„Weri den fetisani foe leti”

„Na neti pasa moi kaba; na dei kon krosibei kaba. Meki wi poeroe den wroko foe doengroe poti a wan sei èn weri den fetisani foe leti.” — ROMESMA 13:12.

1, 2. Fa moro foeroe foe den djoe foe na fosi jarihondro ben doe nanga „a troe leti”, ala di den ben sa kan abi winimarki foe disi?

JESUS KRESTES na „a troe leti di e gi leti na ala sortoe foe libisma” (Johanes 1:9). Di a ben kon leki Mesias na ini 29 G. T., a ben kon na wan nâsi di Gado ben froekisi foe de En kotoigi èn di, awasi fa no fa, ini nen ben gi densrefi abra na Jehovah (Jesaja 43:10). Foeroe foe den Israèlsma ben wakti tapoe na Mesias, èn wan nomroe foe den ben sabi wan toe foe den profeititori di ben sa meki den kon sabi Jesus. Boiti dati, Jesus ben preiki na ini ala kontren foe Palestina, ben doe wondroe leti na fesi den ai foe den ipi-ipi sma. Ipi sma ben kon makandra foe arki en èn san den ben si èn ben jere, ben seki den. — Mateus 4:23-25; 7:28, 29; 9:32-36; Johanes 7:31.

² Ma te foe kaba, a moro bigi pisi foe den djoe ben trowe Jesus. Na evangelium foe Johanes e taki: „A ben kon na en eigi oso, ma en eigi sma no ben teki en” (Johanes 1:11). Foe san-ede disi ben de so? Na piki tapoe na aksi dati, sa jepi wi foe no meki a srefi fowtoe leki den. A sa jepi wi foe ’poeroe den wroko foe doengroe èn . . . weri den fetisani foe leti’, èn na so fasi e kibri wisrefi foe no kisi wan takroe kroetoe leki na wan di Israèl foe na fosi jarihondro ben moesoe ondrofeni. — Romesma 13:12; Lukas 19:43, 44.

Gens foe den kerki edeman

3. Na sortoe fasi den djoe kerki tiriman ben sori taki den ben de „breni tjariman”?

³ Na ini Israèl den kerki fesiman ben de den fosiwan di ben trowe na leti. Ala di den ben de leriman „di ben sabi na Wet boen”, tokoe den ben dwengi na pipel foe teki na sistema foe regels di den ben moesoe hori densrefi tranga na den, èn di foeroetron ben de kontrari a Wet foe Gado (Lukas 11:45, 46). Na so fasi, den ben ’meki na wortoe foe Gado lasi krakti nanga den gwenti di ben gi abra nanga mofo’ (Markus 7:13; Mateus 23:16, 23, 24). Den ben de „breni tiriman”, di ben hendri na leti foe skèin pasa. — Mateus 15:14.

4, 5. (a) Fa den Fariseiman ben doe, di wan lo foe den djoe ben bigin foe aksi densrefi efoe Jesus ben de na Mesias? (b) Sortoe takroe ati-kondisi den Fariseiman ben sori taki den abi?

⁴ Na wan okasi, di foeroe Israèlsma ben aksi densrefi efoe Jesus ben de kande na Mesias, dan den Fariseiman di ben kisi foe jere pe a de, ben seni skowtoe go foe kisi en. Den skowtoe ben drai kon baka nanga leigi anoe, ala di den ben taki: „Noiti wan [tra] sma ben taki na a fasi disi.” Sondro foe disi ben seki den, den Fariseiman ben aksi den skowtoe: „Den ben kori oenoe toe? No wan foe den tiriman noso den Fariseiman ben poti bribi na ini en, a no so? Ma na ipi disi, di no sabi na Wet, froefroektoe den de.” Nikodeimus, wan memre foe na Sanhedrin, ben opo taki, dati a no ben de akroederi na Wet foe kroetoe wan sma sondro foe jere en. Nanga ogri-ati wortoe, den Fariseiman ben kon na tapoe en èn den ben taki: „Joe komoto foe Galilea toe? Ondrosoekoe èn si taki no wán enkri profeiti ben komoto foe Galilea.” — Johanes 7:46-52.

