„Tan waka leki pikin foe a leti”
„Weri a njoen sma, di ben meki akroederi a wani foe Gado ini troe regtfardikifasi nanga loyaalfasi.” — EFEISESMA 4:24.
1. Nanga san den anbegiman foe Jehovah blesi? Foe san ede?
JEHOVAH GADO na „a Tata foe den hemel leti” èn „ini wánfasi nanga en no wan doengroe no de kwetikweti” (Jakobus 1:17; 1 Johanes 1:5). En Manpikin, Jesus Krestes, ben taki foe ensrefi: „Mi na a leti foe grontapoe. A sma di e waka na mi baka kwetikweti no sa waka ini doengroe, ma a sa abi a leti foe a libi” (Johanes 8:12). Troe anbegiman foe Jehovah, den bakaman foe en Manpikin, blesi foe dati ede foe di den kisi a leti — na froestan sei, na moreel sei èn na jeje sei — èn den e „skèin leki sma di e skèin a leti ini grontapoe”. — Filipisma 2:15.
2. Foe sortoe difrenti na mindri Gado pipel nanga grontapoe den ben taki na fesi?
2 Langaten pasa kaba, a profeiti Jesaja ben taki na fesi nanga jepi foe santa jeje foe a difrenti disi: „Loekoe! doengroe srefi sa tapoe grontapoe èn deki doengroe den nationaal groepoe; ma tapoe oenoe Jehovah sa go skèin èn tapoe oenoe sma sa si a glori foe en.” Foe taki en leti, foe a heri libisma famiri di drifi komoto foe Gado, den e taki foe den leki den de na ondro a krakti foe „den grontapoe tiriman foe a doengroe disi”. — Jesaja 60:2; Efeisesma 6:12.
3. Foe sortoe reide ede wi abi foeroe belangstelling gi Paulus rai di e kon na a reti ten?
3 Na apostel Paulus ben broko en ede srefisrefi taki den kompe kresten foe en ben sa tan fri foe a sortoe doengroe dati. A ben begi den foe den „no tan waka so leki den nâsi e waka toe”, ma taki den „tan waka leki pikin foe a leti” (Efeisesma 4:17; 5:8). A ben froeklari toe fa den ben kan abi boen bakapisi te den ben o doe disi. Ini a ten disi, a doengroe di e tapoe den nâsi, kon moro deki. Grontapoe soengoe go moro dipi ini na ogri situwâsi di no warti noti na moreel sei èn na jeje sei. Den anbegiman foe Jehovah abi foe feti wan boen bigi feti di e kon hebi moro nanga moro. Foe dati ede wi abi foeroe belangstelling gi san Paulus ben abi foe taki.
Leri sani di abi foe doe nanga Krestes
4. San Paulus ben abi na prakseri di a ben taki: „Oenoe no ben leri sabi Krestes so”?
4 Baka di na apostel Paulus ben taki foe den sani di grontapoe e feti na baka èn di no e tjari wini kon èn a dotifasi foe den, a e poti en prakseri baka tapoe den kompe kresten foe en na Efeise. (Grantangi leisi Efeisesma 4:20, 21.) Wan sani foe dri jari Paulus ben tan preiki èn gi leri, ini a foto dati èn a ben moesoe foe sabi foeroe foe den sma ini a gemeente (Tori foe den Apostel 20:31-35). So boen, di a ben taki: „Oenoe no ben leri sabi Krestes so”, a ben sori taki ensrefi ben sabi taki den kresten foe Efeise no ben kisi leri foe wan sortoe waarheid di e gi pasi foe sani doe di no boen, bodoi foe waarheid di den meki kon swaki èn di no e loekoe so fini na den sortoe takroe fasi foe tjari densrefi, di Paulus ben taki foe den ini den vers 17 nanga 19. A ben sabi taki den ben leri a troe kresten fasi foe libi, so leki fa Jesus Krestes ben sori dati, na wan joisti èn soifri fasi. Foe dati ede, den no ben waka moro na doengroe so leki fa den nâsi ben doe, ma den ben de pikin foe leti.
