. Kande wi abi wan swaki pisi na ini wi, noso wan froeferi eigifasi, bika foe wi background noso wan takroe ondrofeni di wi ben abi. San wi kan doe? Fosi, wi moesoe erken gi wisrefi taki wi abi wan problema èn abi a bosroiti foe wini en o fara wi man. Seiker wi moesoe taki san de na tapoe wi ati na fesi Jehovah na ini begi, kande soekoe so srefi jepi na jejefasi foe wan kresten owroeman. — Psalm 55:22; Jakobus 5:14, 15.

So wan swakifasi na ini wi ben abi krakti na tapoe Nicholas. „Mi papa ben de wan srafoe foe sopi, èn a ben gi mi nanga mi sisa foeroe problema”, a e froeklari. „Di mi ben komoto foe skoro, mi ben go na ini a legre, ma heri esi na oproeroefasi foe mi ben tjari mi go na ini problema. Den legre tirimakti ben poti mi na ini strafoe-oso bika mi ben e seri drug, èn wan tra leisi mi ben gowe libi a legre. Te foe kaba, mi ben komoto na legre, ma tokoe mi ben abi problema. Ala di mi libi ben broeja foe di mi ben e gebroiki drug èn ben e dringi pasamarki, tokoe mi ben abi belangstelling gi bijbel èn mi ben abi na angri foe abi wan marki na ini a libi. Te foe kaba, mi ben kisi kontakti nanga Jehovah Kotoigi, mi ben kenki mi libi, èn ben teki a waarheid.

„Ma a ben teki foeroe jari bifo mi ben erken wan swakifasi na ini mi persoonlijkheid. Mi no ben lobi tirimakti srefisrefi èn mi ben faja te sma ben gi mi rai. Ala di mi ben wani meki Jehovah gebroiki mi dorodoro, a swakifasi disi ben hendri mi. Te foe kaba, nanga a jepi foe toe owroeman di ben froestan mi, mi ben erken mi problema èn ben bigin gebroiki den lobi-ati bijbel rai foe den. Ala di wanwan leisi pikinso atibron e opo kon baka, tokoe mi basi na oproeroefasi foe mi now. Mi de tangi srefisrefi gi a fasi fa Jehovah ben handri nanga pasensi nanga mi èn gi a lobi-ati jepi foe den owroeman. Foe di mi ben gro na jejefasi, meki no so langa pasa mi ben poti na wroko leki wan dinari ini a diniwroko.”

Soleki fa Nicholas ben kon si, a no makriki foe kenki eigifasi di sidon dipi na ini wi. Wi kan abi wan srefi sortoe tjalensi. Kande wi e atibron toemoesi esi. Kande wi e tan prakseri wan sani di ben banawtoe wi, noso wi e poti toemoesi foeroe prakseri tapoe a doe di wi wani doe sani na wi eigi fasi. So boen, a kan taki a go na fesi foe wi leki kresten kan skotoe. Sma di e grati djamanti e ondrofeni wan srefi sortoe sani nanga den ston di den e kari naats. Disi na troetroe toe ston di smelter kon na wán na a ten di a djamanti ben e meki. Foe dati ede naats abi toe sortoe fasi fa a e gro èn di de kontrari makandra èn dati e meki a moeilek srefisrefi foe koti en akroederi a stroktoeroe foe en. Na ini wi kefal, wi e si taki a „stroktoeroe” foe a wani di wi abi foe doe sani e feti teige a „stroktoeroe” foe na onvolmaakti skin (Mateus 26:41; Galasiasma 5:17). Son tron wi e denki kande foe no feti moro srefisrefi, foe di wi e denki taki tokoe den onvolmaaktifasi na ini wi persoonlijkheid no de prenspari. ’Tokoe’, wi e taki kande, ’mi famiri nanga mati lobi mi ete’.