⁵ Foe san-ede kerki tiriman na ini wan nâsi di ben gi ensrefi abra na Gado ben doe so? Foe di den ben kweki wan takroe ati-kondisi (Mateus 12:34). A fasi fa den ben wisiwasi gewoon sma, ben sori na bigimemre foe den. Foe di den ben taki, dati ’no wán foe den tiriman noso den Fariseiman ben poti bribi na ini en’, dan den ben wani taki, dati na ini a bigifasi foe den, den ben teki taki na Mesias ben kan de troetroe, efoe dén ben feni en boen. Boiti dati, den no ben de eerlijk, èn ben proeberi foe meki sma denki takroe foe Jesus, foe di a ben komoto foe Galilea, ala di wan eenvoudig ondrosoekoe foe sani ben sa tjari kon a krin, taki a ben gebore troetroe na ini Betlehem, na presi di den ben taki foe en a fesi taki na Mesias ben o gebore drape. — Mika 5:2; Mateus 2:1.

6, 7. (a) Fa den kerki tiriman ben doe di Lasarus ben kisi wan opo baka? (b) San Jesus ben taki foe tjari a lobi di den kerki tiriman ben lobi a doengroe kon a doro?

⁶ Na sondro sari-ati gens foe den kerki tiriman disi di ben de kontrari na leti, ben kon de foe si krinkrin di Jesus ben opo Lasarus baka. Gi wan sma di e frede Gado, dan so wan doe ben sa de wan boeweisi taki Jehovah ben horibaka gi Jesus. Ma den kerki tiriman ben man foe si soso wan sani di ben sa kan de wan kefar gi a prenspari posisi foe den. Den ben taki: „San wi e doe, bika a man disi e doe foeroe wondroe? Efoe wi e meki a go doro na so wan fasi, dan ala sma sa poti bribi na ini en, èn den Romesma sa kon èn sa teki na presi foe wi èn na nâsi foe wi poeroe” (Johanes 11:44, 47, 48). Dati meki den ben meki mofo makandra foe kiri Jesus nanga Lasarus, kande foe di den ben howpoe na a fasi disi foe kiri na leti. — Johanes 11:53, 54; 12:9, 10.

⁷ Foe dati-ede, meki bigifasi, heimemre, koni onopregtifasi nanga wan soekoe pasa marki foe den eigi belang nomo ben drifi den kerki tiriman disi foe a nâsi foe Gado komoto foe na leti. Na a kaba foe en diniwroko, Jesus ben tjari a fowtoe foe den kon a doro, di a ben taki: „Heloe foe oenoe, oen leriman foe wet èn Fariseiman, oen hoigri man! bika oenoe e tapoe na kownoekondre foe hemel gi den sma; bika oensrefi no e go na ini, èn den sma di de a pasi foe go na ini, oenoe no e gi pasi foe dati.” — Mateus 23:13.

Soekoe eigi boen nomo èn heimemre

8. Sortoe sani di ben pasa na ini Nasarèt ben tjari na takroe ati-kondisi foe son sma drape kon a krin?

⁸ Ini algemeen, a djoe pipel foe na fosi jarihondro ben doe neleki san den kerki tiriman foe den ben doe ini a trowe di den ben trowe na leti, foe di den ben abi wan takroe ati-kondisi. Foe eksempel, na wán okasi den ben kari Jesus foe taki na ini a djoekerki na ini Nasarèt. A ben leisi èn ben tjari wan pisi foe a boekoe Jesaja kon a krin, èn biginbigin a gemeente ben arki en. Ma di a ben teki sani foe na historia gersi nanga makandra, so taki disi ben tjari a soekoe di den ben soekoe den eigi boen nomo nanga a mankeri di den ben mankeri bribi kon a doro, den ati ben bron srefisrefi èn den ben proeberi foe kiri en (Lukas 4:16-30). Heimemre, nanga ete tra takroe eigifasi ben hendri den foe handri na wan joisti fasi nanga na leti.

9. Fa den fowtoe boeweigi foe ati foe wan bigi groepoe foe Galileasma ben tjari kon a doro?

⁹ Na wan tra okasi, Jesus ben gi na wan wondroe fasi njanjan na wan bigi ipi foe sma na a Se foe Galilea. Sma di ben de kotoigi foe na wondroe disi ben taki: „Disi de foe troe na profeiti di ben o kon na grontapoe” (Johanes 6:10-14). Di Jesus ben go na wan tra presi nanga boto, na ipi ben waka na en baka. Ma Jesus ben sabi taki a boeweigi foe ati foe foeroe foe den sma no ben de foe di den ben abi lobi gi na leti. A ben taigi den: „Oenoe e soekoe mi, no foe di oenoe si den wondroe, ma foe di oenoe ben njan foe den brede èn oenoe bere ben kon foeroe” (Johanes 6:26). Heri esi a ben kon a krin taki Jesus ben abi leti di wan lo foe den sma, di ben waka na en baka, ben drai go na grontapoe baka (Johanes 6:66). Wan jeje fasi foe soekoe den eigi boen nomo nanga a prakseri foe: ’sortoe winimarki mi sa abi foe dati?’, ben tapoe na leti.