5. San na a difrenti na mindri a de di wan sma de frafra ini a waarheid èn abi a waarheid na ini wi?
5 O prenspari a de, foe dati ede, foe „leri sabi Krestes” na wan joisti fasi! Fowtoe fasi de di no e meki wi leri sabi Krestes troetroe? Ija, a no de foe taki. Na fesi, na Efeisesma 4:14, Paulus ben warskow den brada: „Wi no moesoe de beibi moro langa, di neleki a skwala e slenger den go-kon èn di ibri winti foe leri nanga jepi foe a bidrigifasi foe libisma ben tjari den go-kon, nanga jepi foe triki ini a meki foe plan foe doe sondoe.” A de krin taki son sma ben de di ben leri foe Krestes, ma di ben e waka ete na den pasi foe grontapoe èn srefi ben proeberi foe hari trawan kon so fara foe doe dati toe. A de so taki disi e sori wi a kefar foe de ini waarheid nomo, leki fa son sma e taki en, na presi foe abi waarheid na ini wi? Ini den dei foe Paulus den sma di ben abi soso wan frafra froestan foe sani, trawan ben kan meki den prakseri tra sani makriki èn esi-esi, èn so a de toe ini a ten disi. Foe kibri den Efeisesma gi disi, meki Paulus ben go doro foe taki, dati a ben de fanowdoe foe den ’jere Krestes èn ben kisi leri nanga jepi foe Jesus’. — Efeisesma 4:21.
6. Fa wi kan leri, jere èn kisi leri nanga jepi foe Krestes ini a ten disi?
6 Den wortoe „foe leri”, „foe jere” èn „foe kisi leri”, di Paulus ben gebroiki, alamala e sori go na wan fasi foe studie nanga leri, neleki na wan skoro. A no de foe taki, dati wi no man jere, leri noso kisi leri langalanga foe Jesus srefi ini a ten disi. Ma Jesus e tiri wan bijbel leri programa di e gi na heri grontapoe nanga jepi foe en „getrow èn koni srafoe” (Mateus 24:45-47; 28:19, 20). Wi kan „leri sabi Krestes” na wan joisti èn soifri fasi, efoe wi e njan doronomo foe a njanjan na jeje fasi di a srafoe-groepoe e gi na a reti ten, e studeri en serjoesoe efoe a de now nanga wisrefi noso ini a gemeente, e prakseri dipi foe dati èn e doe san wi e leri. Meki wi de overtoigi taki wi e gebroiki ala den sani di den seti gi wi, so taki wi kan taki troetroe, dati wi „jere en èn ben kisi leri nanga jepi foe en”.
7. Sortoe prenspari sani wi kan si ini den wortoe foe Paulus, „waarheid de ini Jesus”?
7 A de wan moi sani foe si taki na Efeisesma 4:21, baka di Paulus poti krakti na tapoe a fasi foe leri, a e taki moro fara: „Neleki fa waarheid de ini Jesus.” Wan toe bijbel takiman e poti prakseri na tapoe taki wanwantron Paulus ben gebroiki na eigi nen Jesus srefi ini den brifi foe en. Ija, disi na a wan enkri eksempel foe a gebroiki di a ben gebroiki a nen na so wan fasi ini a brifi gi den Efeisesma. Wan spesroetoe reide de foe disi? Kande Paulus ben poti prakseri na tapoe na eksempel di Jesus ben gi leki wan libisma. Memre taki Jesus srefi ben taki wan leisi foe ensrefi: „Mi na a pasi nanga a waarheid nanga a libi” (Johanes 14:6; Kolosesma 2:3). Jesus ben taki: „Mi na . . . a waarheid”, foe di a no ben taki èn leri a waarheid nomo, ma a ben libi akroederi dati èn ben meki a kon de leki na ensrefi ben de dati. Ija, troe krestendom a no soso wan prakseri, ma na wan fasi foe libi. Foe „leri sabi Krestes” abi na ini toe foe leri foe waka na en baka ini a fasi fa a ben libi akroederi a waarheid. Joe e seti joe libi neleki fa Jesus ben doe? Joe e waka aladei krosibei na ini den foetoemarki foe en? Soso te wi e doe dati wi kan tan waka leki pikin foe leti.
„Poeroe na owroe sma”
