„Na wortu fu Gado de a libi èn a abi krakti”
1, 2. (a) San meki a libi fu den sma di ben tron kresten kenki? (b) O fara na beybri kan abi krakti tapu wan sma?
INI na mindri fu na fosi yarihondro G.T., na apostru Paulus ben skrifi wan brifi gi na kresten gemeente na ini Rome. Na ini disi a ben meki kon heri bun na krin san den e aksi fu tru kresten, taki den musu tyari kenki kon na ini den libi. A ben taki: „Stòp fu gersi na seti fu sani disi, ma kon kenki fu di yu e kenki yu denki, so taki yu kan ondrosuku fu si san na a bun èn switi èn volmaakti wani fu Gado” (Rome sma 12:2). San e kenki den bakaman fu Yeyses, so taki srefi den heri fasi fu denki e kon de tra fasi? A prenspari fu na tori de na krakti fu na Wortu fu Gado, na beybri.
2 Paulus e meki wi si o dipi na beybri kan abi krakti na tapu wi di a ben skrifi:„A wortu fu Gado de a libi èn a e abi krakti èn a srapu moro leki wan feti-owru di e koti na ala tu sey èn a e sutu go srefi so fara taki a e prati sili nanga yeye, èn skrufu nanga a fatu fu den, èn a kan si prakseri nanga bedoeling fu na ati” (Hebrew sma 4:12). Iya, na tumusi bigi krakti fu na beybri fu tyari den sortu kenki disi kon na ini sma de wan overtoygi buweysi taki a de moro leki soso a wortu fu libisma.
3, 4. O fara a de di wan sma de leki kresten e kenki?
3 Na Griki wortu na ini Rome sma 12:2 di poti abra nanga „kon kenki” e kon fu me.ta.morʹfo.o. A e sori tapu wan sani di kenki krinkrin, so leki na kenki fu a skin fu wan rups kon tron wan kaperka. A de so wan kenki di de so dorodoro taki a beybri e taki fu en leki wan kenki fu a sma di yu de, yu persoonlijkheid. Na ini wan tra beybri vers wi e leysi: „Puru na owru sma di yu de nanga ala en du èn weri na nyun sma di yu musu de, di nanga yepi fu soyfri sabi e kon nyun akruderi na prenki fu Na Sma di ben meki en.” — Kolose sma 3:9, 10.
4 Di Paulus ben skrifi na gemeente na Korente, a ben sori o fara den kenki fu na sma di wan sma de ben feni presi ini na fosi yarihondro. A ben taki: „No huruman, no den diniman fu kruktugado, no den sutaman, no den man di den e hori fu tegennatuurlijk prakseri, no man di e ddon na man, no fufuruman, no bigi-ay sma, no drunguman, no skempiman, no bidrigiman sa kisi Gado kownukondre. Èn toku sonwan fu unu ben de dati. Ma unu wasi kon krin” (1 Korente sma 6:9-11). Iya, hurudu sma èn sma di lobi meki trobi, fufuruman nanga drunguman, ben kenki kon tron kresten sma di de wan bun eksempre.
Kenki na ini na sma di wan sma de na ini wi ten
5, 6. Fa na sma di wan yonguman ben de ben kenki krinkrin nanga na krakti fu na beybri?
5 Den srefi sortu kenki fu a sma di wan sma de de fu si ini na ten disi. Fu eksenpre, wan boy na ini Zuid-Amerika ben tron wan weysipikin di a ben de neygi yari. Fu di a ben gro kon sondro na kweki fu wan ppa nanga wan mma meki a ben abi fu du nanga wan seryusu problema nanga a sma di a de. A e fruteri: „Di mi ben de 18 yari, mi ben de wan srafu krinkrin fu takru puyri nanga tabaka èn mi ben de na dungru-oso kba fu fufuru ede fu kan pay fu na gwenti.” Ma en tanta ben de wan sma fu Yehovah Kotoygi, èn te fu kba a tanta ben man fu yepi en.
6 Na yonguman e tyari kon na krin: „Mi tanta ben bigin fu stuka na beybri nanga mi, èn baka seybi mun mi ben man fu libi na gwenti fu takru puyri nanga tabaka.” A ben libi so srefi den fositen mati fu en èn a ben meki nyun mati a mindri Yehovah Kotoygi. A e fruteri moro fara: „Den nyun mati disi, makandra nanga mi geregelde studi fu na beybri, ben yepi mi fu go na fesi èn te fu kba fu gi mi libi abra ini a dini fu Gado.” Iya, na fositen yonguman disi di ben de wan srafu fu takru puyri nanga tabaka nanga wan fufuruman de now wan aktief kresten di e libi krin. Fa so wan bigi kenki na ini na sma di a ben de ben kan feni presi? Nanga na krakti fu na beybri.