10. Fa a moro bigi pisi foe den hèiden ben doe tapoe na leti?

¹⁰ Baka di Jesus ben dede èn ben opo baka, dan djoe di ben bribi ben go doro foe tjari na leti go na trawan foe na djoe bribi, ma wan toe sma nomo ben doe wan sani. Foe dati-ede, na apostel Paulus nanga trawan di ben dini leki „wan leti foe den nâsi”, ben panja na boen njoensoe go na tra kondre (Tori foe den Apostel 13:44-47). Foeroe sma di no ben de djoe ben teki na bribi, ma a fasi fa sma ben handri ini algemeen ben de neleki fa Paulus ben skrifi: „Wi ben preiki wan Krestes di den ben anga na wan postoe . . . [wan boskopoe di de] wan law sani gi den nâsi” (1 Korentesma 1:22, 23). Moro foeroe foe den sma di no ben de djoe, ben trowe na leti foe di kroektoebribi foe heiden sma noso grontapoe filosofie ben breni den. — Tori foe den Apostel 14:8-13; 17:32; 19:23-28.

’Den ben kari oenoe komoto foe na doengroe’

11, 12. Soema ben doe wan sani a tapoe na leti na ini a fosi jarihondro èn soema e doe disi na ini a ten disi?

¹¹ Na ini a fosi jarihondro, Gado ben kari foeroe reti-ati sma ’komoto foe na doengroe kon ini na wondroe leti foe Gado’ ala di sma ini algemeen no ben teki na boskopoe (1 Petrus 2:9). Na apostel Johanes e skrifi foe den wan disi: „Ma alamala di ben teki en [Krestes], a ben gi den na makti foe tron pikin foe Gado, bika den ben sori bribi ini en nen” (Johanes 1:12). Bigin foe na Pinksterfesa foe 33 G.T., den sma disi di ben lobi na leti ben kisi dopoe nanga jepi foe santa jeje èn ben tron manpikin foe Gado nanga na howpoe foe tiri nanga Jesus na ini en hemel Kownoekondre.

¹² Na ini wi ten, den lastiwan foe den salfoe manpikin disi foe Gado, tjari kon makandra, èn foe di den e meki a profeititori foe Danièl kon troe, meki ’den e skèin leki na brenki krin foe loktoe . . . , èn e tjari foeroe sma kon na ini regtfardikifasi (Danièl 12:3). Den meki a leti foe den skèin na so wan fasi taki moro leki fo miljoen „tra skapoe” hari kon na a waarheid èn e njanboen foe wan regtfardiki posisi na fesi foe Gado (Johanes 10:16). Den disi now e skèin na leti gowe baka na a heri grontapoe, so taki now a leti dati e skèin leki noiti a fesi. Na ini wi ten, neleki fa a ben de na ini a fosi jarihondro, ’na doengroe no wini [na leti].’ — Johanes 1:5.

’Doengroe no de na Gado’

13. Sortoe warskow na apostel Johanes ben gi wi?

¹³ Ma noiti wi moesoe frigiti na warskow foe na apostel Johanes: „Gado na leti . . . èn ini wánfasi nanga en doengroe no de kwetikweti. Efoe wi e taki: ’Wi abi prati nanga en’, èn tokoe wi e go doro foe waka na ini doengroe, dan wi e lei èn wi no e doe san na waarheid e taki” (1 Johanes 1:5, 6). A de krin, taki kresten kan fadon go ini a srefi trapoe leki den djoe èn, ala di ini nen den de kotoigi gi Gado, tokoe e doe den wroko foe doengroe.

14, 15. Sortoe wroko foe a doengroe ben kon a krin na ini a fosi jarihondro kresten gemeente èn san wi e leri foe disi?

¹⁴ Disi ben pasa troetroe na ini a fosi jarihondro. Wi e leisi foe serjoesoe pratifasi na ini Korente (1 Korente 1:10-17). Na apostel Johanes ben moesoe warskow salfoe kresten taki a no ben moesoe de so, taki den no wani si makandra na ai, èn Jakobus ben moesoe gi son wan na rai foe no poti den goedoeman a fesi den pôtiman (Jakobus 2:2-4; 1 Johanes 2:9, 10; 3 Johanes 11, 12). Boiti dati, di Jesus ben ondrosoekoe den seibi gemeente foe Pikin Asia, so leki fa skrifi ini a boekoe Openbaring, a ben taki foe wroko foe doengroe di ben boro kon na ini, èn di ben abi na ini toe, a fadon komoto na bribi, na anbegi foe kroektoe gado, hoeroedoe, èn na lobi foe goedoe (Openbaring 2:4, 14, 15, 20-23; 3:1, 15-17). Na ini den fosi dei dati foe na kresten gemeente, wan toe foe den ben gowe libi na leti na a fasi disi, wan toe foe den ben sluit uit èn trawan ben drifi go ini „a doengroe na dorosei.” — Mateus 25:30; Filipisma 3:18; Hebrewsma 2:1; 2 Johanes 8-11.