8. Sortoe agersitori Paulus ben gebroiki ini Efeisesma 4:22, 24 èn foe san ede den ben joisti?
8 Foe sori fa wi kan „leri sabi Krestes” nanga boen bakapisi èn waka leki pikin foe leti, Paulus e go doro foe taki na ini Efeisesma 4:22-24, taki dri aparti sani de di wi moesoe doe. A fosiwan foe den na: „Oenoe moesoe poeroe na owroe sma, di de akroederi a waka nanga libi di oenoe ben abi fosi èn di den bidrigi lostoe foe en e pori en” (Efeisesma 4:22). Den wortoe „poeroe” („poeroe na joe skin”, Kingdom Interlinear) èn „weri” (vers 24) e tjari kon na ini prakseri a poeroe di wan sma e poeroe wan krosi èn a weri di a e weri en. Disi na wan metafoor (wortoe di gebroiki na agersifasi), di Paulus ben gebroiki foeroetron foe agersi sani èn a wan disi ben wroko heri boen (Romesma 13:12, 14; Efeisesma 6:11-17; Kolosesma 3:8-12; 1 Tesalonikasma 5:8). Te a krosi foe wi kon doti noso kisi flaka, so leki te wi e njan, wi e kenki a krosi so esi leki wi e kisi na okasi foe doe dati. Wi no moesoe broko wi ede na a srefi fasi nanga ibri sani di e doti a jeje fasi foe wi?
9. Na sortoe fasi wan sma e poeroe na owroe sma?
9 Fa dan, wan sma e poeroe na owroe sma? A werkwortoe „poeroe” skrifi na ini a fosi tongo na ini, san sma e kari, aorist ten. A e sori tapoe wan sani di sma e doe soso wán leisi noso wan leisi foe ala ten. Disi e froeteri wi taki na „owroe sma” („owroe libisma”, Kingdom Interlinear), makandra nanga a „waka nanga libi di [wi] ben abi fosi”, moesoe poeroe nanga wan troetroe èn fasti bosroiti, di e doe heri boen èn dorodoro. A no de wan sani di wi kan prakseri-go-prakseri-kon noso draidrai srefi foe espresi èn abi boen bakapisi. Foe san ede a no kan?
10. Foe san ede wan sma moesoe de sondro degedege èn abi a fasti bosroiti te a e poeroe na owroe sma?
10 Den wortoe „e pori en” e sori taki „na owroe libisma” e go na baka na moreel sei doronomo èn ibritron pikinsopikinso a e kon ogri moro nanga moro. Foe taki en leti, dan foe di den no wani teki leti na jeje fasi, meki a heri libisma famiri e fadon go na ini wan dipi ibri tron moro esi. Disi na a bakapisi foe „bidrigi lostoe”, Paulus ben taki. Lostoe na skin fasi, a bidrigi sani bika den kan sori leki den no kefarlek, ma den e pori sani srefisrefi (Hebrewsma 3:13). Efoe sma no hori densrefi, dan a kaba sa de, sjen nanga dede (Romesma 6:21; 8:13). Dati meki sma moesoe poeroe na owroe sma, moesoe hari en poeroe nanga wan fasti bosroiti, èn dorodoro neleki fa wan sma e poeroe wan owroe krosi di doti.
Wan njoen „jeje foe a froestan”
11. Pe a meki kon njoen baka na jeje fasi moesoe bigin?
11 Wan sma di e opo komoto foe wan olo nanga tokotoko no moesoe poeroe wawan den doti krosi foe en, ma a moesoe wasi en skin heri boen toe bifo a e weri wan heri tra sani di krin. Dati na leti san Paulus ben tjari kon na krin leki a di foe toe sani foe doe foe kisi leti na jeje fasi: „Oenoe moesoe kon tron njoen ini a krakti di e meki oen froestan wroko” (Efeisesma 4:23). So leki fa a ben tjari kon na krin moro na fesi, ini vers 17 nanga 18, dan den nâsi e waka ini „a denki foe den di no e tjari wini kon” èn den de „na doengroe na froestan sei”. Wi kan froestan taki, a denki, na inibere foe koni di wi abi foe si èn froestan sani, na drape na a presi pe a meki kon njoen baka moesoe bigin. Fa wi kan doe disi? Paulus ben froeklari taki disi kan, foe di wi e meki a krakti di e meki wi froestan wroko, kon njoen. San na a krakti dati?
12. San na a krakti di e meki a froestan wroko?
12 A krakti di e meki wi froestan wroko, di Paulus ben taki foe en, na santa jeje? Nôno. Den wortoe „a krakti di e meki oen froestan wroko” troetroe wani taki „a jeje foe a froestan foe joe”. No wan presi na bijbel den e taki foe Gado santa jeje leki wan sani di de foe wan libisma noso di de wan pisi foe wan libisma. A wortoe „jeje”, te joe loekoe en finifini, wani taki „blo”, ma ini bijbel den e gebroiki en toe „foe sori tapoe a krakti di e poti wan sma foe sori wan sortoe maniri, gwenti noso firi noso foe doe wan seiker sani noso foe tjari ensrefi na wan sortoe fasi” (Hulp tot begrip van de bijbel, pisi 3, bladzijde 413). So boen, „a jeje foe a froestan” na a krakti di e meki a froestan foe wi wroko noso e troesoe en, wi eigi firi èn eigifasi na froestan sei.