7, 8. Fruteri fa wan seryusu problema fu na sma di wan sma de ben kenki nanga yepi fu na beybri.
7 Wan tra eksempre e kon fu Zuid-Europa. Wan yonguman ben gro drape nanga wan seryusu problema ini a sma di a de: a ben kisi atibron esi-esi. Ala ten baka a ben de ini feti. Na a ten fu wan famiri trobi a naki en ppa srefi trowe na gron! Ma te fu kba a ben go studeri na beybri nanga Yehovah Kotoygi èn a ben poti prakseri tapu na kobòt fu Gado na ini na buku Rome sma: „No pay no wan sma ogri nanga ogri. . . .Efu a kan, fu so fara a e anga fu yu, de ini vrede nanga ala sma. No teki refensi gi yu srefi, lobiwan, ma gi presi na atibron.” — Rome sma 12:17-19.
8 Den wortu disi ben yepi en fu frustan o takru en swakifasi ben de. Di a ben kisi moro nanga moro sabi fu na beybri, dan en konsensi ben skafu kon moro bun, èn disi yepi en fu a tènper en atibron. Wan dey, di a ben go na fesi kba na ini en beybri studi, wan freymde sma ben taki wortu fu gi en syen. Na yonguman ben firi na atibron ben kon na ini en leki fositen. Ne a ben firi wan tra sani: wan firi fu syen; èn disi tapu en fu gi en srefi abra na en atibron. A ben kweki na fasi fu dwengi en srefi, wan prenspari froktu fu na yeye (Galasiya sma 5:22, 23). A sma di a de ben de now tra fasi, tangi fu na krakti fu na Wortu fu Gado.
9. Leki fa Paulus taki dan nanga san na sma di wi de e kon kenki?
9 Ma fa a beybri e meki so wan krakti du kon? Paulus ben taki na ini Kolose sma 3:10, taki na sma di wi de e kon kenki nanga yepi fu soyfri sabi, na soyfri sabi di de fu feni na ini beybri. Ma fa sabi e kenki sma?
Na ròl fu soyfri sabi
10, 11. (a) San wi e leri fu wi studi fu na beybri fu den fasi di wi wani èn den fasi di wi no wani fu a sma di wi de? (b) Boyti sabi, dan san de moro fanowdu fu tyari kenki kon ini a sma di wi de?
10 Ini na fosi presi na beybri e meki wi kon sabi den fasi di no bun fu a sma di wi de èn di wan sma musu puru. Disi na den sani so leki „bigimemre ay, wan leytongo, anu di e trowe brudu fu sma di no du noti, wan ati di e meki ogri plan, futu di e hasti go na ogri, wan falsi kotoygi di e meki ley èn ibriwan sma di e meki trobi kon a mindri brada” (Odo 6:16-19). Ini a di fu tu presi a beybri e fruteri fu fasi di bun èn di wi musu kweki, makandra nanga „lobi, prisiri, vrede, langa pasensi, switifasi, bunfasi, bribi, safri-atifasi, dwengi yu srefi”. — Galasiya sma 5:22, 23.
11 So wan soyfri sabi e yepi wan sma di de opregti, fu ondrosuku en srefi èn fu si sortu fasi a musu kweki èn sortu wan a musu puru ini a sma di a de (Yakobus 1:25). Ma toku dati de ete soso wan bigin. Te wi e taki fu sabi, dan reyde fu ati de fanowdu tu, wan sani san e buweygi en fu wani kenki. Dya agen a abi soyfri sabi fu na beybri fanowdu.
Reyde fu na ati fu du bun
12. Fa sabi fu a sma di Gado de e yepi wi fu kenki?
12 Paulus ben taki taki na nyun sma di wi de e seti „akruderi na prenki fu Na Sma di ben meki en” (Kolose sma 3:10). Na kresten sma di wi musu de gersi sobun na sma di Gado srefi de (Efeysiya sma 5:1). Na sma di Gado de e tyari kon na krin gi wi nanga yepi fu a beybri. Wi e si a fasi fa a e bumuy nanga na libismafamiri èn kan si gaw den tumusi moy eygifasi fu en, so leki en lobi, switifasi, bunfasi, sari-atifasi nanga regtfardikifasi. So wan sabi e buweygi wan reti-ati sma, fu lobi Gado èn fu wani de a sortu fu sma di Gado e feni bun (Mateyus 22:37). Leki lobi pikin wi wani plisi wi heymel Tta èn wi e pruberi fu dati-ede so bun leki wi kan na ini wi swaki onvolmaaktifasi fu waka baka na eksempre fu a sma di a de. — Efeysiya sma 5:1.