¹⁵ Ala den tori disi foe na fosi jarihondro e sori difrenti fasi fa na doengroe foe Satan grontapoe kan boro kon na ini a denki foe aparti kresten ofoe srefi ini a heri gemeente. Wi moesoe loekoe boen taki so wan sortoe sani noiti no pasa nanga wi. Fa wi kan doe dati?

Na njoen sma di wi moesoe de

16. Sortoe boen rai Paulus ben gi den Efeisesma?

¹⁶ Paulus ben gi den Efeisesma tranga foe no de moro langa ’ini doengroe na ini den froestan, èn no de freimde sma gi na libi di de foe Gado.’ Foe den no grati go baka na ini a doengroe dati, den ben moesoe kweki fasi foe na ati di de foe na leti. Paulus ben taki: „Oenoe moesoe poeroe na owroe sma di oenoe de, di e kroederi nanga oenoe fositen waka nanga libi foe oenoe èn di ben kon pori akroederi en bidrigi lostoe, ma oenoe moesoe meki kon njoen ini a krakti di e poesoe oen prakseri, èn oenoe moesoe weri na njoen sma di oen moesoe de akroederi na wani foe Gado ini troe regtfardikifasi èn loyaalfasi.” — Efeisesma 4:18, 22-24.

17. Fa wi ini a ten disi kan kibri wisrefi foe grati go baka na ini a doengroe?

¹⁷ Dja Paulus e gi na rai, foe taki en so, foe doe wan oparâsi pe wi e koti na siki pisi poeroe krinkrin — foe koti poeroe san ben de fosi wan pisi foe wi, na owroe sma di wi ben de, èn foe kan meki wan heri njoen jeje gro foe ’poesoe a prakseri foe wi.’ Èn a no ben e taki nanga sma di a no langa den ben kisi belangstelling, ma nanga dopoe kresten. Na kenki foe na sma di wi de, no e stòp te wi teki dopoe. A de wan sani di e go doronomo. Efoe wi e stòp foe kweki a njoen sma di wi moesoe de, dan na owroewan sa opo kon baka, nanga en heimemre, bigifasi nanga soekoe foe wan sma eigi wini nomo (Genesis 8:21; Romesma 7:21-25). Disi kan meki wi drai go baka na den wroko foe a doengroe.

„Nanga leti di e komoto foe joe wi kan si leti”

18, 19. Fa Jesus nanga Paulus ben skrifi foe na fasi fa foe kon sabi den „pikin foe na leti”?

¹⁸ Hori na prakseri taki a kisi di wi man foe kisi têgo libi e anga foe na kisi di wi moesoe kisi wan boen kroetoe foe Gado, wan kroetoe di abi leki gron omeni wi lobi na leti. Baka di Jesus ben sori go na a lasti sani disi, a ben taki: „A sma di e doe tegoe sani, no wani si na leti na ai èn no e kon na a leti, so taki den no piri-ai gi den wroko foe en. Ma a sma di e doe san de troe e kon na a leti, so taki den wroko foe en kan kon a doro leki wroko di ben doe ini akroederi nanga Gado.” — Johanes 3:19-21.

¹⁹ Paulus ben horibaka gi na prakseri disi di a ben skrifi gi den Efeisesma: „Tan waka leki pikin foe na leti, bika na froktoe foe na leti abi ibri sortoe foe boen-ati èn regtfardikifasi èn waarheid” (Efeisesma 5:8, 9). Den wroko foe wi e sori so boen, efoe wi de pikin foe leti noso pikin foe doengroe. Ma boen wroko kan komoto soso foe wan boen ati. Foe dati-ede meki wi abi foe loekoe na ati foe wi boen, sabi na fanowdoe foe tan kenki na sma di wi moesoe de èn foe loekoe sani boen ini a tori foe a jeje di e poesoe wi prakseri. — Odo 4:23.