Ma efoe wi wani dini wi brada èn gi wi hemel Tata glori, dan wi moesoe ’kon njoen na ini a krakti di e wroko tapoe wi froestan’ foe di wi e weri a njoen persoonlijkheid. A warti foe meki a moeiti, soleki fa Nicholas nanga foeroe tra sma kan kotoigi. Wan man di e grati djamanti sabi taki wán flaka kan pori a heri djamanti. Na so a de toe te wi no e poti prakseri tapoe wan swakifasi na ini wi persoonlijkheid, dan wi kan pori a heri fasi fa wi de na jejefasi. Moro takroe srefi, wan serjoesoe swakifasi kan meki wi fadon na jejefasi. — Odo 8:33.

Leki wan „faja” na ini wi

A man di e grati djamanti e proeberi foe tan hori a brenkifasi na ini a djamanti. Disi a e doe foe di a e seti den plata sei foe a djamanti na so fasi taki den kan gi a so-kari alenbo kloroe. Na ini a djamanti a leti di abi difrenti kloroe e skèin go-kon, èn dati e gi a faja di e meki djamanti e brenki. Na a srefi fasi, a jeje foe Gado kan de leki wan „faja” na ini wi. — 1 Tesalonikasma 5:19; Tori foe den Apostel 18:25; Romesma 12:11.

Ma fa a de te wi e si taki a de fanowdoe foe kisi a krakti foe doe jeje sani? Fa wi kan doe disi? Wi moesoe ’prakseri heri boen den pasi foe wi’ (Psalm 119:59, 60). Disi wani taki dati wi moesoe kon sabi san na den sani di e meki wi e doe en moro safri na jejefasi èn dan wi moesoe kon sabi sortoe theokrasia wroko wi moesoe feti moro serjoesoe na baka. Wi kan tranga a warderi di wi abi gi jeje sani te wi e doe doronomo persoonlijk studie èn e begi fajafaja (Psalm 119:18, 32; 143:1, 5, 8, 10). Boiti dati, te wi abi demakandra nanga den wan di e wroko tranga na ini a bribi, dan wi sa tranga a bosroiti foe wi foe dini Jehovah fajafaja. — Titus 2:14.

Louise, wan jongoe kresten oema ben erken: „Mi ben prakseri toe jari langa foe go na ini a gewoon pionierwroko bifo mi ben tron wan pionier, noso foeroeten Kownoekondre preikiman. Noti ben tapoe mi, ma mi ben doe sani na wan safri fasi, èn mi no ben meki moeiti foe komoto na ini a fasi dati. Dan wantronso mi papa dede. Mi ben froestan o sjatoe a libi kan de èn taki mi no ben gebroiki mi libi na a moro boen fasi. So boen, mi ben kenki a fasi fa mi ben prakseri foe jeje afersi, ben doe moro na ini mi diniwroko, èn ben tron wan gewoon pionier. Wan spesroetoe jepi na ini a tori disi ben de den jeje brada nanga sisa foe mi di ala ten ben horibaka gi den seti foe velddienst konmakandra èn di ben wroko doronomo nanga mi na ini a diniwroko. Mi leri taki awansi a boen noso a no boen, wi abi den srefi markitiki èn marki leki foe den kompe foe wi.

Kon srapoe leki nanga isri

Djamanti na den moro tranga sani na grontapoe di tranga foe ensrefi. Foe dati ede, wan djamanti de fanowdoe foe man koti wan tra djamanti. Disi e meki den bijbelstudenti memre kande na odo di e taki: „Nanga isri, isri srefi e kon srapoe. Na so wan man e srapoe a fesi foe wan trawan” (Odo 27:17). Fa wan sma fesi „e kon srapoe”? Wan sma kan srapoe a kondisi foe wan tra sma na froestan sei èn na jeje sei, neleki fa wi kan gebroiki wan pisi isri foe srapoe wan plata sani di meki foe isri toe. Foe eksempre, te wi kon depressief foe di wan sani no waka fa wi ben prakseri, dan a deki-ati di wan tra sma e gi kan opo wi troetroe. A sari fesi foe wi kan kon boen baka, èn wi kan kisi firi foe wroko fajafaja baka (Odo 13:12). Spesroetoe den gemeente owroeman kan srapoe wi te den e gi deki-ati nanga bijbel rai foe meki wi go na fesi. Den e doe a gronprakseri di Salomo ben kari: „Gi wan koni sma èn a sa kon moro koni srefi. Gi sabi na wan regtfardiki sma èn a sa gro na ini sabi.” — Odo 9:9.