13. Sortu sabi e yepi wi fu ’lobi regtfardikifasi èn fu no wani si kruktudu na ay’?
13 Den reyde fu wi ati e kon moro tranga nanga yepi fu na sabi di beybri e gi ini a tori, fu den bakapisi di bun fasi èn takru fasi fu na sma di wan sma de kan tyari en go (Psalm 14:1-5; 15:1-5; 18:20, 24). Wi e kon sabi taki David ben kisi blesi fu a gi di a ben gi en srefi na ini na dini fu Gado èn fu lobi gi regtfardikifasi ma taki a ben kon ini problema te a ben lasi a dwengi di a ben musu dwengi en srefi. Wi e si sortu sari bakapisi a ben abi, di Salomow ben lasi tumusi moy eygifasi di a ben kon owru. Den blesi di ben de na bakapisi fu na opregtifasi fu Yosiya nanga Hiskiya de abrasey fu na ranpu bakapisi fu Akab swakifasi nanga Manase tranga-ede di meki a fadon komoto na bribi (Galasiya 6:7). Na so wi e leri ’fu lobi regtfardikifasi èn fu no wani si kruktudu na ay’ — Hebrew sma 1:9; Psalm 45:7; 97:10.
14. San na den prakseri fu Yehovah na ini a tori fu grontapu èn aparti sma di e libi na ini?
14 Den reyde disi fu ati e kon moro tranga srefi nanga wan soyfri sabi fu den prakseri fu Gado. So wan sortu sabi e yepi wi srefi fu kenki ’na krakti di e pusu wi denki’, na yeye di e gi reyde a wi denki nanga du (Efeysiya sma 4:23, 24). Te wi e stuka na beybri, wi e leri taki Yehovah no sa frudrage ogri fu têgo. Dyonsro a sa pori na onregtfardiki grontapu disi èn sorgu gi ’nyun heymel nanga wan nyun grontapu pe regtfardikifasi sa de na ini’ (2 Petrus 3:8-10, 13). Suma sa libi na ini na nyun grontapu disi? „A de den opregtiwan di sa tan na grontapu, èn den wan di de soyfri, a den wan di sa tan abra a tapu. Fu na sey fu den ogriwan, den sa koti den puru fu na grontapu srefi; èn fu na sey fu den feradelekwan, den sa hari den puru fu en.” — Odo 2:21, 22.
15. Fa a o abi krakti na tapu wi leki sma efu wi e poti trutru bribi ini san na beybri e taki fu den prakseri fu Yehovah?
15 Efu wi bribi trutru na pramisi disi, dan a sa abi krakti tapu wi heri fasi fu denki. Baka di Petrus ben taki na fesi fu a pori fu ogri, a e taki: „Fu di ala den sani disi sa puru a pasi na a fasi disi, sortu sma unu musu de dan na ini santa waka nanga libi èn du fu a gi di wi e gi wi srefi na ini a dini fu Gado, e fruwakti èn e hori bun na ini prakseri na denoya fu na dey fu Yehovah” (2 Petrus 3:11, 12). Na sma di wi de musu seti akruderi na tranga winsi fu wi fu de a mindri den opregtiwan di e tan abra te den ogriwan e kisi pori.
16. Sortu sma no sa mag de na ini na nyun grontapu, èn fa na sabi dati musu abi krakti na tapu wi?
16 Na buku Openbaring e pramisi opregtiwan taki, baka na kba fu na grontapu disi „[Gado] sa figi ala watra-ay puru fu den ay, èn dede no sa de moro, no wan sari, no wan bbari, no wan pen no sa de moro. Den fosi sani psa kba.” Ma dan a e warskow taki den „lagi-atiwan . . . èn den sma di no abi bribi èn den sma di de wan tegu sani na ini na fistifasi fu den èn kiriman nanga huruman nanga den sma di e du afkodrey nanga den diniman fu kruktugado nanga ala leyman” sa trowe go na wan sey (Openbaring 21:4, 8). O fa a de wan koni sani sobun fu tan farawe fu den ogri eygifasi di Gado no sa gi pasi fu den kon na ini na nyun grontapu!