20, 21. (a) Na fesi sortoe spesroetoe tjalensi den pikin di e gebore na ini kresten osofamiri e kon tanapoe? (b) Na fesi sortoe tjalensi ala den pikin foe kresten papa nanga mama e tanapoe?

²⁰ Na ini son kefal, disi sori taki a de wan spesroetoe tjalensi gi pikin foe Kotoigi di gi densrefi abra na Jehovah. Foe san-ede? We, na a wan sei, den sortoe pikin disi e njanboen foe wan toemoesi moi blesi. Foe sabi na waarheid foe sensi den pikin-nengre jari wani taki, te joe loekoe en boen, taki wan sma noiti no abi foe ondrofeni ensrefi san a wani taki foe de ini a doengroe foe Satan grontapoe (2 Timoteus 3:14, 15). Na a tra sei, wan toe pikin na ini a situwâsi disi ben teki na waarheid leki a ben kon foe ensrefi èn noiti no ben leri troetroe foe lobi na leti. Disi ben de a situwâsi nanga moro foeroe foe den djoe foe na fosi jarihondro. Den ben gro ini wan nâsi di ben gi densrefi abra na Jehovah, èn te na wan seiker marki den ben abi wan sabi foe na waarheid. Ma a no ben de na ini den ati. — Mateus 15:8, 9.

²¹ Kresten papa nanga mama abi na frantiwortoe na fesi foe Gado foe kweki den pikin foe den ini a leti (Deuteronomium 6:4-9; Efeisesma 6:4). Ma te foe kaba, a pikin srefi sa moesoe foe kon lobi na leti moro leki na doengroe. A sa abi foe meki na leti foe na waarheid leki wan sani foe ensrefi. Te a e gro kon, wan toe sani foe na grontapoe foe Satan kan sori moi kande. Na fasi foe libi foe en speri, di de sondro sorgoe ofoe di de sondro frantiwortoe, kan sori wan prisiri sani. Na leri di a e kisi na skoro taki joe moesoe tweifri efoe sani de troetroe so, kan kori en kande. Ma a no moesoe frigiti noiti, taki dorosei foe na leti, ’doengroe srefi e tapoe na grontapoe’ (Jesaja 60:2). Te foe kaba, na doengroe grontapoe disi no abi no wan boen sani foe pristeri. — 1 Johanes 2:15-17.

22. Fa Jehovah e blesi den sma now di e kon na a leti, èn fa a sa blesi den ini a ten di de a wi fesi?

²² Kownoe David ben skrifi: „Bika na joe [Jehovah] na fonten foe libi de; nanga leti di e komoto foe joe wi kan si leti. Tan gi joe lobi boen-ati fasi na den sma di sabi joe” (Psalm 36:9, 10). Den sma di lobi na leti e kon sabi Jehovah, èn disi kan wani taki libi gi den (Johanes 17:3). Na ini en lobi boen-atifasi, Jehovah e jepi den now, èn te na bigi banawtoe sa kon, dan a sa tjari den go na ini a njoen grontapoe. Disi wi kan ondrofeni efoe wi e tan farawe foe a doengroe foe Satan grontapoe. Na ini a njoen grontapoe a libisma famiri sa tjari kon baka na wan volmaakti libi na ini wan paradijs (Openbaring 21:3-5). Den sma di sa kisi wan boen kroetoe sa abi dan na prakseri, foe kan boboi densrefi foe ala ten ini a leti foe Jehovah. Fa disi na wan glori froewakti! Èn fa a de wan krakti deki-ati now foe ’poeroe den wroko di de foe na doengroe poti a wan sei èn . . . foe weri den fetisani foe leti’! — Romesma 13:12.

Joe e memre disi ete?

◻ Foe san-ede moro foeroe foe den djoe na ini a ten foe Jesus ben trowe na leti?

◻ Te na sortoe marki na leti ben skèin ini a ten disi?

◻ Sortoe warskow di abi foe doe nanga a prakseri di wan sma e prakseri ensrefi nomo èn heimemre, den fosi jarihondro eksempel e gi wi?

◻ San de prenspari efoe wi wani tan na ini a leti?

◻ Sortoe blesi e wakti sma di lobi na leti?

[Prenki na tapoe bladzijde 14]

Na moro bigi pisi foe den djoe na ini Jesus ten no ben doe wan sani a tapoe na leti

[Prenki na tapoe bladzijde 17]

Foeroe tintin jari, den ben gebroiki difrenti fasi foe meki na leti skèin ini a meki foe disipel

[Prenki na tapoe bladzijde 18]

’Joe moesoe poeroe na owroe sma di joe de poti a wan sei . . . èn joe moesoe weri na njoen sma di joe moesoe de’