A no de foe taki dati leri na jejefasi abi ten fanowdoe. Moro leki tin jari langa na apostel Paulus ben prati na ondrofeni foe en èn a fasi fa a e gi leri, nanga Timoteus (1 Korentesma 4:17; 1 Timoteus 4:6, 16). A langa leri di Moses ben gi Josua na ini wan pisi ten foe moro leki 40 jari, ben abi wini gi a nâsi Israèl gi wan langa pisi ten (Josua 1:1, 2; 24:29, 31). Elisa ben waka nanga a profeiti Elia kande 6 jari langa, èn Elisa ben kisi wan moi fondamenti gi en eigi diniwroko di ben tan pikinmoro 60 jari langa (1 Kownoe 19:21; 2 Kownoe 3:11). Te den e gi doronomo leri nanga pasensi, dan owroeman e waka baka na eksempre foe Paulus, Moses, nanga Elia.

Foe gi prèise de wan prenspari pisi foe gi leri. Opregti wortoe foe warderi gi toewijzing di doe boen noso gi a fasi fa sma handri boen, kan gi tra sma a tranga foe wani dini Gado moro boen. Wortoe foe prèise e gi wan sma froetrow na ini ensrefi, èn a sani dati foe en sei e gi a deki-ati foe wroko na tapoe den swakifasi. (Teki gersi 1 Korentesma 11:2.) Deki-ati foe gro na ini waarheid e kon toe te wi abi foeroe foe doe na ini a Kownoekondre preikiwroko nanga tra gemeente wroko (Tori foe den Apostel 18:5). Te den owroeman e gi brada frantiwortoe akroederi a gro di den brada e gro na jejefasi, dan disi e gi den man disi prenspari ondrofeni èn dati seiker sa tranga na angri foe den foe tan gro na jejefasi. — Filipisma 1:8, 9.

Boen reide foe gro na jejefasi

Sma e si djamanti leki warti sani. Disi troe toe foe den sma di e kon abi demakandra now nanga a famiri foe Jehovah en anbegiman foe heri grontapoe. Foe taki en leti, Gado srefi e kari den den „sani di sma wani srefisrefi”, noso „warti” sani foe ala den nâsi (Hagai 2:7, foetoewortoe). A jari di pasa, 375.923 sma ben tron dopoe Kotoigi foe Jehovah. Foe man fiti wisrefi na a gro disi, a de fanowdoe foe ’meki den tenti moro bradi’. Te wi e gro na jejefasi — èn te wi e soekoe foe kisi kresten grani foe dini — dan wi kan abi wan prati foe sorgoe gi a gro disi. — Jesaja 54:2; 60:22.

Tra fasi leki foeroe warti djamanti di sma e hori na ini bangi èn di pikinmoro wi no man si, a wartifasi foe wi na jejefasi kan skèin na wan brenki fasi. Èn te doronomo wi e grati èn e sori den kresten eigifasi foe wi, dan wi e gi Jehovah Gado glori. Jesus ben froemane den bakaman foe en: „Meki oen leti skèin gi sma, so taki den kan si den boen wroko foe oenoe èn gi glori na oen Tata, di de na hemel” (Mateus 5:16). Foe troe, dati e gi wi boen reide foe gro na jejefasi.

[Foetoewortoe]