13. Foe san ede wi firi na jeje sei moesoe meki kon njoen?
13 A natuurlijk firi nanga eigifasi foe na onvolmaakti denki e firi moro gi sani na skin fasi èn sani di na ai kan si (Preikiman 7:20; 1 Korentesma 2:14; Kolosesma 1:21; 2:18). Srefi efoe wan sma e poeroe na owroe sma nanga den ogri sani di sma e doe, a sondoe firi foe a froestan foe en, efoe a no ben kenki dati, wan dei sa meki a drai go baka na san a ben libi na baka. A no disi na san foeroe sma ben ondrofeni di ben proeberi, foe eksempel, foe tapoe nanga smoko, dringi pasa marki noso tra ogri sani di sma e doe? Efoe den no ben doe moeiti foe meki kon njoen ini a krakti di e meki a froestan foe den wroko, pikinmoro a no ben kan de tra fasi leki den fadon go baka ini den fosi doe foe den. Ibri troetroe kenki moesoe abi na ini wan dorodoro kenki foe a fasi foe denki. — Romesma 12:2.
14. Fa a krakti di e meki wi froestan wroko kan meki kon njoen?
14 Fa dan, wan sma e meki a krakti dati kon njoen so taki a sa meki a prakseri foe en go tapoe a joisti pasi? A werkwortoe „meki kon njoen” ini a Griki tekst de ini a tegenwoordige tijd (ten foe noja) èn a e sori na tapoe sani di e doe doronomo. So boen, nanga wan doronomo studie foe Gado Wortoe foe waarheid èn nanga a prakseri di wan sma e prakseri dipi foe san a wani taki, a krakti di e meki sani wroko kan meki kon njoen. Sabidensi sma e froeteri wi taki ini na edetonton foe wi, bodoi e lon pasa ini a vorm foe spesroetoe boskopoe, nanga jepi foe stroom noso wan sortoe watra. Den spesroetoe boskopoe e abra komoto foe wan neuron (senwecel) go na a tra neuron nanga jepi foe foeroe pikinpikin presi di opo na den mindri, di sma e kari synaps. „Wan spesroetoe sani di wan sma e memre, e meki na ini a synaps foe a senwecel te a spesroetoe boskopoe e lon pasa, ala di a boskopoe e libi en eigi marki na baka”, a boekoe The Brain e taki. Te a srefi boskopoe dati e pasa wan tra leisi, den cel foe a senwe e sabi en baka èn den e wroko moro esi. Baka wan pisi ten, a senwecel disi e meki wan njoen fasi foe denki gi a sma. Efoe wi e horidoro foe teki gesontoe bodoi na jeje fasi, wan njoen fasi foe denki e bow na ini wi èn a krakti di e meki a froestan foe wi wroko e meki kon njoen. — Filipisma 4:8.
„Weri a njoen sma”
15. Na sortoe fasi a njoen sma njoen?
15 Te foe kaba, Paulus e taki: „[Oenoe] moesoe weri a njoen sma, di ben meki akroederi a wani foe Gado ini troe regtfardikifasi nanga loyaalfasi” (Efeisesma 4:24). Ija, wan kresten e weri wan njoen sma. „Njoen” dja no e sori go na ten, ma na eigifasi. Dati wani taki, a no njoen taki neleki a de a moro njoen modo. A de wan krinkrin njoen, heri tra sma „di meki akroederi a wani foe Gado”. Na Kolosesma 3:10, Paulus ben gebroiki den srefi sortoe wortoe dati èn a ben taki, dati a njoen sma e „meki kon njoen akroederi a prenki foe a Sma di meki en”. Fa a njoen sma disi e doe kon?
16. Foe san ede wi kan taki, dati a njoen sma „meki akroederi a wani foe Gado”?
16 Jehovah Gado ben meki a fosi libisma paar, Adam nanga Eva, na a prenki èn na a eigifasi foe En. Den ben kisi moreel nanga jeje eigifasi di ben meki den de tra fasi leki den meti mekisani èn ben poti den moro hei leki den (Genesis 1:26, 27). Ala di na opo di den opo densrefi kontrari Gado ben poti a heri libisma famiri na ini sondoe nanga onvolmaaktifasi, dan wi, leki bakapikin foe Adam, tokoe abi na okasi foe sori moreel nanga jeje eigifasi. A wani foe Gado de taki den sma di e sori bribi ini a froeloesoe ofrandi, moesoe poeroe na owroe sma èn njanboen foe „a glori fri foe den pikin foe Gado”. — Romesma 6:6; 8:19-21; Galasiasma 5:1, 24.