Yepi fu dorosey
17. Sortu yepi na beybri e taygi wi fu suku?
17 Toku sma de swaki èn leki fa den gwenti, dan den abi wan sani moro ete fanowdu leki tori nanga reyde fu buweygi na ati efu den wani tyari kenki kon. Den abi persoonlijk yepi fanowdu, èn na beybri e sori wi pe wi kan feni a yepi disi. A e taki fu eksenpre: „A sma di e waka nanga koniwan sa kon koni, ma a sma di e bumuy nanga don sma, a sa waka takru nanga en” (Odo 13:20). Na a srefi fasi a de tu, efu wi abi demakandra nanga den sma di e sori den eygifasi di wi wani kweki, dan wi sa kisi yepi tranga fu kon gersi den moro. — Genesis 6:9; Odo 2:20; 1 Korente sma 15:33.
18, 19. San wi musu du fu meki a yeye fu Gado wroko na tapu wi ati nanga yeye?
18 Na sey fu dati, Yehovah srefi e sorgu fu yepi na ini na vorm fu santa yeye — na srefi yeye di a ben kobroyki fu du wondru na fositen. Iya, den moro bun eygifasi „lobi, prisiri, vrede, langa pasensi, switifasi, bunfasi, bribi, èn safri-atifasi nanga dwengi yu srefi” den e kari den „na froktu fu na yeye” (Galasiya sma 5:22, 23). Fa wi e kisi na yepi fu na santa yeye? Fu di na beybri skrifi ondro krakti fu santa yeye, dan te wi e leysi en ofu e taki nanga tra sma fu en, dan wi e meki na overtoygi krakti fu na yeye dati wroko tapu wi ati nanga wi yeye (2 Timoteyus 3:16). Iya, Yeyses ben pramisi taki te wi e taki nanga tra sma fu na howpu fu wi, wi kan ondrofeni langalanga na wroko fu na yeye dati. — Mateyus 10:18-20.
19 Boyti fu dati, na beybri e komanderi: „Horidoro ini begi” (Rome sma 12:12). Nanga yepi fu begi wi e taki nanga Yehovah, e prèyse en, e taki en tangi, èn e aksi en fu yepi. Efu wi e aksi yepi fu wini takru fasi fu a sma di wi de, soleki fu kisi atibron esi-esi, tranga-ede, no abi pasensi ofu heymemre, dan Gado yeye sa hori baka gi ala muyti di wi e du ini wánfasi nanga na begi dati. — Yohanes 14:13, 14; Yakobus 1:5; 1 Yohanes 5:14.
20. Fu san-ede kresten sma musu tan wroko na a weri di den musu weri na nyun sma di den musu de?
20 Di Paulus ben skrifi „Kon kenki fu di yu e kenki yu denki”, a ben skrifi gi wan gemeente fu dopu kresten di kisi salfu (Rome sma 1:7; 12:2). Èn na ini na Grikitongo di ben de biginbigin a ben kobroyki wan werkwortu vorm di e taki fu wan du di e go doronomo. Disi e sori taki na kenki di soyfri sabi fu na beybri e tyari kon na ini wi, de progressief. Neleki kresten sma na ini Paulus dey na so wan grontapu di furu nanga pori krakti e lontu wi. Èn neleki den, na so wi de nanga fowtu, nanga a firi fu du san de fowtu (Genesis 8:21). Fu dati-ede wi musu tan wroko na en fu wini na owru sma di wi de èn di e prakseri en srefi nomo èn fu weri na nyun sma, yoysti so leki den ben du. Den fosi kresten ben man du disi ini so wan marki taki den ben de krinkrin tra fasi leki a grontapu di ben lontu den. Kresten na ini na ten disi e du na srefi.
Wan pipri „di kisi leri fu Yehovah”
21. San na wantu fu den profeytitori di e kon tru na ini den lasti dey disi na tapu a pipri fu Gado?
21 Te yu luku en bun, Gado yeye e wroko ini na ten disi no wwan tapu aparti sma ma tapu en heri organisâsi fu kresten sma, di a nomru fu den de milyunmilyun. Na ini na organisâsi disi Yesaya profeyti wortu e kon tru: „Furu pipri seyker sa go èn taki: ’un kon, èn meki wi go na a bergi fu Yehovah, na a oso fu na Gado fu Yakob; èn en sa leri wi en pasi, èn wi wani waka den pasi fu en’” (Yesaya 2:3). Den tra wortu fu Yesaya profeytitori kon so srefi tru na ini den. „Ala yu manpikin sa de sma di kisi leri fu Yehovah, èn na vrede fu yu manpikin sa de psa marki” (Yesaya 54:13). Suma na den disi di abi vrede fu di den kisi leri fu Yehovah?
22. (a) Suma e kisi leri fu Yehovah ini na ten disi? (b) Gi eksenpre fu sori taki sma na dorosey e erken taki Yehovah Kotoygi de tra fasi.
22 We, poti prakseri na tapu na pisi disi fu wan brifi fu na New Haven Register, wan Noordamerkan koranti: „Efu neleki mi yu e fruferi ofu kisi atibron now fu na wroko fu den fu meki proseliti sma, toku yu musu fruwondru fu na gi di den e gi den srefi na ini na dini fu Gado, a tanbun fu den, na tumusi moy eksenpre fu libisma waka nanga libi èn na gosontu libifasi fu den.” Fu suma na skrifiman ben e taki? Fu na srefi grupu di na Herald fu Buenos Aires, Argentiniya ben taki fu en, di den taki drape: „Yehovah Kotoygi ben sori ini den yari di psa taki den de borgru di e frede Gado èn e wroko tranga, èn e libi eenvoudig nanga zuinig.” Na a srefi fasi na koranti La Stampa fu Italiya ben skrifi: „Den no e proberi fu na bun fu den fu psa muylek wet. Den moreel ideaal fu lobi sma na yu sey, na weygri fu makti, na poti fu tranga na wan sey èn so srefi tu persoonlijk eerlijkfasi . . . de wan pisi fu den ’ala dey libi.’”
23. Fu san-ede Yehovah Kotoygi leki organisâsi de tra fasi?
23 Fu san-ede Yehovah Kotoygi leki grupu de so tra fasi — neleki den fositen kresten? Na ini furu fasi den no kenki fu tra sma. Den koboru nanga den srefi libisma onvolmaaktifasi, èn den abi den srefi ekonomiya problema èn den srefi fondamenti fanowdu. Ma leki wan gemeente di de na a heri grontapu, den e meki na Wortu fu Gado abi krakti na tapu den libi. Na internationaal bradafasi fu tru kresten sma di de wan bakapisi fu dati, de wan krakti buweysi taki na beybri de na Wortu fu Gado di skrifi na ondro krakti fu santa yeye. — Psalm 133:1.
Na beybri skrifi ondro krakti fu santa yeye
24. San na a begi fu wi gi furu moro sma ete?
24 Na ini den tu artikel disi wi taki soso fu tu fasi fu buweysi fu meki sma si taki beybri de trutru a wortu fu Gado, no di fu libisma. Ofu den e luku now na koni fu beybri di no abi en speri ofu na krakti fu en fu kenki sma — ofu den furu tra sani di e meki a buku de leki wan aparti buku — opregti sma musu kon frustan taki na Gado meki den skrifi en na ondro krakti fu en santa yeye. Leki kresten wi e begi taki furu moro sma ete sa kon erken na waarheid disi. Dan den tu sa agri nanga den prisiri wortu fu na Psalmsingiman: „Ow, luku taki mi lobi yú komando. Ow, Yehovah, hori mi na libi akruderi yu lobi bunfasi. Na heri inibere fu yu wortu na waarheid, èn ibri regtfardiki krutu bosroyti fu yu e tan te ten di no skotu.” — Psalm 119:159, 160.
Yu kan memre disi ete?
◻ Sortu krakti beybri abi na tapu tru kresten?
◻ Fa soyfri sabi e yepi fu kenki wi?
◻ Fa beybri e meki wi kisi reyde fu kweki bun eygifasi èn wini san takru?
◻ Sortu yepi de fu kweki eygifasi na ini a dini fu Gado?
◻ Sortu buweysi taki a beybri skrifi ondro krakti fu santa yeye de fu si a mindri Yehovah pipri?
[Prenki na tapoe bladzijde 17]
Na sari bakapisi taki Salomow no ben tan kotrow na ini en owrudey musu pusu wi fu lobi regtfardikifasi èn no wani si kruktudu libi na ay
[Prenki na tapoe bladzijde 19]
Efu wi e aksi Yehovah fu kisi yepi dan en yeye sa tranga ala muyti fu wi di wi e du fu wini fasi di no bun