17. Foe san ede regtfardikifasi nanga loyaalfasi de toemoesi aparti eigifasi foe a njoen sma?
17 Troe regtfardikifasi nanga loyaalfasi na den toe eigifasi di Paulus e poti aparti leki eigifasi foe a njoen sma. Disi e poti moro krakti na tapoe taki a njoen sma e kon njoen akroederi a prenki foe a Sma di meki en. Psalm 145:17 e froeteri wi: „Jehovah regtfardiki ini ala en pasi èn loyaal ini ala den wroko foe en.” Èn Openbaring 16:5 e taki foe Jehovah: „Joe, a Sma di de èn di ben de, a loyaal Sma, de regtfardiki.” Foe troe, regtfardikifasi nanga loyaalfasi de prenspari eigifasi efoe wi wani libi leki fa Gado meki wi leki en prenki èn foe skèin a glori foe en kon baka. Meki wi de leki Sakaria, a papa foe Johanes a Dopoeman, di santa jeje ben boeweigi foe prèise Gado, foe di a ben gi En pipel „a grani foe doe santa diniwroko sondro frede nanga loyaalfasi èn regtfardikifasi”. — Lukas 1:74, 75.
„Tan waka leki pikin foe leti”
18. Fa Paulus ben jepi wi foe si den fasi foe grontapoe so leki fa den de troetroe?
18 Now di wi loekoe den wortoe foe Paulus na Efeisesma 4:17-24 finifini, wi abi foeroe sani foe go denki. Ini vers 17 te nanga vers 19, Paulus e jepi wi foe si den fasi foe grontapoe so leki fa den de troetroe. Foe di den sma di de ini grontapoe e trowe a sabi foe Gado èn e tranga na ati foe den kontrari en, den tapoe densrefi gi a troetroe fonten foe libi. Foe dati ede, sondro wan troe marki foe doro noso wan tiri, den moeiti foe den te foe kaba sa abi leki bakapisi lawfasi nanga soso sani. Den e soengoe go dipi moro nanga moro ini pori na moreel sei èn na jeje sei. Fa dati na wan sari situwâsi! Èn fa wi abi wan krakti reide foe abi wan fasti bosroiti foe tan waka leki pikin foe leti!
19. Sortoe lasti deki-ati wi e kisi foe Paulus foe tan waka leki pikin foe leti?
19 Baka dati, na ini vers 20 nanga 21, Paulus e poti krakti na tapoe a prenspari fasi foe leri waarheid fajafaja, so taki sma no si wi nomo leki sma foe waarheid ma taki wi e libi so leki fa Jesus ben doe. Te foe kaba na ini vers 22 te nanga vers 24, a e froemane wi foe hari na owroe sma poeroe èn weri a njoen wan — sondro degedege, nanga fasti bosroiti. Ini a pisi ten dati, wi moesoe tan tjari den firi foe wi na froestan sei go na tapoe wan gesontoe jeje pasi. Moro prenspari a de, taki wi moesoe loekoe go na Jehovah foe jepi wi foe tan waka leki pikin foe leti. „Bika na Gado di ben taki: ’Meki leti skèin komoto foe doengroe’ èn a ben skèin kon na tapoe den ati foe wi foe gi den a leti nanga a glori foe Gado nanga jepi foe Krestes.” — 2 Korentesma 4:6.
Joe e memre disi ete?
◻ Fa wi kan „leri foe Krestes” ini a ten disi?
◻ Foe san ede na owroe sma moesoe poeroe sondro degedege?
◻ San na a krakti di e meki a froestan wroko èn fa a e meki kon njoen?
◻ Sortoe eigifasi na den marki foe a njoen sma?
[Prenki na tapoe bladzijde 15]
Jesus ben taki: „Mi na a pasi nanga a waarheid nanga a libi”
[Prenki na tapoe bladzijde 16]
„Hari poeroe na owroe sma nanga den doe foe en” — bitafasi, atibron, takroedoe, doti taki, morsoe taki, èn lei. — Kolosesma 3:8, 9
[Prenki na tapoe bladzijde 17]
„Weri a njoen sma . . . di meki akroederi a wani foe Gado ini troetroe regtfardikifasi nanga loyaalfasi.” — Efeisesma 4:24